Ano nga Karera ang Pilion Mo?

ISA ka bala ka pamatan-on kag nagaeskwela pa? Kon amo may yara ikaw sang mga kinaiya sang pagkapamatan-on—maayong panglawas kag enerhiya kag kusog. Ang kabuhi sa imo atubangan daw kaangay sang wala maagihi nga dalan. Paano mo gamiton ina nga kabuhi sa tinuig nga palaabuton?

Samtang ginahunahuna mo ang nahanungod sa imo palaabuton, walay duhaduha nga may mga pamangkot nga nagasulod sa imo painoino. Magaeskwela bala ako sa unibersidad, kag magakuha sing karera subong sang doktor, abogado, ukon sientipiko? Nagahandum bala ako sa pagsaka sa hagdanan padulong sa kadalag-an sa pinansial kag kabantogan? Mangin bantog bala ako sa taliambong kaangay sang pag-arte ukon pagpinta? Ukon, subong isa ka pamatan-on nga debotado kay Jehova nga Dios, pilion ko bala ang bug-os tion nga ministeryo subong ang akon bug-os kabuhi nga karera, sa amo ‘nagadumdom sang akon Manunuga sa adlaw sang akon pagkapamatan-on’?—Manugwali 12:1.

Ginalaragway sing masami sang mga pamantalaan kag mga artikulo sa magasin ang kabuhi sang bantog nga mga tawo subong makalilipay kag maduagon, apang ano ang nahibaloan mo nahanungod sa bug-os tion nga ministro? Masubo bala ini ukon makatalaka? Ukon makawiwili gid bala ini kag makalilipay? Ang pagbinagbinag sa pila sang matuodtuod nga eksperiensia sang pila nga yara sa bug-os tion nga ministeryo sing tinuig na magabulig sa imo sa pagpamat-od.

Kon Ngaa Ginpili Nila ang Bug-os Tion nga Ministeryo

Samtang nagadabdab ang inaway sa Vietnam, si Harry nag-eskwela sa Unibersidad sang Hawaii, kag nagtuon nga mangin isa ka manunudlo sa maragtas. Nagtuon man sia sang Biblia upod sa mga Saksi ni Jehova. Kaangay sang madamo niya nga kabutho, nadalahig sia sa bantog nga radikalismo sang mga estudyante sadto nga tion, nagtilawtilaw sang droga, kag nasapwan niya labi na ang LSD nga makawiwili. Isa ka aga, sang magbugtaw sia sa iya apartment, nakita niya ang nagalinapta nga buka nga botelya sang alak, mga upos sang sigarilyo, kag mga lalaki kag mga babaye nga nagahuray-ad sa salog. Halos indi madumduman ni Harry ang pagpakigbais sa polis nahanungod sa search warrant kag pamahog nga pahalinon sang iya kasera. Sa sini nga punto nga namat-od sia kon bala untaton ang pagtuon sang Biblia ukon tinloan ang iya kabuhi. Sing maalamon, ginpili niya ang naulihi.

Samtang nagadugang ang ihibalo ni Harry sa Biblia, nadula ang ganyat nga padayunon ang edukasyon sa unibersidad kag karera sa pagtudlo. Nag-untat sia sa kolehiyo, nag-obra sing part-time, ginbawtismohan, kag sang ulihi nangin isa ka payunir—isa ka bug-os tion nga manugbantala. Sa amo isa ka bag-o nga karera ang ginkuha ni Harry, isa nga puno sang hangkat kag maayo, makawiwili nga eksperiensia.

Gikan sa grupo sang espesyal nga mga payunir, si Harry kag ang iya asawa ginpadala subong misyonero sa matahom nga “isla sang mga bato” sang Belau sa Nakatundan nga Pasipiko, diin didto gihapon sila nagaalagad. Daw subong sang ano ang kabuhi sang misyonero sa sining mga pulo?

Pagpanaksi Paagi sa Sakayan

Ang kalabanan nga pagpanaksi sa mga pulo sang Micronesia ginahimo paagi sa sakayan ukon paglakat. Nadumduman ni Harry kag sang iya asawa, nga si Rene, ang ila nahauna nga tion sa pagpanaksi paagi sa sakayan sa nagguwa nga pulo. “Nagdayon kami sa isa ka balay nga nahamtang sing minilya didto sa malaba kag nagaikis-ikis nga suba nga nagaagi sa katamnan sang mangrove kag sa tuman kadabong nga kagulangan nga daw isa sila ka berde nga habol sa amon mga ulo,” siling niya. “Gikan sa amon balay, naglakbay kami sa suba, nagdulog sa pagbantala sa mga tawo nga nagapuyo sa pangpang sang suba. Isa ka gab-i, antes magdulom, nagpauli kami gikan sa pag-alagad sa latagon kag nagdalidali nga makatabok sa suba pauli sa amon balay sadto nga gab-i. Sing hinali nagsinggit si Rene. Pagbalikid ko nakita ko gid ang pagtampisaw kag pagsalom sang isa ka malaba sing ikog nga buaya. Isa ini ka buaya sa maasin nga tubig—ang pinakadaku nga espesyi sa kalibutan. Sing mapasalamaton, nakapauli kami nga wala maano. Bisan pa nga panahon na nga magpaligo sa suba, sa tapos makita yadtong daku nga buaya, nahunahuna namon nga walay peligro kon higtan namon sing kalat ang isa ka balde kag manag-ub sing inugpaligo pakadto sa amon sakayan.”

