Ang Akon Kaliwatan—Tumalagsahon kag May Daku Gid nga Pribilehiyo!

Gin-asoy ni Melvin Sargent

MADAMO nga pamatan-on karon ang nabun-ag sa isa ka pamilya nga mga Saksi ni Jehova. Apang sang 1896 isa ini ka tumalagsahon gid nga pribilehiyo. Kutob sa pagkabata, gintudluan ako ni Nanay nga kahadkulan si Jehova sing nagakaigo kag apresyahon ang halad nga gawad nga ginhatag sang iya Anak. Gani natungod ako sa isa ka tumalagsahon kag may daku gid nga pribilehiyo nga kaliwatan—nga sampat na sa kagulangon sa pagsaksi sa umpisa sang tanda sang presensia ni Cristo sang 1914 kag posible nga bataon pa gihapon sa pagsaksi sang katapusan sini sa Armagedon.—Mateo 24:3, 33, 34.

Maayo nga Umpisa Paagi sa TLC

Subong isa ka bata, ginhatagan ako sing ginatawag nga TLC treat­ment, Tender Loving Care. Apang kon kaisa ina nga pag-atipan ginapakita sa mga paagi nga mahimo kabigon karon sang iban nga matigdas. Madumduman ko anay nga sang isa ka bes nabatian ako ni Nanay nga nagapakighambal sa isa ka bata nga lalaki nga sa hinali naggamit sing mga tinaga nga bag-o sa akon. “Malain ina nga mga tinaga nga indi gid paggamita,” siling niya sa akon, nga ginapadulot ini sa akon indi lamang paagi sa mga pulong! Apang narealisar ko nga ang iya disiplina isa ka pagpabutyag sing tender lov­ing care, kag madumduman ko nga nagpalibog ako kon ngaa si Jim­mie wala pagdisiplinaha sang iya iloy. Kulang bala ang iya paghigugma sa iya?

Kami lamang ang Saksi nga pamilya sa Jew­ell Coun­ty, Kansas. Si Tatay indi dedikado nga alagad ni Jehova, apang ginadumalahan niya ang pagtuon sa Biblia upod sa amon nga kabataan. Ang akon utod nga babayi nga si Eva amo ang kamagulangan, kag si Walter magulang sa akon sing 16 ka bulan. Kada gab-i ginapaabot kami nga magbulig sa pagpanghugas sing pinggan. Apang si Walter pirme lang makakita sing balibad. Samtang, si Eva kag ako, naggamit sining buluhaton subong isa ka kahigayunan sa adlaw-adlaw sa paghambalanay nahanungod sa mga kamatuoran sa Biblia, gani nangin pagpakamaayo pa ini sa amon. Sang ulihi nahangpan ko nga ang mga tawo nga nagalikaw sa mga salabton sa kabuhi nagakawasi sing madamo nga pagpakamaayo. Natabo ini kay Walter, nga sang ulihi nagtalikod sa kamatuoran.

Ang amon TLC treat­ment nagdul-ong sa maayong mga resulta sang Agosto 4, 1912. Si Eva kag ako nagmata sang kaagahon kag naglakbay sing napulo ka milya (16 km) paagi sa karosa agod makahingabot sa tren sa James­town, Kansas. Ang pilgrim, ang pagtawag sa nagalakbay nga mga Estudyante sang Biblia sadto, magaduaw didto, kag amo ini ang amon una nga pagpakigkita sa mga Estudyante sang Biblia sa guwa sang amon puluy-an. Amo man ini ang adlaw sng amon bawtismo.

Bisan 16 lamang ako, ginpamangkot ko ang pil­grim nga utod kon mahimo ako magsulod sa bug-os tion nga ministeryo, nga sadto ginatawag nga col­por­teur nga hilikuton. Ginpalig-on niya ako nga magsulat sa ­Watch Tow­er So­cie­ty. Sanglit kinahanglan pa ako sa balay, naatrasar ini. Samtang sadto nga tion, gingamit ko ang akon libre nga tion sa pagbulig sing regular sa mga Estudyante sang Biblia sa James­town sa pagpanagtag sing mga ­tract sa bug-os nga mga 75 ka nagalibot nga mga siudad kag mga banwa.

