Sa Ila Indi Takus ang Kalibutan

“Ginbaton sila, ginkasaba sila, . . . kag sa ila indi takus ang kalibutan.”—HEBREO 11:37, 38.

1, 2. Sa idalom sang anong mga sirkunstansia nga ang mga saksi ni Jehova sang dumaan nga panahon naghupot sing integridad, kag paano naapektohan ang mga alagad sang Dios sa karon sang ila mga buhat?

ANG mga Saksi ni Jehova sang dumaan nga panahon naghupot sing integridad sa Dios walay sapayan sang madamong mga pagtilaw nga ginhatag sa ila sang dimatarong nga tawhanon nga katilingban. Halimbawa, ang mga alagad sang Dios ginbato kag ginpatay paagi sa espada. Nag-antos sila sing malaw-ay nga pagtratar kag kapipit-an. Apang wala sila mationg sa pagtuo. Sa pagkamatuod, nian, subong sang ginsiling ni apostol Pablo: “Sa ila indi takus ang kalibutan.”

² Ang nagainspirar sing pagtuo nga mga buhat sang diosnon nga mga tawo antes sang anaw, mga patriarka, kag ni Moises nagtiklod sa modernong-adlaw nga mga saksi ni Jehova nga alagaron ang Dios sa pagtuo. Apang kamusta ang iban nga ginsambit sa Hebreo kapitulo 11 kag 12? Paano kita makabenepisyo gikan sa pagbinagbinag sa mga bahin sang ila pagtuo?

Pagtuo sang mga Hukom, mga Hari, kag mga Manalagna

3. Paano ang mga hitabo may kahilabtanan sa Jerico kag kay Rahab nagapakita nga ang pagtuo dapat pamatod-an sing mga binuhatan?

³ Ang pagtuo indi lamang pagpati; dapat ini pamatod-an sang mga buhat. (Basaha ang Hebreo 11:30, 31.) Sang mapatay si Moises, ang pagtuo nagdul-ong sing mga kadalag-an sa mga Israelinhon sa Canaan, apang nagkinahanglan ini sing panikasog sa ila bahin. Halimbawa, bangod sa pagtuo ni Josue kag sang iban pa “nagkapukan ang mga kuta sang Jerico sa tapos nga nalibot ini sing pito ka adlaw.” Apang “bangod sa pagtuo si Rahab nga makihilawason wala mawala upod sa mga dimasinulundon [walay pagtuo nga mga pumuluyo sang Jerico].” Ngaa? “Kay ginbaton niya nga may paghidait ang [Israelinhon nga] mga lampitaw,” nagpamatuod sang iya pagtuo paagi sa pagtago sa ila gikan sa mga Canaanhon. Ang pagtuo ni Rahab may malig-on nga sadsaran sa mga balita nga “ginpamala ni Jehova ang mga tubig sang Dagat nga Mapula” gikan sa atubangan sang mga Israelinhon kag naghatag sa ila sing kadalag-an batok sa Amorinhon nga mga hari sang Sihon kag Og. Si Rahab naghimo sing nagakaigo nga mga pagbag-o sa moral kag ginpakamaayo bangod sang iya aktibo nga pagtuo paagi sa pagtipig sa iya upod sa iya panimalay sang napukan ang Jerico kag nangin katigulangan ni Jesucristo.—Josue 2:1-11; 6:20-23; Mateo 1:1, 5; Santiago 2:24-26.

4. Ano ang ginapadaku sang mga eksperiensia ni Gideon kag ni Barak tuhoy sa pagpakita sing pagtuo sa atubang sang katalagman?

