Nagapangita Ka Bala sing Kaupod sa Kabuhi?

“WALA na sing labi katahom, mainabyanon kag makalilipay nga kaangtanan, paghiusa ukon pag-updanay sang sa maayo nga pag-asawahay.” Amo sina ang ginasiling na. Gani, indi katingalahan nga minilyon ka diminyo nga mga tawo ang maluyag nga makatigayon sing kaupod sa kabuhi.

Ang iban nagakonsulta sa isa ka kompyuter subong match­maker (tagatugpo), ang iban sa mga bituon. Apang daw ano pa gid kaayo ang magkonsulta sa aton Manunuga, ang Ginhalinan sang pag-asawahay! (Genesis 2:18-24) Ang mahigugmaon nga interes kag kaalam sang Dios nagahatag sing malig-on nga sadsaran sang pagsalig sa iya laygay kag mga prinsipio nga nagabulig sa aton nga mahibaloan kon ano ang pangitaon sa isa ka tiayon. (Salmo 19:7) Ang Iya Pulong nagasugo sa aton sang masunod:

‘Magminyo Lamang sa Ginuo’

Ngaa? Bangod si Jehova nga Dios nagaulikid sa aton dayon nga kaayohan. Ang laygay ni apostol Pablo nga ‘magminyo lamang sa Ginuo’ nagahisanto sa ginahimo sang dumaan nga mga alagad ni Jehova nga nagapili nga tiayon sang matuod man nga mga sumilimba. (1 Corinto 7:39; Deuteronomio 7:3, 4) Ang mga benepisyo sang paghimo sini madamo kag dapat pirme dumdumon.

Halimbawa, ang diosnon nga tiayon makaamot sa padayon nga katutom sa aton mahigugmaon nga langitnon nga Amay. (Ipaanggid ang Manugwali 4:9-12.) Ang Cristianong magtiayon mahimo makapalig-onay sa isa kag isa kag sing tingob madinalag-on nga makaatubang sang lainlain nga mga pagtilaw. Sing nahiusa, mabatoan nila ang mga pag-ipit nga nagapaluya sa higut sang pag-asawahay. Sanglit lunsay sila nagatulok kay Jehova kag nagaaplikar sang iya matahom nga laygay, malubad nila sing labi kahapos ang mga bulobakulod nga bahin kag makapangabudlay sing nahiusa sa baylo nga magkompetinsiahanay. Ang ila hanuot nga mga panikasog nga alagaron si Jehova kag idihon ang ila kabuhi nahisuno sa iya mga dalanon makaamot sa madinalag-on nga pag-asawahay nga nagapadungog sa aton Manunuga.

Sang nagligad nga pila ka tuig, isa ka babayi nga nagahingalan kay Gloria ang nagapakig-upod sing suod sa isa ka pamatan-on nga lalaki nga nagatambong sa Cristianong mga miting kag nagakomento pa gani sa Pagtinuon sa Lalantawan. Ginlaygayan sia nga indi makig-upod sing suod sa sining wala pa mabawtismohi nga tawo, apang “nagahigugma gid [sia] sing daku” amo kon ngaa wala niya pagsunda ang laygay. Apang, nahibaloan niya nga ang laygay maayo. Gani isa ka adlaw nangamuyo sia kay Jehova sing tudok, nagapakiluoy nga buligan sia sa sining bagay. Wala magdugay pagkatapos sadto, natukiban nga ang pamatan-on nga lalaki imoral gali, kag gani gilayon nga ginbugto ni Gloria ang pag-abyanay. Nakapamana sia sang ulihi sang isa ka maayong lamharon nga Cristianong lalaki. Sa karon, ang iya bana gintangdoan nga gulang, kag ang ila duha ka kabataan aktibo sa kamatuoran. Kon dumdumon niya ang nagligad, nagsiling sia: “Salamat kay Jehova, nalikawan ko ang madamong palaligban. Bangod sang iya panuytuy, nabaton ko ang labing maayo nga laygay, nagtugot sa akon nga magkabuhi sing malipayon upod sa isa ka mahigugmaon nga bana.”

