Ang Pag-alagad Subong Payunir Nag-inspirar sang Akon Kabuhi
Gin-asoy ni Arthur Gustavsson
DIDTO sa natabonan sing yelo nga Himalayas, ang kamatuoran nga masapwan sa Pulong sang Dios nga Biblia nakalab-ot sa akon mga ginikanan nga sanday Fred kag Amanda Gustavsson. Natabo yadto sang 1903, kag sadto nga tion ginamabdos ako sang akon iloy. Ano ang ginahimo didto sang akon mga ginikanan, nga tuman kalayo gikan sa ila dutang natawhan sang Sweden?
Sang tuig 1880 nagsaylo sila gikan sa Sweden padulong sa Estados Unidos. Lunsay sila may malig-on nga pagtuo sa Dios. Nagbuylog sila sa Scandinavian Mission Alliance sa Chicago. Pagligad sang isa ka tion sang paghanas, ginpadala sila subong mga misyonero sa Baltistan, karon nahamtang sa naaminhan sang Pakistan. Apang, wala madugay nasapwan nila nga mabudlay gid kombertihon ang mga Muslim sa mga panudlo sang Cristiandad. Sila mismo nagsugod sa pagduhaduha nga ang Dios mapintas gid sa pagtugot sa malipayon kag maabiabihon nga mga tawo nga magkadto sa walay katapusan nga silot sang kalayuhon nga impierno kon indi sila makombertir. Wala gid sila magdumdom nga ang ila hunahuna ginahanda para sa isa ka butang nga maayo pa.
Sang ulihi nakabaton sila sing isa ka libro gikan sa isa ka abyan sa Estados Unidos nga nagbag-o sing bug-os sang ila panghunahuna. Amo yadto ang The Divine Plan of the Ages, ni Charles T. Russell, nga presidente sadto sang Watch Tower Society. Ginbasa nila ini, kag daw subong bala nga ang ila mga mata nahimbisan. Maathag nga nakita nila nga ang bayad sang sala amo ang kamatayon, indi ang dayon nga pagpaantos. (Roma 6:23) May yara na sila karon positibo nga mensahe sang paglaum para sa katawhan—nga himuon sang Ginharian sang Dios ang duta nga mangin isa ka paraiso.
Pagbag-o sang Misyon
Sa amo sini nga tion nga natawo ako sa Shigar sa Baltistan. Wala magdugay ang akon utod nga babayi nga si Mirjam natawo man. Ang akon mga ginikanan namat-od nga magpangabudlay sa idalom sang pagtuytoy sang Watch Tower Society sa pagwali sing bag-o nga kamatuoran nga ila nasapwan. Apang, ang mga kahimtangan nagpilit sa ila nga magbalik sa Sweden sang 1908. Didto sa Göteborg nagsugod sila sa pagbantala sing ‘maayong balita sang Ginharian’ subong mga colporteur, nga amo ang pagtawag sadto sa bug-os tion nga mga ministro. (Mateo 24:14) Sa sulod sang una nga napulo ka tuig, nakobrehan nila ang bug-os nga siudad sing tatlo ka beses sa ila pamalaybalay nga ministeryo. Madamo nga tawo ang nagbaton sang kamatuoran.
Madumduman ko si Gng. Hanna Gunnarsson nga naakig gid sang ang akon amay magsiling nga ang Biblia wala nagatudlo nga ang tawo may dimamalatyon nga kalag. Sia nagtuaw: “Kon wala kita sing dimamalatyon nga kalag, maayo pa nga malakat na lang ikaw kag lumsi ang imo kaugalingon sa suba!” Nagyuhom lamang akon amay kag ginhatagan sia sing polyeto nga What Say the Scriptures About Hell? Sang ulihi nangin Saksi sia, upod sa iya mga anak nga babayi. Yadto nga hitabo nagtudlo sa akon nga indi gid matublag bisan ano man ang isiling sang iban nga tawo.
Sang dies-anyos ako, si Utod Rutherford nagkadto sa Göteborg agod magpresentar sing pamulongpulong publiko nga “Sa Diin ang Minatay?” Sa tion sang iya presentasyon, nagtanyag sia sing $1,000 sa bisan kay sin-o sa tumalambong nga makapamatuod nga ang tawo may dimamalatyon nga kalag. Wala sing bisan sin-o nga nagbaton sa hangkat.
