Nagapakighambal Gid Bala Sila sa Patay?
KON kaisa ang mga soccer team sa Brazil nagapangayo sing bulig paagi sa mga espiritista. Ngaa? Agod mangayo sing laygay sa kahadlok nga basi magdaug ang kontra nga team. Suno sa isa ka pamantalaan, “ang kahigayunan nga makapakighambal sing direkta sa labaw sa kinaugali sa pagpangita sing mga solusyon sa tanan nga sahi sang problema makusog nga nagaimpluensia sa minilyon ka tawo.” Sa iban nga pungsod, ang mataas sing ranggo nga mga politiko, mga artist, kag mga negosyante tayuyon nga nagakonsulta sa mga espiritu. Sa panikasog nga mabulong ukon malubad ang problema sa pinansial, madamo ang nagatinguha sa pagkonsulta sa patay, nga ginapatihan nga makabulig sing daku.
Apang nagakaigo bala nga tinguhaan ang pagpakighambal sa patay? Posible gid bala nga himuon ina? Kag may mga katalagman bala nga nadalahig? Ayhan makibot ka sa paghibalo kon ano ang ginasiling sang Biblia.
Ano ang Natabo kay Saul?
Binagbinaga ining matuodtuod nga eksperiensia nga narekord sa Biblia: Nahadlok sa kaaway nga mga Filistinhon, si Hari Saul sang dumaan nga Israel nagkadto sa espiritista sang En-dor. Ginpangabay sia ni Saul nga kontakon ang patay na nga si manalagna Samuel. Sang mabatian ang iya paglaragway sa isa ka tigulang nga may wala sing pako nga panapton, ginhangop ni Saul ini nga pagpakita nga si Samuel. Kag ano ang mensahe? Ang Israel itugyan sa kamot sang mga Filistinhon, kag sa masunod nga adlaw si Saul kag ang iya mga anak nga lalaki mangin kaupod ni “Samuel,” nga nagapakita nga mapatay sila samtang nagapakig-away sa mga Filistinhon. (1 Samuel 28:4-19) Amo bala sina ang natabo?
Indi gid man. Nasamad sing daku si Saul sa pagpakig-away sa mga Filistinhon, apang naghikog sia. (1 Samuel 31:1-4) Kag kabaliskaran sa tagna nga nagasiling nga tanan nga mga anak nga lalaki ni Saul mapatay kaupod niya, ang iya anak nga si Is-boset wala mapatay.
Apang una sa tanan nagakaigo bala ang magpamangkot sa patay? Indi, indi ina nagakaigo. Ang Kasulatan nagasugid sa aton: “Napatay si Saul tungod sang iya paglapas . . . kag tungod nga nagpamangkot man sia sa espiritista.” (1 Cronica 10:13) May maton-an bala kita sa sini? Huo. Napatay si Saul tungod sa pagpangabay sa espiritista nga pamangkuton ang patay. Ngaa? Bangod kay sa paghimo sini, ginlapas niya ang maathag nga sugo sang Dios: “Mangin walay makita sa imo nga . . . bisan sin-o nga nagakonsulta sa mga espiritista ukon propesyonal nga mga manugpakot sang mga hitabo ukon manugpamangkot sa mga napatay. Kay ang bisan sin-o nga nagahimo sining mga butang kangil-aran kay Jehova.” (Deuteronomio 18:10-12) Ngaa ang pagpamangkot sa mga patay kangil-aran sa Dios? Sa wala pa masabat ina nga pamangkot, ayhan mamangkot kita:
Posible Gid Bala Ini?
Agod mahambal ni bisan sin-o ang patay, ang mga patay dapat gid nga nagakabuhi. Dapat nga may dimamalatyon sila nga kalag. Apang ang Biblia nagasiling: “Si Jehova nga Dios naghimo sang tawo gikan sa yab-ok sang duta kag naghuyup sa iya ilong sang ginhawa sang kabuhi, kag ang tawo nangin buhi nga kalag.” (Genesis 2:7) Busa, ang tawo mismo isa ka kalag. Wala sia sing dimamalatyon nga kalag nga padayon nga nagakabuhi pagkatapos mapatay ang lawas. Sa katunayan, ang Kasulatan nagasiling: “Ang kalag nga nagapakasala—ini mismo mapatay.” (Ezequiel 18:4) Dugang pa, ang Pulong sang Dios nagasiling: “Ang buhi nakahibalo nga mapatay sila; apang ang patay wala makahibalo sang bisan ano . . . Walay buluhaton ukon pahito ukon ihibalo ukon kaalam sa Sheol,” ang kumon nga lulubngan sang katawhan.—Manugwali 9:5, 10.