Nagpanaksi man ako sa iban nga mga tion. Isa ka bes sang magkadto sa amon duog ang tag-iya sang amon balay sa pag-atipan sing negosyo kag nagdayon sia sa amon sing pila ka adlaw, ginhatagan ko sia sing ­tract. Nahamuot sia sa sini. Apang sang magpauli sia sa Iowa, nagligad pa ang 30 ka tuig antes ko sia makita liwat. Nangin Adbentista sia kag indi interesado sa akon relihion. Apang, may propiedad sia nga kinahanglan atipanon, kag bangod wala sia sing kilala nga “Cristianong tawo” sa iya relihion nga iya masaligan, ako ang iya ginkadtuan. Ang suweldo nga iya ginabayad sa akon nakabulig sa akon sa bug-os tion nga ministeryo sa sulod sang pila ka tuig. Daw ano ini nga pagpamatuod sa Manugwali 11:1: “Ihaboy ang imo tinapay sa mga tubig, kay makita mo ini sa tapos ang madamo nga adlaw.” Subong man sa ginsiling anay ni Jesus nga: “Apang pangitaa anay ninyo ang ginharian sang Dios kag ang iya pagkamatarong, kag tanan ini nga butang idugang sa inyo.”—Mateo 6:33.

Indi Malipatan nga mga Impresyon

Natambungan ko ang akon una nga kombension sang 1913. Nahamuot ako sa pagtan-aw nga 41 ka bag-ohan ang nabawtismuhan, kag napalig-on man ako sa paghunahuna nga sa akon umpisa nga tikang (napulo ka bulan na ako nga nabawtismuhan), may paglaum ako nga makapalambo sing “tulad Cristo nga pagkatawo” sang 1914, agod masigurado ang ‘pagtawag kag pagpili’ sa akon. Nahamuot man ako sa pagtan-aw sa madamo gid nga pula kag dalag nga mga laso. Ang mga col­por­teur nga nagapangita sing mga paris nagasul-ob sing pula, kag ang bisan sin-o nga luyag makigparis sa ila nagasul-ob sing dalag.

Para sa akon, ang daku nga bahin sang kombension sang 1914 amo ang makita ang Photo-Drama of Crea­tion kag mahimutaran si Broth­er Rus­sell. Mapagsik sia kag nagpakita sing matuod nga handum sa pagpaalinton sing makapalig-on nga impormasyon sa iya mga tagpamalati. Mahinuklugon sia kag handa sa pagpamati sa mga nagapalapit sa iya nga may mga problema. Apang kon kaisa nagapakiglahog man sia sa mga tin-edyer. Isa ka gab-i samtang nagapanghatag ako sing mga senaryo sang programa tuhoy sa Photo-Drama, nagadalidali sia nga naglabay. Gintanyagan ko sia sing isa ka kopya, nga nagapakunokuno nga wala ko sia makilala. Sang primero naglabay lamang sia, apang nagbalik sia dayon kag nagakadlaw nga nagpasalamat sa akon, agod pahibaluon ako nga nahangpan niya ang lahog.

Sang ulihi sang 1917, sa edad nga 21, nakasulod ako sa col­por­teur nga hilikuton. Ang Inaway Kalibutanon I nagadabdab sadto sing halos tatlo ka tuig. Dala ang isa ka maleta, madamo nga libro, kag $30.00 sa akon bulsa, naglakbay ako padulong sa Nebraska upod sa akon paris, si Ernest Leuba, mas magulang sa akon kag may eksperiensia nga col­por­teur. Positibo kag negatibo ang amon eksperiensia. Halimbawa, madumduman ko sang mamat-od kami isa ka bes nga gamiton ang padasig nga metodo sa pagpahamtang sing mga libro. Naghimo kami sing mga kard nga nagatanyag sa mga tawo sing libre nga duha ka adlaw nga pag-usisa sa libro nga The Finished Mystery, upod ang pribilehiyo nga matigayon ini sa 60 ka ­cents sa amon pagbalik. Sang isa ka aga pareho kami nga nakapahulam sing napulo ka libro sa sining paagi. Pagligad sang duha ka adlaw, nakapahamtang ako sing pito, samtang si Broth­er Leuba, nga nagpanghikot sa duog nga kalabanan Katoliko, nakapahamtang sing isa lamang. Agod mabawi ang isa sang mga libro nga iya ginpahulam, nagkadto pa sia sa lokal nga Katoliko nga pari nga ginpasahan sang libro. Gani namat-od kami dayon nga ang amon padasig nga metodo indi subong ka epektibo sa paghinguyang sing kapin nga tion sa pagpakighambal sa mga tawo.

Sa pagkamatuod, diutay lamang ang amon kuwarta, nga nagakahulugan nga mahalungon kami sa paghunahuna sing mga paagi nga makakinot. Gani sang magsaylo kami sang ulihi sa bag-o nga asaynment sa Boul­der, Col­o­rado, nagbakal kami sing tiket padulong sa pinakamalapit nga estasyon nga lampas sa pihak sang dulunan sang estado. Nian nanaug kami sa tren kag nagbakal sing isa pa ka tiket para sa nabilin nga bahin sang paglakbay para sa masunod nga tren. Ngaa? Bangod ang plete sa sulod sang isa ka estado duha ka ­cents kada milya, apang ang plete sa ulot sang mga estado mas mahal. Luwas sa pagkinot sing kuwarta, nakapanaksi pa kami sing dipormal sa tion sang pagdulog.

