Ang Malaut nga Makihilawason​—⁠Ang Iya Pagkapukan

“Napukan sia! Napukan ang Babilonia nga Daku, nga nagpainum sang tanan nga pungsod sang alak sang kaakig sang iya pagkamakihilawason!”​—⁠BUGNA 14:⁠8.

Ini nga artikulo kag ang isa nga nagasunod amo ang katapusan nga pamulongpulong sa simposium nga natig-uluhan “Ang Gintangdo nga Tion Malapit Na,” nga ginpresentar sadtong 1988 sa Balaan nga Hustisya Distrito nga mga Kombension sang mga Saksi ni Jehova

1. Sin-o ang malaut nga “makihilawason,” kag ngaa kinahanglan nga mahibaluan naton ang nahanungod sa iya?

ANG malaut nga “makihilawason”​—⁠sin-o sia? Ngaa dapat naton sia hambalan? Indi bala nga ang makahaladlok nga mga nobela, mga sine, TV, kag mga vid­eo nagahatag sing makangilil-ad nga dosis sang imoralidad? Matuod! Apang indi ini isa ka ordinaryo nga babayi sa kagab-ihon. Sa katunayan, sia amo ang labing impluensiado, labing bantog, labing manugpatay nga bigaon sa bug-os nga maragtas. Kag kapin na sa 4,000 ka tuig nga ginabaligya niya ang iya serbisyo! Kinahanglan nga mahibaluan naton ang nahanungod sa iya para sa aton proteksion. Sa Bugna 14:​8, gintawag sang isa ka langitnon nga anghel ining babayi nga may malain nga reputasyon nga “Babilonia nga Daku” kag ginlaragway sia subong nagaganyat sa mga pungsod sa paghimo sing malain. Bangod amo sia sina ka makatalagam, dapat kita malipay sa paghibalo nga ang “gintangdo nga tion [ni Jehova para hukman sia] malapit na.”​—⁠Bugna 1:⁠3.

2. Diin ginkuha sining makihilawason ang iya ngalan, kag paano nagsugod ang bug-os kalibutan nga emperyo sang dimatuod nga relihion?

² Natigayon sining makihilawason ang iya ngalan gikan sa dumaan nga Babilonia, ang bugalon nga siudad nga gintukod ni Nimrod, ang “gamhanan nga mangangayam nga nagapamatok kay Jehova,” sa Mesopotamia sang nagligad nga kapin sa 4,000 ka tuig. Sang ang mga Babilonianhon nagsugod sa pagpatindog sing paganong relihioso nga tore, gingumon ni Jehova ang ila hambal kag ginpaalaplaag sila tubtob sa mga ukbong sang duta. Gindala nila ang ila relihion, kag amo sina kon paano nagsugod ang isa ka bug-os kalibutan nga emperyo sang Babilonianhon nga relihion. Sa pagkamatuod, amo ini ang Babilonia NGA DAKU. (Genesis 10:​8-10; 11:​1-9) Tubtob sa aton tion, ang mga tanhaga sang dumaan nga Babilonia nakita sa mga pagpati kag mga buhat sang mga relihion sang kalibutan. (Bugna 17:7) Ang Hebreo nga ngalan sang siudad, Babel, nagakahulugan sing “Kagumon,” isa ka nagakaigo nga pagtawag sa karon nga kagumon sa dimatuod nga relihion!

3. (a) Daw ano ka dugay nga ginbihag sang Babilonia ang katawhan sang Dios, nagbutang sa ila sa kahimtangan nga tuman kalapit sa ano? (b) San-o nakaagom sing makahalapay nga pagkapukan ang Babilonia, kag ngaa wala mag-abot ang iya katapusan sadto nga tion?