⁴ Ang pagtuo ginapakita paagi sa bug-os nga pagsalig kay Jehova sa atubang sang katalagman. (Basaha ang Hebreo 11:32.) Ginbaton ni Pablo nga kulangon sia sing tion kon magsugid sia nahanungod kay “Gideon, Barak, Samson, Jefte, David kag kay Samuel kag iban pa nga mga manalagna,” nga ang mga binuhatan naghatag sing bugana nga pamatuod sang pagtuo kag pagsalig sa Dios sa makatalagam nga mga kahimtangan. Sa amo, bangod sa pagtuo kag upod ang isa ka hubon sang 300 lamang ka lalaki, si Hukom Gideon ginhatagan sing gahom sang Dios sa pagdugmok sa gahom militar sang mapiguson nga mga Midiahanon. (Hukom 7:1-25) Ginpalig-on ni manalagna Debora, si Hukom Barak kag ang imprantriya nga puersa sang 10,000 ka nasangkapan sing mapigaw nga mga lalaki nagmadinalag-on batok sa mas daku kaayo nga puersa ni Hari Jabin nga may 900 ka naarmasan nga kangga sa inaway nga ginamandoan ni Sisera.—Hukom 4:1–5:31.

5. Sa anong paagi ginpakita ni Samson kag ni Jefte ang pagtuo nga nagahatag sing pamatuod sa bug-os nga pagsalig kay Jehova?

⁵ Ang isa pa ka halimbawa sang pagtuo gikan sa mga adlaw sang mga hukom sang Israel amo si Samson, ang gamhanan nga kaaway sang mga Filistinhon. Matuod, nangin bulag sia nga bihag nila sang ulihi. Apang napatay ni Samson ang madamo sa ila sang gintumba niya ang mga haligi sang balay diin nagahiwat sila sing daku nga halad sa ila butig nga dios nga si Dagon. Huo, si Samson napatay upod sa mga Filistinhon apang indi subong wala sing paglaum nga paghikog. Sa pagtuo nagsalig sia kay Jehova kag nangabay sa iya paagi sa pangamuyo nga hatagan sia sing kinahanglanon nga kusog agod makatimalus sa mga kaaway sang Dios kag sang Iya katawhan. (Hukom 16:18-30) Si Jefte, nga ginhatagan ni Jehova sing kadalag-an batok sa mga Amonhon, nagpakita man sing pagtuo nga nagahatag sing pamatuod sang iya bug-os nga pagsalig kay Jehova. Paagi lamang sa sina nga pagtuo nga matuman niya ang iya panumpa sa Dios nga ihalad niya ang iya anak nga babayi sa pag-alagad kay Jehova subong dayon nga ulay.—Hukom 11:29-40.

6. Paano ginpakita ni David ang iya pagtuo?

⁶ Talalupangdon man sa iya pagtuo amo si David. Bata pa lamang sia sang makig-away sia sa Filistinhon nga higante nga si Goliat. ‘Ikaw nagakari sa akon nga may espada kag may bangkaw kag may sumbiling,’ siling ni David, ‘apang ako nagakari sa imo sa ngalan ni Jehova sang mga kasoldadosan.’ Huo, si David nagsalig sa Dios, nagpatay sa higante nga Filistinhon, kag nangin maisog nga hangaway kag hari sa intereses sang katawhan sang Dios. Kag bangod sang pagtuo ni David, isa sia ka tawo nga kalahamut-an sa tagipusuon ni Jehova. (1 Samuel 17:4, 45-51; Binuhatan 13:22) Sa bug-os nga kabuhi, si Samuel kag ang iban pa nga mga manalagna nagpakita man sing daku nga pagtuo kag bug-os nga pagsalig sa Dios. (1 Samuel 1:19-28; 7:15-17) Daw ano kaayo nga halimbawa para sa karon nga mga alagad ni Jehova, pamatan-on kag tigulang!

7. (a) Sin-o ang “paagi sa pagtuo nakadaug sing mga ginharian”? (b) Sin-o ang “nakahimo sing pagkamatarong” paagi sa pagtuo?

