Mga Pamangkot Gikan sa mga Bumalasa
◼ Kon ang isa magpirma sa Deklarasyon nga Nagapanaad sing Katutom, mahimo bala matapos ina nga kahimusan?
Ang pamangkot nagahilabot sa aman nga indi maaplikar sa kalabanan nga kadutaan. Tan-awon naton anay kon ano inang solemne temporaryo nga kahimusan.
Ang The Watchtower sang Marso 15, 1977, naghinun-anon sa problema nga nagaluntad sa iban nga kadutaan. Bisan nga ginapahanugot sang Dios ang diborsio sa Makasulatanhon nga mga rason, ang iban nga mga pangulohan wala sing aman sa diborsio. (Mateo 19:9) Ukon ang kasugoan nagapabudlay katama sa pagkuha sing diborsio, ayhan nagakinahanglan sing malawig nga tinuig. Gani, ina nga guwa sang magasin nagpaathag nga ang mga Saksi ni Jehova may pahanugot nga naaplikar lamang sa sina nga kadutaan; nagadalahig ini sa Deklarasyon nga Nagapanaad sing Katutom. Binagbinaga ang halimbawa sang kahimusan:
Ang isa ka babayi nakatuon sang Cristianong kamatuoran samtang nagapuyo upod (kag ayhan may kabataan) sa tawo nga madugay na nga bulag sa iya legal nga asawa. Ang bag-ong interesado nga babayi matutom sa iya kag maluyag nga pakaslan sia, apang imposible ina bangod ang kasugoan wala nagatugot sa lalaki nga diborsiohan ang iya legal nga asawa. Gani, kon ang mga gulang sang kongregasyon kombinsido nga ang iya relasyon upod sa sining lalaki kalahamut-an sa Dios, tugotan nila sia nga magpirma sing Deklarasyon nga Nagapanaad sing Katutom. Ginasiling niya diri nga ginhimo niya ang tanan nga masarangan niya agod ipalegal ini nga relasyon; nga ginakilala niya sa atubangan sang Dios ang nagahigut nga kinaugali sang Deklarasyon; kag nagasaad sia nga magpakasal sing legal sa gilayon kon ini posible, sa amo nagatapos sang Deklarasyon nga naghimo sa iya nga mangin bahin sang Cristianong kongregasyon.
Apang, ang pamangkot nagautwas: Kon sia (ukon ang bisan sin-o sa sina nga kahimtangan) makasulod sa kongregasyon sa idalom sina nga Deklarasyon, may iban pa bala nga paagi nga natapos ini ukon mahimo matapos?
Ang Deklarasyon mismo nagasiling nga ang nagpirma ‘nagakilala sang iya relasyon subong nagahugpong nga higut sa atubangan ni Jehova nga Dios kag sa atubangan sang tanan nga mga tawo, nga patihan kag kilalahon nahisuno sa mga prinsipio sang Pulong sang Dios.’ Busa, gikan sa pagtamod sang kongregasyon, nagahigut ini sing moral subong legal nga pag-asawahay. Apang, ang kamatayon sang tiayon nagatapos sa pag-asawahay ukon paghiusa sa idalom sina nga Deklarasyon. (Roma 7:2) Ang Biblia nagasiling man nga kon ang tiayon makasala sing porneiʹa (seksuwal nga imoralidad sa guwa sang pag-asawahay), ang walay sala nga tiayon sarang makakuha sing diborsio. (Mateo 5:32; 19:9) Sing kaanggid, sa idalom sang Deklarasyon nga Nagapanaad sing Katutom, ang imoralidad sang tiayon mahimo mangin rason sa pagtapos sa paghiusa, kon ginapakamaayo sang walay sala nga tiayon. Ang walay sala nga Cristiano dapat magahatag sing pamatuod sang pagluib sa mga gulang. Magatapos ini sang Deklarasyon; pagkatapos sini ang isa nga walay sala Makasulatanhon na nga hilway.
Nagakilala nga ginakabig sang kongregasyon ang Deklarasyon nga Nagapanaad sing Katutom subong nagahigut sa moral subong legal nga pag-asawahay nagapautwas sing may kahilabtanan nga hulusayon. Nagautwas ini kon ang sablag anay sa pag-asawahay makuha. Pananglitan, sa halimbawa sa hitaas, ang legal nga asawa sang lalaki mahimo nga napatay ukon mahimo nga ginalegalisar sang pangulohan ang diborsio, kag handa niya nga pakaslan sing legal ang Cristianong babayi. Sa sinang kaso ang sister indi padayon nga mapaidalom sa Deklarasyon nga Nagapanaad sing Katutom, bisan pa tungod sa mga rason nga nahuya magpakasal sing legal karon ukon bangod madula niya ang pila ka materyal nga bentaha. Nahisuno sa iya Deklarasyon, dapat sia karon maghimo sing mga tikang agod ilegalisar ang ila pag-asawahay. Kon indi, ibale-wala sang kongregasyon ang Deklarasyon, kag dapat sia magbulag sa lalaki ukon mahimo nga ma-disfellowship.
Apang, ano abi kon ang ditumuluo indi magpakasal sa iya? Sang magpirma sia sa Deklarasyon, gintamod sang kongregasyon ang pag-asawahay subong nagahigut kag moral. Ang katunayan nga indi niya mapilit ang iya ditumuluo nga tiayon nga ilegalisar ang ila pag-asawahay wala karon nagahimo sa pag-updanay nga imoral. Gani padayon sia nga mangin matutom nga tiayon, nga wala na kinahanglan magbulag sa ditumuluo, bisan pa magapadayon sia sa iya mga panikasog nga ipalegal ang pag-asawahay. (Nagabag-o ini sang komento sa “Mga Pamangkot Gikan sa mga Bumalasa” sang Nobiembre 1, 1985 sa The Watchtower.)—Ipaanggid ang Mga Hukom 11:35; Lucas 18:1-5.
Sa pagkamatuod, ang kahimtangan tuhay kon ang duha ka partido nagpirma sa Deklarasyon kag nangin bawtismado nga mga Cristiano. Sa sining kaso, ang duha solemne nga nagsumpa nga magapakasal sing legal kon makuha ang sablag sa pangulohan, nga sa sini nga punto ang Deklarasyon matapos. Obligado sila nga himuon ini sa sulod sang rasonable nga tion, ukon magbulagay agod magpabilin sa kongregasyon. (Ipaanggid ang “Mga Pamangkot Gikan sa mga Bumalasa” sa The Watchtower sang Septiembre 1, 1982.) Kon magbulagay sila, ang nagahigut sing moral nga Deklarasyon naaplikar gihapon, gani indi sila hilway sa pagpakasal sa iban.—Ipaanggid ang 1 Corinto 7:10, 11.
Bisan pa nga ang kahimusan para sa Deklarasyon nga Nagapanaad sing Katutom wala naaplikar sa kalabanan nga mga lugar, ang ginhinun-anon sa hitaas nasentro sa talaksan sang Biblia nga naaplikar bisan diin: “Paghuptan sing dungganon sang tanan ang pag-asawahay, kag ang higdaan sang pagkasal dipagdagtaan, kay hukman sang Dios ang mga makihilawason kag mga makilahion.”—Hebreo 13:4.