Mga Gulang—Amligi ang Gintugyan sa Inyo

“Tatapa ang inyo mga kaugalingon kag ang bug-os nga panong, nga sa ila ginhimo kamo sang balaan nga espiritu nga mga manugtatap, sa pagbantay sang kongregasyon sang Dios, nga ginbakal niya sang dugo sang iya kaugalingon nga Anak.”​—⁠BINUHATAN 20:⁠28.

1. Ano ang ginalakip sang Cristianong butang nga gintugyan?

SI Jehova nga Dios may makatilingala nga gintugyan sa iya dutan-on nga organisasyon. Apang ano ang buot silingon sang butang nga gintugyan? Butang ini nga may balor nga ginhatag sa isa nga amo dapat ang may salabton. Ang Cristianong butang nga gintugyan nagalakip sang “huwaran sang maayong mga pulong,” ang kamatuoran nga ginapaambit paagi sa Kasulatan kag ginahatag sang “matutom kag mainandamon nga ulipon” subong “pagkaon sa nagakaigo nga tion.” (2 Timoteo 1:​13, 14; Mateo 24:​45-47) Ining butang nga gintugyan nagalakip sang ministeryo nga naangot sa kamatuoran, nga dapat ibantala sa sulod kag sa guwa sang kongregasyon. (2 Timoteo 4:​1-5) Ang mga manugbantala sang Ginharian, lakip ang gintangdo sang espiritu nga mga gulang, dapat magkabig sining gintugyan nga butang subong may pinakamataas nga balor.

2. Ano ang dugang nga gintugyan sa mga gulang, kag ano ang ginsiling ni Pedro nahanungod sini?

² May dugang pa nga gintugyan sa Cristianong mga gulang​—⁠ang responsabilidad nga bantayan ang panong sang Dios. Nahanungod sini, si apostol Pedro nagsulat: “Ako nga masigka gulang kag saksi sang mga pag-antos ni Cristo, nga umalambit man sang himaya nga ipahayag, nagalaygay sa mga tigulang sa tunga ninyo: Tatapa ninyo ang panong sang Dios nga gintugyan sa inyo, indi sa pilit kundi sing kinabubut-on; indi tungod sa didungganon nga daug, kundi sa may pagkahanda; nga wala nagapakaginuo sa mga panublion sang Dios, kundi mangin huwaran sang panong. Kag kon mapahayag ang pangulo nga manugbantay magabaton kamo sang wala pagkalaya nga purungpurong sang himaya.”​—⁠1 Pedro 5:​1-4.

3. Dapat mangin tuburan sang ano ang mga gulang?

³ Ang Cristianong mga gulang “mangin subong sang palalipdan sa hangin kag palanagoan sa unos, subong sang mga ilig sang tubig sa duog nga kigas, subong sang landong sang daku nga igang nga makalalapyo.” (Isaias 32:​1, 2) Nagakahulugan ini nga ang mga gulang dapat mangin tuburan sang kasigurohan, paghidait, kag kalig-onan sang panong sang katulad karnero nga mga panong sang Dios. “Labi sa kinaandan” ang ginakinahanglan sa mga gulang, ukon sa kabulig nga mga manugbantay, sang panong bangod “gintugyanan [sila] sing madamo.” (Lucas 12:48) Kag isa gid ini ka hamili nga butang nga gintugyan nga dapat nila amligan.

Ngaa Gintugyan sa Inyo?

4. Ngaa madamo gid nga mga gulang ang kinahanglan?

⁴ Ang pagluntad sang kapin sa 60,000 ka kongregasyon sang mga Saksi ni Jehova sa bug-os nga kalibutan nagakinahanglan sang linibolibo ka kalipikado sa espirituwal nga mga lalaki sa pag-atipan sa panong sang Dios. Madamo ang gulang sa tagsa ka pungsod, kag isa ini ka rason sang kalipay. Sa bug-os nga kalibutan may promedyo nga mga 60 ka manugbantala sang Ginharian sa tagsa ka kongregasyon. Gani, ang mga gulang may daku gid nga hilikuton nga himuon.​—⁠1 Corinto 15:⁠58.