⁷ Bangod sa pagtuo madinalag-on naton nga maatubang ang tagsa ka pagtilaw sang integridad kag matuman ang bisan ano nga nahisuno sa balaan nga kabubut-on. (Basaha ang Hebreo 11:33, 34.) Sang nagasitar sa dugang nga mga buhat sang pagtuo, maathag nga ginahunahuna ni Pablo ang Hebreohanon nga mga hukom, mga hari, kag mga manalagna, kay ginhingadlan niya sila. “Paagi sa pagtuo” ang mga hukom subong ni Gideon kag Jefte “nakadaug sing mga ginharian.” Amo man si Hari David, nga naglupig sa mga Filistinhon, Moabinhon, Siriahanon, Edominhon, kag iban pa. (2 Samuel 8:1-14) Subong paagi sa pagtuo, ang matarong nga mga hukom “nakahimo sing pagkamatarong,” kag ang matarong nga laygay ni Samuel kag sang iban nga mga manalagna nagpahulag sa dimagkubos sa iban nga likawan ukon biyaan ang sayop nga buhat.—1 Samuel 12:20-25; Isaias 1:10-20.

8. Ano nga saad ang natigayon ni David, kag sa ano ini nagdul-ong?

⁸ Si David amo ang isa nga paagi sa pagtuo “nakaagom sing mga saad.” Si Jehova nanaad sa iya: “Ang imo trono palig-unon sing dayon.” (2 Samuel 7:11-16) Kag gintuman sang Dios ina nga saad paagi sa pagtukod sa Mesianikong Ginharian sang 1914.—Isaias 9:6, 7; Daniel 7:13, 14.

9. Sa idalom sang anong mga sirkunstansia ‘napakium ang mga baba sang mga leon’?

⁹ Si manalagna Daniel madinalag-on nga nakaatubang sa pagtilaw sa integridad sang padayon sia nga nangamuyo sa Dios suno sa iya matag-adlaw nga kinabatasan walay sapayan sang pagdumili sang hari sa sini. Bangod sa pagtuo sang isa nga nagahupot sing integridad, si Daniel “nakapakium sang mga baba sang mga leon” amo kon ngaa gintipigan sia ni Jehova nga buhi sa yungib sang leon nga sa sini gintagbong sia.—Daniel 6:4-23.

10. Sin-o ang “nakapalong sang gahom sang kalayo” paagi sa pagtuo, kag ano ang mapahimo sa aton sang kaanggid nga pagtuo?

¹⁰ Ang nagahupot sing integridad nga mga kaupdanan ni Daniel nga sanday Sadrac, Mesac, kag Abednego “nakapalong sang gahom sang kalayo.” Sang ginpahog sing kamatayon sa tuman kainit nga hurno, ginsilingan nila si Hari Nabokodonosor nga, luwason man sila sang ila Dios ukon indi, indi sila magaalagad sa dios sang hari sang Babilonia ukon magasimba sa larawan nga ginpatindog niya. Wala pagpalonga ni Jehova ang kalayo sa sina nga hurno, apang ginpat-od niya nga indi maano ang tatlo ka Hebreohanon. (Daniel 3:1-30) Ang kaanggid nga pagtuo magahimo sa aton nga mahuptan ang integridad sa Dios tubtob sa punto sang posible nga kamatayon sa mga kamut sang kaaway.—Bugna 2:10.

11. (a) Paagi sa pagtuo, sin-o ang “nakalikaw sa sulab sang espada”? (b) Sin-o ang “nagbakud” paagi sa pagtuo? (c) Sin-o ang “naggamhanan sa inaway” kag “nakapapalagyo sang mga hangaway sang mga dumuluong”?