Ngaa Madamo ang Nagapangita sa Kon Bisan Diin?

Ngaa, nian, ang isa ka tawo nga dedikado kay Jehova magapangita pa kon bisan diin sing palamanahon ukon palangasaw-on? Indi bala kombinsido ang Cristiano nga si Jehova nakahibalo kag maluyag kon ano ang labing maayo para sa aton? (Hulubaton 3:1-7; Salmo 145:16) Kamusta ka? Nagapati ka bala nga si Jehova “Dios sang kamatuoran”? (Salmo 31:5) Kon amo, nian pat-od nga nahibaloan mo nga pirme sia nagaaman sing masaligan nga laygay nga nagakaigo kag mapuslanon. (Isaias 48:17, 18) Sa pagkamatuod, ang aton mahigugmaon nga langitnon nga Amay nagahatag sing laygay nga nagahunahuna sang aton walay katapusan nga kaayohan, apang ayhan latiran naton ang aton plano sa malapit nga buwas-damlag lamang. Apang, kon nagapangita sing palamanahon ukon palangasaw-on, indi bala nga labi pa ang planuhon naton sang sa malapit nga buwas-damlag?—Salmo 37:11, 29.

Nagapati ka gid bala nga malapit na ang Ginharian kag sa dili madugay magapanghikot agod tinloan ang duta? Kag nakita mo bala ang imo kaugalingon sa gintagna nga tugob-globo nga Paraiso? Ukon luyag mo bala nga himuslan ang karon nga sistema sang mga butang sing bug-os? Nagapangita ka bala sing kaupod nga may ikasarang sa pag-aman sa imo sang maayo nga estilo sang kabuhi? Ukon nagapangita ka bala sang isa nga nagauna sang matuod nga pagsimba? (Mateo 6:33) Sa pagkamatuod, ano gid ang importante sa imo kabuhi? Maalamon para sa aton nga usisaon ang aton nasulod nga mga panghunahuna kag mga motibo. Nian, kon kinahanglanon, makahimo kita sing mga pagbag-o kag sa amo malikawan ang dalanon nga indi kalahamut-an kay Jehova.—Ipaanggid ang Salmo 78:40, 41.

Ang Aton Malimbungon nga Tagipusuon

Ang Jeremias 17:9 nagapaandam sa aton nga “ang tagipusuon malimbungon labaw sa tanan nga butang.” Gani dapat naton ini pirme usisaon. Maayo man nga dumdumon nga ang mga wala nagasapak sa laygay kag mga pahanumdum sang inspirado nga Biblia nga mahigugmaon nga ginahatag sang mga gulang sang kongregasyon kag sang iban pa masami nagapatulo sing madamong luha kag nagaantus sing sakit sa tagipusuon.

‘Apang ngaa nasiling mo ina?’ basi ipamangkot sang isa. ‘May kilala ako nga isa ka utod nga wala mangasawa sing masigkatumuluo, kag karon nagaalagad sila nga duha kay Jehova.’ Matuod, sa iban nga hitabo amo sina ang natabo, kag nalipay kami nga ang duha sa karon “nagalakat sa kamatuoran.” (3 Juan 4) Apang, ang utod nga nangasawa sing indi bawtismado nga tawo malinapason. Ina bala nga independiente nga espiritu matabo liwat? Ayhan magahunahuna sia nga labi pa ang nahibal-an niya sang sa Dios kag sa amo wala magsapak sa laygay sang Biblia kag nagsalig sa iya kaugalingon nga kaalam sa iban pa nga kahimtangan? Ginalaygayan kita nga ‘magsalig kay Jehova upod ang bug-os naton nga tagipusuon.’ (Hulubaton 3:5) Nagakahulugan ina sang mapinasakupon nga pagsunod sa balaan nga kabubut-on sa tanan nga tion. Gani luyag naton palambuon ang matinumanon nga tagipusuon, ang isa nga nagasugata sang pagtilaw sa pagkamatinumanon bisan sa magagmay nga mga butang. (Lucas 16:10) Kon lapason naton ang Dios, ano nga sahi sang talaksan ang ginapalambo naton? Ang utod nga wala ‘magminyo sa Ginuo’ ayhan nakamarasmas na sa iya sayop bangod sang paghimo sang mga butang sa iya kaugalingon nga paagi kag nagapangabay sang kapatawaran ni Jehova. Apang amo bala ina ang luyag mo nga panugod sa imo pag-asawahay?

