Bug-os Kalibutan nga Kalig-onan sa Idalom sang “Prinsipe sang Paghidait”

“Sa kabuganaan sang prinsipenhon nga paggahom kag sa paghidait wala sing katapusan, sa trono ni David kag sa iya ginharian sa pagpalig-on sini kag sa pagtib-ong sini sa katarungan kag sa pagkamatarong, kutob karon tubtob sa tion nga wala sing latid. Ang kakugi ni Jehova sang mga kasoldadosan magahimo sini.”—ISAIAS 9:7.

1, 2. (a) Ang pagkabun-ag sang Ginharian sang Dios mangin okasyon para sa ano, kag san-o natabo ini nga pagkabun-ag? (b) Ano ang hilikuton nga ginahatag sang karta sang Nasyones Unidas sa sina nga organisasyon, apang ano nga hilikuton ang ginhatag sang katipan para sa Ginharian kay Jesucristo? (c) Paano naton nahibaluan nga tumanon gid ni Jehova ang katipan para sa Ginharian?

SUBONG nga ang pagkatawo ni Jesus, ang himpit nga tawo nga bata, nangin isa ka okasyon sang tumalagsahon nga pagkalipay, ang pagkabun-ag sang iya madugay na ginsaad nga Ginharian nangin okasyon man sang daku nga pagkalipay. (Salmo 96:10-12) Suno sa mga kamatuoran sang modernong maragtas, ina nga pangulohan gintungtong sa abaga sang ginhimaya nga si Jesus sang 1914. Ang pagluntad sang Nasyones Unidas nga organisasyon wala nagapabutig sina nga kamatuoran. Wala sa mga manuggahom sang 159 ka katapo sang NU ang sa panimalay ni David. Walay sapayan, ang karta sinang bug-os kalibutan nga paghimbon nagahatag sa ila sing hilikuton nga tigayunon ang bug-os kalibutan nga paghidait kag kalig-onan para sa katawhan.

² Apang ang katipan ni Jehova para sa Ginharian wala gid mapanas. Sa Isaias 9:7 ang ekspresyon nga “sa trono ni David” nagapalig-on sa katipan nga ginhimo sang Dios kay David para sa isa ka ginharian nga wala sing katapusan. Dugang pa, nanumpa si Jehova nga ini matuman sing madinalag-on. Nga tumanon ni Jehova ining katipan maathag nga ginpakita sa Salmo 89:3, 4, 35, 36: “Nagpakigkatipan ako sa akon pinili; nagsumpa ako kay David nga akon alagad, ‘Ang imo binhi palig-unon ko tubtob sa tion nga wala sing latid, kag patindugon ko ang imo trono sa tanan nga kaliwatan.’ Sa makaisa nagsumpa ako sa akon pagkabalaan, dili ako magbutig kay David. Ang iya binhi magapadayon tubtob sa tion nga wala sing latid, kag ang trono subong sang adlaw sa atubangan nakon.” Yadto nga katipan, subong man ang titulo nga “Prinsipe sang Paghidait,” nagahatag kay Jesucristo sing hilikuton nga paluntaron ang bug-os kalibutan nga kalig-onan.

3. Ngaa ang tion sa pagsugod sang “Prinsipe sang Paghidait” sang iya paggahom indi tion sang paghidait para sa langit ukon sa duta?

³ Apang, ang tion nga itungtong ni Jehova nga Dios ang pangulohan sa abaga sang iya Manunubli nga Prinsipe indi nangin isa ka tuig sang paghidait sa langit sa ibabaw ukon sa duta sa idalom. Suno sa Bugna kapitulo 12, ang pagkabun-ag sang iya Ginharian sundan sang inaway sa langit. Si Satanas nga Yawa kag ang iya mga demonyo nagpakig-away batok sa bag-o matukod nga pangulohan, kag ang bag-o makalingkod sa trono nga Hari upod sa iya balaan nga mga anghel nagpakig-away batok sa sadto nga puersa sang mga demonyo. Ang resulta amo nga si Satanas kag ang iya mga demonyo gintagbong gikan sa langit kag paubos sa palibot sang aton duta. Busa, naglanog ang pagtu-aw: “Kailo sa duta kag sa dagat, kay ang yawa nagpanaug sa inyo, sa dakung kasingkal, bangod nga nakahibalo sia nga may malip-ot lamang sia nga tion.” (Bugna 12:12) Sugod sang gintagbong ang Yawa, ang aton duta makapasubo nga nangin duog sang wala sing tupong nga kasingki kag mga inaway. Daw ano gid ang pagkinahanglan sang katawhan sa paggahom sang “Prinsipe sang Paghidait,” kay magaresulta ini sa bug-os kalibutan nga kalig-onan!