Mga Problema sa Tion sang Inaway kag Isa ka Bag-o nga Umpisa

Sini nga tion 1918 na, kag ang Estados Unidos naulamid na sa inaway. Ang unos sang pagpamatok dayag nga nagsugod batok sa mga Estudyante sang Biblia, nga nagapakilala sang mga maisog kag sang mga indi. Ang iban nga kauturan nga yara na sa edad nga kuluhaon subong soldado, bisan pa nagapamatok bangod sa konsiensia, nagsugot sa paghimo sing serbisyo militar nga wala nagauyat sing armas.

Sang magparehistro ako, nangayo ako sing eksepsion bilang isa ka ministro. Sa hunahuna ko, ang akon mga argumento may maayo nga sadsaran, kag ang pagkuha sa akon naatrasar samtang ang akon kaso gindala sa hubon nga apelaran. Baliskad ang ila ginhunahuna kag ginsikway nila ang akon ginapangayo. Apang, ining pagkaatrasar nakabulig sa akon nga indi anay mabilanggo bangod tig-alani sini nga tion, kag gintugutan ako anay nga tapuson ining importante nga hilikuton sa uma sang akon mga ginikanan. Sang ulihi ang pagkuha sa akon gintalana sang Nobiembre 15. Ang inaway natapos sang Nobiembre 11. Apat ka adlaw na lang kuntani kag mabilanggo na ako.

Ang iban nga nagsakdag sa Cristianong neu­tralidad nahalitan man. Sa isa ka kombension sa Denver nakilala ang isa sa ila. Nagpaathag kon ngaa nakalbo sia, ang utod nagsiling nga ginhigot sia sang isa ka panatiko nga grupo nga nagbubo sing mainit nga alkitran sa ulo niya. “Ang mga babayi sa grupo,” siling niya, “amo ang pinakamapintas.” Nagpakalbo sia agod makuha ang alkitran. Nian nagyuhum sia kag nagsiling tuhoy sa iya eksperiensia: “Wala ako maghinulsol.”

Bangod sang ila wala magkompromiso nga tindog, ang iban nga opisyal sang Watch Tower Society ginbilanggo sa sayop nga kabangdanan. Apang sang 1919, samtang sa bilangguan pa, ginpili sila liwat sa ila mga posisyon sa Sosiedad, walay sapayan sang pagtinguha sang mga apostata nga islan sila. Ginbaton ini sang matutom nga kauturan subong tanda sang kahamuot ni Jehova. Puno sing kalipay, napalig-on sang bag-o nga pagpasagahay sang balaan nga espiritu, labi pa nga nangin determinado sila sang sa bisan anong tion nga himuon liwat ang pagbantala sing Ginharian nga hilikuton kag ibuyagyag ang klero bangod sang ila salimpapaw nga kapaslawan sa pagsakdag sa Ginharian sang Dios. Nagsugod ang bug-os nga pagpain gikan sa Babilonia.

Sang Pebrero 24, 1918, sa Los An­gel­es, Cal­i­for­nia, sa tapos madalahig ang Estados Unidos sa Inaway Kalibutanon I sang Abril 6, 1917, si Broth­er Ruth­er­ford naghatag sa nahaunang tion sing makakulunyag nga pamulongpulong, “Minilyon sang Nagakabuhi Karon ang Indi Na Mapatay.”

Importante nga mga Pagbalhin sa Sulod sang mga Tinuig

Sa sulod sang pito ka tuig si Lydia Tan­na­hill kag ako nagasulatay subong mag-abyan lamang. Sa tapos sang mapangamuyuon nga pagbinagbinag, namat-od kami sang 1921 nga labing maayo nga himuslan namon ang ginsiling ni Pablo sang ginlaygay niya ang pagkadiminyo nga sia nga “nagapakasal sa iya palangasaw-on nagahimo sing maayo.” (1 Corinto 7:38) Ang amon pag-asawahay isa ka dulot gikan kay Jehova kag nagpahalipay sa amon. Apang, wala magdugay, may naatubang kami nga problema. Bangod sang paglakbay, naggrabe ang halit sa likod ni Lydia, kag ang akon tagipusuon, bisan pa matutom kag mahigugmaon, mahinay, isa ka “kapoy nga tagipusuon” suno sa tawag sang mga doktor sa sini. Nagdul-ong ini sa anemia. Pareho kami nga nagluya. Ginlaygayan kami nga mag-ilis sing klima kag limitehan ang amon mga paglakbay sa adlaw-adlaw. Ang amon mo­bile home maayo gid para sa pagsunod sini nga laygay, kag gani ginhinguyang namon ang Septiembre 1923 sa dalanon padulong sa Cal­i­for­nia.