‘Apang ang akon nobyo nagsugod na sa pagtuon kag nagatambong na sa Cristianong mga miting,’ ayhan isiling sang isa. Huo, apang ngaa nagtuon sia? Agod makakuha bala sing tiayon ukon agod ton-an ang nahanungod kay Jehova nga Dios kag alagaron sia? Samtang nagapangaluyag ang motibo sang lalaki mahimo nga mapangduhaduhaan. Ano ang matukiban mo sa tapos sang adlaw sang kasal? Matuod, ayhan magahulat ka tubtob mabawtismohan ang imo nobyo kag sa dili madugay pagkatapos sina ang petsa sang kasal italana. Nagahambal sing tampad, ikaw ‘nagaminyo sa Ginuo.’ Apang nagapanghikot ka bala nahisuno sa espiritu sina nga laygay?

Natalupangdan mo bala kon ang isa ka utod nga lalaki ginarekomendar para sa pila ka pribilehiyo sa pag-alagad? Bastante na bala nga bawtismado sia? Indi, sa baylo, ina nga utod “gintilawan anay kon nagakabagay.” (1 Timoteo 3:10) May maton-an bala kita nga leksion sa sina? Huo. Magdulog, magtan-aw, kag magpamati. Magdulog kag hunahunaa ang nahanungod sa pagkaserioso sang pag-asawahay. Tan-awa ang indibiduwal, indi lamang paagi sa nagal-uman nga mga mata sang in­fatua­tion, kundi sing matinuyuon. Kag magpamati man. Nagahambal bala sia gikan sa tagipusuon nga may mahigugmaon nga pagpabutyag sing pagdayaw sa Dios? Sa makatarunganon nga panag-on sang tion, nagpakita bala sia sing pamatuod sang Cristianong pagtubo? Sa tapos niya mapakita ang iya katutom kag espirituwal nga kalipikasyon, amo lamang nga makabig sia nga posible nga kaupod sa kabuhi. Nagakutlo sa palalahog nga manugbinalaybay:

“Inday! ako may sugilanon

Makahatag sing leksion—

Pilia ang but-anang palamanhon,

Magminyo sa husto nga tion.”

Ano ang matabo kon ang aton tagipusuon magasikway sang maayo nga laygay kag matinuyuon nga pangatarungan? Ang resulta makahalalit. Dumduma, ang Biblia nagalaygay sa aton:

‘Imo Ginaani ang Imo Ginasab-ug’

Binagbinaga ang natabo kay Jacque­line. Ginlaygayan sia sang isa ka gulang nahanungod sa iya pagpakig-abyan sa isa ka pamatan-on sa guwa sang Cristianong kongregasyon. Apang bangod ginabatyag niya nga ang mga utod tuman ka estrikto, wala niya pagpamatii ang napasad sa Biblia nga mga laygay. Nagadumdum sang iya kaugalingon nga panimuot, nagsiling sia sang ulihi: “Ginahangop sang isa ang luyag niya hangpon kag indi kon ano ang ginahangop kag ginasiling ni Jehova.” Ang pamatan-on nagsugod sa pagtuon sang Biblia kag sang ulihi ginbawtismohan. Sa sulod sang tatlo ka bulan sila nagpakasal.