Kon amo, sa baylo nga labi nga nakahibalo, ang patay wala sing hinalung-ong. Gani imposible ang makighambal sa ila. Busa ang pagsunod sa sugo sang Dios batok sa pagpamangkot sa mga patay nagaamlig sa aton nga indi madaya. Apang, ang mga mensahe gikan sa espiritu nga duog posible, subong sang ginapakita sang naeksperiensiahan ni Hari Saul.
Apang Ano ang Ginhalinan?
Una, ang daya kinaandan sa tunga sang mga nagaangkon nga nagapakighambal sa patay. Ang The World Book Encyclopedia nagasugid sa aton: “Ginapakita nga ginalimbungan sang mga espiritista ang mga tawo sa ila mga miting sa pagpati nga ang mga espiritu sarang makapakighambal sa mga buhi. Ang mga sientipiko nagahatag sing madamo nga paathag sa kon ano ang nagakatabo sa mga miting sang mga espiritista. Halimbawa, ang iban nga mga espiritista bentrilogo. Ang iban nagagamit sing mga kabulig kag lainlain nga sahi sang kagamitan sa paglimbong. Ang iban nagagamit sing hypnosis ukon paglupay. Madamo sa nagatambong sa miting sang mga espiritista ang may daku nga handum nga masugilanon ang patay na nga hinigugma. Ini nga handum nagapapati sa ila nga ang bisan ano nga mensahe nga ginahatag sang espiritista naghalin sa kalibutan sang mga espiritu.”
Apang magahunahuna lamang bala kita sa sina nga paagi? Indi, kay ang pagpamati sa sugo sang Dios batok sa pagpamangkot sa mga patay nagaamlig man sa aton sa labi ka talalupangdon nga paagi. Nagahalin matuod ang mga mensahe sa espiritu nga duog, apang ang ginhalinan nila isa ka gamhanan nga tinuga nga nagatinguha sa pagdaya sa katawhan. Ginapakilala sila sang Biblia subong “malaut nga mga espiritu”—si Satanas nga Yawa kag ang malinapason nga mga anghel nga kilala subong mga demonyo. (Efeso 6:12) Sang ginduaw ni Hari Saul ang espiritista sang En-dor, isa ka demonyo ang nagpakunokuno nga amo ang napatay na nga si manalagna Samuel.
Subong sang gin-ilustrar sa kaso ni Saul, ang mga demonyo wala sing mapuslanon nga mapaalinton, kag ang ginakabig nga mabulig nila makadali lamang. Kaangay sang ila gumalahom, ang Yawa, mga butigon sila. (Marcos 3:22; Juan 8:44) Sa sini nga bahin, ang anhing Britanikong psychic nga mananalawsaw nga si Sir Arthur Conan Doyle nagsulat: “Dimalipayon nga makig-angot kita sa walay patugsiling nga pagbinutig sang malaut ukon tuso nga mga intelihensia. Ang kada isa nga nag-imbestigar sang bagay, sa banta ko, nakasugata sing mga halimbawa sang hungod nga paglimbong nga kon kaisa ginaupod sa maayo kag matuod nga mga komunikasyon.” (The New Revelation, pahina 72) Sa pagkamatuod, indi ninyo luyag nga limbungan, kamo bala?
