Mga Manughingalit sa ‘Kaimulon kag Pagkaignorante’?
“ANG mga Saksi ni Jehova . . . nagahimulos sa kaimulon, sa pagpatumbaya, kag sa pagkaignorante sang madamo sa aton katawhan,” sulat sang Mexicano nga manunulat nga si Jorge García, “agod kontrolon sing amat-amat ang ila konsiensia.”—Excelsior sang Marso 9, 1983.
Kaanggid man sini nga mga panumbungon batok sa mga Saksi ni Jehova ang masami mabatian sa Latin Amerika. ‘Wala gid sing importante nga tawo nga nangin isa sang mga Saksi ni Jehova,’ siling sang pila ka propesyonal nga mga tawo, mga politiko, kag relihioso nga mga lider. ‘Ang mga Saksi ni Jehova nagakuha sang ila mga sumulunod gikan sa imol kag ignorante nga mga tawo.’ Matuod nga madamo sang mga Saksi ni Jehova ang imol, apang nagakahulugan bala ini nga ang mga Saksi ni Jehova ‘nagahimulos sa kaimulon, pagpatumbaya, kag pagkaignorante?’ Ang kamatuoran bala nga madamo sang kubos kag imol nga mga tawo ang nagabaton sang ila mga panudlo nagakahulugan nga ina nga mga panudlo sayop?
Sa pagsabat sining mga pamangkot, balikan anay naton ang nahaunang siglo sang aton Komon nga Dag-on. Ano nga sahi sang katawhan ang naganyat sa Cristianismo sadto?
Cristianismo—Kon Ngaa Naganyat sa Sini ang ‘mga Timawa’
Ang modernong-adlaw nga mga manugmulay sa mga Saksi ni Jehova nagasulit lamang sang mga pulong sang nahaunang-siglo nga mga manugpamatok sang Cristianismo. Binagbinaga, halimbawa, ang Griegong mga alamon nga nagpuyo sa dumaan nga siudad sang Corinto. Suno kay apostol Pablo, “ang mga Griego nagapangita sing kaalam.” (1 Corinto 1:22) Sa pagkamatuod, ang ginapangita nila indi ang Biblikanhon nga kaalam, kundi ang mabudlay hangpon nga pilosopiko nga mga argumento. Kag sang si apostol Pablo ‘wala magkara nga may pagkasampaton sang pulong ukon sang kaalam’ kundi sa baylo naghatag sing simple nga mensahe tuhoy kay “Cristo, kag sia nga ginlansang,” ang Cristianismo ginmulay sang madamo subong “kabuangan.”—1 Corinto 1:23; 2:1, 2.
‘Ginhimuslan bala nian [ni Pablo] ang pagkaignorante,’ sa pagganyat sa mga kubos kag mga timawa upod sa iban nga mga pumuluyo sang Corinto? Wala gid. Si Pablo nagpaathag sa mga Cristiano didto: “Kay tan-awa ang pagtawag sa inyo, mga kauturan, indi madamo sa inyo ang maalam suno sa kalibutanon nga mga talaksan, . . . kundi ginpili sang Dios ang buangbuang sang kalibutan sa pagpakahuya sa maalam . . . agod nga walay tawo nga magpabugal sa atubangan sa Dios.”—1 Corinto 1:26-29.
Kutob sa ginsuguran gid, ang Cristianismo nangin isa ka relihion nga nagganyat una sa tanan sa timawa, kag kubos nga mga tawo. Ang 12 ka apostoles ni Jesus—ang sadsaran sang iya iglesia—wala ginkuha sa tunga sang edukado nga mga escriba kag mga Fariseo. (Efeso 2:20) Sa baylo, naghalin sila sa grupo nga nagatrabaho, ang apat mga mangingisda. (Mateo 4:18-22; 10:2, 3) Mga tawo sila nga gintamod sang relihioso nga mga lider subong mga “walay tinon-an kag ordinaryo,” nga mga tawo nga nagakahulugan nga ang ila edukasyon elementarya lamang kag wala sila makatuon sa mga eskwelahan sang mataas nga tinon-an. (Binuhatan 4:13) Ginpakanubo sang may “tinon-an” nga mga escriba kag mga Fariseo ang madugay na ginhulat nga Mesias, nga ginayubit ang iya mga panudlo kag ang iya mga sumulunod. Naghupot sila sing panimuot nga ‘wala sing importante nga tawo nga nagasunod kay Jesus.’
