Mga Pamangkot Gikan sa mga Bumalasa

◼ May yara bala pinakamanubo nga edad para sa isa ka Cristianong lalaki agod marekomendar subong ministeryal nga alagad sa kongregasyon?

Wala, ang Biblia wala nagapat-od sing pinakamanubo nga edad.

Sa dumaan nga Israel, ginhambal sang Dios ang espisipiko nga edad sa pila ka kaso. Ang mga lalaki nga ginrehistro para sa serbisyo militar dapat mangin 20 anyos; ang mga lanubo wala ginpadala sa patag-awayan, subong nagakatabo sa iban nga mga duog karon. Ang edad isa man ka kinahanglanon para sa mga Levinhon. Ang mga Kohatinhon nga nag-alagad sa tabernakulo dapat mangin halin sa 30 tubtob 50 anyos. Ngaa? Ining limitasyon ginsambit may kaangtanan sa “buluhaton sang pag-alagdan kag sang buluhaton sang pagdala sang mga lulan sa layanglayang nga tiliponan.” (Numeros 4:​3, 47) Daw subong bala nga ang mga Levinhon makahimo sing mamulumag-an nga mga hilikuton sa edad nga 25, apang dapat sila mangin 30 anyos antes sila makaambit sa mas mabug-at nga mga hilikuton kag kapin ka responsable nga mga pribilehiyo sa pagrumpag, sa pagsaylo, kag sa pagtukod sang tabernakulo. (Numeros 8:​24-26) Inang mabug-at nga hilikuton indi kinahanglan sa ulihi sa templo, gani ang mga Levinhon sadto nagasugod sa pag-alagad sa edad nga 20.​—⁠1 Cronica 23:⁠24.

Apang sang gin-untat na ni Jehova ang paggamit sa undanon nga Israel kag ginsugdan ang paggamit sa espirituwal nga Israel, nagpat-od bala sia sing pinakamanubo nga edad para sa ministeryal nga mga alagad (mga deakono) sa Cristianong kongregasyon?

Mahimo hunahunaon sang isa nga subong sina, pasad sa rekord sang ulihi nga mga siglo. Sa Iglesia Katolika Romana, ang deakono “isa ka ordenado nga ministro, nga masunod sa ranggo sang pari, sa hirarkiya sang mga orden sang Iglesia nga ginpatok sing balaan.” Ang Antiquities of the Christian Church ni Bingham nagasiling: “Ang mga obispo kag mga presbitero [mga gulang] . . . kinaandan nga wala ginaordenan sa wala pa magtreinta anyos; apang ang mga deakono gintugutan nga ordenan sa edad nga beinte-singko anyos, kag indi antes sini. Amo ini ang kondisyon nga ginhimo sang kasuguan sibil kag kanon . . . Malaka kita makakita sing isa nga gin-ordenan sa wala pa magbeinte-singko anyos ang edad, sa bug-os nga maragtas sang Iglesia.”

Apang, ano ang mga kalipikasyon nga masapwan sa Biblia? Ang lamang nga ginhatag amo ang ginsambit sa 1 Timoteo 3:​8-10, 12, 13: “Ang ministeryal nga mga alagad dapat man mangin serioso, diduha sing hinambalan, dipalainom sing alak, didalok sang dibunayag nga daug, nga nagahupot sang balaan nga tinago sang pagtuo nga may matinlo nga konsiensia. Kag sila man pagtilawan anay kon nagakabagay sila, ugaling magaalagad sila subong mga ministro, kay disalawayon sila. Ang ministeryal nga mga alagad mga bana sang isa ka asawa, nagadumala sa maayong paagi sa mga anak kag sa ila panimalay. Kay ang mga lalaki nga nagaalagad sa maayong paagi nagahiagom sa ila kaugalingon sing maayong tindog kag daku nga kahilwayan sa paghambal sa pagtuo may kaangtanan kay Cristo Jesus.”

Makita naton diri nga wala sing pinakamanubo nga edad para sa pagtangdo sing ministeryal nga alagad nga ginpat-od. Gani kon magtipon ang mga gulang agod hambalan ang mga kalipikasyon sang mga lalaki sa kongregasyon, mahimo nila tandaan nga wala sing sadsaran sa Biblia sa pagpatuman nga ang Cristianong lalaki dapat mangin 20, 25, ukon 30 anyos antes sia marekomendar kag mag-alagad. Ginapatuhuyan sang Biblia ang mga lalaki nga nagauyat sining katungdanan subong “mga lalaki nga nagaministro,” gani indi naton mapaabot nga sila lanubo ukon tin-edyer lamang. Ang nagapamatuod sa sini amo ang ginasiling sang Biblia nga ang ministeryal nga mga alagad mahimo nga may asawa kag may mga anak.

Dugang pa, ang mga lalaki nga ginrekomendar subong ministeryal nga mga alagad dapat ‘natilawan kon nagakabagay sila,’ nga nagahatag sing ebidensya nga sila responsable. Indi buot silingon nga sila temporaryo nga magaalagad agod matilawan. Sa baylo, dapat nagpakita sila sing Cristianong pagkahamtong sa sulod sang rasonable nga kalawigon sang tion (nabawtismuhan sa dimagkubos isa ka tuig), mga lalaki nga handa kag makaatipan sang mga butang nga natangdo sa ila. Kon ang “serioso” nga pamatan-on nga lalaki nagapakita sining mga kinaiya, kag mapainubuson sia kag nalab-ot niya ang iban pa nga mga kalipikasyon, mahimo nga irekomendar sia sang mga gulang nga tangduan bisan wala pa sia magbeinte anyos. Ang iban nga mga lalaki mahimo mas gulang-gulang na kon sila maathag nga magpakita nga nalab-ot nila ang mga kalipikasyon para sa ‘pag-alagad sa maayong paagi, nga nagahiagom para sa ila kaugalingon sing maayong tindog kag sing dakung kahilwayan sa paghambal.’