4. Ngaa ang titulo nga “Dios nga Gamhanan” indi dapat pagsal-an sa Dios nga labing gamhanan?

⁴ Suno sa Isaias 9:6, ang iban pa nga mga titulo, dugang sa “Prinsipe sang Paghidait,” gindugang sa mahimayaon nga ngalan ni Jesucristo. Ang isa sining mga titulo amo ang “Dios nga Gamhanan.” Wala sia gintawag Dios nga labing gamhanan, nga subong bala sia isa ka katupong nga katapo sang isa ka trinidad nga mga dios. Bisan sang mabanhaw sia, ginpakilala niya nga kubos gihapon sia kay Jehova. Nagpakita sia kay Maria Magdalena kag ginpadala niya sia agod pahibaluon ang iya nabalaka nga mga disipulo nga mabalik sia sa ila Amay kag iya Amay kag sa ila Dios kag iya Dios. (Juan 20:17) Tubtob sa karon, sia gihapon ang nagapanguna sa tanan nga tinuga sa pagsimba sa “Dios sang mga dios,” si Jehova. (Daniel 11:36) A, huo, si Jesucristo mismo may Dios kag ina nga Dios indi si Jesus kundi amo ang langitnon nga Amay nga si Jehova. Daw ano ka dungganon nga ang “Prinsipe sang Paghidait” nagaalagad subong manughanda sang dalan padulong sa dayon nga paghidait kag kalig-onan sa bug-os nga uniberso!

5. Ngaa si Jesucristo ang kalipikado gid nga manguna sa tanan intelihente nga mga tinuga sa pagsimba sa matuod kag buhi nga Dios, si Jehova?

⁵ Sing dayon, ang ginhimaya nga Anak sang Dios padayon nga magapanguna sa tanan nga intelihente nga tinuga sa pagsimba sa sining isa kag matuod nga buhi nga Dios, si Jehova. Kalipikado gid para sa sini ang nabayaw nga Anak sang Dios. Sa tanan nga tinuga sa langit kag duta, ang ginhimaya nga Anak sang Dios amo ang nakakilala kay Jehova sa madugay nga tion kag suod gid sa iya. Sa 1 Corinto 2:11, si apostol Pablo nagsiling: “Kay sin-o nga tawo ang nakahibalo sang mga painoino sang tawo luwas ang espiritu sang tawo nga yara sa iya?” Gani amo sini kay Jesucristo. Bisan pa gingamit sia ni Jehova nga Dios sa pagtuga sa tawo, lain nga butang nga sia mangin tawo mismo, nga ginalibutan sang tanan dutan-on nga mga kahimtangan kag maeksperiensiahan ang mga balatyagon sang isa ka tawo. Sa amo nasulat nga “bisan sia Anak, nakatuon sia sang pagkamasinulundon paagi sa iya gin-antos” subong tawo diri sa duta. (Hebreo 5:8) Ginpamatud-an gid niya nga takus sia saligan sang ‘bug-os nga awtoridad sa langit kag sa duta’ kag magdala sang titulo nga “Dios nga Gamhanan.”—Mateo 28:18; ipaanggid ang Filipos 2:5-11.

“Makatilingala nga Manuglaygay” kag “Dayon nga Amay”

6. Paano si Jesucristo nagaalagad subong “Makatilingala nga Manuglaygay,” kag paano ang “dakung kadam-an” nakabenepisyo gikan sa iya makatilingala nga laygay?