Gilayon nga nag-utwas ang mga problema. Sa katunayan, nagsugod ini sang nagahoney­moon pa lang sila! Ang malaw-ay nga batasan nga wala anay madiparahi ni Jacque­line ukon hungod nga ginpasapayanan anay nangin maathag na. Nagdamgo sia sang isa ka malipayon kag nahiusa nga pag-asawahay, apang, sing masubo, lain ang natabo. Ang iya bana na-dis­fellow­ship kag ginbayaan sia kag ang ila duha ka bata. Karon indi lamang nga ginaantus niya ang mabudlay nga pangabuhi sining nagalain nga sistema kundi ang hangkat man nga saguron ang duha ka kabataan, nga nagaatipan sang ila mga kinahanglanon sa pisikal kag balatyagon. Ano ang naton-an ni Jacque­line gikan sa sining mapait nga eksperiensia? “Ang pagkamatinumanon,” siling niya. “Bisan pa ang laygay daw indi maayo ukon daw indi labing maayo para sa imo, dapat mo ini kabigon nga daw naghalin kay Jehova kag dapat gid ini sundon.”—Galacia 6:7; Salmo 86:11.

Binagbinaga ang isa pa ka halimbawa. Nakilala ni Maritza ang iya palamanahon sa obra. Ginpakita sa iya sang lalaki ang mga butang sa kalibutan nga wala niya anay mahibal-i—kag daw indi man ini malain para sa iya. Edukado ang lalaki, maayo sing batasan, kag nagahambal sing maalamon sa madamong butang. Bisan pa ginhatagan si Maritza sing madamong paandam sa Kasulatan, wala niya ini pagsapaka. “Nagahigugma” gid sia.

Sang ulihi ang Cristianong mga miting nangin makatalaka kay Maritza, pero indi ang badlak sang makakulunyag nga mga gab-i upod sa iya makalilingaw nga kaupod. Sa wala pa sila makasal, nanaad ang lalaki nga indi niya pag-upangan ang iya pagtambong sa Cristianong mga miting, kag amo sina primero. Apang, sing amat-amat nasapwan ni Maritza nga tuman sa iya kasaku sa iban nga bagay amo kon ngaa ang iya espirituwal nga mga hilikuton nangin ikaduha na lamang, kag nangin diaktibo sia.

Kamusta ang makalilingaw nga mga paghambalanay? Amat-amat ini nga nadula, kag sang ulihi ginbulagan sia sang iya bana, nagbilin sa iya sang apat ka kabataan nga halin sa apat tubtob siam ka tuig ang edad. Sa kakibang, si Maritza nangin matig-a, kag pagligad lamang sang tatlo ka tuig nga nakabatyag sia sing katawhay agod maanalisar kon ano ang natabo kag kon ano ang himuon niya sa iya kabuhi. Pirme niya ginasiling sa iya kaugalingon: “Agod mabuhi kinahanglan mag-antus.” Apang wala sia sini mapaayawi bangod madumduman gihapon niya ang mga tinuig nga sia malipayon, sang nabatyagan niya ang mabugnaw nga dapya sa iya nawong samtang nagaguwa sa pag-alagad sa latagon, nagapaambit sa iban sang maayong balita sang Ginharian.

“Aba, daw ano kadaku nga kasakit kag kaakig ang nalikawan ko kuntani kon namati lamang ako!” siling ni Maritza. Paagi sa kabutho sang iya mga anak, nakapakig-angot sia liwat sa mga Saksi ni Jehova. Ang iya interes sa kamatuoran kag ang iya gugma kay Jehova napukaw liwat, kag karon sia kag ang iya kabataan aktibo sa pag-alagad sa iya. Karon si Maritza bug-os tagipusuon nga nagarekomendar: “Ton-i ang magpasakop sa panuytuy nga ginahatag ni Jehova kag kilalaha nga ginagamit ni Jehova ang mga tawo nga wala mo gid ginahunahuna nga magapahibalo sang iya kabubut-on.” Subong sang ginasiling ni Jesucristo: “Mag-andam kon paano ka magpamati.” (Lucas 8:18) Huo, magdulog, magtan-aw, kag magpamati!

