Nagapakig-upod Ka Bala Anay sa Organisasyon ni Jehova?

ANG pamatan-on nagbatyag sing kahuya kag daku nga kasubo. Ang iya mga panapton, nga guba kag gision, nagapakita nga isa anay ini ka sunod sa moda nga panapton. Walay duhaduha nga nagapakita ini nga namigado sia karon. Samtang ginadumdom niya ang iya malayo nga tumandok nga duta, nagsugod sia sa pagbatyag sing daku nga pagbag-o tungod sa malaut nga pagkabuhi niya anay kag sa kon paano niya gin-uyangan ang palanublion nga gintinguhaan niya nga makuha sing tuman ka temprano. Ang iya wala sing unod nga tiyan nagadugang sa iya kasubo, kag nagbatyag sia nga may kahidlaw sa ila balay. Ti, bisan ang mga suluguon sang iya amay sa ila balay mas maayo pa sang sa iya! Abaw, daku gid ang iya kaluyag nga mangin sa lugar nila!

Apang ano nga sahi sang pagbaton ang ginapaabot niya sa iya amay kon magbalik sia karon? Wala gid niya ginapaabot nga sug-alawon sia sing mainit ukon pasudlon sa balay pagkatapos sang makahuluya nga paghingalit niya sa kaayo sang iya amay. Apang, nagapangibabaw gid sa iya hunahuna kag tagipusuon ang daku nga balatyagon: Dapat sia magpauli.

Wala gid mahangpi sing maayo sining pamatan-on ang balatyagon sang iya amay sa iya! Daw ano nga sorpresa ang nagahulat sa iya samtang nagahinampot sia sa iya anay puluy-an! Sa katunayan, “sang malayo pa sia, nakit-an sia sang iya amay kag ginkaluoyan, kag nagdalagan ang amay kag ginhakus sia niya kag ginhalukan.”—Lucas 15:20.

Kaangay sang buhaha nga anak, ginbayaan mo bala ang imo puluy-an? Nagpalayo ka bala sa imo Amay, nga si Jehova, kag sa iya organisasyon? Luyag mo man bala karon nga ‘magpauli’?

Sa kalabanan nga hitabo, ang mga nagpalayo sa organisasyon ni Jehova indi gid eksakto nga kaangay sa buhaha nga anak. Tuhoy sa madamo, isa lamang ini ka amat-amat, halos indi mamulalungan, nga proseso sang pagpalayo—kaangay sang diutay nga sakayan, nga ginaanud-anud kag mahinay nga ginadaldal palayo sa duta. Ang iban nabug-atan sing daku sa pinansial nga mga problema ukon mga problema sa pamilya, sa balatian ukon sa “pag-una” sa kalibutan, sa bagay nga ang espirituwal nga mga butang ginpatumbayaan. Ang iban nagpasandad sa mga indibiduwal nga nagapakig-upod sa Cristianong kongregasyon ukon nagbiya bangod wala sila nagaugyon sa pila ka paghangop sa isa ka Makasulatanhon nga punto sang organisasyon ni Jehova. Ang iban naman nagtugot sa ila kaugalingon nga magluya kag nag-untat sang ining karon nga sistema sang mga butang wala matapos sa tion nga ginapaabot nila.

Kon isa ikaw sadtong wala na nagapakig-upod sing aktibo sa organisasyon ni Jehova, ayhan isa ukon kapin pa sining mga rason ang nagakabagay sa imo kahimtangan. Apang bisan ano man ang kabangdanan, indi bala karon na ang tion sa paghunahuna nga magbalik?—Mateo 18:12-14.

Nasandad Ka Bala?

Nagadumdom kon daw ano na kalayo ang katawhan sa kahimpitan, mapaabot sang isa nga sa tion kag tion mahanabo ang pagbanggianay. Nagdul-ong ini sa pagkasandad sang iban. Nasandad ang iban sang ang indibiduwal nga ginatahod gid nila sing daku hinali nga naghulag sing padasudaso ukon sing dicristiano nga paagi ukon naulamid sa sala.