⁶ Bangod sining tanan makapakombinse nga rason, ang langitnon nga Prinsipe sang Dios may ikasarang gid sa pag-alagad sa katawhan subong “Makatilingala nga Manuglaygay.” (Isaias 9:6) Ang iya laygay pirme nga maalamon, himpit, kag wala nagasayop. Subong amo ang Manugpatunga sa ulot ni Jehova nga Dios kag sang mga gindala sa bag-ong katipan, nagaalagad gid sia subong ang makatilingala nga manuglaygay sa sining nagligad nga 19 ka siglo. Sugod sang 1935, ang isa ka “dakung kadam-an” sang iya “iban nga mga karnero” nagabaton sang iya makatilingala nga laygay kag nagatigayon sing labing maayo nga panudlo kag gabayan. (Bugna 7:9-17; Juan 10:16) Subong isa ka ahensya para sa sining hilikuton sa paglaygay, nagbangon sia sa sining “katapusan sang sistema sang mga butang” sang ginsaad nga “matutom kag mainandamon nga ulipon” nga klase kag ginpadumala ini sa iya mga pagkabutang sa duta, ukon harianon nga mga interes. (Mateo 24:3, 45-47; Lucas 12:42-44) Ang “dakung kadam-an” nagabaton karon sing espirituwal nga laygay nga makatilingala gid kag masaligan bangod napasad ini sa ginbuyagyag nga Pulong sang Dios.

7. Ngaa si Satanas nga Yawa indi na isa ka dios nga gamhanan para sa katawhan ni Jehova?

⁷ Subong resulta sang ila pagbaton sa sina nga laygay, si Satanas nga Yawa, “ang dios sining sistema sang mga butang,” indi na isa ka gamhanan nga dios sa aton subong katawhan ni Jehova. (2 Corinto 4:4) Matinumanon nga nagguwa kita sa Babilonia nga Daku, ang bug-os kalibutan nga emperyo sang dimatuod nga relihion, kag wala na kita nagapakigbahin sa iya mapintas nga mga sala. Nagatindog kita sing dimationg sa kiliran sang Isa nga sa iya abaga gintungtong ni Jehova nga Dios ang Iya pangulohan.

8. (a) Ngaa ang titulo nga “Dayon nga Amay” labi na nga makagalanyat sa “dakung kadam-an”? (b) Ano ang matabo sa mga nagatugot kay Satanas nga Yawa nga mangin ila espirituwal nga amay?

⁸ Ang titulo nga “Dayon nga Amay” makapamahal gid. Labi na nga ginaapresyar sang “dakung kadam-an” sang “iban nga mga karnero” ining termino. Wala sila naganyat sa pagkaamay ni Satanas nga Yawa. Nagakurog sila kon madumduman nila ang Judiyong relihiosong mga lider nga namatok kay Jesus kag tuhoy sa ila sia nagsiling: “Kamo iya sang inyo amay nga yawa, kag luyag ninyo himuon ang mga kailigbon sang inyo amay. Sia manugpatay kutob sa ginsuguran, kag wala sia magtindog sa kamatuoran, bangod wala sing kamatuoran sa iya. Kon nagabutig sia, nagapamulong sia suno sa iya kinaugali, kay butigon sia kag amay sang kabutigan.” (Juan 8:44) Ang “dakung kadam-an” nagguwa gikan sa tunga sang espirituwal nga mga anak ni Satanas nga Yawa, nga tuhoy sa iya pagkaamay sa napukan nga katawhan, indi ini magadugay. Ang mga nagatugot sa iya nga mangin ila espirituwal nga amay malaglag upod sa iya. Bug-os nga kalaglagan, nga ginsimbuluhan sang “kalayo nga wala sing katapusan” sa Mateo 25:41, ang nagahulat sa Yawa kag sa tanan nga tawo nga wala nagapalagyo gikan sa iya pagkaamay.—Mateo 25:41-46.

9. Paano ang “dakung kadam-an” nagabenepisyo na sa pagkaamay sang “Dayon nga Amay”?

⁹ Sa pihak nga bahin, ginatilawan na sang “dakung kadam-an” ang pagkaamay sang “Dayon nga Amay.”a Paano? Paagi sa pagpamati sa iya tingog kag mangin katapo sang iya “iban nga mga karnero” kag paagi sa pagpakig-upod sa nagkalabilin sang espirituwal nga Israel. Ining mainit nga relasyon subong pamilya nagapakita sing paghidait. Nagsulat sa idalom sang inspirasyon, ginpatuhuyan ni apostol Pablo si Jehova sa Roma 16:20 subong “ang Dios nga nagahatag sing paghidait.” Daw ano ka nagakaigo, nian, nga ang iya bugtong nga Anak tawgon nga “Prinsipe sang Paghidait”! Paagi sa pagpasag-uli sing paghidait sa bug-os nga uniberso, pat-od nga tumanon sang “Prinsipe sang Paghidait” ang kahulugan sang iya daku nga titulo.