³ Ang dumaan nga Babilonia nakabangon gikan sa sinang una nga pagpalantang sang pag-uswag kag, sang napukan ang Asiria sang 632 B.⁠C.⁠E., nangin ang ikatlong kagamhanan sa bug-os nga kalibutan sa maragtas sang Biblia. Dali lang ang iya himaya​—⁠wala pa isa ka gatos ka tuig​—⁠apang sa sulod sang 70 sina nga tinuig, ginbihag niya ang katawhan sang Dios. Ginbutang niya sila sa kahimtangan nga tuman kalapit sa linibo ka templo kag kapilya sang Babilonia, sa iya trinidad nga mga dios kag trinidad nga mga yawa, sa iya iloy-kag-anak nga pagsimba, kag sa iya astrolohiya nga nagasimba sa ginakunokuno nga dimamalatyon nga mga dios. Busa, ang bihag nga mga Israelinhon yara sa bug-os kalibutan nga sentro sang dimatuod nga relihion sang, sadtong 539 B.⁠C.⁠E., ang siudad sang Babilonia nakaagom sing makahalapay nga pagkapukan. Apang indi pa amo sina ang iya katapusan! Padayon sia nga gingamit sang iya mga manlulupig subong bantog nga sentro sang relihion.

Isa ka Tugob-globo nga Emperyo sang Relihion

4. (a) Ano ang ginsiling sang mga manalagna ni Jehova nahanungod sa Babilonia, kag ano ang natabo sa Babilonia? (b) Ano ang iban nga Babilonia nga yara pa, sa kahalitan sang katawhan sa duta?

⁴ Ginbantala sang mga manalagna ni Jehova ang iya paghukom nga ang Babilonia silhigon sang “silhig sang kalaglagan”​—⁠“subong sang pagguba sang Dios sang Sodoma kag Gomora.” Natuman bala sang ulihi ina nga mga tagna? Huo, tubtob sa katapusan nga detalye! Sang ulihi, ang dumaan nga Babilonia nangin tumpok sang nadugmok nga mga bato​—⁠wala mapuy-an luwas sang mga reptilya kag ilahas nga mga sapat​—⁠subong gid sang gintagna! (Isaias 13:​9, 19-22; 14:​23; Jeremias 50:​35, 38-40) Apang, inang isa pa ka Babilonia, ang modernong-adlaw nga Babilonia nga Daku yara pa. Subong ang bug-os kalibutan nga emperyo sang dimatuod nga relihion, wala niya ginkalimtan ang mga panudlo kag bugalon nga espiritu sang orihinal nga Babilo­nia. Sia amo ang panguna nga instrumento ni ­Satanas sa pagbulag sa katawhan sa mga katuyuan sang Ginharian ni Jehova.​—⁠2 Corinto 4:​3, 4.

5. (a) Ano nga mga relihion ang nagluntad samtang ang Babilonia yara sa putukputukan sang iya himaya, apang ngaa wala magmadinalag-on si Satanas sa pagpabaha sa bug-os nga kalibutan sang dimatuod nga relihion? (b) Paano gingamit ni Satanas ang dimatuod nga relihion sa tapos nagsugod ang Cristianismo?

⁵ Mga ikan-um ka siglo sa wala pa si Cristo, sang ang bug-os kalibutan nga kagamhanan sang Babilonia yara pa sa putukputukan sang iya himaya, ang mga relihion sang Hinduismo, Budhismo, Confucianismo, kag Shintoismo nag-abante man. Apang nagmadinalag-on bala si Satanas sa pagpabaha sang dimatuod nga relihion sa bilog nga kalibutan? Wala, kay ang nagkalabilin sang dumaan nga mga saksi ni Jehova nagbalik gikan sa Babilonia pa Jerusalem sa pagtukod liwat sang pagsimba kay Jehova. Busa, anum ka siglo sang ulihi, ang dumaan nga mga Judiyo yadto didto sa pag-abiabi sa Mesias kag nangin ang unang mga katapo sang Cristianong kongregasyon. Ginpatay sang dimatuod nga relihion ang kaugalingon nga Anak sang Dios kag nangin instrumento ni Satanas sa pagpamatok sa matuod nga Cristianismo, subong gid sang ginpaandam ni Jesus kag sang iya mga apostoles.​—⁠Mateo 7:​15; Binuhatan 20:​29, 30; 2 Pedro 2:⁠1.