¹¹ Si David “nakalikaw sa sulab sang espada” sang mga tinawo ni Hari Saul. (1 Samuel 19:9-17) Ang mga manalagna nga sanday Elias kag Eliseo nakalikaw man sa kamatayon paagi sa espada. (1 Hari 19:1-3; 2 Hari 6:11-23) Apang sin-o ang ‘gikan sa kaluyahon nagbakud paagi sa pagtuo’? Bueno, ginkabig ni Gideon ang iya kaugalingon kag ang iya tinawo nga tuman kaluya sa pagluwas sa Israel gikan sa mga Midiahanon. Apang ‘ginbakud’ sia sang Dios, nga naghatag sa iya sing kadalag-an—kag paagi lamang ina sa 300 ka lalaki! (Hukom 6:14-16; 7:2-7, 22) “Gikan sa kaluyahon” sang ang iya buhok gin-utod, si Samson ‘ginbakud’ ni Jehova kag nagdul-ong sa kamatayon sang madamong Filistinhon. (Hukom 16:19-21, 28-30; ipaanggid ang Hukom 15:13-19.) Mahimo nga ginhunahuna man ni Pablo si Hari Ezequias subong isa nga “nagbakud” gikan sa kaluyahon sa militar kag sa pisikal. (Isaias 37:1–38:22) Sa tunga sang mga alagad sang Dios nga “naggamhanan sa inaway” amo si Hukom Jefte kag si Hari David. (Hukom 11:32, 33; 2 Samuel 22:1, 2, 30-38) Kag yadtong “nakapapalagyo sang mga hangaway sang mga dumuluong” naglakip kay Hukom Barak. (Hukom 4:14-16) Ining tanan nga mga buhat dapat magahaylo sa aton nga bangod sa pagtuo madinalag-on naton nga masugata ang tagsa ka pagtilaw sa aton integridad kag matuman ang bisan ano nga nahisuno sa kabubut-on ni Jehova.

Ang Iban nga May Huaran nga Pagtuo

12. (a) Anong “mga babayi [ang] nakabaton sang ila mga patay paagi sa pagkabanhaw”? (b) Sa anong paagi ang pagkabanhaw sang pila ka lalaki sang pagtuo “maayo pa”?

¹² Ang pagtuo nagalakip sang pagpati sa pagkabanhaw, isa ka paglaum nga nagabulig sa aton nga huptan ang integridad sa Dios. (Basaha ang Hebreo 11:35.) Bangod sa pagtuo, “ang mga babayi nakabaton sang ila mga patay paagi sa pagkabanhaw.” Paagi sa pagtuo kag gahom sang Dios, nabanhaw ni Elias ang anak nga lalaki sang isa ka balo sa Sarepta kag nabanhaw ni Eliseo pa kabuhi ang bata nga lalaki sang Shunaminhon nga babayi. (1 Hari 17:17-24; 2 Hari 4:17-37) “Ang iban nga mga lalaki ginsakit [sing literal, “ginbunal sing lipak”] nga wala magbaton sang paghilway paagi sa pila ka gawad, agod nga matigayon nila ang mas maayo pa nga pagkabanhaw.” Sing hayag ining wala makilal-i sa Kasulatan nga mga saksi ni Jehova ginsakit tubtob kamatayon, nga wala magbaton sang paghilway nga nagakinahanglan sing pagkompromiso sa ila pagtuo. Ang ila pagkabanhaw mangin “mas maayo pa” bangod wala na ini sing dimalikawan nga pagkinahanglan nga mapatay liwat (subong sadtong ginhimo ni Elias kag Eliseo) kag mahanabo sa idalom sang paggahom sa Ginharian ni Jesucristo, ang “Dayon nga Amay” nga ang gawad nagahatag sing kahigayunan para sa walay katapusan nga kabuhi sa duta.—Isaias 9:6; Juan 5:28, 29.

13. (a) Sin-o ang nag-antos sing “pag-uligyat kag paghampak”? (b) Sin-o ang nakaeksperiensia sang “mga gapus kag pagbilanggo”?

¹³ Kon kita may pagtuo, sarang naton mabatas ang paghingabot. (Basaha ang Hebreo 11:36-38.) Kon kita ginahingabot, makabulig ang pagdumdum sa paglaum nga pagkabanhaw kag ang paghibalo nga sarang kita masakdag sang Dios subong sang ginhimo niya sa “iban [nga] nag-antos sang ila pagtilaw [ukon, sang pagtilaw sa pagtuo] sang pag-uligyat kag paghampak, kag bisan pa sing mga gapus kag pagbilanggo.” Ang mga Israelinhon “padayon nga . . . ginyubit ang iya mga manalagna, tubtob nga nag-ibwal ang kasingkal ni Jehova batok sa iya katawhan.” (2 Cronica 36:15, 16) Bangod sa pagtuo, si Micaya, si Eliseo, kag iban pa nga mga alagad nagbatas sing “pag-uligyat.” (1 Hari 22:24; 2 Hari 2:23, 24; Salmo 42:3) Ang “paghampak” kilala anay sa mga adlaw sang mga hari kag mga manalagna sang Israel, kag “ginbunal” sang mga kaaway si Jeremias, wala lamang magtampa sa iya subong insulto. Ang “mga gapus kag pagbilanggo” mahimo magapahanumdum sa aton sang iya mga eksperiensia subong man sang iya sang mga manalagna nga sanday Micaya kag Hanani. (Jeremias 20:1, 2; 37:15; 1 Hari 12:11; 22:26, 27; 2 Cronica 16:7, 10) Bangod sa pagtigayon sing kaanggid nga pagtuo, ang modernong-adlaw nga mga saksi ni Jehova nakasarang sa pagbatas sa kaanggid nga mga pag-antos “tungod sa pagkamatarong.”—1 Pedro 3:14.