Bangod natungod ako sa kaliwatan nga may mataas gid nga pribilehiyo, nakita ko ang pagtubo sang kitaon nga organisasyon ni Jehova sa sulod sang mga tinuig. Didto ako sang ang Los An­gel­es gintungatunga sa mga teritoryo agod bantalaan sang mga indibiduwal, sang ang pagpanaksi kon Domingo una nga nagsugod, kag sang mabaton naton ang aton bag-o nga ngalan, mga Saksi ni Jehova, sang 1931. Daw ano ka makakulunyag nga makita ang mga pagpasibo nga ginhimo sang 1932 kag sang 1938 nga mangin teokratiko, sa baylo nga demokratiko, ang pagtangdo sa mga gulang. Kag makalilipay nga makita ang indi maathag nga mga hulusayon kag mga pamangkot, kaangay sang neutralidad kag pagkabalaan sang dugo, nga nag-athag.

Bisan pa nag-untat ako sa col­por­teur nga hilikuton sang 1923, wala ko gid madula ang espiritu sa pagpayunir. Gani sang 1943 nakabuylog ako liwat sa madasig magdamo nga grupo sang mga payunir. Sang 1945 nakatigayon pa gani ako sing pribilehiyo nga mangin espesyal payunir, kag nag-alagad sing siam ka tuig sa sina nga kapasidad tubtob naglukmat ang akon “kapoy nga tagipusuon.” Kutob sang 1954 regular payunir ako.

Ang amon pag-asawahay ni Lydia nagdugay sing 48 ka tuig tubtob sang 1969 nagsaylo sia sa iya bag-o nga asaynment, isa ka panublion nga “natigana sa iya sa mga langit,” isa ka asaynment nga akon man ginalauman nga mabaton sa sibu nga tion. (1 Pedro 1:4) Bisan pa wala kami ginpakamaayo sing kabataan, ginpakamaayo kami sang ginakabig sang madamo nga isa ka sulundan nga pag-asawahay. Bisan pa daku gid ang nadula sa akon, ang pagkamasako sa Teokratikong mga interes nakabulig sa akon sa paglandas sini. Sang ulihi ginpangasawa ko ang isa ka eksperiensiado nga payunir nga nakilala ko sa madamong tinuig, si Eva­mae Bell. Nag-updanay kami sing 13 ka tuig, tubtob sia, man, napatay.

Ang Akon Kaliwatan—Tumalagsahon sa Isa ka Pinasahi nga Paagi

Kon kaisa ginapamangkot ako: “Ano ang imo labing daku nga eksperiensia sa kamatuoran?” Sa wala sing pagpangalag-ag ako nagasabat: “Ang makita nga natuman sa sulod sang akon kaliwatan ang mga tagna sa Biblia nga ginsulat sang inspirado kag dedikado nga mga tawo sang nagligad nga mga siglo.”

Sa pagkamatuod, ang mga katapo sang akon kaliwatan sa guwa sang Teokratikong organisasyon, nangin subong gid sang ginpakita sang Photo-­Drama of Crea­tion sang 1914: buang sa kuwarta, buang sa kalipay, kag buang sa himaya. Kami sa sulod sang organisasyon sang Ginuo nagtinguha, sa tanan nga paagi nga mahimo, sa pagliso sang ila igtalupangod sa mensahe sang kabuhi. Naggamit kami sing mga eslogan, bug-os pahina nga mga pasayod, radyo, ­sound cars, mga ponograpo, dalagku nga mga kombension, mga parada sang mga karatula nga nagadala sing impormasyon, kag sang nagadamo nga armada sang manugpamalaybalay nga mga ministro. Ining hilikuton nagpain sa katawhan—pabor sa natukod na nga Ginharian sang Dios sa isa ka bahin, sa mga nagapamatok sa sini sa pihak nga bahin. Amo ini ang hilikuton nga gintagna ni Jesus para sa akon kaliwatan!—Mateo 25:31-46.

Tubtob ining akon “kapoy nga tagipusuon” magapitik sang iya katapusan nga pitik, magapadayon ini sa pagpitik sing apresasyon sa pribilehiyo nga akon natigayon nga matungod sa isa ka tumalagsahon nga kaliwatan. Magapadayon ini sa pagpitik sa kalipay sa pribilehiyo nga akon karon natigayon nga makita ang minilyon sang nagayuhum nga mga nawong nga magayuhum tubtob sa walay katubtuban.

[Laragway sa pahina 23]

Si Melvin kag si Lydia Sargent, mga colporteurs sang 1921

[Laragway sa pahina 24]

Si Melvin kag si Evamae Sargent, 1976