Mga Pamangkot Gikan sa mga Bumalasa

◼ Paano si Jesus mangin “isa ka dios” nga gintuga ni Jehova, samtang sa Isaias 43:10 si Jehova nagsiling: “Una sa akon wala gid sing dios nga ginhuman, kag wala na gid sa ulihi nakon”?

Kilala ang mga Saksi ni Jehova sa pagtudlo gikan sa Biblia nga si Jesus amo ang gintuga nga Anak sang Dios kag sakop sang iya Amay. (Juan 14:28; 1 Corinto 11:3) Sa gihapon, subong ang gamhanan nga Isa nga nagaalagad subong Humalambal sang Dios, ukon Logos, mahimo sia tawgon nga “isa ka dios.” Ang pila ka bersion sang Biblia nagabadbad sang Juan 1:1 subong nagasiling nga ang Logos “isa ka dios.” Halimbawa, ang Das Evangelium nach Johannes (1979) ni Jürgen Becker mabasa: “. . . und der Logos war bei dem Gott, und ein Gott war der Logos.” (Sa Hiligaynon: “. . . kag ang Logos upod sa Dios, kag ang Logos isa ka dios.”)a

Apang subong ginapakita sang pamangkot, daw nagasumpakil ini sa Isaias 43:10, 11, nga nagasiling: “‘Kamo akon mga saksi,’ siling ni Jehova, ‘kag ang akon alagad nga ginpili ko, agod nga magakilala kamo kag magtuo sa akon, kag makahangop nga ako gihapon Sia. Una sa akon wala gid sing Dios nga ginhuman, kag wala na gid sa ulihi nakon. Ako—Ako amo si Jehova, kag luwas sa akon wala sing manluluwas.’”

Ang isa ka sinsero nga estudyante sang Biblia mabuligan kon talupangdon niya sing mahalungon ang konteksto sadtong mga pulong. Ginpatuhay sang Labing Gamhanan nga Dios nga si Jehova ang iya kaugalingon sa hinimo sang tawo nga mga idolo sang mga pungsod nga nagapalibot sa Israel. Si Jehova namangkot: “Sa kay sin-o bala ninyo ipaangay ang Dios, kag sa ano bala nga kaangay ipaanggid ninyo sa iya?” Indi gid sa pagkamatuod sa larawan nga ginhimo sang manugsalsal sing metal ukon gintigib gikan sa kahoy. (Isaias 40:18-20; 41:7) Ina nga “mga dios” indi ‘makabitad sang mga langit subong sang kumbong,’ subong sang ginhimo ni Jehova. (Isaias 40:21-26) Dugang pa, si Jehova makatagna sang palaabuton; sa pagkamatuod ang mga idolo sang mga pungsod indi ‘makapahayag sang mga butang nga magaabot sa ulihi, agod nga mahibaloan namon nga sila mga dios.’ (Isaias 41:23) Ining ideya ginsulit sa Isaias 43:9, nga sa diin si Jehova nagasiling: “Pagtipunon sing tingob ang tanan nga pungsod. Sin-o bala ang makapahayag sini? Ukon mapakita bala nila sa amon bisan ang nahauna lamang nga mga butang? Padalha sila sang ila mga saksi.” Ang Labing Gamhanan husto sa pagsiling: “Ako si Jehova. Ina amo ang akon ngalan; kag indi ko pag-ihatag sa iban ang akon himaya, ukon ang akon kadayawan sa mga larawan nga tinigban.”—Isaias 42:8.

Gani ginapamatod-an sang konteksto nga ginahangkat sang Labing Gamhanan ang ginatawag nga mga dios sang mga pungsod. Bangod mga idolo lamang nga wala sing balaan nga gahom, sa pagkamatuod indi sila mga dios nga dapat simbahon; wala gid sila sing pulos. Si Jehova nagapadayon: “May Dios bala luwas sa akon? Wala, wala sing Igang. Wala ako sing nahibaloan nga bisan sin-o. Ang mga nagahuman sing larawan nga tinigban sila tanan kadayawan, kag ang mga butang [gindihon gikan sa metal ukon gintigib gikan sa kahoy] nga ginakalipayan nila indi mapuslan.” (Isaias 44:8-17) Busa, maathag nga ginapakita sang konteksto sang Isaias 43:10 nga indi si Jesus ang ginabinagbinag; ang mga dios nga ginabinagbinag amo ang wala sing gahom nga mga idolo sang mga pungsod.

Ang tinaga nga “Dios” ukon “dios” kinaandan nga ginagamit tuhoy sa labaw sa tawo nga butang nga ginasimba. Sa amo, sa hunahuna sang madamo nga tawo, ang “dios” nagakahulugan sing (1) Supremo nga Persona, ang Labing Gamhanan, ukon (2) dimatuod nga dios, subong sang idolo. Apang, wala ginagamit sang Biblia ang isa ka paggamit. Makita naton ini gikan sa Salmo 82:1, 2. Didto ang Balaan (Jehova nga Dios) ginapatuhay sa tawhanon nga mga hukom nga ginatawag sang salmista nga “mga dios.” Ginpatuhuyan ni Jesus ini nga dinalan sang ulihi. Bangod gintawag niya si Jehova nga Dios subong iya Amay, luyag sang iban nga mga Judiyo nga batuhon sia. Sa ila panumbungon nga iya ‘ginahimo ang iya kaugalingon nga dios,’ si Jesus nagsabat: “Wala bala masulat sa inyo Kasugoan, ‘Ako nagsiling: “Mga dios kamo”’? Kon gintawag niya nga ‘mga dios’ sila [mga tawo nga hukom] . . . nagasiling kamo nahanungod sa iya nga ginpakabalaan sang Amay kag ginpadala sa kalibutan, ‘Ikaw nagapasipala,’ bangod nga ako nagsiling, Ako ang Anak sang Dios?”—Juan 10:31-36.

Maathag nga may isa lamang ka Labing Gamhanan nga Dios, subong sang ginsulat ni apostol Pablo: “Kay bisan may mga ginatawag nga ‘mga dios’ sa langit ukon sa duta, subong nga may madamo nga ‘dios’ kag madamo nga ‘ginuo,’ sa aton may isa ka Dios kag Amay, nga sa iya nagikan ang tanan nga butang, . . . kag isa ka ginuo, si Jesucristo, nga paagi sa iya nangin-amo ang tanan nga butang kag paagi sa iya kita nagakabuhi.” (1 Corinto 8:5, 6) Si Ginuong Jesucristo indi dimatuod nga dios, indi demonyo nga dios, indi idolo lamang. Sia ‘ang banaag sang himaya ni Jehova nga Dios.’ (Hebreo 1:3) Sa amo nagakaigo nga kilalahon sang Juan 1:1 si Jesus subong “isa ka dios,” ukon “tulad dios” (Johannes Schneider).

[Footnote]