Ang Harianon nga Pangulohan sang “Prinsipe sang Paghidait”

10, 11. Sa tapos gintagna ang labing daku nga pagkatawo, ano pa ang ginsiling ni Isaias, kag ano ang kahulugan sang iya mga pulong?

¹⁰ Sa tapos gintagna ni Isaias ang labing daku nga pagkatawo—huo, ang pagkatawo sang Anak sang Dios nga padunggan sina nga titulo nga “Prinsipe sang Paghidait”—ang manalagna gindaldal sang espiritu ni Jehova sa pagsiling: “Sa kabuganaan sang prinsipenhon nga paggahom kag sa paghidait wala sing katapusan . . . Ang kakugi ni Jehova sang kasoldadosan magahimo sini.”—Isaias 9:7.

¹¹ Sa pagsiling “sa kabuganaan sang prinsipenhon nga paggahom,” ginapakita sang tagna nga ang sakop nga duog sang “Prinsipe sang Paghidait” magalakip sang bug-os nga duta. Wala sing mga dulunan sa duta nga magalatid sang iya ginsakpan nga duog. Magasakop ini sang bug-os nga globo. Dugang pa, sa Paraiso nga duta nga maabot, wala sing katapusan ang paghidait. Wala man sing kagamo bisan diin. Ang paghidait magaluntad sa bug-os nga duta kag pirme nga magabugana. (Salmo 72:7) Ang paghidait sa sini nga kaso indi lamang ang pagkadula sang kasingki kag inaway. Nagalakip ini sa katarungan kag pagkamatarong, kay si Isaias nagsiling nga ang prinsipenhon nga paggahom sakdagon “sa katarungan kag sa pagkamatarong, kutob karon tubtob sa tion nga wala sing latid.” Mangin bugana ang mga pagpakamaayo sa katawhan. Kag himuon ini sang wala sing kalapyo nga kakugi ni Jehova nga Dios sa sulod sang aton tion.

12. Paano ang pangulohan nga yara sa abaga sang “Prinsipe sang Paghidait” ginarepresentar sa bug-os nga duta?

¹² Bisan sa karon, ining pangulohan sa abaga sang “Prinsipe sang Paghidait” ginarepresentar sa bug-os nga duta. Ang pagbaton sa iya harianon nga langitnon nga pangulohan madasig nga nagalapnag. Ang nagkalabilin sang hinaplas sang espiritu nga mga disipulo ni Jesucristo natipon na gikan sa mga pungsod. Dugang pa, ang “dakung kadam-an” ginatipon gikan sa kapin sa 200 ka nanuhaytuhay nga kadutaan. May yara karon 3,229,022 ka saksi ni Jehova, kag wala pa matapos ang makalilipay nga hilikuton sa pagtipon. Ining “dakung kadam-an” nagakilala sa pangulohan nga yara sa abaga sang “Prinsipe sang Paghidait.” Ang mga katapo sini nagapasalamat gid nga sakop sila sina nga pangulohan kag mga mensahero sini sa bug-os nga duta, upod sa “mga embahador nga nagahalili kay Cristo,” ang hinaplas nga nagkalabilin.—2 Corinto 5:20.

Ang Modernong-Adlaw nga Paghimbon nga Laglagon

13. (a) Ano ang ginatinguhaan nga himuon sang mga mensahero sang Ginharian sa tunga nila? (b) Paano ginatamod sang Dios ang Nasyones Unidas?