Sanglit madamong minuro kag kabalayan ang indi makadtoan paagi sa salakyan ukon sakayan, ang mga misyonero nagahinguyang sing inoras sa paglakat sa matahom kag ginarayahan sang lubi nga kagulangan agod malab-ot ang mainabyanon, kubos nga mga tawo. Si Harry nagsiling: “Masapwan namon pirme ang mga dulunggan nga nagapamati sa kamatuoran. Ining napain nga katawhan masami nagapakita sang ila pagkamaabiabihon. Nagasaka sila sa lubi, nagakuha sing butong, ginabuka ini, kag ginatanyagan ka nga mag-inum dira mismo sa butong. Makapasulhay ini, manamit, kag masustansia.”

Paano ginpadayaan ang mga panikasog sa pagbantala sang mga misyonero sa Belau? May yara sila karon isa ka kongregasyon nga may 42 ka matuod nga mga Cristiano. Sing promedyo, 10 ang yara sa bug-os tion nga ministeryo kada bulan sang nagligad nga tuig, kag 193 ang nagtambong sa Memoryal sang kamatayon ni Cristo sang 1985.

Pagkatapos sang 17 ka tuig nga pag-alagad sing bug-os tion, ano ang balatyagon karon ni Harry nahanungod sa iya desisyon nga gamiton ang iya kabuhi sing bug-os sa pag-alagad kay Jehova? “Kon wala ko makita ang kamatuoran sang Dios sang nagligad nga 17 ka tuig, ang akon tion kag kabuhi nauyang kuntani sa kalibutanon nga mga handum,” siling niya. “Wala ko kuntani makita ang kalinong sang panghunahuna kag kalig-onan nga naton-an sang mga tinuig nga isa ako ka payunir kag misyonero, subong diminyo sing madamong tinuig, kag sang ulihi kaupod ni Rene nga sa karon kaupod ko sa nagligad nga walo ka tuig sang misyonero nga pag-alagad.”

Nagarekomendar sang Bug-os Tion nga Pag-alagad

Si Milton nag-eskwela sing hayskul sa Hawaii. Ginpalig-on sia sang iban nga kuhaon ang matahom nga karera nga may kalig-onan sa pinansial, apang ang halimbawa sang iya utod nga babayi kag sang iya magulang nga utod nga lalaki nga yara na sa bug-os tion nga pag-alagad subong payunir, nagpalig-on sa iya nga binagbinagon ang pagsulod man sa bug-os tion nga ministeryo. Dugang pa, nabatian niya ang pamulongpulong tuhoy sa mga pagpakamaayo sang bug-os tion nga pag-alagad kag kon paano ginaaman ni Jehova ang aton materyal nga mga kinahanglanon kon magasalig kita sa iya kag magauna sa iya sa aton kabuhi. Si Milton nagsiling: “Ginpahulag ako sini nga pilion ang bug-os tion nga ministeryo nga akon karera sa kabuhi. Busa, antes makatapos sing hayskul, ginbawtismohan ako kag nagsulod sa bug-os tion nga pag-alagad.”

Sang magpayunir si Milton, wala pa sing napulo ka payunir sa kongregasyon. Ano ang ginhimo niya nahanungod sina? “Gin-agda ko ang mga pamatan-on nga magpangabudlay upod sa akon sa pag-alagad sa latagon,” siling niya. “Subong resulta, madamo sa ila sang ulihi ang nagbuylog sa akon sa bug-os tion nga pag-alagad.”

“Ang akon bayaw isa ka gulang kag payunir,” padayon ni Milton. “Isa kami sing kongregasyon kag nagapangabudlay sing tingob sa pagpalig-on sa iban nga magpayunir. Ginpamat-od namon nga palig-unon ko ang mga tin-edyer, kag palig-unon niya ang mga asawa. Pagkatapos sang pila ka bulan, may yara 25 ka bug-os tion nga ministro sa kongregasyon. Sang magduaw ang manugtatap sa sirkito, gin-agda niya ang napulo sa ila nga mag-aplay subong espesyal payunir kag magsaylo sa malapit nga mga kongregasyon. Nian ginhambalan namon ang tulumuron nga buligan ang napulo pa nga magsulod sa payunir nga pag-alagad agod buslan yadtong ginpadala. Sang magduaw liwat ang manugtatap sa sirkito, 15 pa ang nagsugod sa bug-os tion nga pag-alagad. May yara na kami karon 30 ka payunir. Sa liwat ginpangabay sang manugtatap sang sirkito ang napulo sa ila nga magsaylo sa iban nga mga kongregasyon. Kag sa liwat, nagpangita kami sing magabulos sa ila. Antes magduaw ang manugtatap sang sirkito sa liwat, 20 pa ang nag-aplay para sa payunir nga pag-alagad!”

