Mga Pamangkot Gikan sa mga Bumalasa

◼ Ngaa ginapaguwa (ekskomunikar) sang mga Saksi ni Jehova bangod sang apostasya ang pila ka tawo nga nagatuo pa sa Dios, sa Biblia, kag kay Jesucristo?

Ang mga nagapautwas sina nga pagpamatok nagasiling nga madamo sang relihioso nga mga organisasyon nga nagapangangkon subong Cristiano ang nagatugot sa nagasumpakil nga mga pagtamod. Bisan gani ang pila ka mga klerigo nagasupak sa sadsaran nga mga panudlo sang ila iglesia, apang nagapabilin sila sa maayo nga tindog. Sa halos tanan nga denominasyon sang Cristiandad, may yara mga modernista kag mga fundamentalista nga nagasumpakil sing daku sa isa kag isa tuhoy sa pagkainspirar sa Kasulatan.

Apang, ina nga mga halimbawa indi sadsaran nga himuon man namon ina. Ngaa indi? Madamo sina nga mga denominasyon ang nagatugot sang magkatuhay nga mga pagtamod sa tunga sang mga klero kag lego bangod indi sila sigurado kon ano gid ang kamatuoran sang Biblia. Kaangay sila sang mga escriba kag mga Fariseo sang adlaw ni Jesus nga indi makahambal subong mga tawo nga may awtoridad, nga amo si Jesus kon magpanudlo. (Mateo 7:29) Dugang pa, tubtob sa kasangkaron nga nagapati ang mga relihionista sa pagsamo sang mga pagtuluohan, indi sila obligado nga sapakon ang nagakatuhay nga mga pagtuluohan.

Apang ina nga pagtamod wala sing sadsaran sa Kasulatan. Wala si Jesus mag-ugyon sa mga sekta sang Judaismo. Ang mga Judiyo sadto nga mga sekta nagapati sa Dios sang pagpanuga kag sa Hebreong Kasulatan, labi na sa Kasugoan ni Moises. Apang, nagsiling gihapon si Jesus sa iya mga disipulo nga “andam kamo sa tapay sang mga Fariseo kag mga Saduceo.” (Mateo 16:11, 12; 23:15) Talupangda man kon daw ano kabaskog nga ginhambal ni apostol Pablo ang tuhoy sini: “Apang bisan kami, ukon ang manugtonda gikan sa langit, magwali sa inyo sing maayong balita nga tuhay sang sa amon ginwali sa inyo, magmanginpinakamalaut sia.” Ginsulit pa ni Pablo ina nga pulong agod ipadaku ina.—Galacia 1:8, 9.

Ang pagtudlo sing nagasumpakil ukon tuhay nga mga pagtamod indi nahisanto sa matuod nga Cristianismo, subong maathag nga ginpakita ni Pablo sa 1 Corinto 1:10: “Ginapakiluoy ko sa inyo, mga kauturan, sa ngalan sang aton Ginuong Jesucristo, nga maghilisugot kamo tanan sa inyo nga walay pagbinahinbahin sa inyo, agod mahiusa kamo sing himpit sa hunahuna kag painoino.” (New International Version) Sa Efeso 4:3-6 nagsiling sia sing dugang pa nga ang mga Cristiano dapat “magtinguha sing hanuot nga tipigan ang pagkaisa sa espiritu sa nagapahiusa nga higot sang paghidait. May isa ka lawas, kag isa ka espiritu, subong man nga gintawag kamo sa isa ka paglaum sang inyo pagkatinawag, isa ka Ginuo, isa ka pagtuo, isa ka bawtismo, isa ka Dios kag Amay sang tanan nga tawo.”

Matigayon bala kag mahuptan ining paghiusa kon ang kada isa magpaiyaiya sa pag-usisa sang Kasulatan, nga nagahimo sang iya kaugalingon nga mga konklusyon, kag dayon ipanudlo ini? Indi gid! Paagi kay Jesucristo, si Jehova nga Dios nag-aman para sa sining katuyoan “ang iban subong mga apostoles, . . . ang iban subong mga ebanghelisador, ang iban subong mga manugbantay kag mga manunudlo . . . tubtob nga makadangat kita tanan sa paghiusa sang pagtuo kag sa sibu nga pagkilala sa Anak sang Dios, tubtob sa isa ka hamtong nga tawo.” Huo, upod sa bulig sina nga mga ministro, ang paghiusa sang kongregasyon—paghiusa sang pagpanudlo kag hilikuton—mangin posible.—Efeso 4:11-13.

Sing maathag, ang sadsaran sang aprobado nga pagpakig-upod sa mga Saksi ni Jehova indi lamang ang pagtuo sa Dios, sa Biblia, kay Jesucristo, kag iban pa. Ang papa sang Romana Katolika, subong man ang Anglikano nga Arsobispo sang Canterbury, nagapangangkon nga nagatuo man sa sina, apang ang mga katapo sang ila iglesia indi natungod sa isa kag isa. Subong man, ang pagpangangkon lamang nga nagatuo sa sina nga mga panudlo indi magahimo sa isa nga isa sang mga Saksi ni Jehova.