6. (a) Paano ginpalain ni Satanas ang Cristianong mga panudlo, kag anong wala nagapadungog sa Dios nga mga panudlo ang nagluntad? (b) Ano ang natabo sa linibolibo nga nagpili sang kamatuoran sang Biblia sa baylo sang Babilonianhon nga doktrina?

⁶ Labi na pagkatapos sang ikaduha nga paglaglag sa Jerusalem sang 70 C.⁠E. nga gingamit ni Satanas ang dimatuod nga mga apostoles sa pagdagta sa Cristianong mga panudlo, ginsakotan ini sing Babilonianhon nga mistisismo kag kalibutanon nga Gresyahanon nga pilosopiya. Busa, ang ‘balaan nga tatlo sa isa,’ ang Trinidad, amo ang nagbulos sa “isa ka Jehova” sa Biblia. (Deuteronomio 6:​4; Marcos 12:​29; 1 Corinto 8:​5, 6) Kag ang doktrina nahanungod sa pagkadimamalatyon sang tawhanon nga kalag, subong sang gintudlo sang paganong pilosopo nga si Plato, ginpasulod sa pagsikway sa hamili nga mga panudlo sang Biblia nahanungod sa gawad kag pagkabanhaw ni Cristo. Nagbukas ini sang dalan para patihan ang kalayuhon nga impierno kag ang kubos ka kalayuhon nga purgatoryo. (Salmo 89:​48; Ezequiel 18:​4, 20) Inang wala nagapadungog sa Dios nga mga panudlo nga nagahingalit sa kahadlok sang tawo nagbulig sa pagpuno sa mga kaban sang mga simbahan. Dugang pa, sa mga adlaw sang Inkisisyon kag sang Repormasyon, ang klero indi makahulat sa mga dabdab sang kalayuhon nga impierno sa paghimo sang pagpaantos. Linibolibo sang nagpili sa kamatuoran sang Biblia sang sa Babilonianhon nga doktrina ang ginsunog nga buhi sa usok sang mga Katoliko kag mga Protestante. Apang subong sang makita naton, ang pagkamakihilawason sang Babilonia nga Daku labi pa ang ginhimo sang sa pagpauswag sa kabutigan.

Ang Adlaw sang Paghukom ni Jehova

7. (a) San-o kag paano ginsugdan ni Jehova nga ipasag-uli ang sadsaran nga mga kamatuoran sa Biblia kag ginbuyagyag ang dimatuod, Babilonianhon nga mga panudlo? (b) Anong sadsaran nga mga kamatuoran sa Biblia ang ginpasag-uli sang mga Estudyante sang Biblia?

⁷ Ang adlaw sang paghukom ni Jehova sa sining makihilawason magaabot! (Hebreo 10:30) Yara ang panag-on sang paghanda, nagsugod sang katuigan 1870, sang ginpadala ni Jehova ang iya “mensahero”​—⁠isa ka sinsero nga grupo sang mga estudyante sang Biblia​—⁠sa pagpasag-uli sang sadsaran nga mga kamatuoran sa Biblia kag sa pagbuyagyag sa dimatuod Babilonianhon nga mga panudlo. (Malaquias 3:​1a) Ining “mensahero” nga grupo nagsakdag sa matagnaon nga mga pulong sang Bugna 4:​11: “Takus ka, Jehova, kag Dios namon, sa pagbaton sang himaya kag dungog kag gahom, kay ikaw ang nagtuga sang tanan nga butang, kag bangod sang imo kabubut-on nangin amo kag gintuga sila.” Ang “mensahero” nangin amo man ang direkta nga sumalakdag sang halad nga gawad ni Jesus, ang aman sang Dios sa paggawad sa katawhan. Ang gingawad nga katawhan magalakip, una, sa “diutay nga panong” nga magagahom kaupod ni Jesus sa iya langitnon nga Ginharian kag, sa ulihi, sa ginatos ka minilyon nga magakabuhi sing dayon sa Paraiso nga duta​—⁠ang kalabanan sa ila pagabanhawon gikan sa minatay. (Lucas 12:​32; 1 Juan 2:​2; Binuhatan 24:15) Huo, ginpasag-uli sadtong mga Estudyante sa Biblia ining panguna nga mga kamatuoran, kag sa malaragwayon nga paagi, ila ‘ginbasyahan sing tubig ang impierno kag ginpalong ang kalayo’ sang Babilonianhon nga doktrina nahanungod sa dayon nga pagpaantos!⁠a

8. (a) Paano gingamit sang klero sang Cristiandad ang Inaway Kalibutanon I sa pagtinguha nga laglagon ang mga Estudyante sang Biblia? (b) Ano ang natabo sa huwes nga nagpabilanggo sa walo ka opisyales sang Watch Tower Society nga wala sing piyansia?

