Mga Pamangkot Gikan sa mga Bumalasa

◼ Ngaa ginapatuhuyan sang Panalabiton 4:​10 ang mga iloy nga nagkaon sang ila kaugalingon nga kabataan subong “maluluy-on nga mga babayi”?

Nagalaragway sang makaluluoy nga kahimtangan sang mga Judiyo sang ginbihag sang mga Babilonianhon ang Jerusalem sang 607 B.⁠C.⁠E., si Jeremias nagsulat: “Ang mga kamot sang maluluy-on nga mga babayi naglaga sang ila kaugalingon nga kabataan. Nangin kalan-on sila sang babayi nga anak sang akon katawhan.”​—⁠Panalabiton 4:⁠10.

Mga siglo antes sini, ginpaalisto ni Moises ang mga Israelinhon nga ang ila palaabuton pagatandaan sang “pagpakamaayo” ukon “pagpakamalaut.” Pakamaayuhon sila kon tumanon nila ang mga sugo sang Dios, apang magaantos sila kon sikwayon nila ang iya matarong nga mga dalanon. Ang isa sang makakulugmat nga mga resulta amo nga kaunon sang mga Israelinhon ang ila kaugalingon nga kabataan. (Deuteronomio 28:​1, 11-15, 54, 55; 30:​1; Levitico 26:​3-5, 29) Natabo gid ini sang ginbiyaan ni Jehova ang wala sing pagtuo kag malalison nga pungsod sa kamot sang mga Babilonianhon.

Sa Panalabiton 4:​10 ginapatalupangod ni manalagna Jeremias ang kilala nga kamatuoran nga sa kinaandan ang isa ka iloy malolo, maluluy-on, kag maamligon sa iya kabataan. (1 Hari 3:​26, 27; 1 Tesalonica 2:7) Apang, daku gid ang tiggulutom sa ginbihag nga Jerusalem kag ang pagkagutom nga resulta sini amo kon ngaa ang mga iloy nga sa kinaandan maluluy-on napilitan sa paglaga kag sa pagkaon sang ila kabataan.​—⁠Ipaanggid ang Panalabiton 2:⁠20.

Natabo ang kaanggid man sini nga kahimtangan sang ginsikway sang mga Judiyo ang Mesias, nga nagpaandam nahanungod sa nagapakari nga paglikop sa Jerusalem. (Mateo 23:​37, 38; 24:​15-19; Lucas 21:​20-24) Ginlaragway sang istoryador nga si Josephus ang isa sang mga kakugmat sang paglikop sang 70 C.⁠E.: “Ginpatay ni Maria nga anak ni Eleazar . . . ang iya anak, dayon ginsugba niya sia kag ginkaon ang katunga, kag gintago ang nabilin.”​—⁠The Jew­ish War, ginbadbad ni G. A. William­son, kapitulo 20, pahina 319.

Sa pagkamatuod, ang pagbiya sa kasuguan kag mga dalanon sang Dios indi amo ang dalanon sang kaalam.