Dumduma kon ano ang natabo sang isa ka okasyon sang magpadala sila sing mga tulugyanan sa “pagdakop” kay Jesus. Ang mga tulugyanan nagbalik nga wala sing dala. Ngaa? Ang rekord sang Biblia nagasiling: “Ang mga tulugyanan nagsabat: ‘Wala pa gid sing tawo nga nagpamulong subong sining tawo.’ ” Huo, natingala sila sa mga panudlo ni Cristo! Apang, ano ang ginhimo sang edukado nga relihiosong mga lider? “Ang mga Fariseo nagsabat sa ila: ‘Ginpatalang man bala kamo? May yara bala sang mga manugdumala ukon sang mga Fariseo nga nagtuo sa iya?’ ” (Juan 7:32, 44-48) Sa amo ang bugal nagpugong sa ila sa pagbaton kay Jesus. Matuod, ang Biblia nagasiling nga “bisan sa mga manugdumala madamo ang nagtuo sa iya, apang bangod sang mga Fariseo wala sila magtu-ad sini, basi kon sikwayon sila sa sinagoga; kay ginhigugma nila ang pagdayaw sang mga tawo sing labi pa sa pagdayaw sang Dios.”—Juan 12:42, 43.
Hunahuna ina! Nakombinse gid ining mga tawo nga ang kamatuoran yara kay Jesus, apang nagdumili sila nga mangin mga disipulo niya bangod sang kahadlok sa mga tawo. Indi kombenyente para sa mga manugdumala sadto nga isakripisyo ang ila tindog sa sosyal, politikal, kag relihioso nga katilingban agod mangin mga sumulunod ni Jesus. Indi katingalahan nga si Jesus nagsiling: “Sa pagkamatuod nagasiling ako sa inyo, mabudlay sa isa ka manggaranon ang pagsulod sa ginharian sang langit”! (Mateo 19:23) Gani, sa masami, ang subong sina nga mga tawo may tuman nga bugal nga sundon nila ang relihion nga nagakinahanglan sa ila nga ‘pas-anon [sing mapainubuson] ang usok sang pag-antos kag sundon si Jesus.’ (Mateo 16:24) Sa amo si Cristo nagsiling isa ka bes sa pangamuyo: “Ginadayaw ko ikaw sing dayag, Amay, Ginuo sang langit kag duta, kay ginlipdan mo ining mga butang sa mga maalam kag mga mahinangpunon, kag ginpahayag sila sa kabataan.” (Lucas 10:21) Indi kaangay sang kalibutanon nga maalam nga mga tawo, ginabaton nila ang kamatuoran.—Ipaanggid ang Mateo 18:3.
Walay Ginapasulabi ang Dios
Ang disipulo nga si Santiago nagsulat: “Wala bala pagpilia sang Dios ang mga imol sining kalibutan nga magmanggaranon sa pagtuo kag mga manunubli sang ginharian nga ginsaad niya sa mga nagahigugma sa iya?” (Santiago 2:5) Nagakahulugan bala ini, nian, nga ang mga may sarang kag may sekular nga edukasyon ginapunggan sa pag-alagad sa Dios? Wala gid! Sa tapos ang nahaunang Gentil nga kombertido, nga si Cornelio, makabaton sing balaan nga espiritu, si Pedro nagsiling: “Sa pagkamatuod ginahantop ko nga ang Dios walay ginapasulabi, kundi sa tagsa ka pungsod ang nagakahadlok sa iya kag nagahimo sang katarungan kalahamut-an sa iya.” (Binuhatan 10:34, 35) Mahimo nga nadumduman ni Pedro ang mga pulong ni Jehova kay Samuel, nga ginbungat mga siglo sang una: “Kay ang Dios nagatan-aw indi subong sang pagtan-aw sang tawo; ang tawo nagatulok sa guwa nga dagway, apang si Jehova, nagatulok sa tagipusuon.”—1 Samuel 16:7.
Sing makawiwili, nian, ang Biblia nagasiling nga ang “daku nga kadam-an sang saserdote nagmatinumanon sa pagtuo.” (Binuhatan 6:7) May mga Cristiano man nga nasapwan sa kilala nga “panimalay ni Cesar.” (Filipos 4:22) Kag bisan pa ang kalabanan sang mga Cristiano imol, may pila sa kongregasyon nga manggaranon.—1 Timoteo 6:17.
Modernong mga Tion
Gani, indi kita dapat makibot nga ang kamatuoran karon namunga labi na sa tunga sang kinaandan nga mga tawo. Sa gihapon ang ginatulok ni Jehova, indi ang kuwarta sa bangko sang isa ka tawo ukon ang iya sekular nga edukasyon, kundi ang tagipusuon. (Hulubaton 21:2) Dumduma, man, nga si Jesus nagsiling: “Walay tawo nga makakari sa akon kon indi sia pagbuyukon sang Amay nga nagpadala sa akon.” (Juan 6:44) Sa pagkamatuod, buyukon sang Amay sa iya kaugalingon yadto lamang ang mapainubuson kag madali tudluan, indi bala?