Magpanghulonghulong sa masunod nga miting sa King­dom Hall. Walay duhaduha nga nakita mo ang madamong malipayon nga Cristianong minyo nga mag-asawa kag matalupangdan ang ila kalipay sa pagpaambit sang tion kag mga eksperiensia sing tingob. Sa pihak nga bahin, ayhan nakita mo ang iban nga nagaisahanon bangod ang ila mga tiayon ditumuluo. O, kon kaupod kuntani nila ang ila mga bana ukon mga asawa! Sing masami nagadalidali sila sa pagpauli pagkatapos sang miting kag nawasi ang makapalig-on nga pagpakighambal kag pagpakig-upod sa mga masigkatumuluo. Handa ka bala nga masapwan sing dinagakigo ang imo kaugalingon sa amo man nga kahimtangan bangod sang indi pagsapak sa laygay nga ‘magminyo lamang sa Ginuo’? Sa baylo, daw ano kaalam nga sundon ang mga instruksion ni Jehova kag sa amo malikawan ang masubo nga mga resulta!—Salmo 119:9; Hulubaton 28:26.

Maghulat kay Jehova

‘Apang,’ basi isiling mo, ‘wala gid ako sing nakita sa kongregasyon. Diutay lamang ang pareho ko sing pangedaron.’ Ayhan matuod ina. Apang kombinsido ka bala nga luyag ni Jehova nga ikaw magmalipayon? “Sia nagaulikid sa imo.” (1 Pedro 5:6, 7) Nadumduman mo bala ang hulubaton nga nagasiling: “Ang mainandamon nga asawa naghalin kay Jehova”? (Hulubaton 19:14) Ti, nian, ngaa indi ipangamuyo ang nahanungod sa pag-asawahay?—Filipos 4:6, 7.

Nadumduman mo bala si Ana kag ang iya handum nga makaangkon sing bata? Ano ang ginhimo niya? Ginbubo niya ang iya tagipusuon sa pangamuyo kay Jehova, nagasalig sa iya sing bug-os. Nian gintugyan niya ang tanan sa kamut niya. Sang ulihi, nabaton niya ang makatilingala nga sabat sa iya pangamuyo—ang pagkabun-ag sang isa ka anak nga lalaki.—1 Samuel 1:9-11, 18-20; Salmo 62:8.

Bisan pa diutay lamang ang pareho mo sing pangedaron sa lokal nga kongregasyon, kamusta sa sirkito nga mga asambleya kag distrito nga mga kombension? Nagatambong kita sa sinang mga pagtilipon tungod sa espirituwal nga rason. Apang ang mga nagaboluntaryo sang ila serbisyo sa sina nga tion may kaayawan nga nakaalagad sa iban kag makilala ang mga utod nga lalaki kag babayi nga nagaalagad kay Jehova sing bug-os kalag. Kag sa sina nga mga okasyon, may posibilidad nga makilala mo ang imo kaupod sa kabuhi sa ulihi.

Apang bisan pa indi ikaw makakita sing nagakabagay nga Cristianong tiayon, mapangamuyuon nga magsalig kay Jehova nga buligan ka sa pagkabuhi sing putli subong diminyo nga tawo. Kag samtang diminyo, palamboa ang mga kinaiya kag mga ikasarang nga magahimo sa imo nga isa ka maayong bana kag amay ukon isa ka maayong asawa kag iloy. (Galacia 5:22, 23) Madamo ang nabuligan sa paghimo sina paagi sa pagsulod sa bug-os tion nga pag-alagad subong mga payunir. Daw ano kaayo nga paagi sa paggamit sang imo tion kag kusog!

Kon nagapangita ka sing kaupod sa kabuhi, nian, diin ka magasugod? Kabay nga sa tunga sang aktibo nga masigkasumilimba ni Jehova, sa mga nagaambit sang imo tulumuron sa kabuhi kag hanuot nga nagahandum nga alagaron sia sing dayon. (2 Timoteo 2:22) Kag kon si Jehova magapakamaayo sa imo sing nagakahadlok sa Dios nga kaupod sa kabuhi, kabay nga ang imo pag-asawahay isa nga nagapadungog sa aton mahigugmaon nga Dios.

[Kapsion sa pahina 29]

“Aba, daw ano kadaku nga kasakit kag kaakig ang nalikawan ko kuntani kon namati lamang ako!”