Magaunong Ka Bala sa Kamatuoran?

KON ikaw nagsugod sa pagtuon sang Biblia upod sa mga Saksi ni Jehova, ang pangunang pamangkot nga dapat mo sabton sa imo kaayawan amo, Amo bala ini ang kamatuoran? Kon nasapwan mo nga amo ini, magaunong ka bala sa sini? Ang kaanggid nga pamangkot ginaatubang sang mga tawo sang kaadlawan ni Jesucristo kag sang iya mga apostoles.

Sang magbantala ang mga apostoles tuhoy kay Jesus, ano ang reaksion sang mga tawo? Bueno, ang balita nahanungod sa Ginharian ni Cristo, sa iya mga milagro, sa iya halad gawad, sa iya pagkabanhaw, kag kabuhi nga walay katapusan maayo pamatian, kag ginbaton sang madamo nga ang nabatian nila amo ang kamatuoran. Apang ang kalabanan wala. Sa katunayan, ang Cristianong organisasyon sadto nga tion “ginapakamalain” bisan diin. (Binuhatan 28:22) Gani ang pagbaton sa mga kamatuoran nga ginabantala sang mga disipulo ni Jesus nagakahulugan sing indi pag-ugyon sa kilala nga opinyon kag pag-atubang sa pagpamatok. Busa ang mga interesado dapat magapamatuod sa ila kaugalingon nga kaayawan nga ang Cristianong mga panudlo amo ang kamatuoran. Sa sina lamang nga sila makatindog nga malig-on.

Sang ginduaw ni Pablo kag Bernabe ang Antioquia sa Asia Minor, madamo ang namati sa ila mensahe upod ang hanuot nga interes. Ang rekord sang Biblia nagasiling: “Sang nagguwa sila, nagpakiluoy ang katawhan nga ining mga pulong mahambal sa ila sa madason nga adlaw nga inugpahuway. Sa madason nga adlaw nga inugpahuway ang kalabanan sang siudad nag­tipon sa pagpamati sang pulong sang Dios.” (Binuhatan 13:42, 44) Apang ining nauna nga interes nag-ugdaw sa madamo nga tawo sang mabatian nila ang emosyonal nga mga manugpamatok nga nagapamulong batok sa mga apostoles.

Ang bersikulo 45 sang Binuhatan kapitulo 13 nagasiling: “Sang nakita sang mga Judiyo ang mga kadam-an, napuno sila sang kahisa, kag ginsumpung ang mga butang nga ginpamulong ni Pablo.” Nian ang bersikulo 50 nagapadayon sa pagsiling: “Apang ginsugyot sang mga Juidyo ang mga mainampuon kag lutaw nga mga babayi kag ang mga punoan sang siudad, kag nagsutsut sing paghingabot batok kay Pablo kag kay Bernabe kag ginsubol sila sa ila ginsakpan.” Ang mga interesado dapat mamat-od kon bala padayon sila nga magapamati sa mga sumulunod ni Jesus walay sapayan sang paghingabot. Dapat nila batunon ang ila nabatian nga kamaturoan ukon takpan ang ila mga dulunggan sa sini.

Pagpamatok Karon

Subong nga ang mga Cristiano ginapamatokan anay sang nahaunang siglo C.E., ang karon nga mga manugpamatok nagatinguha man nga takpan ang mga dulunggan sang mga interesado sa Makasulatanhon nga mga kamatuoran nga ginatudlo sang mga Saksi ni Jehova. Ang mga abyan, mga himata, kag relihiosong mga lider masunson nga nagatinguha sa pagpalas-ay sa mga interesado gikan sa pagtuon sang Biblia upod sa mga Saksi. Wala sing Makasulatanhon nga pamatuod, ginasumpakil sang mga manugpamatok ang gintudlo kag nagsumbong sing dimatuod.

Ano ang dapat himuon sang mga interesado? Pahanugutan bala nila ang mga pinamulong sang mga manugpamatok sa pagtakop sang ila mga hunahuna kag mga dulunggan subong sang ginhimo sang iban sa Antioquia? Ukon pamatud-an bala nila sa ila kaugalingon gikan sa Biblia kon bala ang ginaton-an nila kamatuoran ukon indi?

Gindayaw ang nagbaton nga mga tawo sa siudad sang Berea bangod gin-usisa nila ang Kasulatan agod tan-awon kon bala ang ginsiling ni Pablo sa ila amo ang kamatuoran. Sang matukiban nga ang ginsiling niya kamatuoran, nagtindog sila sing malig-on sa sini. Ginasilingan kita: “Ang [mga taga-Berea] labi pa ka dungganon sang sa mga yadto sa Tesalonica, kay ginbaton nila ang pulong sing hanuot, nga ginausisa ang mga kasulatan adlaw-adlaw kon ining mga butang matuod.”—Binuhatan 17:10, 11.