⁸ Sa sulod sang 40 ka tuig ang mga Estudyante sang Biblia masidla nga nagbantala nga ang tuig 1914 magatanda sang katapusan sang Panahon sang mga Gentil. Subong sang ginpaabot, ina nga tuig nagpahanabo sang nagapatay-ug sa kalibutan nga mga hitabo, indi pinakakubos sa sini amo ang unang kalibutanon nga inaway. Abaw, gintinguhaan gid sang klero sang Cristiandad​—⁠ang labing kilala nga bahin sang Babilonia nga Daku​—⁠nga gamiton ang bug-os kalibutan nga krisis sa paglaglag sa sadtong maisog maghambal nga mga Estudyante sang Biblia! Sa katapusan, sang 1918, ginlupot nila sa bilanggoan ang walo ka opisyales sang Watch Tower Society bangod sang dimatuod nga panumbungon nga sedisyon. Apang ining mga opisyales ginbuy-an pagligad sang siam ka bulan kag gin-absuelto sang ulihi. Ang huwes pederal sang E.U. nga si Martin T. Manton, nga nagbilanggo sa sining mga Estudyante sang Biblia nga wala sing piyansia, ginpadunggan sang ulihi ni Papa Pio XI, subong “kabalyero sa orden ni St. Gregory the Great.” Apang, ang iya himaya makadali lamang, kay sang 1939 ginpamatbatan sia sing duha ka tuig nga pagkabilanggo kag sing mabug-at nga pina. Ngaa? Bangod natukiban sia nga nakasala sing pagbaligya sang anum ka desisyon sang korte sa kabilugan nga $186,000 nga hiphip!

9. Paano ginapaathag sang tagna ni Malaquias ang natabo sa katawhan ni Jehova, kag gani nagsugod kay sin-o ang paghukom?

⁹ Subong sang nakita naton bag-o lang, ang katawhan ni Jehova nagsulod sa panag-on sang daku nga pagtilaw sang 1918. Ang dugang nga pinamulong sang manalagna sa Malaquias 3:​1-3 nagapathag kon ano ang natabo: “Kag magasulod sing hinali sa Iya templo ang matuod nga Dios [si Jehova], nga ginapangita ninyo, kag ang mensahero sang katipan [ni Abraham]”​—⁠Jesus. Huo, si Jehova nagkari kaupod ni Jesus sa paghukom. Nian si Jehova nagapamangkot: “Sin-o bala ang makabatas sang adlaw sang iya pagkari, kag sin-o bala ang makatindog kon magpahayag sia? Kay sia kaangay sang kalayo sang manugtunaw kag kaangay sang habon sang mga manugpamunak.” Suno sa 1 Pedro 4:​17, ang paghukom magasugod sa mga nagaangkon nga yara sa “panimalay sang Dios.” Busa, ang matuod nga mga Cristiano ginapaputli kag ginatinluan para sa pag-alagad kay Jehova.

“GUWA KAMO . . . SA TUNGA NIYA, O KATAWHAN KO”!

10. Anong balaan nga paghukom ang nag-abot sa Cristiandad kag sa dimatuod nga relihion sang 1919, nagaresulta sing ano sa Babilonia nga Daku?

