Pagpamati kay Jehova Samtang Nagapalapit ang Katapusan

“Malipayon ang tawo nga nagapamati sa akon . . . Kay kon sin-o ang makakita sa akon makakita sing kabuhi.”—HULUBATON 8:34, 35.

1, 2. (a) Walay sapayan sang kakulang sing paghidait sa bug-os nga maragtas sang tawo, ano ang ginasiling sang iban karon? (b) Ngaa imposible ang matuod nga paghidait paagi sa mga panikasog sang tawo?

WALAY sapayan sang kakulang sing paghidait sa bug-os nga maragtas, labi na sa sining ika-20 ka siglo, mahimo magasiling ang iban nga ang mga pungsod nagatinguha sa paglubad sang ila mga problema. Mahimo nga itudlo nila ang katunayan nga ang mga lider sang kalibutan nagasinapol agod hambalan ang paghidait kag nagahimo sing madamo nga kasugtanan. Ti, gindeklarar gani sang Nasyones Unidas ang nagligad nga tuig subong “Internasyonal nga Tuig sang Paghidait”! Ginalauman nga amo ini ang pamuno sang labi pa nga mga panikasog sang mga pungsod sa pagpaluntad sang paghidait, upod ang posible nga kadalag-an sa malapit nga palaabuton.

² Apang, sa bug-os nga maragtas, nakapaluntad bala sing dayon nga paghidait ang kaanggid sini nga panikasog? Kon mahimo ini sang tawo, kuntani sang una pa—sa wala pa ang halos lima ka bilyon ka tawo sa duta mabahinbahin sa kapin sa 160 ka pungsod, nga may linibolibo ka pilosopiya sa politika, ekonomiya, kag relihion. Apang wala gid sing paghidait; kag indi man magaresulta ang paghidait gikan sa mga panikasog sang mga lider sang kalibutan! Ngaa indi? Sa isa ka rason, bangod daku gid ang mga palaligban sang katawhan nga indi ini malubad sang mga panikasog sang tawo. Husto gid ang Jeremias 10:23 sa pagsiling: “Wala sa tawo nga nagalakat ang pagmando sang iya mga tikang.”

Kon Ngaa ang mga Panikasog sang Tawo Indi Magamadinalag-on

3. Bangod sang anong iban pa nga rason nga ang mga tawo kag mga pungsod indi gid makapaluntad sang paghidait?

³ May isa pa ka rason kon ngaa ang mga panikasog sang mga tawo kag mga pungsod indi makadala sing matuod nga paghidait. Ginsambit ini sa 1 Juan 5:19, nga nagasiling: “Ang bug-os nga kalibutan yara sa gahom sang malauton.” Ang Bugna 12:9 nagapakita nga “ang malaut” amo ang “Yawa kag Satanas, nga nagadaya sa bug-os napuy-an nga duta.” Ang 2 Corinto 4:4 nagatawag sa iya “ang dios sining sistema sang mga butang.” Sa amo, ang bug-os nga sistema sang politika, ekonomiya, kag relihion nga nagbunga karon sing daku nga kasingki amo ang produkto sang paggahom ni Satanas, indi sang paggahom sang Dios. Busa, tuhoy sa kaalam nga nagagikan sa Dios, ang 1 Corinto 2:8 nagasiling: “Walay bisan sin-o sang mga manuggahom sining sistema sang mga butang ang nakahangop sini.”—Lucas 4:5, 6.

4. Ano ang resulta sang ang aton nahaunang mga ginikanan wala na mamati kay Jehova?

⁴ Sang nagrebelde si Satanas sa Dios, ginhaylo niya ang aton unang mga ginikanan sa pagpamati sa iya sa baylo sang pagpamati sa Dios. Busa, ginlapas nila ang Dios kag nagresulta ini sa 6,000 nga pag-antos sang tawhanon nga panimalay. Maathag nga ginasugid sa aton sang Biblia nga ginhaylo ni Satanas ang mga tawo sa pagpati nga magaayuhan sila kon indi sila magpamati sa ila Manunuga. (Genesis 3:1-5) Sa iya kaalam, gintugutan ni Jehova ang kalibutan sang katawhan nga magkinaugalingon nga wala sang iya pagtuytoy tubtob karon. Sa pagkamatuod, sa sining tanan nga siglo, napamatud-an nga napaslawan gid ang paggahom sang tawo.—Deuteronomio 32:5; Manugwali 8:9.

