Report sang mga Manugbantala sang Ginharian
Ginpadaku nga mga Pasilidad Agod Magbagay sa Pag-uswag sang Ginharian
ANG adlaw sang dedikasyon para sa bag-o lang mapadaku nga mga pasilidad sang sanga sang mga Saksi ni Jehova isa gid ka makalilipay nga adlaw sa isla sang Jamaica sa Caribbean. Kinahanglanon gid ining pagpadaku bangod sang pagpakamaayo ni Jehova sa matutom nga mga panikasog sang kauturan sa pagbantala sing maayong balita sa sining matahom nga tropiko nga isla.
Ginpatindog ang puluy-an para sa mga misyonero sa Jamaica sang 1946. Sa pagpanguna sang mga misyonero sa hilikuton, madasig gid ang pagdamo sang mga manugbantala, amo kon ngaa sa sulod lamang sang napulo ka tuig ang promedyo nga kadamuon sang mga Saksi nga nagareport kada bulan nagdugang halin sa 732 tubtob sa 3,216. Agod maatipan ang pag-uswag, nangin kinahanglanon ang pagplano sing bag-o nga mga pasilidad.
Ginbakal ang duta sang 1954 kag ginsugdan ang pagtukod sing isa ka mapag-on duha sing panalgan nga tinukod sa malinong nga duog sang Kingston. Nahuman ini sang Mayo 1958. Ang kadamuon sang mga manugbantala sadto nga tuig nag-uswag tubtob sa kataason nga 4,367.
Nagpadayon ang ‘pagtanom’ kag ‘pagbunyag’ kag si Jehova ‘nagpatubo sini,’ amo kon ngaa sang 1983 ang kadamuon sang mga manugbantala nag-uswag tubtob sa kapin sa 7,000, nga nagpautwas sing kinahanglanon para sa dugang pa nga pagpadaku. (1 Corinto 3:6) Ang Komite sang Sanga, upod ang pagtugot sang Nagadumala nga Hubon, namat-od nga padakuon ang mga pasilidad. Kapin sa 250 ka kauturan gikan sa bug-os nga isla ang nagkari agod magbulig. Ang lantip kag indi lantip nga mga manugpangabudlay nagboluntaryo sang ila serbisyo subong mga kantero, panday, elektrisyan, kag tubero. Ang ila mga edad halin sa 10 tubtob sa 86. Ang iban naghatag sing pinansial nga amot para sa proyekto, ang iban nag-amot sing kalan-on para sa mga manugpangabudlay, kag ang iban pa gid nagbukas sang ila mga puluy-an agod dayunan sang mga boluntaryo nga nagkari gikan sa malayo. Sa isa ka tuig, natapos ang proyekto, nga amo ang dugang nga ikatlo nga panalgan nga may lima ka kuarto kag isa ka duog para sa kalingawan, isa ka kuarto sa ikaduha nga panalgan, kag 400 pie kuadrado (37 metro kuadrado) nga bodega, agod gamiton sang 11 ka katapo sang pamilya nga Bethel.
Si Milton Henschel, nga katapo sang Nagadumala nga Hubon sang mga Saksi ni Jehova, ang naghatag sing pamulongpulong para sa dedikasyon sang Pebrero 22, 1986. Nagpamulongpulong sia sa tema nga “Ang Madaugon nga Pagprosesyon.” (2 Corinto 2:14) Ang mga namati sa programa sang dedikasyon may kabilugan nga 2,949. Sa sini, 380 ang namati sa Kingdom Hall kag sa iban pa nga bahin sang tinukod, kag ang iban gin-angot paagi sa telepono kag radyo padulong sa iban pa nga mga Kingdom Hall sa siudad kag sa awditoryom sang isa ka eskwelahan.
Ang kalabanan sang mga gin-agda sa Kingdom Hall sang sanga amo ang kauturan nga lalaki kag babayi nga nangin sa kamatuoran sa sulod sang 30 ka tuig ukon kapin pa. Madamo ang nagpabutyag sang ila apresasyon sa maayo nga dugang sa tinukod. Ginalauman namon nga madamo pa sa “dakung kadam-an” sang “iban nga mga karnero” ang magabuylog sa madaugon nga pagprosesyon samtang ang bag-o nga mga pasilidad sang sanga ginagamit para sa pag-uswag sang Ginharian sa Jamaica.