Natabo bala ini sa imo? Bisan ano man ang nagpasandad sa imo, pat-od gid nga indi si Jehova ang ginbangdan sang pagkasandad. (Ipaanggid ang Galacia 5:7, 8.) Gani matarong gid bala nga halitan ang aton kaangtanan sa iya bangod sang ginhimo sang iban? Sa baylo, indi bala nga dapat naton sia padayon nga alagaron sing matutom, nagasalig nga nahibaluan ni Jehova ang nagakatabo kag magapakig-angot sa aton sing mahigugmaon?—Colosas 3:23-25.

Sa pagligad sang tion, nasapwan sang iban nga ang nagpasandad anay sa ila indi na importante karon ukon nadula na. Ukon sa matawhay nga pagbinagbinag sa natabo, mahimo sila karon magahinakop nga sila amo gid ang nagsala. Masami nga amo sini kon ang isa wala mag-ugyon kag nasandad sa laygay ukon disiplina nga ginpadapat sa iya. Sa pagdumdom, ayhan narealisar niya nga yadtong disiplina ginhatag sa matuod nga gugma kag para sa iya kaayuhan. (Hebreo 12:5-11) Daw ano ka nagakaigo, nian, nga maghulag sa laygay ni apostol Pablo! Naglaygay sia: “Pabakura ang inyo nagapamuypuy nga mga kamot kag nagakurog nga mga tiil, kag patadlunga ang inyo mga tikang. Nian ang piang indi magliw-as, kundi mag-ayo.”—Hebreo 12:12, 13, The New English Bible.

Wala Ka Bala Mag-ugyon sa Isa ka Panudlo?

Mahimo nga ginbiyaan mo ang organisasyon ni Jehova bangod lain ang imo paghangop sa pila ka Makasulatanhon nga punto. Subong nga ang mga Israelinhon nga ginluwas sa Egipto madali nga “nalimot sang mga binuhatan [sang Dios]” tungod sa ila kag “wala sila maghulat sang iya laygay,” mahimo nga nagpamat-od ka sing padasudaso nga sanglit wala pagbatuna sang organisasyon ang pagtamod nga ginkabig mo nga husto, utdon mo ang pagpakig-upod sa sini. (Salmo 106:13) Ayhan kutob sadto ang punto gin-athag na, mahimo nga ginbayluhan ukon ginlig-on pa gid paagi sa dugang nga Makasulatanhon nga panalawsaw sa idalom sang pagtuytoy sang espiritu sang Dios. Indi bala mas maayo nga magpabilin sa organisasyon, maghulat kay Jehova?

Maayo panumdumon nga si Jehova pirme nagapanghikot paagi sa isa lamang ka organisasyon. Sa aton kaadlawan, “ang matutom kag mainandamon nga ulipon” nagahatag sing espirituwal nga pagkaon “sa nagakaigo nga tion.” Talupangda nga ining ulipon ‘nasapwan nga nagahimo sing subong sang mag-abot ang Agalon.’ (Mateo 24:45-47) Sa pagkamatuod, sin-o karon ang nakahibalo nga ang Agalon nag-abot na? Kag sin-o ang masako sa hilikuton nga ginpakita? Yadto lamang ang nagapakig-upod sa organisasyon sang Cristianong mga saksi ni Jehova!

Sang ginbayaan sang iban si Jesus, si apostol Pedro nagsiling: “Ginuo, kay sin-o bala kami makadto? Ikaw may mga pulong sang kabuhi nga walay katapusan.” Indi mapangduhaduhaan nga nahibaluan gid ni Pedro nga si Jesus amo ang Mesias. Gani sang masapwan sang madamong disipulo ang iban nga pinamulong ni Jesus nga makakilibang, nahibaluan ni Pedro nga dimaalamon ang magbiya sa ginhalinan sang “mga pulong sang kabuhi nga walay katapusan.” Sa ulihi ang bisan ano nga pangduhaduha ukon dipaghangop maathagan. (Juan 6:51-68; ipaanggid ang Lucas 24:27, 32.) Amo sini gihapon karon, samtang progresibo nga ginatuytuyan ni Jehova ang iya mga alagad sa dalan sang kamatuoran.—Hulubaton 4:18.