¹³ Ang mga mensahero sang Ginharian nagahupot man sing paghidait sa tunga nila. Sila ‘hanuot nga nagatinguha nga mangin isa sa espiritu sa nagahiusa nga higot sang paghidait.’ (Efeso 4:3) Ginahimo nila ini walay sapayan sang tanan nga kagamo nga nagakatabo karon sa bug-os nga duta. Ang pungsod sa sulod kag sa guwa sang Nasyones Unidas nagapamatok, sa kamatuoran, sa pangulohan sang “Prinsipe sang Paghidait.” Sa pagtamod sang Dios, ang Nasyones Unidas isa ka daku nga paghimbon sang bug-os nga kalibutan. Ngaa? Bangod ginadeklarar sini nga tigayunon ang mga tulumuron nga ginapahimo sang Dios sa iya “Prinsipe sang Paghidait.” Kag nagapanawag ini sa katawhan sang tanan nga pungsod nga sakdagon ini sa pagtukod sing bug-os kalibutan nga kalig-onan paagi sa mga panikasog sang tawo. Ginbantala pa gani sini ang 1986 subong “Internasyonal nga Tuig sang Paghidait.” Sa amo ginapamatud-an sini ang iya kaugalingon subong isa ka paghimbon batok sa “Prinsipe sang Paghidait” kag batok sa katipan ni Jehova sa iya para sa isa ka Ginharian nga wala sing katapusan.

14. Paano ginpaandaman ni manalagna Isaias ang tanan nga nagapamatok kay Jehova kag sa iya katipan para sa Ginharian?

¹⁴ Bangod sina nga rason, ginpaandaman sadto ni manalagna Isaias si Hari Ahas kag ang iya mga sakop batok sa pagpangita sing paghidait kag kalig-onan paagi sa pagpakig-alyansa sa Asirianhon nga Kagamhanan sa Kalibutan. Ang paandam masapwan sa Isaias 8:9, 10. Sa matagnaon nga paagi, ang manalagna nagapaandam sa tanan nga nagapamatok kay Jehova kag sa iya katipan para sa Ginharian: “Magginahod, O kamo nga katawhan, kag mabuong; pamati, tanan kamo nga sa malayong duta! Magwagkos kamo kag mabuong! Magwagkos kamo kag mabuong! Maghimbon kamo, kag malaglag ini! Ipamulong ang pulong, kag indi ini mahimo, kay ang Dios nagaupod sa amon!”

15. Ano ang matabo sa paghimbon karon batok sa katipan para sa Ginharian, subong ginpakita sang paghimbon sang mga adlaw ni Hari Ahas?

¹⁵ Gani pabay-i ang mga pungsod sa idalom sang prinsipe sining kalibutan, si Satanas nga Yawa, nga maghimbon batok sa katipan para sa Ginharian kag sa prinsipenhon nga Manunubli kag Manuggahom sini. Ang paghimbon buongon, subong sang natabo sa paghimbon sang mga adlaw ni Hari Ahas. Si Hari Resin sang Siria kag si Hari Peka sang Israel wala magkahadlok kay Jehova sang kasoldadosan kundi naghimbon batok sa iya katipan para sa Ginharian. Ti, ginbuong ang ila paghimbon. Subong man, si Hari Ahas sang Juda wala magkahadlok kay Jehova kundi nakighimbon upod sa Asiria nga kagamhanan sa kalibutan. Wala gid ini makabulig kay Ahas kag wala makahatag sa iya sing paghidait kag kalig-onan. Nagdala ini sing kasisit-an kag pagkaulipon. Malain pa sa tanan, bangod sini nadula ni Ahas ang kahamuot ni Jehova.

16. Paano ginbuong ni Jehova ang paghimbon sang Asiria batok sa katipan para sa Ginharian, kag ano ang ginalaragway sini sa aton adlaw?

¹⁶ Sang mapatay si Ahas kag sang mga adlaw sang iya anak nga si Ezequias, ginbuong ni Jehova sang kasoldadosan ang paghimbon sang Asiria batok sa katipan para sa Ginharian. Napilitan ang hari sang Asiria sa pag-isol gikan sa duta sang Juda sa tapos malaglag sang anghel ni Jehova ang 185,000 ka soldado niya. Ang kaaway wala makapalupad sing bisan isa lamang ka pana batok sa siudad sang Jerusalem. (Isaias 37:33-36) Sigurado gid ang kaangay sini nga pagkalutos sang paghimbon sang kalibutan karon batok sa katipan ni Jehova para sa Ginharian kag sa “Prinsipe sang Paghidait,” kay ang Dios nagaupod sa iya Prinsipe Immanuel kag sa tanan nga nagakilala sa iya!