14. (a) Sin-o ang iban sadtong “ginbato”? (b) Sin-o ang mahimo nga “ginpang-utud sa lagari”?

¹⁴ “Ginbato sila,” siling ni Pablo. Ang isa sina nga tawo sang pagtuo amo si Zacarias, anak sang saserdote nga si Joaida. Ginlikupan sang espiritu sang Dios, nagpamulong sia batok sa mga apostata sang Juda. Ang resulta? Sa mando ni Hari Joas, ginbato sia sang mga manughimbon tubtob kamatayon sa luwang sang balay ni Jehova. (2 Cronica 24:20-22; Mateo 23:33-35) Si Pablo nagdugang: “Ginkasaba sila, ginpang-utud sa lagari.” Ayhan nahunahuna niya si manalagna Micaya subong isa sadtong “ginkasaba,” kag ginasiling sang dipat-od nga tradisyon sang Judiyo nga si Isaias gin-utud sa lagari sa pagginahom ni Hari Manases.—1 Hari 22:24-28.

15. Sin-o ang nag-antos sing “kapintas” kag “nagadalangdalang sa mga kamingawan”?

¹⁵ Ang iban “ginpamatay sa espada,” subong, halimbawa, sa mga masigkamanalagna sang Dios ni Elias nga “ginpamatay sa espada” sa mga adlaw sang malaut nga si Hari Ahab. (1 Hari 19:9, 10) Si Elias kag si Eliseo amo ang iban sadtong may pagtuo nga “nagdalangdalang nga napanaptan sang mga panit sang mga karnero kag mga kanding, nga nawad-an, ginpapiotan, ginpintasan.” (1 Hari 19:5-8, 19; 2 Hari 1:8; 2:13; ipaanggid ang Jeremias 38:6.) Yadtong “nagadalangdalang sa mga kamingawan kag kabukiran kag sa mga lungib kag mga gikab sang duta” subong mga ginahingabot nagalakip indi lamang kay Elias kag kay Eliseo kundi sa 100 man ka manalagna nga gintago ni Obadias sing tig-50 sa isa ka yungib, nagahatag sa ila sing tinapay kag tubig sang ang idolatroso nga si Reyna Jezebel nagsugod sa “pag-utod sa mga manalagna ni Jehova.” (1 Hari 18:4, 13; 2 Hari 2:13; 6:13, 30, 31) Daw ano ka mga nagahupot sing integridad! Indi katingalahan nga si Pablo nagsiling: “Sa ila indi takus ang kalibutan [dimatarong tawhanon nga katilingban]”!

16. (a) Ngaa ang antes Cristiano nga mga saksi ni Jehova wala pa makabaton sang “katumanan sang ginsaad”? (b) Para sa mga saksi ni Jehova sang panahon sang antes Cristiano, ang ‘paghimpit’ dapat nga may kaangtanan sa ano?