5. Sa anong sadsaran ginhatag sa tawo ang pribilehiyo nga mag-alagad subong gulang?

⁵ Kon ikaw isa ka gulang, ngaa ginhatag sa imo ining ginpakamaayo nga pribilehiyo? Bangod may himimuan ka, kag may espirituwal nga kalipikasyon. Halimbawa, mahimo ginaton-an mo sing makugi ang Pulong sang Dios. (Josue 1:​7, 8) Mahimo nagapakigbahin ka sing mapisan sa pag-alagad sa latagon, nagabulig man sa iban nga mangin mga manugbantala sang Ginharian. Bangod ‘gintilawan anay,’ nag-alagad ka sing matutom subong ministeryal nga alagad. ‘Naghandum,’ ukon nanikasog ka nga makalipikar nga mangin gulang, nagaapresyar nga ang pagkamangin manugtatap isa ka “maayong hilikuton.” (1 Timoteo 3:​1, 10) Kaangay ni Timoteo, “ginsugid [ka] nga maayo sang mga kauturan.” (Binuhatan 16:2) Sang ginrekomendar subong isa ka gulang, mahimo nga nagaedad ka sing mga 28 ukon 29 ukon mas magulang pa kag eksperiensiado sa kabuhi. Gintahod ka sang kongregasyon subong hamtong sa espirituwal, madali palapitan nga utod nga makasarang sa paghatag sing epektibo nga laygay sa Kasulatan kag makatago sing sekreto.​—⁠Hulubaton 25:​9, 10.

Kon Paano Amligan ang Butang nga Gintugyan sa Inyo

6, 7. Anong laygay ang ginahatag sang 1 Timoteo 4:​13-15 sa pagbulig sa isa nga maamligan ang butang nga gintugyan sa iya?

⁶ Huo, kon ikaw isa ka gulang, bangod sa maayong rason nga gintugyan sa imo ang Cristianong pagdumala. Kag daw ano ka daku nga pribilehiyo ang ginbatyag mo! Apang paano mo amligan ang butang nga gintugyan sa imo?

⁷ Ang isa ka paagi sa pag-amlig sang butang nga gintugyan sa imo subong gulang amo ang mangin positibo kag mapisan sa pagdipara sa imo mga katungdanan. Kita tanan may mga asaynment nga lainlain sing responsabilidad sa organisasyon ni Jehova. Busa, hupti ang imo duog, kag mangin kontento sa ‘paggawi subong kubos.’ (Lucas 9:​46-48; ipaanggid ang Hukom 7:⁠21.) Pakabahandia ang imo mga pribilehiyo, kag indi ‘magpangabudlay sa kamot nga matamad.’ (Hulubaton 10:4) Indi magdulog, kundi paagi sa bulig sang Dios, maghimo sing pag-uswag sa tanan nga bahin sang ministeryo. Sa pagkamatuod, tumana ining laygay nga ginhatag ni Pablo kay Timoteo: “Mag-ukud ka sa pagbasa sang kasulatan sa dayag, sa pagpangwali, sa pagpanudlo. Dili pagpatumbayai ang hiyas nga yara sa imo nga ginhatag sa imo paagi sa tagna sang gintakdungan ka sang mga tigulang sang ila mga kamot. Himoa ining mga katungdanan; ukuri ini sila, agod nga ang imo pag-uswag makita sang tanan.”​—⁠1 Timoteo 4:​13-15.

8. Ano ang magabulig sa gulang sa paghatag sing maayo nga laygay kag sa pagpaambit sing butang nga makapalig-on sa espirituwal sa mga miting?

⁸ Siguraduha nga ginahuptan mo ang maayo kag mapatubason nga iskedyul sang personal nga pagtuon. Subong isa ka gulang, ginapaabot sing makatarunganon nga makahatag ka sing maayong Makasulatanhon nga laygay. Agod masangkapan ka para sa sini nga responsabilidad, nabasa mo na bala ang bilog nga Biblia sing mapinamalandungon, ayhan sing madamo nga beses? (Hulubaton 15:28) Kamusta ang imo mga bahin sa plataporma? Handai ini sila sing maayo, mapangamuyuon nga nagapangayo sang bulig ni Jehova agod mapaambit mo ang butang nga makapabakud sa espirituwal sang mga nagatambong sa miting. Ang mga gulang labi na nga dapat ‘maghambal sing maayo nga makapalig-on, agod makahatag sing bugay sa mga nagapamati.’​—⁠Efeso 4:​29; Roma 1:⁠11.

