Makita Pa Ayhan Naton Sila Liwat?

“Ginbayaan mo kami sing dayon. Wala gid ini ginapaabot. Apang walay sapayan sang madalom nga pilas nga ginbilin sang imo kamatayon, mangin kaupod ka namon pirme sa amon tagipusuon. Indi gid namon malipatan ang malipayon nga tinuig nga nakaupod ka namon kag nagalaum kami nga makita ka liwat sa pila ka adlaw.”

SA Grand Duchy sang Lux­em­bourg, ang mga pamilya kag mga abyan sang namatyan liwat kag liwat nga nagapabutyag sini nga balatyagon sa pahibalo sa pamantalaan nahanungod sa napatay nga ginabalhag pagkatapos mapatay ang isa nga hinigugma. Amo man sina ang ginahunahuna sang iban sa bug-os nga kalibutan, matahom nga mga handumanan, lakip ang daku nga kasubo bangod sang pagtaliwan nila​—⁠paglaum nga ginaupdan sang pagkawalay pat-od. Ayhan amo sina ang imo reaksion ukon ayhan nakabati nahanungod sini gikan sa isa ka abyan pagkatapos mapatay ang isa nga hinigugma.

Para sa kalabanan nga tawo, ang paglaum nga makita liwat ang ila mga hinigugma makagulumon kag dimaathag. Ang mga kabangdanan maathag. Una, halos wala gid sing isa karon nga mga adlaw ang nagapanikasog nga mahibaluan ang nahanungod sini. Kag kon may isa nga nagapanikasog, ang impormasyon nga ginahatag sang kalabanan nga relihion nahanungod sa pangduhaduha indi maathag kag indi makapakombinse.

Subong sang ayhan nahibaluan mo na, para sa madamo ang lamang nga “palaabuton nga kabuhi” para sa patay amo ang kasugpon sang ila linya sang pamilya. Ayhan nabatian mo ang pagtamod nga ang mga tawo ‘padayon nga nagakabuhi sa ila kabataan.’ Apang ina bala nga “kabuhi” nagahatag sing kaayuhan sa patay ukon sing paglaum nga makita sila liwat sang iya mga ginbayaan? Wala gid! Gani diutay ­lamang ang paumpaw sa sina nga panghuna­huna!

Sa kaayuhan sang aton mga hinigugma, mga patay kag mga buhi pa, kinahanglan naton ang mga sabat sa mga pamangkot: Kon ang isa nga ginahigugma naton mapatay, makita pa ayhan naton sia liwat? Kon huo ang sabat, diin kag san-o? Sa langit bala? Ukon diri bala sa duta? Sa pagkamatuod, ano ang paglaum para sa mga hinigugma nga napatay kag para sa aton sa palaabuton?

Sing prangka, may maayong balita nahanungod sining mga pamangkot. Maayo ini bangod may isa ka pat-od kag makalilipay nga paglaum. Balita ini bangod isa ini ka mensahe nga tuhay sa mga nabatian sang kalabanan nga tawo, bisan gikan sa ila mga relihion.

Sadtong unang siglo sang aton Kumon nga Dag-on, sang ang Cristianong misyonero nga si Pablo didto sa Atenas, Gresya, nagpamulong sia nahanungod sa Makasulatanhon nga paglaum sang mga patay. Ang iban nga manugpalamati nangusisa, apang ang iban namati sing mayugataon. Luyag sang iban nga mga pilosopo makigbais sa iya, kag nagsiling sila: “Ano bala ang buot nga isiling sining boraan?” Ang iban nagsiling nga sia “ ‘manugbantala sang dumuluong nga mga dios.’ Bangod kay ginwali niya si Jesus kag ang pagkabanhaw.” (Binuhatan 17:18) Huo, ang maayong balita nga ginbantala ni Pablo naglakip sa pagkabanhaw!

Paano mo tamdon ang pinamulong nahanungod sa palaabuton nga pagkabanhaw​—⁠nga makita liwat ang patay? Isa lamang bala ini ka walay pulos nga hambal? Ukon, bangod sang imo relihioso nga edukasyon kag sang imo personal nga mga pagtamod, ang mensahe sang Balaan nga Kasulatan nahanungod sa paglaum para sa patay daw bag-o kag makatilingala bala sa imo, daw subong bala nga naghalin ini sa isa ka ‘dumuluong nga dios’?

Kay Pablo, ang mga taga-Atenas nagsiling: “Nagadala ka sing kalamag-ohan nga mga butang sa amon mga igdulungog. Busa buot namon mahibaluan kon ano ang kahulugan sining mga butang.” (Binuhatan 17:20) Luyag mo man bala mahibaluan ang dugang pa nahanungod sa paglaum sa Biblia para sa aton mga patay, kag para sa aton nga mga buhi? Kon amo, ang masunod nga artikulo magawili sa imo.