Mga Pamangkot Gikan sa mga Bumalasa

◼ Ano ang sala ni Moises nga nagbili sa iya sang pribilehiyo nga makasulod sa Ginsaad nga Duta? Amo bala ang paghampak niya sa igang sa baylo sang paghambal sa sini ukon nga napaslawan sia sa paghimaya kay Jehova nga Dios?

Ang sala ni Moises labi pa sang sa pagbunal lamang sang bato sa baylo sang paghambal sa sini, subong sang ginsugo sang Dios.

Malapit na matapos sa 40 ka tuig nga paglibotlibot, ang mga Israelinhon nagkampo sa Kadesh-barnea sa kahanayakan sang Zin (ukon, Paran). Nagkampo na sila didto mga dekada ang nagligad, ayhan bangod ang tatlo ka sapa sa sina nga lugar nagahatag sing berde nga lugar, subong sang makita sa kaupod nga litrato. Apang, sa sini nga okasyon, maiwat ang tubig, nga ayhan nagkahulugan nga ang katawhan indi makakita sing madamo nga pagkaon. Gani gin-away nila si Moises, ang tiglawas ni Jehova, nga nagasiling: “Ngaa bala nga ginpataklad ninyo kami gikan sa Egipto sa pagdala sa amon sa sining malaut nga duog? Indi ini duog sang uyas kag sang higos kag sang mga balagon sang ubas kag sang mga granada, kag wala sing tubig nga imnon.”—Numeros 20:5.

Nian ginsilingan sang Dios si Moises kag si Aaron: “Dalha ang sungkud kag tipona ang katilingban, . . . kag hambala ninyo ang igang sa atubangan sang mga mata nila nga maghatag ini sang iya tubig; kag paguwaan mo sila sing tubig gikan sa igang kag sa amo mapainum mo ang katilingban kag ang ila kahayupan.” (Numeros 20:8) Ano ang masunod nga natabo?

“Kag gintipon ni Moises kag ni Aaron ang katilingban sing tingob sa atubangan sang igang, kag nagsiling sia sa ila: ‘Pamati karon, kamo nga mga mabinatoon! Paguwaan bala namon kamo sing tubig gikan sining igang?’ Kag ginbayaw ni Moises ang iya kamot kag ginbunal ang igang sang iya sungkud sing makaduha; kag nagguwa sing bugana ang tubig.”—Numeros 20:10, 11.

Natalupangdan sang iban nga ginsugo sang Dios si Moises kag si Aaron nga ‘hambalon ang igang,’ apang ila “ginbunal ang igang.” Ini bala nga kinatuhayan wala magpahamuot sing daku kay Jehova amo kon ngaa ginsilingan niya si Moises kag si Aaron nga indi Niya sila pagpahanugutan nga magatuytoy sa Israel pasulod sa Ginsaad nga Duta?

Indi amo sina. Ang matuod amo nga mga pila lamang ka bulan sa tapos sang Pagpalagyo (Exodo) ang katawhan nagreklamo primero bangod sang kakulang sing tubig. Malapit ini sa Bukid sang Sinai (Horeb), sa lugar nga gintawag nga Meriba (sa lugar nga makita sa ubos). Talupangda kon ano ang ginsiling sang Dios kay Moises sadto nga okasyon: “Ako magatindog sa atubangan nimo didto sa ibabaw sang bato sang Horeb. Kag hampakon mo ang bato, kag magaguwa sa sini ang tubig, agod nga mag-inum ang katawhan.” (Exodo 17:2-7; 33:6) Gani sang ginsilingan si Moises, sa Kades, nga hambalon ang bato, mahimo nga naanad sia sa paghimo kon ano ang iya ginhimo sang nagligad sa sugo sang Dios, bisan pa nga para sa Dios ang paghambal sa bato bastante na.

May labi pa nga butang nga nagdul-ong sa paghukom sang Dios kay Moises kag kay Aaron. Ano ayhan ina? Ginsilingan ni Moises ang mabinatoon nga katawhan: “Paguawaan bala namon kamo sing tubig gikan sining igang?” Ang Salmo 106:33 nagahatag sa aton sing paghangop sa sini, kay ginapakita sini nga si Moises naghulag nga may mabinatoon nga espiritu kag nga sia ‘nagpamulong sa iya mga bibig sing matabinason.’ Sa akig nga hambal, gintawag niya ang igtalupangod sa iya kaugalingon kag kay Aaron sa baylo nga sa Isa nga amo gid ang milagruso nga nagaaman sang tubig. Gani, sang wala pa mapatay si Moises sa dulunan sang Ginsaad nga Duta, ginpatuhuyan sang Dios ang hitabo sa Kadesh-barnea kag ginsiling nga ang sala ni Moises amo nga napaslawan sia sa ‘pagpakabalaan sa Dios sa atubangan sang mga mata sang katawhan.’—Numeros 27:12-14.

Makakuha kita sing leksion gikan sa sini. Bisan pa nga importante gid ang pagpugong sa aton kaugalingon gikan sa maakigon nga mga buhat, importante man nga kontrolon ang aton espiritu, labi na kon ang iban nakasala. Kon ginapabay-an naton ang aton kaugalingon nga matublag sing sobra, ayhan magasugod kita sa pagtamod sa mga alagad sang Dios sa tawhanon nga sadsaran, sa baylo sang pagkilala nga “mga karnero” gihapon sila sang Dios. Matuod, dihimpit sila kag makahimo sing makaulugot nga mga butang, apang sila “iya katawhan kag mga karnero sang iya halalban.” (Salmo 100:3) Gintugutan sang Dios ang iya Anak nga mapatay tungod sa ila, gani indi bala kita dapat magpanikasog nga magpailob sa ila, nga wala nagapensar sing daku sa kon ano ang batyagon naton ukon maapektuhan kag sing labi sa ila tindog upod sa Dios?

[Mga Laragway sa pahina 31]

Panahon sang tigragas sa lugar malapit sa isa sang mga sapa sang Kadesh-barnea

[Ginkuhaan]

Photos, pages 10, 31: Pictorial Archive (Near Eastern History) Est.