9. Suno sa 2 Timoteo 4:​2, ano dapat ang himuon sang gulang?

⁹ Subong isa ka gulang, pamatii ang laygay ni Pablo: “Iwali ang pulong, mag-ukud sa panag-on kag sa dipanag-on, magsabdong, magbadlong, kag maglaygay, sa bug-os nga pagbatas kag pagpanudlo.” (2 Timoteo 4:2) Naba­laka si Pablo nahanungod sa ­apostasya bangod ang iban sa kongregasyon ‘nagbinanggianay nahanungod sa mga pulong,’ naduyog sa ‘binuang nga pagpangduhaduha,’ kag ‘wala nagagamit sing matadlong sang kamatuoran.’ (2 Timoteo 2:​14-18, 23-25; 3:​8-13; 4:​3, 4) Apang, bisan nagaeksperiensia man ang kongregasyon sing malain ukon maayo nga panag-on, si Timoteo dapat ‘magwali sang pulong.’ Magapabakud ini sa mga masigkatumuluo nga batuan ang apostasya. Amo man sa karon, ang mga gulang dapat magbantala sang Pulong, ukon mensahe, sang Dios, nga nagalab-ot sang tagipusuon kag nagapalig-on sang pagsunod sa mga talaksan ni Jehova.​—⁠Hebreo 4:⁠12.

10. Ngaa ang gulang dapat mangabudlay sing tayuyon sa pag-alagad sa latagon upod sa mga katapo sang iya pamilya kag sang iban pa?

¹⁰ Agod makahambal nga may awtoridad, ang gulang dapat magkabuhi nahisuno sa Pulong sang Dios. Apang wala niya ginaamligan sing bug-os ang butang nga gintugyan sa iya kon ‘nagawali [sia] sang pulong’ sa entablado lamang sa sulod sang kongregasyon. Sa sina man nga konteksto si Pablo naglaygay kay Timoteo: “Himoa ang buluhaton sang ebanghelisador.” Agod ‘matuman sing bug-os ang imo ministeryo’ subong isa ka gulang, dapat mo ibantala ang Pulong sang Dios “sing dayag kag sa pamalaybalay.” (2 Timoteo 4:​5; Binuhatan 20:​20, 21) Busa, magguwa sa latagon kaupod sang mga katapo sang imo pamilya. Magaamot ini sa espirituwal nga wagkus sa ulot mo kag sang imo asawa kag magabulig sing daku sa imo kabataan. Maghinguyang man sing tion sa pagpakigbahin sa pagbantala nga hilikuton upod sa iban nga katapo sang kongregasyon. Nagapabakud ini sang espirituwal nga kaangtanan kag nagapauswag sang utudnon nga gugma. (Juan 13:​34, 35) Sa pagkamatuod, ang gulang dapat manikasog sa pagbahinbahin sang hamili nga tion sa ulot sang iya pamilya kag sang kongregasyon. Ang paggamit sang paghantop magaupang sa imo gikan sa paghugod sang tuman kadamo nga tion sa isa, nga nagapatumbaya kag sa kahalitan sang isa pa.

11. Ngaa dapat mangabudlay sing lakas ang gulang sa pagpauswag sang iya ikasarang subong isa ka manu­nudlo?

¹¹ Agod maamligan ang butang nga gintugyan sa imo subong gulang, mangabudlay man sing lakas sa pagpauswag sang imo ikasarang subong manunudlo. “Ang nagapanudlo, sa iya pagpanudlo,” siling ni Pablo, “ukon ang nagapanglaygay, sa iya pagpanglaygay.” (Roma 12:​7, 8) Bangod ang manunudlo subong instruktor nagatindog sa atubangan sang iban, may kinamatarong sila sa pagpaabot sing daku sa iya. Kon ang gulang makahimo sing daku nga sala sa iya pagpanudlo kag nagatuga ini sang problema sa mga masigkatumuluo, ang Dios magahukom sa iya. Huo, ang mga manunudlo “hukman sing maid-id pa.” (Santiago 3:​1, 2; Mateo 12:​36, 37) Gani ang mga gulang dapat mangin serioso nga mga estudyante sang Pulong sang Dios kag dapat magaaplikar sini sa kabuhi. Nian ang ila Makasulatanhon nga panudlo, ginaupdan sang personal nga aplikasyon, apresyahon sing daku sang mga masigkatumuluo. Magaamlig man ini sa kongregasyon gikan sa dimaayo nga mga impluensia, lakip ang apostasya.

Likawi ang mga Tugalbong

12. Anong laygay nga ginbalhag anay sining balasahon ang magabulig sa gulang sa paglikaw sa sayop nga paggamit sang dila?