Espiritu sa Pagpayunir sa Pamilya
Bangod sang maayong halimbawa sang akon mga ginikanan, wala madugay napuno ako sang espiritu sang pagpayunir. Bata pa ako sang magsugod ako sa pagpakigbahin sa ministeryo. Ginapapanagtag ako sang akon amay sing mga handbill nga nagapasayod sang mga pamulongpulong publiko. Nalipay gid ako sa sini kag nakasumalang ako sing pila ka tumalagsahon nga mga eksperiensia. Isa ka adlaw nagduaw ako sa akon manunudlo agod agdahon sia sa isa ka pamulongpulong. Wala niya pagbatona ang pampleta. Nakibot gid ako nga nakadasma ako kag nahulog sa hagdan. Isa yadto ka leksion para sa akon—gintudloan ako sini nga mangin realistiko. Ang reaksion sang mga tawo indi pirme subong sang aton ginapaabot.
Ang amon puluy-an nangin puluy-an sang mga payunir, nga ang tagsatagsa nagapas-an sang iya lulan. Ang akon utod nga si Mirjam kag ako nakahibalo sang pagkaimportante sang pagbantala nga hilikuton nga ginahimo ni Tatay kag ni Nanay. Busa, pirme namon ginatinloan ang bug-os nga balay pagpauli gikan sa eskwelahan.
Sa edad nga 16 anyos, gindedikar ko ang akon kaugalingon sa paghimo sang kabubut-on ni Jehova kag nagpabawtismo sang 1919 sa isa ka kombension sa Örebro. Sang masunod nga tuig gin-agda ako nga magpangabudlay upod sa isa ka diutay nga grupo sang walo ka utod nga masaku sa sanga talatapan sang Watch Tower Society sa Sweden. Yadtong mga tinuig sang pag-alagad sa sanga nagpasad sing sadsaran para sa isa ka disiplinado kag organisado nga kabuhi sa pag-alagad kay Jehova.
1914—Indi Malipatan nga Tuig
Sa sulod sang madamo nga tuig antes sang 1914, ang mga Estudyante sang Biblia, subong amo ang pagtawag sa amon sadto, nagpaabot sadto nga tuig subong isa ka butang nga pinasahi. Sanglit tinandaan ini sa tagna sang Biblia, nagpaabot kami sing tumalagsahon nga mga hitabo. Madumduman ko gid sing maathag ang Domingo, Agosto 2, 1914. Ang akon amay nagadumala sang miting sa Göteborg sang mabatian namon sa guwa ang bata nga manuglibod sing pamantalaan nga nagsinggit: “Ang pagkalaglag sang kalibutan nagsugod na!” Nagtulokay ang mga utod sa sulod sang tinukod. Ang pila sang mga butang nga amon ginwali nahanungod sa 1914 nagmatuod na.
Ang tuig 1914 nagkahulugan man sing isa ka butang para kay Johan Severin Petersson. Ginbilinan sia anay sang iya utod nga si Ida sing tatlo ka libro nga ginsulat ni Utod Russell. Nagdumdom sia nga makatalagam ini, gani ginsunog niya ini. Nabatian ini ni Ida kag, gani ginpahulam sia liwat sing tatlo pa. Sini nga tion ginkandadohan niya ini sa isa ka hunoshunos.
Nian nag-abot ang Dakung Inaway sang 1914. Nabatian ni Johan nga ang mga libro nagsambit nahanungod sa sina nga petsa. Agod mahibal-an, ginbuksan niya ang hunoshunos, ginkuha ang mga libro kag ginbasa ini. Ang iya mga mata nabuksan sa kamatuoran sang Biblia, kag sia man nangin Estudyante sang Biblia. Nagpabawtismo sia sang 1917, kag ang iya anak nga si Rosa nagsunod sang iya huwaran sang 1918. Sang 1928 nangin asawa ko sia kag kaupod sa kabuhi sa pag-alagad kay Jehova.
Sa Dalan nga Dala ang Maayong Balita
Sang mangasawa ako, naghalin ako sa sanga talatapan, kag si Rosa kag ako naghinguyang sang amon dugos-bulan paagi sa pagpayunir! Sa una nga bulan sang amon pag-asawahay, nakapahamtang kami sing 4,000 ka kopya sang polyeto nga Freedom for the Peoples.
Pagligad sang pila ka bulan, ginpamangkot ako kon luyag ko maglakbay subong direktor sang pag-alagad sa rehiyon, nga karon nakilal-an subong manugtatap sa sirkito. Nagkahulugan ini sing pagduaw sa mga kongregasyon sa bug-os nga Sweden kag sang ulihi sa Norway. Wala sing kahimusan sadtong mga adlaw nga paupdon ang imo asawa sa sining mga paglakbay. Mangin wala ako sa balay sing anum ukon pito ka semana sa isa ka tion, kag may pila ka adlaw nga pahuway sa ulot sang tagsa ka ruta. Handa kami sa pagsakripisyo kag ginhimo namon ini sa sulod sang 14 ka tuig.
