“Ano ang Dapat Ko Himuon Agod Maluwas?”
“ANO ang dapat ko himuon agod maluwas?” Ini nga pamangkot ginpamangkot anay sang tuig 50 C.E. sang manugbantay sang bilanggoan sa Filipos, Macedonia. Bag-o lang naglinog sing mabaskog, kag nabuksan ang mga ganhaan sang bilanggoan nga ginabantayan niya. Sa paghunahuna nga ang mga bilanggo nagpalagyo, buot kuntani manginmatay ang manugbantay sang bilanggoan. Apang ang isa sa mga bilanggo, si apostol Pablo, nagsinggit: “Dili paghaliti ang imo kaugalingon, kay yari kami diri tanan.”—Binuhatan 16:25-30.
Si Pablo kag ang iya kaupod nga bilanggo, si Silas, nagkari sa Filipos agod magbantala sang mensahe sang kaluwasan, kag nabilanggo sila bangod sang dimatuod nga mga panumbungon batok sa ila. Sa pasalamat nga ang mga bilanggo wala magpalagyo, luyag sang manugbantay sang bilanggoan mamati sa mensahe nanday Pablo kag Silas. Ano ang dapat niya himuon agod maagom ang kaluwasan nga ginbantala sining duha ka Cristianong misyonero?
Kinahanglan gihapon sang katawhan karon ang kaluwasan nga ginbantala nanday Pablo kag Silas. Apang, sing dimakalilipay, ginatamod sang madamo ang kaluwasan nga may daku nga pangalag-ag. Naugot sila sa pagkaarogante kag kakagod sa kuwarta sang madamong relihionista nga nagapangangkon sa pagtudlo sa ila kon paano maluwas. Ang iban nagaisol bangod sang dimakatarunganon nga emosyonalismo sang madamong ebangheliko nga mga relihion nga nagapadaku sang ideya nahanungod sa kaluwasan. Ang Ingles nga dyurnalista nga si Philip Howard nagsiling nga inang ginatawag nga mga ebanghelisador “nagaatake sang emosyon kag sang nagapirma sang tseke nga mga kamot sa baylo sang sa mga hunahuna sang ila tumalambong.”—Ipaanggid ang 2 Pedro 2:2.
Nakibang ang iban sa mga pagbalhin nga nagakatabo kon kaisa sa mga indibiduwal nga nagapati nga sila may “nakalampuwas” nga eksperiensia. Sa ila libro nga Snapping, si Flo Conway kag si Jim Siegelman nagahinun-anon sang madamong relihioso nga eksperiensia—lakip ang mangin “naluwas”—nga nangin uso sa sulod sang nagligad nga pila ka dekada. Nagsulat sila nahanungod sa “maitom nga bahin” sinang mga eksperiensia kag nagsiling nga ang mga tawo “ginasagmit” pakadto sa hinali nga pagbalhin sang personalidad nga wala nakahatag sang ginsaad nga kalipay kag kasanagan kundi nagresulta sa dikinaugali nga paghanduraw, sarado nga panghunahuna, kag indi pag-atubang sa katunayan. Ang mga awtor nagdugang: “Malaragway namon ang proseso subong isa nga nagasarado sang hunahuna, nga wala nagahunahuna.”
Indi amo sini ang natabo sang ang unang-siglo nga mga Cristiano nakaeksperiensia sing kaluwasan. Ang manugbantay sang bilanggoan sa Filipos wala ‘magsarado sang iya hunahuna’ sang ginsabat ni apostol Pablo ang iya pamangkot, “Ano ang dapat ko himuon agod maluwas?” Kag si Pablo kag si Silas wala ‘magsalakay sa iya emosyon’ kag nangayo sing dakung pinansial nga amot. Sa baylo, “ginhambal nila ang pulong ni Jehova sa iya.” Nagapangatarungan upod sa iya, ginbuligan nila sia sa pagtigayon sing maathag nga paghangop sa mga aman sang Dios para sa kaluwasan.—Binuhatan 16:32.
“Magtuo kay Ginuong Jesus”
Ginbuksan sang Cristianong mga misyonero ang hunahuna sang manugbantay sang bilanggoan sa pangunang kamatuoran nahanungod sa kaluwasan. Amo man ini ang kamatuoran nga ginpaathag ni apostol Pedro sang una nga gintukod ang Cristianong kongregasyon. Gintudlo ni Pedro ang pangunang katungdanan ni Jesucristo sa kaluwasan, nagatawag sa iya “ang Pangulong Ahente sang kabuhi.” Nagsiling man ina nga apostol: “Walay kaluwasan sa bisan kay sin-o nga iban, kay walay iban nga ngalan sa idalom sang langit nga ginhatag sa mga tawo nga paagi sa iya kinahanglan kita maluwas.” (Binuhatan 3:15; 4:12) Gintuytuyan nanday Pablo kag Silas ang manugbantay sang bilanggoan sa Filipos sa sini man nga Ahente sang kaluwasan sang nagsiling sila: “Magtuo kay Ginuong Jesus kag maluwas ka.”—Binuhatan 16:31.
Apang, ano ang buot silingon sang magtuo kay Ginuong Jesus? Ngaa wala na sing iban nga ngalan kundi si Jesus lamang nga sa sini mahimo kita maluwas? Makatigayon bala ang tanan sang kaluwasan sa ulihi? Nagpati bala ang mga apostoles sa ideya nga “kis-a nga naluwas, pirme na naluwas”? Amo ini ang importante nga mga pamangkot bangod, walay sapayan sang katunayan nga ang mga pulong kag mga buhat sang madamong modernong relihionista nagapakanubo sina nga termino, kinahanglan gihapon naton ang kaluwasan. Kita tanan nagakinahanglan sang makaalayaw kag makatarunganon nga sabat sa pamangkot: “Ano ang dapat ko himuon agod maluwas?”