¹² Amligi man ang butang nga gintugyan sa imo subong gulang paagi sa paglikaw sa mga tugalbong. Ang isa sini amo ang sayop nga paggamit sang dila subong manunudlo. Ang paghalong sa sini nga bahin madugay na nga ginpadaku sang organisasyon ni Jehova. Halimbawa, sa iya guwa sang Mayo 15, 1897, ining balasahon naghinun-anon sang Santiago 3:​1-13 kag nagsiling labi na sa mga gulang: “Kon maayo sila maghambal mahimo ini mangin tuburan sang daku nga pagpakamaayo, nagaganyat sang madamo sa Ginuo, sa kamatuoran kag sa dalan sang pagkamatarong; ukon, sa pihak nga bahin, kon nahigkuan sang sayop, ang dila makahimo sing halos dimasugid nga halit​—⁠halit sa pagtuo, sa moral, sa maayong mga buhat. Matuod gid nga bisan sin-o nga nagabuhat sang dulot sang pagpanudlo nagahimo sa iya nga bukas sa dugang nga responsabilidad sa itololok sang Dios kag sang tawo. . . . Ang bisan sin-o mahimo mangin tuburan nga gikan sini magaguwa ang balaan nga Pulong, nagadala sang pagpakamaayo kag kaumpawan kag kusog, magatatap nga ang mapait nga mga tubig, dimatuod nga mga doktrina nga nagaresulta sa pagkamalaut, halit​—⁠nagapakahuya sa Dios kag nagapatiku sang iya Pulong​—⁠indi makita sa ila ang tuburan sang pulong. Sa pagpili sang mga pangulo sa mga miting ang kalipikasyon sa ‘dila,’ subong sang ginbalay diri indi dapat pasapayanan. Ang mga kalayuhon sing dila indi dapat pagpilion, kundi ang mas malum-ok, ang haganhagan, nga ‘nagapugong’ sang ila mga dila kag nagapanikasog sing maayo sa ‘paghambal sang mga orakulo sang Dios’ lamang.” Daw ano gid ka importante nga gamiton sing maayo sang isa ka gulang ang iya dila!

13. Ano nga paghalong nahanungod sa paglingawlingaw ang dapat himuon sang gulang?

¹³ Ang sobra nga paglingawlingaw isa man ka tugalbong nga likawan. Ang paglingawlingaw dapat magaparepresko kag magapalig-on, indi magakapoy kag magatublag sa Cristiano. Dugang pa, ang mga manugtatap dapat mangin “haganhagan sa mga batasan.” (1 Timoteo 3:2) Kon haganhagan ka sa imo paglingawlingaw, magaamlig ini sa imo kag sa imo pamilya kag magahatag sing maayo nga halimbawa sa kongregasyon. Wala ka nagahatag sing maayo nga halimbawa kon, pirmepirme, nagalakat ka agod maglingawlingaw sa talipuspusan sang semana samtang ang imo mga masigkatumuluo mapisan nga nagaalagad sa latagon. Ang maayong balita dapat ibantala, kag ang mga gulang dapat manguna sa sining hilikuton subong mapisan nga mga manugbantala sang Ginharian.​—⁠Marcos 13:​10; Tito 2:⁠14.

14. (a) Anong Makasulatanhon nga mga halimbawa ang nagapadaku sang kinahanglanon para sa mga gulang nga magbantay batok sa seksuwal nga imoralidad? (b) Anong sulitsulit nga laygay nahanungod sa pagbulig sa utod nga mga babayi ang indi dapat pasapayanan sang gulang?