Maisugon nga Pagtindog Para sa Bug-os Uniberso nga Pagkasoberano ni Jehova

17. (a) Ano sa dili madugay ang himuon sang politikal nga mga elemento sa Babilonia nga Daku, kag ano ang kinahanglan sang katawhan ni Jehova kag mabaton nila? (b) Sa tapos malaglag ang Babilonia nga Daku, ano karon ang himuon sang ateistiko nga mga manuggahom, nga magatiklod kay Jehova sa paghimo sing amo?

¹⁷ Sa dili madugay ang politikal nga mga elemento magapanikasog indi lamang batok sa Cristiandad kundi batok sa bug-os nga Babilonia nga Daku, ang bug-os kalibutanon nga emperyo sang dimatuod nga relihion, agod laglagon ini. Sa sinang ital-ital nga tion, ang pag-amlig ni Jehova sa iya katawhan sa pinasahi nga paagi mahanabo. Bangod sang maduguon nga kadalag-an batok sa Babilonia nga Daku, ang ateistiko nga mga manuggahom mapintas nga magaliso batok sa mga nagadampig sa pangulohan sang Dios paagi kay Jesucristo. Nian gamiton ni Jehova ang iya “Prinsipe sang Paghidait” sa pagpakig-away sa “inaway sang dakung adlaw sang Dios nga Labing Gamhanan.” (Bugna 16:14) Si Jesucristo mangin dimadaug nga Hangaway kag ang iya pangulohan indi mabuhinan. Mangin “Dios nga Gamhanan” sia sa idalom sang madaugon nga Dios nga labing gamhanan, si Jehova. Koronahan sining “Dios nga Gamhanan” ang iya mahimayaon nga hilikuton sing kadalag-an sa Armagedon nga indi malipatan sa dayon nga tion. Dayawon inang wala sing katupong nga kadalag-an!

18. Sa atubangan sang modernong-adlaw nga paghimbon batok sa katipan para sa Ginharian, determinado ang mga Saksi ni Jehova sa paghimo sing ano, kag ano ang mangin resulta?

¹⁸ Gani, mag-abante sa daku pa nga pagkilala sang kalibutan, kamo tanan nga mga saksi ni Jehova, nga may bug-os nga pagsalig sa inyo Dios kag sa iya nagagahom nga Hari, ang “Prinsipe sang Paghidait!” Magpakita sing kaisog sa karon nga paghimbon sang kalibutan. Paagi sa inyo pagbantala bisan diin sang mensahe sang Ginharian kag sang nagapakari nga kadalag-an sini batok sa paghimbon sang kalibutan sa Armagedon, himua ang inyo kaugalingon nga mangin mga tanda kag mga katingalahan sa kadungganan ni Jehova. Kon gamiton na sang Yawa ang kalibutanon nga mga manuggahom batok sa aton, dumduma, ang kadalag-an mangin ila nga nagatindog sing matuod kag matutom para sa Ginharian ni Immanuel, ang “Prinsipe sang Paghidait,” kay “Ang Dios Kaupod Naton”! (Mateo 1:23; ipaanggid ang Isaias 8:10.) Kag tuguti ang tanan nga anghel sang langit kag ang tanan nga nagahupot sing integridad nga katawhan sa duta nga mangin “Amen” sa pagbindikar sang pagkasoberano ni Jehova sa ibabaw sang tanan nga tinuga sa langit kag sa duta, upod ang kalig-onan nga wala gid sing katapusan!

[Footnote]

Mga Pamangkot sa Sumaryo

◻ Paano ang titulo nga “Dios nga Gamhanan” naaplikar kay Jesucristo?

◻ Paano si Jesus nagaalagad subong “Makatilingala nga Manuglaygay”?

◻ Kay sin-o pagkaamay ang tinguhaan naton, kag kay sin-o pagkaamay ang dapat naton sikwayon?

◻ Ano sa kamatuoran ang Nasyones Unidas?

◻ Ano ang matabo sa paghimbon karon batok sa katipan para sa Ginharian kag sa Manunubli sini, ang “Prinsipe sang Paghidait”?

[Laragway sa pahina 16, 17]

Ang bug-os nga uniberso mahiusa sa mahidaiton nga pagsimba sa Bug-os Uniberso nga Soberano