Ano ang ginhimo ni Rosa sa sulod sining tion? Nagpayunir sia upod sa akon utod sa Hälsingborg, Sweden. Nagabisikleta sila sadto nga mga adlaw agod makakobre sila sing daku nga teritoryo. Apang pasugiron naton sia sina nga sugilanon.
“Ang pagpayunir sang katuigan 1930 tuhay gid sa pag-alagad karon. Si Mirjam kag ako nagaarkila anay sing diutay nga hulot sing isa ukon duha ka semana samtang nagasaylo kami gikan sa isa ka parokya padulong sa lain nga parokya. Nian nagasaylo kami nga dala ang amon tanan nga bagahe sa amon bisikleta—mga panapton, mga kaserola, kag mga kahon sang mga libro. Isa gid yadto ka talan-awon!
“Indi pirme mahapos mangita sing dalayohan. Isa ka adlaw, sa tapos mangabudlay nga bulagay, si Mirjam kag ako nagkitaay sang mga alas otso sang gab-i.
“Nagpadayon kami sa pagbisikleta padulong sa masunod nga uma nga sa diin nakakita kami sing suga. Nian nakilal-an namon ang balay. Nahanusbo kami. Ang mga tawo didto nagpamatok gid sang magduaw kami anay sa ila. May pagpangalag-ag, nagpalapit si Mirjam sa puerta kag namangkot kon mahimo kami magdayon. Sa amon kakibot kag paumpaw, ginpasulod kami sang babayi kag ginpapungko. Dugaydugay gin-agda kami sa pinakamaayo nga hulot, nga sa diin may lamesa nga madamo sing kalan-on. Daw indi kami makapati sa amon nakita! Pagkatapos namon kaon, ginpakita sa amon ang isa ka hulot nga sa diin ang mga katre nahapinan sing pinakamaayo nga lino. Natingala kami sa sining pagbag-o sang panimuot.
“Sang masunod nga aga ginpapamahaw kami. Sang magbayad na kami, wala nila pagbatona ang amon kuwarta. Namangkot kami kon mahimo namon mahatag sa ila ang libro nga Deliverance subong regalo. ‘Huo, luyag namon ina nga libro,’ siling nila. ‘Ang amon kaingod nagsiling nga ginhatagan ninyo sia sini sang magdayon kamo sa iya. Nanugid sia sa amon nga naluyagan gid niya ini.’
“Yadto nga eksperiensia nagtudlo sa amon nga wala gid ikaw makahibalo kon ano ang mangin bunga sang isa ka literatura sa Biblia nga mapahamtang.”
Pag-unong sa Pag-alagad Subong Payunir
Sang 1942 ang paglakbay nga hilikuton gin-utod sa sulod sang isa ka tion, gani si Rosa kag ako nag-updanay liwat sa pagpayunir. Sang ulihi, nagmasakit ang iya amay, gani nag-untat kami sa bug-os tion nga ministeryo agod atipanon sia. Apang, sa gilayon nga gintugot na sang mga kahimtangan, nagbalik kami sa amon paborito nga hilikuton—ang bug-os tion nga pag-alagad. Sa pamatyag namon daw nagbalik kami sa amon husto nga kahimtangan. Sa amon pagpauli sa tapos sang mahago nga pagbantala sa bug-os nga adlaw, pirme kami nagasiling: “Ang pag-alagad subong payunir takus sang tanan nga sakripisyo kag panikasog nga ginakinahanglan sini.”
Sa sulod sang madamo nga tuig na karon nagapayunir kami sa nakatundan nga bahin sang Sweden, kag nagapangabudlay upod sa Kongregasyon sang Svenljunga sang mga Saksi ni Jehova. Bangod may tigulang na kami, wala na kami sing kapagsik subong sang una sang batabata pa kami, apang malipayon kami nga nakapadayon gihapon kami sa pagpayunir. Nakompleto ko na karon ang 55 ka tuig sa bug-os tion nga pag-alagad kag ang akon asawa 48. Apang, wala kami nagakabuhi sa memorya lamang, bisan pa nagapabatyag ini sa amon sing maayo. Walay sapayan kon daw ano na katigulang sa imo, dapat ka pirme magtulok sa unhan. Nagahandum kami sing sinsero nga kabay nga maglakat kami sing matutom kag mapainubuson upod sa amon Dios nga si Jehova kag sa ulihi maagom ang dalayawon nga mga pagpakamaayo sang iya Ginharian nga amon ginabantala sa bug-os tion nga pag-alagad sa madamo nga tuig.—Miqueas 6:8.
[Laragway sa pahina 26]
Ang akon asawa kag ako nag-updanay sa pag-alagad kay Jehova sa sulod sang 58 ka tuig