5. Bisan pa nga ang paghidait mapaluntad paagi sa mga panikasog sang tawo, ano sa gihapon ang yara sa aton?

⁵ Subong man, sang nag-untat na si Adan kag si Eva sa pagpamati kay Jehova, nga Tuburan sang himpit nga kabuhi, nangin dihimpit sila kag sang ulihi napatay. Sa amo, kita tanan nga ila kaliwat, dihimpit man. Ang balatian, katigulangon, kag kamatayon nag-abot sa tawo. (Roma 5:12) Busa, bisan pa kon magmadinalag-on ang mga tawo sa pagpaluntad sing paghidait, indi nila mabulong ang napanubli nga dikahimpitan. Magamasakit kita gihapon, magatigulang, kag mapatay. Kag bangod si Satanas ang may salabton sa sini, si Jesus nagsiling tuhoy sa iya: “Sia manugpatay kutob sa ginsuguran, kag wala nagatindog sa kamatuoran.” (Juan 8:44) Sa pagkamatuod, kon hunahunaon mo ang binilyon nga nabuhi anay kag napatay, daw subong bala nga ginpamatay sila tanan ni Satanas.

6. Sin-o ang mga manugguba sang paghidait, kag ano ang dapat nga matabo sa ila?

⁶ Ginhaylo man ni Satanas ang iban nga mga espiritu nga tinuga sa pagrebelde, kag ining tanan nga mga malauton wala magpamati kon nagahambal si Jehova. Gani, si Satanas, ang iya mga demonyo, kag ang rebelde nga mga tawo ang nagdala sini nga kalibutan sa iya karon nga kahimtangan. Dapat sila tanan dulaon, nagatapos sining malaut nga 6,000 ka tuig nga eksperimento nga hilway sa Dios. “Ang Dios nga nagahatag sing paghidait,” pasalig sang Roma 16:20, “magadugmok kay Satanas . . . sa dili madugay,” kag lakip man ang iya mga demonyo kag tanan nga mga tawo nga wala nagapamati kon nagahambal ang Dios.—Mateo 25:41.

Labi Pa nga Kinahanglanon nga Magpamati Karon

7. Ngaa dapat naton pabaskugon ang aton mga panikasog nga alagaron si Jehova karon?

⁷ Yara na kita sa punta sining “katapusan nga mga adlaw.” (2 Timoteo 3:1-5) Gani, kinahanglan gid nga mamati kita sa ginahambal ni Jehova. Kinahanglan nga pabaskugon naton ang aton kahanda sa paghimo sing mga sakripisyo sa pag-alagad sa iya. Ngaa pabaskugon ang aton mga panikasog? Bangod nahibaluan ni Satanas nga ‘malip-ot na lamang ang iya tion.’ (Bugna 12:12) Gani pabaskugon niya ang iya malaut nga panikasog sa paglaglag.

8. (a) Ngaa ang pagbantala nga hilikuton indi mapunggan sang mga kaaway? (b) Ano ang dapat naton himuon agod huptan ang balaan nga pagsakdag?

⁸ Labi na nga luyag ni Satanas nga punggan ang mga tiglawas ni Jehova sa pagsugid sa iban sang maayong balita sang Ginharian. Apang indi niya mahimo, kay si Jehova nagsaad sa ila: “Wala sing hinganiban nga ginhimo batok sa imo ang magamadinalag-on.” (Isaias 54:17) Ang mga nagapamatok sa iya mga alagad “masapwan pa nga nagapakig-away sa Dios.” (Binuhatan 5:38, 39) Gani, paagi sa gamhanan nga pagsakdag sang espiritu ni Jehova, ni Cristo Jesus, kag sang kadam-an sang mga anghel, ang hilikuton nga pagbantala sing Ginharian nagauswag sa kasangkaron kada tuig karon. Agod mahuptan inang balaan nga pagsakdag, ginatuman sang mga alagad ni Jehova ang laygay sa Santiago 4:7, 8: “Busa magpasakop kamo sa Dios; sumpunga ang Yawa, kag magapalagyo sia sa inyo. Magpalapit sa Dios kag sia magapalapit sa inyo.”