Magbalik Karon

“Usisaon naton kag tungkaron ang aton mga dalanon, kag magbalik kay Jehova,” laygay ni manalagna Jeremias. (Panalabiton 3:40) Huo, ayhan ang iban magaisol, ayhan nahadlok sa mapigaw nga pagbaton sang mga yara sa kongregasyon. Apang ano ang sabat sang magpauli ang buhaha nga anak? “Dapat kita . . . magkalipay,” paathag sang amay, “kay ining imo utod napatay kag nabuhi, kag nadula sia kag nakita.” (Lucas 15:32) Ang amo man kainit nga pag-abiabi nagahulat sa mga ‘nagbalik kay Jehova’ upod ang hanuot nga handum nga himuon ang iya kabubut-on.—Ipaanggid ang Lucas 15:7.

Apang ang Cristianong kongregasyon wala lamang magpungko kag maghulat sa pag-abiabi sa ila kon kag sang mamat-od sila nga ‘magpauli.’ Sa ilustrasyon ni Jesus, ang amay nagdalagan sa pagsug-alaw sa iya anak “sang malayo pa sia.” Sing kaanggid, ginakabig sang mga Saksi ni Jehova nga personal nga obligasyon nga pangitaon ang nagapakig-upod anay kag buligan sila nga magbalik sa organisasyon ni Jehova.

Apang kamusta ang indibiduwal nga nakahimo sing grabe nga sala sang magbulag sia sa organisasyon ni Jehova? Ukon kamusta kon ang isa ginpahalin sa pagpakig-upod sa katawhan sang Dios bangod sang grabe nga sala kag kutob sadto wala na magbuhat sing dicristiano nga pagginawi? Nahibaluan sang mga gulang kon paano sia buligan sa isa ka malulo kag mahigugmaon nga paagi agod tadlungon ang mga bagay upod kay Jehova. Gani ang bisan sin-o nga maluyag karon nga magbalik kag magkabuhi nahisuno sa kabubut-on sang Dios dapat magpahibalo sini nga handum sa mga gulang. “‘Kari karon, kag magbais kita sing tingob,’ siling ni Jehova. ‘Bisan ang inyo mga sala subong sang escarlata, mangin maputi sila subong sang nieve.’”—Isaias 1:18.

Daw ano kalulo, kainit, kag mahigugmaon ang aton langitnon nga Amay! Kag daw ano sia ka mapailu­bon kag interesado sa kada isa sa aton sing personal! Sa pagkamatuod, indi niya luyag nga malaglag kita upod sining malaut nga sistema sang mga butang. (2 Pedro 3:9) Si Jehova amo ang ­naglaygay sa iya dumaan nga katawhan: “Balik kamo sa akon, kag magabalik ako sa inyo.” Amo man sina ang imbitasyon karon.—Malaquias 3:7.

Ang tion nagaligad, busa indi magpalantang. Upod sa katawhan ni Jehova, agoma liwat ang ‘daku nga paghidait sang mga nagahigugma sa kasuguan sang Dios.’ “Wala sila sing kahigayunan sa pagkasandad,” siling sang salmista. (Salmo 119:165) Sa sulod sang imo tagipusuon, ginahigugma mo bala ang kasuguan ni Jehova? Kon isa ikaw ka dedikado nga alagad sang Dios, amo ini kon ngaa nagdedikar ka sa iya. Wala na—huo, wala na sing iban pa—ang labi ka importante sang sa pagpasag-uli sa imo kaangtanan kay Jehova. Indi sia pagtalikdi. Hunahunaa sing maayo kag sing mapangamuyuon ang bagay. Kon nahidlaw ka sa paghiusa kag pagpakig-abyan sa katawhan ni Jehova, indi pa tuman ka ulihi ang magbalik sa organisasyon ni Jehova. Himua ini nga wala nagapalantang.