¹⁴ Ang seksuwal nga imoralidad isa pa ka tugalbong nga likawan. Ang malain nga moral sang kalibutan mahimo makaimpluensia bisan sa isa ka gulang kon indi niya pagbatuan ang mga pagsulay nga ginagamit ni Satanas sa panikasog niya nga bugtuon ang integridad sang katawhan sang Dios. (Ipaanggid ang Mateo 4:​1-11; 6:​9, 13.) Dumduma nga si manalagna Balaam, nga nagmadinalag-on sa iya mga panikasog nga pakamalauton ang mga Israelinhon, nangatarungan nga si Jehova mismo magapakamalaut sa ila kon masulay sila sa paghimo sa pagsimba sa sekso. Gani gintudluan ni Balaam si Balak nga hari sang Moabinhon ‘sa pagbutang sing kasandaran sa mga anak sang Israel, sa pagkaon sang mga butang nga ginhalad sa mga dios kag sa pagpakighilawas.’ Ginlikawan bala nila ang tugalbong? Wala, kay 24,000 ka Israelinhon ang napatay sa isa ka kalalat-an gikan kay Jehova bangod sang ila imoral nga relasyon sa Moabinhon nga mga babayi kag pagyaub sa ila mga dios. (Bugna 2:​14; Numeros 25:​1-9) Dumduma man nga bisan si David, ‘ang tawo nga kalahamut-an sa tagipusuon sang Dios,’ nahulog sa siod sang seksuwal nga imoralidad. (1 Samuel 13:​14; 2 Samuel 11:​2-4) Subong isa ka gulang, nian, pamatii ang sulitsulit nga laygay sang “matutom nga tulugyanan” nga indi gid pagbuligi ang espirituwal nga utod nga babayi sing pribado kundi upda ang kaupod nga gulang kon nagahimo sini nga responsabilidad.​—⁠Lucas 12:⁠42.

15. Paano mabuligan sang pamilya sang gulang nga malikawan niya ang tugalbong sang materyalismo?

¹⁵ Ang materyalismo isa pa ka tugalbong nga likawan sang gulang. Mangin kontento sa mga kinahanglanon, nakahibalo nga si Jehova magaaman sing bastante. (Mateo 6:​25-33; Hebreo 13:5) Hanasa ang imo pamilya nga mangin makinot, kay ang pag-uyang isa ka makawat sang tion kag manggad nga mahimo magamit sa pagbulig sa pamilya, subong man sa pag-alagad sa latagon, sa pagpabakud sa kongregasyon, kag sa pagpauswag sang intereses sang Ginharian. Ang gulang nagabenepisyo gikan sa kooperasyon sang iya pamilya sa sining bahin kag nagapasalamat nga wala nila sia ginaipit sa mga butang nga indi gid man kinahanglan. Sa katunayan, “maayo pa ang diutay nga naupdan sang kahadlok ni Jehova sang sa dakung bahandi kag may kagamo sa sini.”​—⁠Binuhatan 15:⁠16.

“Tatapa ang Inyo mga Kaugalingon”

16. Anong laygay ang ginhatag ni Pablo sa mga manugtatap sa Efeso?

¹⁶ Agod maamligan sang mga gulang ang butang nga gintugyan sa ila, dapat nila iaplikar ang laygay ni Pablo sa mga manugbantay sang Efeso. Ginsilingan niya sila: “Tatapa ang inyo mga kaugalingon kag ang bug-os nga panong, nga sa ila ginhimo kamo sang balaan nga espiritu nga mga manugtatap, sa pagbantay sang kongregasyon sang Dios nga ginbakal niya sang dugo sang iya kaugalingon nga Anak. Nahibaluan ko nga sa makataliwan na ako sudlon kamo sang mga lobo nga mapintas nga indi magpaligad sang panong, kag gikan sa inyo gid magalutaw ang mga tawo nga nagapamulong sing mga butang nga balingag sa pagpasunod sa ila sang mga disipulo. Busa magbantay kamo, nga nagapahanumdom nga sa sulod sang tatlo ka tuig sa gab-i kag adlaw, wala ako mag-untat sa paghatag sa inyo sang panublion upod sa tanan nga ginpakabalaan.”​—⁠Binuhatan 20:​28-31.

17, 18. Anong laygay ang ginbalhag sa sining magasin sang nagligad nga mga 80 ka tuig ang naaplikar sa Cristianong mga gulang?

