Ang Masanag nga Palaabuton sang Duta sa Idalom sang Ginharian sang Dios
ANG Biblia nagasiling nga “ang pagtuo amo ang kasigurohan sang mga butang nga ginalauman.” (Hebreo 11:1) Subong sang nakita naton sa nauna nga artikulo, kapin sa 500 ka tuig antes sang pagkabun-ag ni Cristo, ginpasulat sang Dios sa tolon-an ni Daniel ang matagnaon nga paglili sa pagbangon kag pagkapukan sang mga kagamhanan sa kalibutan kutob sang kaadlawan ni Daniel tubtob sa aton adlaw. Ang kasibu sining mga tagna nagapasalig sa aton, nagahatag sa aton sing makusog nga rason sa pagtuo, nga ang iban pa nga mga tagna ni Daniel matuman man kag sa dili madugay buslan sang Ginharian sang Dios sa idalom ni Cristo Jesus ang tawhanon nga mga gobierno.
Daku gid nga pagbalhin ang kahulugan sina para sa katawhan! Nagahulat sina nga tion, ang Dios mismo nagsiling: “Toloka! Ginahimo ko nga bag-o ang tanan nga butang.” (Bugna 21:5) Ang pagbinagbinag sa pila ka inspirado nga mga tagna nga nagalaragway sa aton sinang malipayon nga tion magabulig sa aton sa paghangop kon daw ano gid ka “bag-o” ang mga butang, kon daw ano gid ka tuhay ini gikan sa makita naton karon sa idalom sang tawhanon nga pagginahom. Sa pagkamatuod, ang ginasiling sang Biblia nahanungod sa palaabuton sang aton duta kag sang kabuhi sa sini makatilingala gid. Binagbinaga:
Ang krimen kag kasingki matapos. “Kay utdon ang mga manughikot sing malaut, . . . ang malauton wala na.” Ang mga nagakabuhi “magalingkod, ang tagsa ka tawo sa idalom sang iya ubas kag sa idalom sang iya higuera, kag wala na sing magapahadlok sa ila; kag ang baba ni Jehova sang mga kasoldadosan nagpamulong sini.”—Salmo 37:9, 10; Miqueas 4:4.
Ang mga pagbinahinbahin sa rasa kag pungsod, kag ang mga inaway nga ginatuga sini, madula. “Ang pungsod indi magbayaw sing espada batok sa pungsod, kag indi na sila magtuon sing inaway.”—Isaias 2:4.
Ang kakulang sa balay, pagkawalay puluy-an, kag pagkawalay palamugnan mangin mga butang sang nagligad. Si Isaias nagtagna: “Magapatindog sila sing mga balay kag puy-an sila; kag magatanum sila sing mga ulubasan kag magakaon sang bunga nila. . . . Kag ang akon mga pinili magakalipay sing malawig sa binuhatan sang ila mga kamot.”—Isaias 65:21, 22.
Ang makahaladlok nga tiggulutom, subong sang natabo sining karon lang sa Aprika, talusan sang bugana nga pagkaon para sa tanan. “May bugana nga uyas sa duta; sa putukputukan sang kabukiran magahapayhapay ini.” “Ang duta naghatag sang iya patubas; ang Dios, ang aton kaugalingon nga Dios, magapakamaayo sa aton.”—Salmo 72:16; 67:6, 7.
Dugang pa, yara ang maayo nga panglawas kag kabuhi nga sa sini maagom naton ining mga pagpakamaayo. Bisan sadtong ministeryo ni Jesus sa duta, masiling sing matuod nga “ang mga bulag nagabaton sang ila itololok, ang mga piang nagalakat, ang mga aruon nagaayo, ang mga bungol nakabati.” Apang, ang mas daku nga saad naaplikar: “Pahiran niya [Dios] ang tagsa ka luha sa mga mata nila, kag wala na sing kamatayon, ukon kalisud ukon paghibi ukon kasakit pa. Ang nahaunang mga butang nagtaliwan.”—Lucas 7:22; Bugna 21:4.
Daw ano ka daku nga pagbalhin! Daw ano nga paumpaw ang ihatag sini tanan sa nasit-an nga katawhan! Ginapalig-on namon kamo nga ipasakop ang inyo kaugalingon bisan karon pa lang sa Ginharian sang Dios, agod nga kamo man magaani sing mga benepisyo nga magakari gikan sa sining pagbalhin sa pagginahom sa kalibutan.
[Laragway sa pahina 7]
Ang katawhan nga nagakabuhi karon mahimo magpaabot sing makatilingala nga mga pagpakamaayo—ang katapusan sang inaway, krimen, kaimulon, balatian, kag bisan ang kamatayon. Maagom mo bala ina nga palaabuton?