9. Ngaa indi naton pagpakanubuon si Satanas?

⁹ Indi pagpakanubua ang ikasarang ni Satanas sa paglimbong kag sa paghalit. Ang Pulong sang Dios nagapaandam: “Magmaligdong kamo kag magbantay. Ang inyo kaaway, nga Yawa, subong sang nagangurob nga leon nagaluyung, nga nagapangita sang iya tulukbon. Apang sumpunga sia, nga nagapangalig-on sa inyo pagtuo.” (1 Pedro 5:8, 9) Kon nahibaluan mo nga may nakabuhi nga leon, himuon mo ang tanan agod amligan ang imo kaugalingon kag ang imo pamilya. Apang kon tuhoy kay Satanas, labi pa nga mag-andam kita, bangod dayon nga halit ang mahimo niya sa aton. Makapasubo nga ang kalabanan nga tawo wala nagapangaman kay wala gani sila nagapati nga nagakabuhi sia. Ngaa? Bangod ginapakamaayo nila nga indi mamati sa Pulong ni Jehova. Kag ano ang resulta sinang sayop nga pili? “Kon ano ang ginasab-ug sang tawo, ina man ang iya anihon.”—Galacia 6:7.

Kon Magsinggit Sila sing “Paghidait kag Kalig-onan!”

10, 11. (a) Ano ang dapat naton dumdumon nahanungod sa bisan ano nga kadalag-an sang mga pungsod sa pagpaluntad sing paghidait? (b) Ano nga tagna sang Biblia ang may kahilabtanan sa pagpangita sing paghidait sang mga pungsod karon? (c) Daw ano ka mapinadayunon ina nga paghidait?

¹⁰ Magbantay gid kamo nga indi mahaylo sang kadalag-an sang mga pungsod sa pagpaluntad sang paghidait. Dumduma nga wala ginagamit ni Jehova ang bisan ano nga ahensya sang kalibutan sa pagpaluntad sing paghidait. May kaugalingon nga paagi si Jehova sa pagdala sing matuod nga paghidait, kag paagi lamang ina sa iya Ginharian sa idalom ni Cristo. Gani ang kadalag-an sang mga pungsod sa pagpaluntad sing paghidait indi matuod kag indi magadugay. Wala gid sing magabag-o. Ang krimen, kasingki, inaway, gutom, kaimulon, pagkalusod sang pamilya, imoralidad, balatian, kamatayon, kag si Satanas kag ang iya mga demonyo magaunay gihapon sa aton tubtob laglagon sila tanan ni Jehova. “Kon indi si Jehova ang magpatindog sang balay, nagapangabudlay sa wala sing pulos ang mga nagapatindog sini.”—Salmo 127:1.

¹¹ Matuod, ang tagna sang Biblia nagasiling nga ang mga pungsod magatinguha sa pagtigayon sing paghidait sa panahon naton. Ini nagasiling: “Kay kamo gid nakahibalo sing sibu nga ang adlaw ni Jehova magaabot subong sang makawat sa kagab-ihon. Kon magsiling sila: ‘Paghidait kag kalig-onan!’ nian sa hinali ang kalaglagan magaabot sa ila subong nga ang kasakit sa pag-anak nagaabot sa babayi nga nagadala; kag indi sila nga mas-a makalikaw.” (1 Tesalonica 5:2, 3) Ina nga pagsinggit sing “Paghidait kag kalig-onan!” wala nagakahulugan nga magaayo ang kahimtangan sa kalibutan. Ang 2 Timoteo 3:13 nagasiling nga “ang mga tawo magalain kag magalain pa.” Matuod gid ang ginsiling sang presidente sang isa ka organisasyon para sa palibot: “Ang problema gid sang katilingban amo nga indi ini makontrol.”

12. Ano ang nahibaluan sang mga alagad ni Jehova nahanungod sa importansia sang nagapakari nga ‘paghidait kag kalig-onan’ nga singgit?

¹² Madamo sa kalibutan ang mahimo madaya sang ginapasalig nga “Paghidait kag kalig-onan!” Apang indi ang mga alagad ni Jehova, bangod nagapamati sila kon nagahambal ang Dios. Sa amo nahibaluan nila gikan sa iya Pulong nga ina nga deklarasyon indi magadala sing matuod nga paghidait kag kalig-onan. Sa baylo, amo gid ini ang katapusan nga sinyas nga “sa hinali ang kalaglagan magaabut sa ila.” Magapahibalo ini nga magasugod na ang “dakung kapipit-an” nga gintagna ni Jesus para sa panahon naton. Nagsiling sia: “Kay nian magaabot ang dakung kapipit-an nga wala pa sing subong nga nahanabo kutob sa ginsuguran sang kalibutan tubtob karon, wala, kag indi na gid mahanabo.”—Mateo 24:21.