¹⁶ Ang pagtuo nagahatag sa aton sing kombiksion nga sa gintalana nga tion sang Dios ang tanan nga nagahigugma sa iya “makabaton sing katumanan sang ginsaad.” (Basaha ang Hebreo 11:39, 40.) Ang wala pa Cristiano nga mga nagahupot sing integridad “nagpanaksi sa ila paagi sa ila pagtuo,” nga karon isa ka bagay nga narekord na sa Kasulatan. Apang wala pa nila mabaton ang “katumanan sang ginsaad” sang Dios paagi sa dutan-on nga pagkabanhaw upod ang paglaum nga kabuhi nga walay katapusan sa idalom sang paggahom sang Ginharian. Ngaa? “Agod nga indi sila mahimpit nga wala” ang hinaplas nga mga sumulunod ni Jesus, nga sa ila “ang Dios may natigana nga maayo pa”—dimamalatyon nga langitnon nga kabuhi kag mga pribilehiyo nga maggahom kaupod ni Cristo Jesus. Paagi sa ila pagkabanhaw, nga nagsugod sa tapos matukod ang Ginharian sang 1914, ang hinaplas nga mga Cristiano ‘ginhimpit’ sa mga langit sa wala pa ang mga saksi ni Jehova antes sang Cristiano nga panahon banhawon sa duta. (1 Corinto 15:50-57; Bugna 12:1-5) Para sa dumaan nga mga saksi, ang ‘paghimpit’ sa ila nagahilabot sa ila dutan-on nga pagkabanhaw, sa ila ‘kahilwayan gikan sa pagkaulipon sang kaduluntan’ sa ulihi, kag sa pagtigayon nila sing tawhanon nga kahimpitan paagi sa mga pag-alagad sang Mataas nga Saserdote nga si Jesucristo kag sang iya 144,000 ka langitnon nga kabulig nga mga saserdote sa iya Isa ka Libo ka Tuig nga Paggahom.—Roma 8:20, 21; Hebreo 7:26; Bugna 14:1; 20:4-6.

Hupti nga Ginatan-aw ang Manughimpit sang Aton Pagtuo

17, 18. (a) Agod magmadinalag-on sa aton dalaganon para sa dayon nga kabuhi, ano ang dapat naton nga himuon? (b) Paano si Jesucristo “Manughimpit sang aton pagtuo”?

¹⁷ Kay nahinun-anonan na ang mga binuhatan sang antes Cristiano nga mga saksi ni Jehova, gintudlo ni Pablo ang panguna nga halimbawa sang pagtuo. (Basaha ang Hebreo 12:1-3.) Daw ano ka tuboran sang pagpalig-on ang matigayon sa ‘tuman kadamol nga panganod sang mga saksi nga nagalibot sa aton’! Nagapahulag ini sa aton nga kuhaon ang tagsa ka lulan nga nagaupang sa aton espirituwal nga pag-uswag. Nagabulig ini sa aton sa paglikaw sa sala sang pagwasi ukon kakulang sing pagtuo kag sa pagdalagan nga may pagbatas sa Cristianong dalaganon para sa kabuhi nga walay katapusan. Apang, agob malab-ot ang aton tulumuron, dapat kita maghimo sing labi pa. Apang ano ina?

¹⁸ Agod magmadinalag-on kita sa aton dalaganon para sa dayon nga kabuhi sa bag-ong sistema sang Dios, dapat kita “magtulok sa Pangulong Ahente [ukon, Pangulong Lider] kag Manughimpit sang aton pagtuo, si Jesus.” Ang pagtuo ni Abraham kag sang iban pa nga mga nagahupot sing integridad antes sa dutan-on nga ministeryo ni Jesucristo mga dihimpit, indi kompleto, sa bagay nga wala nila mahangpi anay ang wala pa matuman nga mga tagna nahanungod sa Mesias. (Ipaanggid ang 1 Pedro 1:10-12.) Apang paagi sa pagkabun-ag, ministeryo, kamatayon, kag pagkabanhaw ni Jesus, madamong Mesianikong mga tagna ang natuman. Sa amo ang pagtuo sa nahimpit nga kahulugan “nag-abot” paagi kay Jesucristo. (Galacia 3:24, 25) Dugang pa, gikan sa iya langitnon nga kahimtangan si Jesus padayon nga nangin Manughimpit sang pagtuo sang iya mga sumulunod, subong sang ginbubo sa ila ang balaan nga espiritu sang Pentecostes sang 33 C.E. kag sang pagpahayag nga amat-amat nga nagpalambo sang ila pagtuo. (Binuhatan 2:32, 33; Roma 10:17; Bugna 1:1, 2; 22:16) Daw ano kita ka mapasalamaton tungod sining “Matutom nga Saksi,” sining “Pangulong Lider” sang mga Saksi ni Jehova.—Bugna 1:5; Mateo 23:10.