Agod mangin aprobado nga kaupod sang mga Saksi ni Jehova kinahanglan nga batunon ang kabug-osan sang matuod nga mga panudlo sang Biblia, lakip ang Makasulatanhon nga mga panudlo nga tumalagsahon sa mga Saksi ni Jehova. Ano ang nalakip sa sinang mga pagtuluohan?

Nga ang daku nga hulusayon sa atubangan sang katawhan amo ang pagkamatarong sang pagkasoberano ni Jehova, amo kon ngaa gintugutan niya ang kalautan sing tuman kadugay. (Ezequiel 25:17) Nga si Jesucristo nagaluntad na sa langit sa wala pa sia mangin tawo kag sakop sang iya langitnon nga Amay. (Juan 14:28) Nga may yara karon sa duta “matutom kag mainandamon nga ulipon” nga ‘ginsaligan sang tanan nga intereses ni Jesus sa duta,’ kag ina nga ulipon naangot sa Nagadumala nga Hubon sang mga Saksi ni Jehova. (Mateo 24:45-47) Nga ang 1914 nagtanda sang katapusan sang Panahon sang mga Gentil kag sang pagkatukod sang Ginharian sang Dios sa langit, subong man sang tion sang gintagna nga presensia ni Cristo. (Lucas 21:7-24; Bugna 11:15–12:10) Nga 144,000 ka Cristiano lamang ang makabaton sing langitnon nga padya. (Bugna 14:1, 3) Nga ang Armagedon, nga amo ang inaway sang dakung adlaw sang Dios nga Labing Gamhanan, malapit na. (Bugna 16:14, 16; 19:11-21) Nga sundan ini sang Isa ka Libo ka Tuig nga Paggahom ni Cristo, nga magapasag-uli sang bug-os duta nga paraiso. Nga ang una nga magaagom sini amo karon ang “dakung kadam-an” sang “iban nga mga karnero” ni Jesus.—Juan 10:16; Bugna 7:9-17; 21:3, 4.

May yara bala kita Makasulatanhon nga sadsaran sa sining estrikto nga tindog? May yara gid sa pagkamatuod! Si Pablo nagsulat sa pila sang iya adlaw: “Ang ila pulong magaab-ab subong sang kalamayo. Sa ila amo si Himeneo kag si Fileto. Ini nga mga tawo naglipas sa kamatuoran sa pagsiling nga ang pagkabanhaw nagligad na, kag ginatublag nila ang pagtuo sang iban.” (2 Timoteo 2:17, 18; tan-awa man ang Mateo 18:6.) Wala sing nagapakita nga ining mga tawo wala magtuo sa Dios, sa Biblia, sa halad ni Jesus. Apang, sa sining sadsaran nga punto, bangod sang ila ginapanudlo tuhoy sa tion sang pagkabanhaw, gintawag sila ni Pablo nga mga apostata, nga dapat likawan sang matutom nga mga Cristiano.

Gintawag man ni apostol Juan nga mga anticristo ang mga tawo nga wala magtuo nga si Jesus nagkari sa unod. Mahimo nga sila nagtuo sa Dios, sa Hebreong Kasulatan, kay Jesus subong Anak sang Dios, kag iban pa. Apang sa sini nga punto, nga si Jesus nagkari gid sa unod, wala sila nagaugyon kag sa amo gintawag sila nga “mga anticristo.” Nagpadayon pa si Juan sa pagsiling tuhoy sa ila nga nagahupot sing tuhay nga mga pagtamod: “Kon may tawo nga nagaabot sa inyo kag wala nagadala sining pagtulun-an, dili pagbatona sia sa inyo balay kag dili pag-abiabiha sia. Kay ang nagaabiabi sa iya nagaambit sa iya mga buhat nga malaut.”—2 Juan 7, 10, 11.

Sa pagsunod sinang Makasulatanhon nga sulundan, kon ang isa ka Cristiano (nga nagapangangkon nga nagatuo sa Dios, sa Biblia, kag kay Jesus) dimahinulsulon nga nagatudlo sing dimatuod nga mga panudlo, kinahanglanon nga paguwaon sia gikan sa kongregasyon. (Tan-awa ang Tito 3:10, 11.) Sa pagkamatuod, kon ang isa ka tawo nagaduhaduha lamang ukon wala mapahibalo tuhoy sa isa ka punto, ang sangkol nga mga ministro mahigugmaon nga magabulig sa iya. Nahisanto ini sa laygay: “Padayon nga kaluy-i ang iban nga nagaduhaduha, luwasa sila paagi sa pag-agaw sa ila gikan sa kalayo.” (Judas 22, 23) Busa, ang matuod nga Cristianong kongregasyon indi masumbong nga mapintas kag dogmatiko, kundi nagapabili ini sini kag nagapanghikot padulong sa paghiusa nga ginapalig-on sa Pulong sang Dios.