13. Paano ginalaragway sang Biblia ang kalaglagan sang mga paggahom sang tawo?

¹³ Sa “dakung kapipit-an,” ang paggahom sang tawo laglagon. Ang Salmo 2:2-6 nagasiling: “Ang mga hari sang duta nagapahamtang sang ila kaugalingon kag ang mga manuggahom nagahilisayo sing tingob batok kay Jehova kag sa iya hinaplas, nga nagasiling: ‘Bugrason ta ang ila mga gapos kag ipilak gikan sa aton ang ila mga pisi!’ Ang nagalingkod sa kalangitan magakadlaw; si Jehova magauligyat sa ila. Nian magapamulong sia sa ila sa iya kasingkal kag gamuhon sila sa iya tanan nga kaakig, nga nagasiling: ‘Napahamtang ko ang akon hari sa ibabaw sang akon balaan nga bukid nga Sion [nga langitnon].’” Ang Salmo 110:5, 6 nagadugang: “Si Jehova . . . magabuno sa mga hari sa adlaw sang iya kasingkal. Magahukom sia sa tunga sang mga pungsod.” Ang tanan nga politikal nga mga plano matapos, kay ang Isaias 8:9, 10 nagasiling: “Magwagkus kamo kag mabuong! Magwagkus kamo kag mabuong! Maghimbon kamo, kag malaglag ini! Ipamulong ang pulong, kag indi ini mahimo, kay ang Dios nagaupod sa amon!”

Makasalig sang Kaluwasan

14. Ngaa makasalig kita nga may mga makalampuwas sa kalaglagan sining kalibutan?

¹⁴ Makasalig kita nga si Jehova magapahibalo sa iya katawhan agod makahimo sila sing nagakaigo nga mga tikang para sa kaluwasan sa nagapakari nga “dakung kapipit-an.” Paano kita makapat-od sini? Bangod ang tagna sa Bugna 7:9, 14 nagapakita nga ang “dakung kapipit-an” makalampuwas. Ngaa? Bangod nagapamati sila kon nagahambal si Jehova kag ginatudluan sila. Sa amo nahimo sang “dakung kadam-an” ang ginasiling sang Bugna 7:15: “Nagahalad sila sa iya sing balaan nga pag-alagad sa adlaw kag gab-i.” Sa amo, ginahimo nila ang kabubut-on sang Dios, nahamut-an sila niya kag ginatuytuyan agod maluwas sa kalaglagan sining kalibutan.—1 Juan 2:15-17.

15. Paano ginalaragway ni Joel ang pagdugmok sa sining sistema, kag ano ang mangin resulta sa mga alagad sang Dios?

¹⁵ Ginapatuhuyan man sang Joel 3:13-16 ang kaluwasan sang mga alagad sang Dios kon ining sistema dugmukon subong sang ubas sa linasan. Ini nagasiling: “Igulo ninyo ang galab, kay gulang na ang alanyon. . . . Nagaalawas ang mga kawa; kay daku ang pagkamalaut nila. Mga kadam-an, mga kadam-an, sa nalupyakan sang pagtapat, kay malapit na ang adlaw ni Jehova. Ang adlaw kag ang bulan magadulom, kag ang kabituonan magauntat sang ila pagsilak. Kag si Jehova magangurob gikan sa [langitnon] nga Sion . . . Ang mga langit kag ang duta magakurog; apang si Jehova mangin dalangpan sa iya katawhan.”

16. Ano ang iban pa nga tagna nga nagapakita nga tipigan ni Jehova ang iya katawhan sa kalaglagan sang kalibutan?

¹⁶ Subong man, sa Isaias 26:20, 21, si Jehova nagasiling tuhoy sinang nagapakari nga tion: “Kari, katawhan ko, sulod ka sa imo mga hulot, kag takpi ang imo mga ganhaan sa palibot mo. Panago ka sing malip-ot nga tion tubtob nga magtaliwan ang kaalipungot. Kay yari karon! si Jehova nagaguwa sa iya duog sa pagsilot sang mga pumuluyo sang duta tungod sang ila kalautan.” Busa, ang Sofonias 2:2, 3 nagalaygay: “Sa wala pa mag-abot sa inyo ang adlaw sang kaakig ni Jehova, pangitaa ninyo si Jehova, kamo tanan nga mahagop sang duta, nga nagbantay sang iya mga pagsulundan. Pangitaa ang pagkamatarong, pangitaa ang pagkahangop. Ayhan malipdan kamo sa adlaw sang kaakig ni Jehova.”

‘Nagadalagan’ kay Jehova

17. (a) Ano ang dapat himuon agod amligan ni Jehova? (b) Ano ang ginhimo nga sayop sang mga tawo antes sang Anaw nga kalibutan?

