Takus Bala sa Panikasog ang Pangamuyo?

SANG Biernes, Mayo 31, 1985, isa ka alagisod nga mabaskog nga bagyo ang nagsalakay sa nabagatnan nga bahin sang Ontario, Can­a­da. Ang klerigo nga nagaistar sa diutay nga minuro sang Grand Valley nagtan-aw nga wala sing mahimo samtang ang nagabalingaso nga hangin nagakakas sa atop sang iya apart­ment. Subong sang ginbalita sa prensa, iya “nakita ang mga milagro kag mga trahedya nga dungan nga natabo samtang ginasaksihan niya ang dimakontrol nga kasingkal sang kinaugali.”

Sa pagkamatuod, ang mga hinigugma kag mga abyan sang duha ka tawo nga napatay sa mabaskog nga bagyo nagkabig sini nga isa ka terible nga trahedya. Amo man ang linibo kag kapin pa nga nadulaan sing puluy-an bangod sang malaglagon nga buhawi. Sa pihak nga bahin, madamo sadtong halos nakapalagyo sa kamatayon ukon grabe nga halit ang naglaragway sa kaluwasan nila subong “milagro.” Duha sa ila amo si Ron kag ang iya kaupod sa obra. Nalab-ot nila ang lugar nga wala sing peligro sa pinakamabakud nga bahin sang ila opisina nga may apat lamang ka segundo nga paandam. Sa tapos malaragway ang ila makatilingala nga pagpalagyo sa kamatayon, si Ron nagsiling: “Huo, nagapati ako anay sa Dios kag nagapati gid ako karon sa Dios.”

Ginasiling nga sa tion sang hinali kag wala ginapaabot nga kalamidad, ‘diutay lamang, kon may yara gid man, ang mga atiesta.’ Kag kon may bastante pa nga tion sa sina nga mga okasyon, madamong hanuot nga pangamuyo nga nagapangabay sing pangamlig kag kaluwasan ang ginahimo.

Sang Domingo, Hulyo 21, 1985, kapin sa isa ka gatos ka lalaki, babayi, kag kabataan ang nagtipon para sa pagsimba sa ila King­dom Hall sa Syd­ney, Aus­tra­lia. Pagkatapos sang ambahanon sang pagdayaw sa Dios, ginhatag ang pangamuyo tungod sa kongregasyon. Sang ang isa ka ministro 15 minutos na nga nagahatag sang iya diskurso sa Biblia sadto nga Domingo sang aga, isa ka lupok sang bomba ang hinali nga nagtublag sa kalinong, nagsamad sa iya sing grabe, nagpatay sa isa ka tawo nga nagalingkod sa atubangan sang tiliponan, kag nagresulta sa pagkaospital sang kapin sa 40 ka tawo.

[Kahon/Laragway sa pahina 3]

May Ginahimo Bala nga Kinatuhayan ang Pangamuyo?

Ang duha ka hitabo nga ginsugilanon bag-o lang—ang isa nagalaragway sa “indi makontrol nga kasingkal sang kinaugali” kag ang isa pa subong isa ka kriminal nga buhat—nagapautwas sing mga pamangkot nahanungod sa kabilihanan sang pangamuyo. Ano ang kabilihanan sang pangamuyo? Epektibo gid bala ang pangamuyo? Takus gid bala sa panikasog ang pangamuyo?