Karon, binagbinaga ini: Ginasugiran kita sang maragtas nahanungod sa negosyo sa ulipon kag may kahilabtanan nga mga pag-antos. Kinabubut-on bala nga batunon sang bisan sin-o ina nga kabudlay kag pagpakahuya? Indi gid. Nian ngaa tugutan naton ang aton kaugalingon nga maulipon sang malaut nga mga espiritu? Wala lamang sila nagabinutig kundi nagakawat man sa mga tawo sang ila kahilwayan kag ayhan nagadul-ong sa ila sa kasingki kag pagpatay. Halimbawa, ang 29-anyos nga si José sang Pernambuco, Brazil, nagsiling nga ‘isa ka espiritu ang nagsulod sa iya, nga nagapilit sa iya nga patyon ang iya isa ka tuig nga bata nga babayi.’ Huo, ang pagkanadalahig sa malaut nga mga espiritu magadul-ong sa sina nga pagkaulipon. Nian, subong nga ang napit-an nga mga ulipon sang nagligad luyag mahidlaw, ang mga naulipon karon sa mga demonyo maluyag man nga mahilway. Ang isa ka paagi sa pagtigayon sini nga kahilwayan amo ang pag-untat sa pagkonsulta sa mga espiritista kag pagpanikasog nga masugilanon ang patay. Bangod sina, . . .
Kinahanglan Bala nga Makighambal sa Patay?
Indi, bangod indi nga wala kita sing bulig. Kaangay sang kabataan nga nagasalig sa ila amay, hilway kita nga makapangayo sing bulig gikan sa langitnon nga Amay, nga malipay sa pagbulig sa mga bunayag sing tagipusuon. (Lucas 11:9-13) Ang manalagna sang Dios nga si Isaias nagsiling: “Kag kon magsiling sila sa inyo: ‘Pamangkot kamo sa mga manugpaguwa sang mga espiritu kag sa mga salamangkero nga nagawiswis kag nagakibot,’ indi bala magpamangkot ang katawhan sa ila Dios? Tungod sa mga buhi magapamangkot bala sila sa mga patay? Sa kasuguan kag sa pagpamatuod!”—Isaias 8:19, 20.
Huo, may malig-on kita nga rason sa pagsalig kay Jehova nga Dios kon ginahimo naton ang iya kabubut-on kag nagadumili sa pagpakig-angot sa malaut nga mga espiritu. Ang Cristianong disipulo nga si Santiago nagsulat: “Busa magpasakop kamo sa Dios; sumpunga ang Yawa, kag magapalagyo sia sa inyo.” (Santiago 4:7) Pagkatapos makatuon sa Biblia upod sa mga Saksi ni Jehova, ang isa ka tawo nga nagabuhat anay sing espiritismo sa sulod sang 28 ka tuig nagsiling: “Indi gid mahadlok sa kon ano ang mahimo nga himuon sang Yawa sa mga nagabiya sang espiritistiko nga mga buhat, kundi, sa baylo, magsalig kay Jehova nga Dios.”
Ang pagpuno sa hunahuna sing kamatuoran gikan sa Pulong sang Dios kag ang pagpanghikot nahisuno sa sini magahimo sa aton nga “masuklob ang bug-os nga [espirituwal] nga hinganib sang Dios” agod aton “mabatuan ang mga daya sang Yawa” kag indi maulipon sang malaut nga mga espiritu. (Efeso 6:11) Dugang pa, ang pagpangamuyo sing tayuyon kay Jehova magaaman sing makusog nga pangapin batok sa pagpanggamo sang demonyo.—Hulubaton 18:10.
Daw ano ka makapaumpaw ang paghibalo sa kamatuoran nahanungod sa kahimtangan sang patay! Ang kamatayon kaangay sang mahamuok nga katulugon. (Juan 11:11) Kag gingarantiyahan ni Jesucristo nga may pagkabanhaw sa mga patay.—Juan 5:28, 29.
Upod sa iya asawa kag kabataan, naton-an sang isa ka espiritista gikan sa Kasulatan nga indi dapat pagtinguhaan sang bisan sin-o ang makighambal sa patay ukon sa isa nga nagapakunokuno sa ila. Kaangay sini nga pamilya kag sang madamo pa nga iban sa palibot sang kalibutan, maagom man ninyo ang espirituwal nga kahilwayan. (Juan 8:32) Ton-i ang kamatuoran nahanungod sa patay kag ang katuyuan sang Dios para sa katawhan. Nian mahulat ninyo ang bag-ong sistema ni Jehova, diin masugilanon ninyo ang ginbanhaw nga mga hinigugma kag matigayon ang kabuhi nga dayon sa idalom sang mahidaiton nga mga kahimtangan.—Isaias 25:8.
[Laragway sa pahina 4]
Sin-o gid ang nakighambal sang mangabay si Hari Saul sing mensahe gikan sa patay nga si manalagna Samuel?