¹⁷ Sang nagligad nga kapin sa 80 ka tuig, ang The Watch Tower (Marso 1, 1909) nagbalikwat sang nasambit nga laygay ni Pablo sa mga masigkagulang kag nagkomento: “Ang mga Gulang bisan diin kinahanglan magpamati sing pinasahi; bangod sa tagsa ka pagtilaw ang labing kalahamut-an kag labing kilala may pinakamabug-at nga pagsalakay kag mga pagtilaw. Gani [si Santiago] nagalaygay, ‘Indi madamo sa inyo mga manunudlo, mga kauturan, nakahibalo nga sia magabaton sing mas mabug-at nga pagtilaw.’ Ginalaygayan man namon ang tanan nga mga Gulang nga sa tagipusuon putli, dimakagud, kundi may gugma kag maayong handum lamang para sa katawhan, kag nga sila mapuno pa sang mga bunga kag mga grasya sang balaan nga Espiritu, nagapamati man sa panong. Dumduma, nga ang panong iya sang Ginuo kag nga kamo may salabton sa Ginuo, subong man sa ila. Dumduma, nga dapat ninyo bantayan ang ila mga kalag (mga interes) subong nga amo ang manabat sa Dakung Pangunang Manugbantay. Dumduma, nga ang una nga butang amo ang Gugma, sa tanan; kag, samtang wala nagapatumbaya sang mga doktrina, nagahatag sing pinasahi nga igtalupangod sa pag-uswag sang Espiritu sang Ginuo sa tunga sang madamong katapo sang iya Lawas, agod nga ila ‘masugata ang panublion sang mga santo sa kapawa,’ kag, suno sa Balaan nga kabubut-on, indi masandad sa sining malaut nga adlaw, kundi, subong nakahimo sang tanan, magatindog nga bug-os kay Cristo, ang iya Lawas, ang iya mga Katapo, ang iya Kaupod nga mga Manugsakripisyo, ang iya Kaupod nga mga Manunubli.”

¹⁸ Inang mga pulong ginpatuhoy sa gintangdo sang espiritu nga mga gulang kag mga masigkatumuluo nahisanto sa paghangop kag mga sirkunstansia sang organisasyon ni Jehova sadtong unang mga adlaw. Apang, daw ano gid ka nagakaigo nga inang laygay naaplikar karon! Sa langit man ukon sa duta ang ila paglaum, ang Cristianong mga gulang dapat magtatap sang ila kaugalingon, mag-amlig sang butang nga gintatap sa ila, kag mahigugmaon nga magadipara sa kaayuhan sang panong sang Dios.

Ang Kasadya Nagaresulta Bangod sang Pag-amlig sa Butang nga Gintugyan sa Inyo

19, 20. Ngaa masiling nga ang kalipay nagaresulta kon amligan sang mga gulang ang butang nga gintugyan sa ila?

¹⁹ Ang kalipay​—⁠sa katunayan, ang tinagipusuon nga kasadya​—⁠nagaresulta bangod sang pag-amlig ninyo sang butang nga gintugyan sa inyo subong Cristianong gulang. May kalipay sa paghimo sing maayo sang mabug-at nga responsabilidad. Mangin mahalungon, mapangamuyuon, mapisan. Amligi ang butang nga gintugyan sa inyo subong gulang kag hulata ang tion nga makasiling ka, subong sang ginsiling sang lalaki nga may tintirohan sang manugsulat: “Nahimo ko suno sa ginsugo mo sa akon.”​—⁠Ezequiel 9:​3, 4, 11.

²⁰ Huo, mangabudlay sing matutom subong gulang agod masiling man sa imo ang subong sang kay Noe: “Amo ang ginhimo niya.” (Genesis 6:22) Bangod sinang mapisan nga pag-alagad, ang kongregasyon nagabenepisyo sa madamo nga paagi. Labaw sa tanan, si Jehova ginapadunggan sang malig-on kag aktibo nga mga kongregasyon nga ginaalagaran sang matutom nga mga gulang nga nagaamlig sang butang nga gintugyan sa ila. Apang labi pa ang ginakinahanglan agod, sa katunayan, masilingan ka: “Maayo, maayong ulipon!” (Lucas 19:17) Subong isa ka gulang, dapat ka mangin malulo sa panong sang Dios.

Ano ang Masiling Mo?

◻ Ano ang dugang nga gintugyan sa Cristianong mga gulang?

◻ Anong positibo nga mga tikang ang mahimo sang gulang agod maamligan ang butang nga gintugyan sa iya?

◻ Agod maamligan ang butang nga gintugyan sa iya, anong mga tugalbong ang dapat likawan sang gulang?

◻ Ngaa nagaresulta ang kasadya kon ginaamligan sang mga gulang ang butang nga gintugyan sa ila?

[Piktyur sa pahina 10]

Ang Cristianong mga gulang dapat mangin “duog nga palanagoan gikan sa bagyo”

[Piktyur sa pahina 12]

Subong gulang, makigbahin sing tayuyon sa pag-alagad sa latagon upod sa mga katapo sang imo pamilya kag sang iban

[Piktyur sa pahina 13]

Kon amligan mo ang butang nga gintugyan sa imo subong gulang, ang kongregasyon magabenepisyo sa madamong paagi