Ang Kabuhi kag Ministeryo ni Jesus

Pagpauli sa Capernaum

SINI nga tion nakilala na si Jesus sing lapnag, kag madamo nga tawo ang nagalakbay padulong sa iya ginateneran sa naligwin nga mga duog. Apang, pagligad sang pila ka adlaw, nagpauli sia sa Capernaum sa higad sang Dagat sang Galilea. Ang balita maabtik nga naglapta sa bug-os nga siudad nga nakapauli na sia, kag madamo ang nagkadto sa balay nga iya ginateneran. Ang mga Fariseo kag mga manunudlo sa Abogasiya nagkari gikan sa malayo nga duog subong sang Jerusalem.

Nagginutok ang kadam-an amo kon ngaa wala na sing maagihan, kag wala na sing duog para sa tanan sa sulod. Gintukod ang entablado para sa talalupangdon gid nga hitabo. Ang natabo sini nga okasyon importante gid, kay nagabulig ini sa aton sa paghangop sang gahom ni Jesus sa pagdula sang kabangdanan sang pag-antos sang tawo kag sa pagpasag-uli sang maayong lawas sa tanan nga iya pilion.

Samtang nagapanudlo si Jesus sa kadam-an, ginpasulod sa balay sang apat ka lalaki ang isa ka paralitiko nga tawo sa higdaan. Luyag nila nga ayuhon ni Jesus ang ila abyan, apang indi sila makasulod bangod sang kadam-an. Kanugon gid! Apang wala sila mag-ampo. Nagsaka sila sa tapan nga atop, ginguhaban ini paagi sa paghukas sang mga tile, kag gintunton nila ang higdaan sang paralitiko nga tawo sa tupad ni Jesus.

Naakig bala si Jesus bangod sining pagtublag? Wala gid! Sa baylo nagdayaw gid sia sa ila pagtuo. Nagsiling sia sa paralitiko: “Ginapatawad ang imo mga sala.” Apang makapatawad gid bala si Jesus sing mga sala? Indi dapat sa hunahuna sang mga escriba kag mga Fariseo. Nagpangatarungan sila sa ila tagipusuon: “Sin-o bala ang makapatawad sang mga sala kundi ang Dios lamang?”

Bangod nahibaloan niya ang ila ginahunahuna, si Jesus nagsiling sa ila: “Ano bala ang mahapos pa, ang pagsiling sa paralitiko, ‘Ginapatawad ang imo mga sala,’ ukon ang pagsiling, ‘Tindog ka, dalha ang imo higdaan kag maglakat’?” Wala na maghulat pa sing sabat, nagliso si Jesus sa paralitiko kag nagsiling: “Tindog ka, dalha ang imo higdaan, kag magpauli sa imo balay.” Kag sa gilayon nagtindog sia kag naglakat nga dala ang iya higdaan sa atubangan nila tanan! Sa katingala ang mga tawo nagtuaw: “Wala pa gid kita makakita sang kaangay sini!”

Natalupangdan mo bala nga ginsambit ni Jesus ang sala may kaangtanan sa balatian kag nga ang kapatawaran sang mga sala may yara kaangtanan sa pagtigayon sing maayong lawas? Ginapaathag sang Biblia nga ang aton unang ginikanan nga si Adan nagpakasala kag napanubli naton tanan ang mga resulta sina nga sala, nga amo, ang balatian kag kamatayon. Apang sa idalom sang paggahom sang Ginharian sang Dios, patawaron ni Jesus ang mga sala sang tanan nga nagahigugma kag nagaalagad sa Dios, kag nian madula na ang tanan nga balatian. Maayo gid ina! Marcos 2:1-12; Lucas 5:17-26; Mateo 9:1-8; Roma 5:12, 17-19.

◆ Ano ang danyag sang isa ka talalupangdon gid nga hitabo?

◆ Paano nakakadto ang paralitiko kay Jesus?

◆ Ngaa makasasala kita tanan, apang paano si Jesus naghatag sing paglaum nga ang kapatawaran sang aton mga sala kag napasag-uli nga himpit nga lawas posible?