¹⁰ Subong dimahinulsulon nga bahin sang Babilonia nga Daku, ang klero sang Cristiandad indi makatindog sa paghukom ni Jehova. Ginmantsahan gid nila ang ila mga panapton subong mga nagapakigbahin sa pagpamatay sang inaway kalibutanon kag subong mga manughingabot sang matuod nga mga Cristiano. (Jeremias 2:34) Sa baylo sang pag-abiabi sa nagakapakari nga langitnon nga Ginharian ni Cristo, ginsakdag nila ang hinimu sang tawo nga Liga de Nasyones, nga ginlaragway nila subong “ang politikal nga ekspresyon sang Ginharian sang Dios sa duta.” Sang 1919 maathag nga ginhukman ni Jehova ang Cristiandad​—⁠kag sa pagkamatuod ang tanan dimatuod nga relihion. Ang Babilonia nga Daku napukan, ginpakamalaut sa kamatayon! Tion na karon para sa tanan nga nagahigugma sa kamatuoran kag sa pagkamatarong nga maghulag sa matagnaon nga sugo sa Jeremias 51:​45: “Guwa kamo gikan sa tunga niya, O katawhan ko, kag panginluwas ang tagsa ka kalag gikan sa mapintas nga kaakig ni Jehova.”

11, 12. (a) Ano ang ginasiling sang isa ka anghel sa Bugna 17:​1, 2 nahanungod sa paghukom sa Babilonia nga Daku? (b) Ano ang “madamong tubig” nga ginalingkoran sang dakung makihilawason, kag paano niya “ginpainum [ang mga pumuluyo sang duta] sang alak sang iya pagpakighilawas”?

¹¹ Ang Babilonia nga Daku napukan! Apang wala pa sia malaglag. Subong bug-os kalibutan nga emperyo sang dimatuod nga relihion, magakabuhi sia sing malip-ot na lang subong obra-maestra sang pagpangdaya ni Satanas. Ano bala ang katapusan nga paghukom sang Dios sa iya? Wala kita ginpabay-an nga nagapangduhaduha! Buksan naton ang aton mga Biblia sa Bugna 17:​1, 2. Diri ang isa ka anghel nagapakigsugilanon kay apostol Juan kag, paagi sa iya, sa mga estudyante sang tagna karon, nga nagasiling: “Kari ka, ipakita ko sa imo ang paghukom sang dakung makihilawason nga babayi nga nagalingkod sa ibabaw sang madamong tubig, nga sa iya nagapakighilawas ang mga hari sang duta, kag ang mga nagapuyo sa duta nahubog sang alak sang iya pagkamakihilawason.” Ang termino nga “madamong tubig” nagapatuhoy sa magamo nga masa sang katawhan, ginpigus sang madugay na sang daku nga makihilawason. Kag ang tagna nagasiling nga “ang mga nagapuyo sa duta” nahubog sang iya alak. Ginbaton nila ang dimatuod nga mga panudlo kag ang kalibutanon kag imoral nga dalanon sang Babilonia nga Daku kag ginpadala nga nagadulingduling, subong nga daw nahubog sang baratuhon kag ginadumilian nga alak.

¹² Sa Santiago 4:4 aton mabasa: “Mga makihilahion, wala bala kamo makahibalo nga ang pagpakig-abyan sa kalibutan pagpakig-away sa Dios?” Ang ikaduha ka pulo ka siglo nga relihion handa gid katama sa pagkuha sang igtalupangod sang kalibutan paagi sa pag-ulog-ulog, kag matuod ina labi na sa Cristiandad. Indi lamang nga ang iya klero napaslawan sa pagbantala sang maayong balita sang nagapakari nga Ginharian ni Jehova apang ginpaluya nila ang moral nga mga panudlo sang Biblia, ginpasapayanan ang kalibutanon nga pagkamatinuguton sa tunga sang mga katapo sang iglesia. Bisan ang klero indi walay sala kon nahanungod sa undanon nga pakighilawas, nga talangkod gid nga ginpakamalaut ni apostol Pablo sang nagsiling sia: “Dili kamo magtalang. Bisan ang mga makihilawason, ukon mga diwatahan, ukon mga makihilahion, ukon mga babayinhon, ukon mga sodomanhon . . . indi makapanubli sang ginharian sang Dios. Kag ang iban sa inyo subong anay sina. Apang ginhugasan kamo.”​—⁠1 Corinto 6:​9-11.

