Ang Kabuhi kag Ministeryo ni Jesus

Ang Tawo nga Manggaranon kag si Lazaro

SI Jesus nakigsugilanon sa iya mga disipulo nahanungod sa nagakaigo nga paggamit sang materyal nga manggad, nagapaathag nga indi kita mahimo nga mangin ulipon sini kag sa amo man nga tion mangin ulipon sang Dios. Ang mga Fariseo nagapamati man, kag gin-uligyat nila si Jesus bangod mga mahigugmaon sila sa kuwarta. Gani siling niya sa ila: “Kamo amo ang mga nagapakamatarong sang inyo kaugalingon sa atubangan sang mga tawo, apang ang Dios nakakilala sang inyo mga tagipusuon; kay ang ginapakamataas sa tunga sang mga tawo kangil-aran sa itololok sang Dios.”

Nag-abot na ang tion agod baliskaron ang lamesa sa mga tawo nga manggaranon sa kalibutanon nga mga pagkabutang, sa politikanhon nga gahom, kag sa relihioso nga kontrol kag impluensia. Paubson sila, kag yadtong nagakilala sang ila espirituwal nga kinahanglanon pakataason. Ginpakita ni Jesus ina nga pagbalhin sang padayon sia nga nagsiling sa mga Fariseo:

“Ang Kasuguan kag ang mga Manalagna tubtob kay Juan [Bautista]. Kutob sadtong tion ginawali ang maayong balita sang ginharian sang Dios, kag ang tagsa ka tawo nagasulod sing palugus sa sini. Apang, mahapos pa nga magtaliwan ang langit kag duta sang sa mangin walay pulos ang isa ka kudlit sang kasuguan.”

Ang mga escriba kag mga Fariseo nagapabugal sang ila ginaangkon nga pagsunod sa Kasuguan ni Moises. Dumduma nga sang milagruso nga ginhatagan sing itololok ni Jesus ang isa ka tawo sa Jerusalem, sila nagpabugal: “Mga disipulo kami ni Moises. Nahibaluan namon nga ang Dios nagpamulong kay Moises.” Apang gintuman karon sang Kasuguan ni Moises ang tuyo sini nga pagtuytoy sa mga kubos sa gintangdo sang Dios nga Hari, si Jesucristo. Gani sang ginsugdan ang ministeryo ni Juan, ang tanan nga sahi sang katawhan, labi na ang mga kubos kag mga imol, nagpanikasog nga mangin mga sakop sang Ginharian sang Dios.

Sanglit ang Mosaikong Kasuguan natuman karon, ang obligasyon nga tumanon ini dapat nga dulaon. Ang Kasuguan nagatugot sang diborsio sa lainlain nga kabangdanan, apang sa karon si Jesus nagsiling: “Ang tagsatagsa nga nagabulag sa iya asawa kag nagapangasawa sing lain nagapanglahi, kag ang nagapangasawa sa isa nga binulagan sang iya bana nagapanglahi.” Ina nga pahibalo pat-od gid nga nagpaakig sa mga Fariseo, labi na kay ginatugutan nila ang diborsio sa madamong kabangdanan!

Nagapadayon sang iya ginasiling sa mga Fariseo, si Jesus nagsaysay sang isa ka ilustrasyon nahanungod sa duha ka lalaki nga ang tindog, ukon kahimtangan, nagbalhin sing dramatiko sang ulihi. Mamutikan mo bala kon sin-o ang ginalaragway sang mga lalaki kag kon ano ang kahulugan sang pagbaliskad sang ila kahimtangan?

“May isa ka tawo nga manggaranon,” paathag ni Jesus, “nga napanaptan sing purpura kag lino nga manipis, kag nagakabuhi sa lakas nga kadayawan adlaw-adlaw. Kag sa iya gawang nahal-id ang isa ka imol nga tawo nga ginhingalanan si Lazaro, naputos sang mga tabukaw kag naghandum nga pakan-on sang mga usik nga nagkalahulog sa latok sang manggaranon. Huo, bisan pa ang mga ido nagpalapit kag nagdilap sang iya mga tabukaw.”

Gingamit diri ni Jesus ang tawo nga manggaranon sa paglaragway sa Judiyong relihiosong mga lider, lakip indi lamang ang mga Fariseo kag mga escriba kundi ang mga Saduceo kag pangulong mga saserdote man. Manggaranon sila sa espirituwal nga mga pribilehiyo kag mga kahigayunan, kag naggawi sila subong sang paggawi sang manggaranon. Ang ila pagsuksok sing harianon nga purpura nagalaragway sang ila maayo nga posisyon, kag ang puti nga lino nagalaragway sang ila pagpakamatarong sa kaugalingon.

Ginasimusimu sining bugalon nga manggaranon nga klase ang imol kag kubos nga mga tawo, nagatawag sa ila nga ‘am ha·’aʹrets, ukon mga tawo sang duta. Busa ginalaragway sang imol nga si Lazaro ining mga tawo nga gindingotan sang relihiosong mga lider sing nagakaigo nga espirituwal nga pagkaon kag mga pribilehiyo. Busa, kaangay kay Lazaro nga naputus sang mga tabukaw, ang kubos nga mga tawo ginpakanubo subong balatianon sa espirituwal kag nagakaigo lamang nga ibuylog sa mga ido. Apang, yadtong yara sa Lazaro nga klase ginagutom kag ginauhaw sang espirituwal nga pagkaon kag gani yara sila sa gawang sa panikasog nga makabaton sing bisan anong usik sang espirituwal nga pagkaon nga mahimo nga mahulog gikan sa latok sang tawo nga manggaranon.

Ginalaragway karon ni Jesus ang pagbaliskad sang kahimtangan sang tawo nga manggaranon kag ni Lazaro. Ano ining mga pagbalhin, kag ano ang ginalaragway sini? Ining mga pamangkot binagbinagon sa masunod nga guwa sang amon magasin. Lucas 16:​14-21; Juan 9:28, 29; Mateo 19:​3-9; Galacia 3:​24; Colosas 2:⁠14.

◆ Sa umpisa sang ministeryo ni Juan, ano nga pagbalhin ang ginpakita ni Jesus nga matabo?

◆ Ano ang dulaon sa kamatayon ni Jesus, kag paano ini magaapektar sa diborsio?

◆ Sa ilustrasyon ni Jesus, sin-o ang ginalaragway sang tawo nga manggaranon kag ni Lazaro?

◆ Ano nga impormasyon ang paabuton naton sa masunod nga guwa sining magasin?