Relihioso nga mga Imahen—Paano Mo Sila Ginatamod?

DAKU ang baha sa Canton, China sang 1888. Ang dalayon nga ulan nagpierdi sang mga pananom. Ang mga mangunguma nangamuyo sa ila dios nga si Lung-wong agod maghulaw ang ulan, apang wala ini sing nahimo. Naakig sa indi pagsapak sang ila dios, ginbilanggo nila ang iya imahen sing lima ka adlaw! Sang nagligad nga pila ka tuig, wala man pagsapaka sang amo gihapon nga dios ang ila mga pangamuyo nga untaton ang tigpalamangag. Ginhigot nila ang iya imahen sa guwa sa nagatagiti nga init.

Sang 1893 natabo ang tigpalamangag sa Sicily. Ang relihioso nga mga prosesyon, mga kandila nga nasindihan sa mga simbahan, kag mga pangamuyo sa mga imahen napaslawan tanan sa pagpaulan. Nadulaan sing pailob, ginhublasan sang mga mangunguma ang iban sang ila mga imahen, ginpaatubang sa dingding, kag gintum-oy pa gani ang iban sa ilimnan sang kabayo! Sa Licata, si “Santo” Angelo ginhublasan, ginposasan, ginpasipalahan, kag ginpahog nga bitayon. Sa Palermo, Italya, si “Santo” Jose gindan-ok sa nagkigas nga hardin agod maghulat sa ulan.

Ining mga hitabo, nga ginsaysay sa libro nga The Golden Bough, ni Sir James George Frazer, may makatulublag nga mga ginapahangop. Ginapakita sina nga ang nagapangangkon nga mga Cristiano kag mga di-Cristiano daw may pareho nga pagtamod sa relihioso nga mga imahen. Sa duha ka kaso, ginagamit sang mga sumilimba ang ila mga imahen subong paagi sa pagkontak sa isa ka “santo” ukon dios. Kag sing makawiwili, gintinguhaan sang duha ka bahin nga pahulagon ang ila atrasado nga “mga santo” ukon mga dios sa paghikot paagi sa pagbutang sa ila sa mabudlay nga mga kahimtangan nga ginaeksperiensiahan sang ila mga sumilimba!

Apang, sa karon, madamo nga nagagamit sing relihioso nga mga imahen ang nagatamod sina nga mga buhat subong sobra, ayhan makahalam-ot pa gani. Nagapangatarungan sila nga para sa ila ang mga imahen mga butang lamang nga ginatahod​—⁠indi ginasimba. Nagasiling pa gani sila nga ang mga estatwa, mga krus, kag ang relihioso nga mga laragway mga bulig sa pagsimba sa Dios. Ayhan amo man sini ang imo ginabatyag. Apang ang pamangkot amo: Ano ang ginabatyag sang Dios nahanungod sini? Ang pagtahod bala sa isa ka imahen isa gid ka pagsimba sa sini? Posible bala nga ina nga mga buhat may natago nga mga katalagman?