Wala ginpahanugutan sang mga tawo sa Berea ang pinamulong sang mga manugpamatok nga matakpan ang ila mga hunahuna sa maayong balita. Sa baylo, gin-usisa nila ang Kasulatan adlaw-adlaw agod lig-unon nga ang mga butang nga ila nabatian matuod. Nasapwan nila ang hamili nga bahandi kag indi nila pagpahanugutan nga kuhaon ini sa ila sang mga manugpamatok. Indi bala ini makatarunganon nga dalanon nga himuon kon tuhoy sa kaanggid nga maayong balita nga ginabantala sang mga Saksi ni Jehova karon?

Kon Ngaa ang Iban Nagapamatok

Kon kaisa ang mga nagapamatok mga mabuot nga mga himata nga imo ginahigugma kag ginatahod, kag may rason gid ikaw sa pagpati nga interesado sila sing hanuot sa imo kaayuhan. Apang dapat mo binagbinagon kon ngaa nagapamatok sila sa imo pagtuon sang Biblia upod sa mga Saksi ni Jehova. May malig-on bala sila nga pamatuod sa Kasulatan nga ang ginaton-an mo indi kamatuoran? Ukon nagapamatok bala sila bangod sang ginsiling sa ila sang iban? Kulang bala sila sing sibu nga ihibalo nahanungod sa ginatudlo sang mga Saksi? Madamo sang nagpamatok anay kay Jesus ang wala sing ihibalo nahanungod sa kon ano ang iya gintudlo kag bangod nagapati sila sa butig nga mga panumbungon sang mga manugpamatok.

Sang si Jesus ginbitay sa usok sang pag-antos, ang mga tawo nga nagalabay “nagbuyayaw sa iya, nga nagalungolungo sang ila mga ulo kag nagasiling: ‘Ha! Ikaw nga buot magguba sang templo kag magpatindog sini sa tatlo ka adlaw, luwasa ang imo kaugalingon kag panaug sa usok sang pag-antos.’ Sa among bagay ang puno nga mga saserdote man nga nagauligyat sa iya sa tunga nila kaupod sang mga escriba nagsiling: ‘Ang iban ginluwas niya; ang iya kaugalingon indi niya maluwas! Papanauga karon sa usok sang pag-antos ang Cristiano, ang Hari sang Israel, agod nga makita naton kag magtuo.’” (Marcos 15:29-32) Ano ang rason tungod sining malain nga panimuot?

Ang mga tawo nagpahanugot sang ila opinyon kay Jesus nga dihunon sang relihiosong mga lider nga naugot sa iya bangod ginbuyagyag niya sila subong dimatuod nga mga manunudlo nga ang mga buhat wala nahisuno sa ila pangangkon nga mga tiglawas sang matuod nga Dios. Sing prangka, ginsilingan sila ni Jesus: “Ngaa bala nagalalis man kamo sang sugo sang Dios tungod sang inyo pinalatonlaton nga sugid? Mga salimpapaw, matuod gid ang gintagna nahanungod sa inyo ni Isaias, sang nagsiling sia: ‘Ining katawhan sa mga bibig nagatahod sa akon, apang ang tagipusuon nila malayo sa akon. Walay pulos ang pagsimba nila sa akon, nga nagapanudlo subong nga mga pagtolon-an sang mga sugo sang mga tawo.’”—Mateo 15:3, 7-9.

Daku gid ang kaakig sang relihiosong mga lider kay Jesus kag sa mga kamatuoran nga ginatudlo niya amo kon ngaa naghimbon sila nga patyon sia kag himuon ang tagsa ka panikasog nga ang mga tawo magapamatok sa iya. Karon, madamong relihiosong mga lider ang nagapamatok man sing daku sa mga Saksi ni Jehova. Kag subong sa kaso sang dumaan nga mga Cristiano, ang mga Saksi “ginapakamalain” bisan diin. Apang maalamon bala nga pahanugutan ining bantog nga pagpamatok nga dihunon ang imo panghunahuna?

Ang amo man nga mga kamatuoran sa Kasulatan nahanungod sa Ginharian sang Dios nga ginbantala ni Jesus kag sang iya mga apostoles ginabantala sang mga Saksi ni Jehova karon. Ginatos ka libo ka tawo sa bug-os nga kalibutan ang nagabaton sining maayong balita walay sapayan sang daku nga pagpamatok sang mga abyan, mga himata, kag relihiosong mga lider. Ang mga nagabaton sang mensahe sang Ginharian nagapamatuod sa kaayawan nila nga amo ini ang kamatuoran, kag determinado sila sa pagpabilin sa sini.

Gani ngaa mangin kaangay sadtong mga sa nahaunang siglo nga nagpahanugot sa iban nga magpatalikod sa ila gikan sa nagahatag kabuhi nga mga kamatuoran sang Kasulatan nga nag-abot sa ila paagi sa wala maluyagi nga mga sumulunod ni Jesucristo? Sa baylo, padayon nga ton-i ang Biblia upod sa mga Saksi, nagagamit sang nasulat nga Pulong sang Dios sa pagpamatuod sa imo kaugalingon nga kaayawan nga ang imo ginaton-an amo gid ang kamatuoran. (Juan 8:32) Kag upod ang bulig sang Dios mag-unong sa kamatuoran.