Apang, indi buot silingon nga wala sing edukado kag ginatawag nga propesyonal nga mga tawo nga mga Saksi ni Jehova. Sang si Pablo naghatag sing simple, apang mabaskog nga pagpabuyagyag sang kamatuoran sa atubangan ni Hari Agripa, ang hari nagbaton: “Sa malip-ot nga tion mahaylo mo ako nga mangin Cristiano.” (Binuhatan 26:27, 28) Subong man, madamo nga edukado ang naganyat sa kamatuoran paagi sa maathag kag makatarunganon nga pagpaathag sang kamatuoran sa Biblia nga ginahatag sang mga Saksi ni Jehova. Dumduma, ang mapainubuson nga tawo wala nagakahulugan nga indi edukado. Si Moises gintawag “ang pinakamahagop sa tanan nga tawo nga yara sa kadaygan sang duta.” (Numeros 12:3) Apang, ‘gintudluan [sia] sang tanan nga kaalam sang mga Egiptohanon.’—Binuhatan 7:22.
Apang, talalupangdon, nga kon ang mga indibiduwal nga may diutay nga tinon-an magsugod sa pagpakig-upod sa mga Saksi ni Jehova, sa masami nagahimo sila sing mga tikang nga pauswagon ang ila edukasyonal nga kalantip. Nagatinguha sila nga pauswagon ang ila pagbasa kag batasan sa pagtuon agod nga maton-an nila ang sadsaran nga mga panudlo sang Biblia kag makadungan sa dalayon nga pag-ilig sang mga literatura sa Biblia nga ginabalhag sang mga Saksi ni Jehova. Kon ang isa ka sinsero nga tawo luyag magtuon sang Biblia apang ginaupangan sang iliterasiya, ang wala sing bayad nga pagtudlo masami nga sarang mahimos paagi sa lokal nga kongregasyon.
Ang Watchtower Society nagbalhag pa gani sing polyeto nga natig-uluhan Learn to Read and Write. Linibolibo ka tawo ang nabuligan sining polyeto sa pagtuon sa pagbasa sa Asia, Aprika, kag sa Sentral kag sa Bagatnan nga Amerika. Sa isa ka pungsod sa Latin Amerika, 51,249 ang nakatuon sa pagbasa kag sa pagsulat sang nagligad nga 26 ka tuig sa bulig sining polyeto! Sa isa ka diutay nga minuro sa Latin Amerika, ang inspektor sang Department of Education nakigsapol sa mga tiglawas sang nanuhaytuhay nga organisasyon—lakip ang mga Saksi ni Jehova. Ang Saksi nagsugid sa ila didto nahanungod sa Learn to Read nga polyeto kag gin-agda ang grupo sa isa sang mga miting sang mga Saksi.
Nagtambong ang grupo sa Teokratikong Eskwelahan sa Ministeryo—isa ka miting nga gindesinyo sa pagbulig sa mga lalaki kag mga babayi nga mangin epektibo nga mga manunudlo. Sa ila kakibot, nakita nila ang isa ka tawo nga kilala nila nga indi makahibalo magbasa kag magsulat—sa plataporma kag nagahatag sing pamulongpulong sa Biblia! Ang isa sa mga bisita nagsiling, nga isa ka prinsipal sang eskwelahan: “Indi posible nga ining tawo nga kilala naton nga indi makahibalo magbasa kag magsulat makahambal sing Espanyol [luwas sa iya natawhan nga dialekto], labi na sa paghambal sa isa ka tumalambong, apang ginahimo niya.”
Gani sa baylo nga nagahingalit sa kubos nga mga tawo, ang matuod nga mga Cristiano karon nagabulig sa ila sa pagpauswag sang ila kaugalingon paagi sa pagbulig sa ila nga makatigayon sing ihibalo tuhoy sa kamatuoran. Ginahimo sina nga mga Cristiano ang hilikuton sa pagtudlo nga ginsugo ni Jesus sang magsiling sia: “Busa lakat kamo kag himuon nga mga disipulo ang katawhan sang tanan nga kapungsuran, . . . nga nagapanudlo sa ila sa pagtuman sang tanan nga ginsugo ko.” (Mateo 28:19, 20) Kag subong resulta, kada tuig linaksalaksa gikan sa tanan nga nibel sang katilingban ang nagabuylog sa ranggo sang mga Saksi ni Jehova.