Ang makalalaton nga espiritu sang pagpayunir nagdalahig sa mga pamatan-on. Sang makalab-ot sila sing hayskul, halos sila tanan nagpahamtang sing bug-os tion nga pagpayunir subong ila tulumuron. Sa edad nga 13 anyos, ang isa ka utod nga babayi namat-od sa pagpayunir. Nagsiling sia: “Daw amo ini ang kinaugali nga butang nga himuon.” Sia kag ang iban pa nga pamatan-on sa kongregasyon wala gid magpensar sing bisan ano pa. Ginhimus ang pagpanaksi sang grupo pagkatapos sang klase kag sang ulihi 60 ka estudyante gikan sa lainlain nga eskwelahan ang nagsakdag sini nga hilikuton upod sa mga payunir. Kon binulan sang tig-ilinit, makalilipay makita ang mga 130 nga nagatipon para sa grupo nga pagpanaksi!

Ang Pagpayunir Nagadul-ong sa Mas Daku nga Pribilehiyo

“Sang 1974,” siling ni Milton, “gin-agda ako nga batunon ang hilikuton nga pagmisyonero sa isa ka asaynment nga 4,000 ka milya [6,400 km] gikan sa balay—ang mga pulo sang Belau sa Micronesia. Ang isa ka hangkat nga nagakinahanglan sing tion nga maanaran amo ang paglakat sing malawig sa tropikal nga mga talamnan kag paglakbay paagi sa mga sakayan.

Pagkatapos sang inoras nga paglakat sa nagatagiti nga adlaw sa yab-ukon nga dalan, si Milton nagsiling, “ginkapoy gid kami sang makalab-ot kami sa balay sang isa ka interesado nga pamilya. Ginsugo sang iloy ang iya bata nga lalaki didto sa suba. Nagpauli sia nga dala ang daku katama, ginpabugnaw sa suba nga sandiya para sa amon. Ginkaon namon ang sobra sa tunga sini, kag napabugnawan gid kami sini!”

Pagkatapos sang isa ka tuig sang iya misyonero nga asaynment, luyag ni Milton makita nga matuman ang tatlo ka tulumuron sa Belau, nga amo, ang lokal nga mga kautoran sa ulihi magatatap sang responsabilidad sa kongregasyon, ang mga pamatan-on magasulod sa bug-os tion nga pag-alagad, kag ang kongregasyon magapatindog sang iya kaugalingon nga Kingdom Hall. Sa karon nagasiling sia: “Pagkatapos sang napulo ka tuig diri, ang akon mga pangamuyo nga matuman ining tatlo ka tulumuron ginsabat.”

Nagbatyag bala si Milton nga nahimo niya ang husto nga pili sang nagligad nga 14 ka tuig sang ginhimo niya ang bug-os tion nga pag-alagad subong karera sang iya kabuhi? “Isa ka butang nga naton-an ko sa akon tinuig sa bug-os tion nga pag-alagad amo ini: Kon luyag naton, gamiton kita ni Jehova sa husto nga tion,” sabat niya. “Indi gid naton ini pagbayaan kundi padayon nga ihalad ang aton kaugalingon sing kinabubut-on sa pag-alagad sa iya. Indi mo gid paghinulsulan ang pagkuha sang karera nga alagaron si Jehova subong bug-os tion nga ministro.”

Paano Mo Gamiton ang Imo Kabuhi?

Mga pamatan-on, paano ninyo gamiton ang inyo palaabuton? Para bala sa inyo kaugalingon ukon sing bug-os para kay Jehova? (Roma 14:8) Sing mapangamuyuon, binagbinaga ang tulumuron sang bug-os tion nga pag-alagad karon sa inyo pagkapamatan-on. Iloga ninyo si Jesus paagi sa pagkabuhi sang nabilin sang inyo kabuhi “para sa kabubut-on sang Dios.” (1 Pedro 4:2) Mangin isa ini ka proteksion gikan sa makahalalit nga ambisyon, karera, kag asosasyon sang kalibutan. Analisaha ang inyo kahimtangan, kag magpahamtang sing espesipiko nga petsa subong inyo tulumuron sa pagsulod sa bug-os tion nga pag-alagad. Pangabudlayi ini. Mangamuyo kay Jehova nga buligan kamo nga matigayon ini.—Efeso 6:18.

Ang pagpili sang pagpayunir subong karera magadul-ong sa inyo sa madamong matahom nga pribilehiyo sa pag-alagad nga labaw sa inyo ginapaabot. Ang inyo kabuhi mangin puno sang kalipay, kalig-onan, kag gugma. Mangin makalilipay ini, makawiwili, kag makaalayaw. Labaw sa tanan, mangin pagkabuhi ini nga kalahamut-an kay Jehova.—Hulubaton 27:11.