“Pagtubog sa Lunang”

13, 14. (a) Anong mga halimbawa ang nagapakita nga ang modernong-adlaw nga klero wala “ginhugasan”? (b) Ano ang panimuot sang sinodo sa Church of England nahanungod sa homoseksuwal nga mga buhat sa kinatawo, kag ano ang ginpanugda sang isa ka manugsulat sang balita nga ingalan liwat sa simbahan? (c) Ang apostata nga klero nagakaigo sa anong mga pinamulong ni apostol Pedro?

¹³ “Ginhugasan” na bala ang modernong-adlaw nga klero? Ti, subong isa ka halimbawa, talupangda ang natabo sa Britanya, nga isa anay ka pamakud sang Protestantismo. Sang Nobiembre 1987, sang ang primer ministro sang Britanya nagpanawagan sa klero sa paghatag sing moral nga pagpanguna, ang rektor sang isa ka Anglikano nga simbahan nagsiling: “Ang mga homoseksuwal may pareho nga kinamatarong kon tuhoy sa seksuwal nga ekspresyon subong sang iban; dapat naton tan-awon ang maayo sa sini kag palig-unon ang katutom [sa tunga sang mga homoseksuwal].” Ang isa ka pamantalaan sa London nagreport: “Ang homoseksuwal nga mga buhat nangin lapnag gid katama sa isa ka Anglikano nga kolehiyo sa teolohiya sa bagay nga ang mga estudyante gikan sa iban nga kolehiyo gindumilian sang mga empleyado sa pagduaw.” Ginbantabanta sang isa ka pagtuon nga “sa isa ka distrito sa London, ang kadamuon sang klero nga may homoseksuwal nga huyog mahimo nga kapin sa katunga sang kabilugan.” Kag sa sinodo sang isa ka simbahan, 95 porsiento sang klero sang Church of England ang nagsakdag sa panugda nga tawgon ang pakighilawas kag pakighilahi nga mga sala, apang indi ang homoseksuwal nga mga buhat sa kinatawo; inang homoseksuwal nga mga buhat ginkunokuno nga kulang lamang sa kon ano ang husto. Nagakomento nahanungod sini tanan, ang isa ka manugsulat sang balita nagpanugda nga ang Church of England mahimo ngalanan liwat nga Sodoma kag Gomora. Ang isa pa ka pamantalaan sa London nagsiling: “Ang mga Britaniko ginangidlisan samtang ginabinagbinag nila ang resulta sang isa ka kaliwatan sang pagkamatinuguton.”

¹⁴ Nagakabagay gid ang apostata nga klero sa sulod sang mga tinuig sa pinamulong ni apostol Pedro: “Nahanabo sa ila suno sa matuod nga hulubaton: ‘Ang ido nagabalik sa iya kaugalingon nga suka, kag ang nayon nahugasan lamang sa pagtubog sa lunang’ ”!​—⁠2 Pedro 2:⁠22.

15. (a) Ano nga pagkawasdak sa moral nga kabilihanan ang natabo sa Cristiandad? (b) Sin-o ang may salabton sa mailo nga ani?

¹⁵ Sa bug-os nga Cristiandad, kag sa pagkamatuod sa bug-os nga kalibutan, may yara makahaladlok nga pagkawasdak sang moral nga kabilihanan. Sa iban nga mga katilingban, ang kasal ginakabig na karon subong dikinahanglanon, kag ang mga minyo naghunahuna nga ang katutom sa pag-asawahay indi uso. Nagadiutay ang nagapalegalisar sang ila pag-updanay, kag ang kadamuon sang diborsio nagatimbuok. Sa Estados Unidos, ang diborsio nagkapin sa tatlo ka pilo sa sulod sang nagligad nga 25 ka tuig tubtob sa mga kapin sa isa ka milyon kada tuig. Sa 20-ka-tuig nga panag-on kutob sang 1965, ang diborsio sa Britanya nag-apat ka pilo, kutob sa 41,000 tubtob sa 175,000. Ang mga diminyo nagpakamaayo nga magpuyo upod sa mga diminyo, lalaki man ukon babayi, kag madamo ang nagasulusaylo sa lainlain nga kaupod. Nagkasubo sila sa grabe nga mga balatian nga ginaliton paagi sa sekso, sing talalupangdon sa AIDS, nga nagadamo subong resulta sang ila imoral nga estilo sang pagkabuhi apang padayon nga nagainsister sa ila malaw-ay nga mga buhat sa sekso. Wala ginadisiplina sang klero sang Cristiandad ang nakasala nga mga katapo sang simbahan. Tubtob sa punto nga nagpiyong sila sa imoralidad, dapat man sila manabat tungod sining kailo nga ani.​—⁠Jeremias 5:​29-31.