¹⁷ Ang Hulubaton 18:10 nagasiling: “Ang ngalan ni Jehova torre nga mabakod. Ang matarong nagadalagan pasulod sini kag may kalig-onan.” ‘Nagadalagan’ bala kamo kay Jehova? Dumduma ang ginsiling ni Jesus tuhoy sa katawhan sang adlaw ni Noe. “Sila nagakaon kag nagainum, nagapangasawa kag nagapamana, tubtob sa adlaw nga nagsulod si Noe sa arka; kag sila wala magtalupangod tubtob nag-abot ang anaw kag nagdala sa ila nga tanan.” (Mateo 24:38, 39) Ang sayop amo nga nagmasako sila sa iban nga butang apang wala sila mamati sa Dios sang maghambal sia sa ila paagi sa iya tiglawas nga si Noe nga ginalaragway sang Biblia subong “manugbantala sang pagkamatarong.” (2 Pedro 2:5) Bangod wala sila mamati, sang nag-abot ang Anaw ‘nagdala ini sa ila tanan’ sa kalaglagan.

18. Ngaa ang pagkamangin “maayong” mga tawo wala magluwas sa mga napatay sa Anaw?

¹⁸ Madamo sadtong napatay sa Anaw ang mahimo “maayong” mga tawo, nga wala nagahimo sing kalautan nga nagpuno sang katilingban sadto anay. Apang ang ila ‘kaayo’ wala magluwas sa ila. Bangod sang ila dipagsapak ginpabay-an nila ang kalautan sadto. Ang pinakaimportante amo nga wala sila ‘magdalagan’ kay Jehova; wala sila magpamati kon maghambal ang alagad sang Dios. Busa wala sila maghimo sing nagakaigo nga tikang agod malu­was. Sa pihak nga bahin, ang mga namati naluwas.

19. Anong makatilingala nga benepisyo ang ginaani karon sang mga alagad ni Jehova, kag ngaa?

¹⁹ Sa karon ang Dios nagahambal sing paghidait sa mga nagapamati sa iya. Kag ano ang resulta sa ila? Ang Isaias 54:13 nagasiling: “Ang tanan mo nga anak tudluan ni Jehova, kag mangin daku ang paghidait sang imo mga anak.” Huo, “si Jehova magapakamaayo sang iya katawhan nga may paghidait.” (Salmo 29:11) Busa, walay sapayan sang kasingki sa kalibutan, ang mga Saksi ni Jehova may matuod kag malig-on nga paghidait. May yara sila mahigugmaon nga internasyonal nga pag-ululutod nga indi mailog sang mga lider sang kalibutan, sang ila mga pungsod, kag sang ila mga relihion. Ngaa indi? Bangod wala sila nagapamati kon nagahambal ang Dios. Gani wala sila nagapanghikot sa kon ano ang ginasiling niya. Apang ang mga Saksi ni Jehova nagapamati sa Dios. Ginatuman nila ang ginasiling sang Manugwali 12:13: “Magkahadlok sa matuod nga Dios kag magbantay sa iya mga sugo. Amo ini ang bug-os nga katungdanan sang tawo.”

20. Ano ang dapat himuon sang tagsa ka tawo agod makalampuwas padulong sa bag-ong kalibutan sang Dios?

²⁰ Amo sina ang dapat himuon sang tagsa ka tawo—huo, sang tanan nga maluyag magpuyo sa bag-ong kalibutan sang Dios. Dapat sila ‘magdalagan’ kay Jehova nga wala nagapalantang. Sa pagkamatuod, dapat sila tuytuyan sang hatag-Dios nga kaalam nga ginarepresentar nga nagasiling: “Pamati sa akon; huo, malipayon ang mga nagabantay sang akon mga dalanon. Pamatii ang disiplina kag magmaalam, kag dili magpatumbaya. Malipayon ang tawo nga nagapamati sa akon . . . Kay kon sin-o ang makakita sa akon makakita sing kabuhi.”—Hulubaton 8:32-35.

Paano Mo Sabton?

◻ Ngaa ang mga panikasog sang tawo indi magamadinalag-on sa pagpaluntad sang paghidait?

◻ Ngaa labi pa ang kinahanglan nga pamatian si Jehova?

◻ Ano ang kahulugan sang nagapakari nga pagsinggit sang “Paghidait kag kalig-onan!”?

◻ Ano ang dapat naton himuon kon luyag naton makalampuwas pakadto sa bag-ong sistema sang Dios?

[Laragway sa pahina 17]

Kaangay sang leon nga nagaluyung, pabaskugon ni Satanas ang iya malaut nga panikasog sa paglaglag

[Laragway sa pahina 18]

Kon ining sistema dugmukon subong sang ubas sa linasan, “si Jehova mangin dalangpan sa iya katawhan”