19. Ngaa dapat naton ‘talupangdon sing maayo’ si Jesus?

¹⁹ Sanglit indi mahapos ang pagbatas sa mga pasipala sang mga walay pagtuo, si Pablo naglaygay: “Talupangda sia [si Jesus] nga nagbatas sang amo nga pagsumpong sang mga makasasala batok sa iya kaugalingon, agod nga indi kamo paglapyoon ukon pagpunawon sa inyo mga kalag.” Sa pagkamatuod, kon ginatuon naton ang aton mga mata sa “Matutom nga Saksi,” si Jesucristo, indi gid kita paglapyoon sa paghimo sang balaan nga kabubut-on.—Juan 4:34.

20. Ano ang pila ka butang nga naton-an mo nahanungod sa pagtuo paagi sa pagbinagbinag sa Hebreo 11:1–12:3?

²⁰ Gikan sa ‘tama kadamol nga mga saksi’ madamo ang naton-an naton nahanungod sa mga bahin sang pagtuo. Halimbawa, ang pagtuo nga kaangay sa iya ni Abel nagapasangkad sang aton apresasyon sa halad ni Jesus. Ang matuod nga pagtuo nagahimo sa aton nga maisog nga mga saksi, subong nga si Enoc masidla nga nagpamulong sang mensahe ni Jehova. Kaangay kay Noe, ang aton pagtuo nagapahulag sa aton nga sundon sing maayo ang mga instruksion sang Dios kag mag-alagad subong mga manugbantala sang pagkamatarong. Ang pagtuo ni Abraham nagapatudok sa aton sang kinahanglanon nga tumanon ang Dios kag saligan ang Iya mga saad, bisan pa nga ang iban sini wala pa matuman. Ang halimbawa ni Moises nagapakita nga ang pagtuo nagahimo sa aton nga magpabilin nga walay dagta sining kalibutan kag magtindog nga matutom kaupod sa katawhan ni Jehova. Ang mga binuhatan sang mga hukom, mga hari, kag mga manalagna sang Israel nagapamatuod nga ang pagtuo sa Dios sarang makasakdag sa aton sa tunga sang paghingabot kag mga pagtilaw. Kag daw ano kita ka mapasalamaton nga ang superlatibo nga halimbawa ni Jesucristo nagalig-on kag nagahimo sang aton pagtuo nga dimationg! Busa, upod kay Jehova subong aton Lider kag sa kusog sang aton Dios, padayon naton nga ipadayag ang mabinatason nga pagtuo subong mga Saksi ni Jehova!

Ano ang Imo mga Sabat?

◻ Ano nga buhat sang antes Cristiano nga mga saksi ni Jehova ang nagapamatuod nga ang pagtuo ginapakita paagi sa bug-os nga pagsalig sa Dios sa atubang sang katalagman?

◻ Ngaa masiling nga bangod sa pagtuo masugata naton sing madinalag-on ang tagsa ka pagtilaw sa aton integridad?

◻ Ano ang pamatuod nga paagi sa pagtuo mabatas naton ang paghingabot?

◻ Ngaa gintawag si Jesus nga “Manughimpit sang aton pagtuo”?

◻ Ano ang pila sa madamong bahin sang pagtuo?

[Laragway sa pahina 16, 17]

Si David nagpakita sing pagtuo paagi sa pagsalig sing bug-os kay Jehova. Isa gid ka maayo nga halimbawa para sa katawhan ni Jehova karon!

[Laragway sa pahina 18]

“Ang mga babayi nakabaton sang ila mga patay paagi sa pagkabanhaw.” Ang pagtuo sa pagkabanhaw nagabulig sa aton nga mahuptan ang integridad kay Jehova