16. (a) Ano ang nagapakita sa katunayan nga ang Babilonia nga Daku napukan, kag anong angheliko nga tu-aw sang Bugna 18:2 ang nagakaigo? (b) Ano ang dapat himuon sang tanan nga maluyag makalampuwas sa katapusan sang kalibutan?

¹⁶ Ang makaluluoy nga kahimtangan sa moral sang bug-os kalibutan nga emperyo sang dimatuod nga relihion nagapakita man sang katunayan nga ang Babilonia nga Daku napukan. Ginhukman sia sang Dios kag gintangdo sa kalaglagan. Daw ano ka nagakaigo, nian, ang mabaskog nga tu-aw sang anghel sa Bugna 18:​2: “Napukan sia! Napukan ang Daku nga Babilonia, kag ini nangin puluy-an sang mga yawa kag salabuyan sang tagsa ka espiritu nga mahigko kag sang tagsa ka pispis nga mahigko kag makangilil-ad!” Kag daw ano ka importante nga ang tanan nga maluyag makalampuwas sa katapusan sang kalibutan magapanghikot karon sa pagsabat sa panawagan sa bersikulo 4: “Guwa ka sa iya, katawhan nakon, agod nga indi kamo makaambit sa iya mga sala, kag agod nga indi kamo makaagom sang iya mga kalalat-an”! Ang pagguwa sa dimatuod nga relihion isa ka importante nga tikang padulong sa pagkalampuwas sa “dakung kapipit-an” nga yara lang sa unahan. (Bugna 7:14) Apang kapin pa ang kinahanglan, subong sang makita naton!

[Footnote]

Paano Mo Sabton?

◻ Sin-o ang malaut nga makihilawason, kag paano niya natigayon ang iya ngalan?

◻ Bisan pa nga ang dumaan nga Babilonia napukan sang 539 B.⁠C.⁠E., ano ang yara pa?

◻ Paano ang Malaquias 3:​1-3 may modernong-adlaw nga katumanan?

[Kahon sa pahina 8]

MGA MORAL SANG KLERO

“Ang ginatos ka kabataan nga ginhingalitan sa sekso sang Katoliko nga mga pari sa Estados Unidos sa nagligad nga lima ka tuig nag-antos sing daku nga halit sa balatyagon, siling sang mga ginikanan, mga sikologo, mga polis kag mga abogado nga nadalahig sa mga kaso.”​—⁠Akron Beacon Journal, Enero 3, 1988.

“Ang Iglesia Katolika Romana sa Estados Unidos napilitan sa pagbayad sing minilyon ka dolyar bilang halit sa mga pamilya nga nagsiling nga ang ila kabataan gin-abusuhan sa sekso sang mga pari. Walay sapayan sina, ang problema naggrabe pa gid sa bagay nga madamong abogado kag biktima ang nagsiling nga wala ginasapak kag ginatabonan sang simbahan ang mga kaso.”​—⁠The Miami Herald, Enero 3, 1988.

[Piktyur sa pahina 6]

Mga imahen sang trinidad nga mga dios​—⁠gikan sa dumaan nga Egipto kag gikan sa Cristiandad

[Credit Lines]

Koleksion sang Saint-Remi Museum, Reims, ritrato kuha ni J. Terrisse

Louvre Museum, Paris

[Piktyur sa pahina 9]

Ginapaanggid sang Biblia ang imoral nga relihiosong mga lider sa nakapaligo nga baboy nga nagbalik sa pagtubog sa lunang