Ginakondenar Mo bala ang Kalibutan Paagi sa Imo Pagtuo?

“Bangod sa pagtuo si Noe . . . nagtukod sing arka sa pagluwas sang iya panimalay; kag paagi sini ginkondenar niya ang kalibutan.”​—⁠HEBREO 11:⁠7.

1, 2. Ano ang matun-an naton gikan sa pag-usisa sang kabuhi ni Noe?

GINHATAGAN ni Jehova si Noe kag ang iya pamilya​—⁠walo lamang sila⁠—​sing pribilehiyo nga amo lamang ang mga tawo nga naluwas sa Anaw. Ang kabuhi sang tanan nga kadungan ni Noe ginpalip-ot sang ginlaglag sila sang Dios sa tubigon nga lulubngan. Busa sanglit si Noe katigulangan naton tanan, dapat kita magpasalamat sa pagtuo nga ginpakita niya.

² Daku ang matun-an naton sa pag-usisa sang kabuhi ni Noe. Ginasugiran kita sang Kasulatan kon ngaa ginpaboran sia sang Dios sing kaluwasan samtang ginlaglag Niya ang katawhan sang kaliwatan ni Noe. Ini gihapon nga balaan nga rekord maathag nga nagapakita nga ang aton kaliwatan nagaatubang sing kaanggid nga paghukom sang Dios. Nahanungod sini, si Jesus nagsiling: “Magaabot ang dakung kapipit-an nga wala pa sing subong nga nahanabo kutob sa ginsuguran sang kalibutan tubtob karon, wala, kag indi na gid mahanabo liwat.” (Mateo 24:21) Paagi sa pag-ilog sa pagtuo ni Noe, may pat-od kita nga paglaum nga maluwas sa nagahilapit nga kalaglagan sining malaut nga sistema karon.​—⁠Roma 15:​4; ipaanggid ang Hebreo 13:⁠7.

3. Ngaa ginpahanabo ni Jehova ang Anaw?

³ Sa sulod sang 1,656 ka tuig kutob sang gintuga si Adan tubtob sa Anaw, pila lamang ka tawo ang may huyog sa paghimo sing maayo. Nagnubo gid ang moralidad. “Nakita ni Jehova nga ang pagkamalaut sang tawo daku gid sa duta kag ang tagsa ka huyog sang panghunahuna sang iya tagipusuon malaut lamang sa tanan nga tion.” (Genesis 6:5) Ang kasingki, pagpangita sing kalipay, kag ang presensia sang nagmateryalisar nga mga anghel nga nagpangasawa sing mga babayi kag nagbata sing higante nga mga anak amo ang lakip sa mga kabangdanan nga nagdul-ong sa paghukom sang Dios sa sadtong dumaan nga kalibutan sang katawhan. Kay Noe, si Jehova nagsiling: “Ang katapusan sang tanan nga unod nag-abot sa atubangan nakon, kay ang duta napuno sing kasingki bangod sini.” Ang pagpailob sang Manunuga, ang “Hukom sang bug-os nga duta,” naubos.​—⁠Genesis 6:​13; 18:⁠25.

Si Noe Naglakat Upod sa Dios

4. (a) Paano gintamod ni Jehova si Noe, kag ngaa? (b) Samtang ginkinahanglan sang hustisya sang Dios ang kalaglagan sadtong malaut nga kalibutan, paano ang iya gugma ginpakita kay Noe kag sa iya pamilya?

⁴ Daw ano ka tuhay si Noe gikan sa katawhan sang iya adlaw! Sia “nakapahamuot sa mga mata ni Jehova. . . . Si Noe tawo nga matarong. Himpit sia sa iya mga kadungan. Si Noe naglakat upod sa matuod nga Dios.” (Genesis 6:​8, 9) Paano si Noe naglakat upod sa Dios? Paagi sa paghimo sing matarong nga mga butang subong sang pagbantala subong sumalakdag sang pagkamatarong kag pagtukod sing arka pasad sa pagtuo kag pagkamatinumanon. Sa amo, bisan pa ginlaglag ang dumaan nga kalibutan bangod malaut gid yadto, ‘gintipigan [sang Dios] si Noe, nga manugbantala sang pagkamatarong, kaupod sang iban nga pito sang gin-anaw niya ang kalibutan sang mga didiosnon.’ (2 Pedro 2:5) Huo, wala paglaglaga sang aton mahigugmaon kag matarong nga Dios nga si Jehova, ang mga matarong upod sa mga malauton. Ginsugo niya si Noe nga magtukod sing daku nga arka sa pagluwas sa iya kaugalingon, sa iya panimalay, kag sa pila ka sapat, agod puy-an liwat ang duta sa tapos sang Anaw. Kag “ginhimo gid ini” ni Noe.​—⁠Genesis 6:⁠22.

5. Paano ginalaragway sang Kasulatan ang pagkamatarong kag pagtuo ni Noe?

⁵ Sang matapos na ang arka, ginsugo sang Dios si Noe: “Sulod ka kag ang imo bug-os nga panimalay sa arka, kay nakita ko ikaw nga matarong sa atubangan ko sa sini nga kaliwatan.” Ginsumaryo ni Pablo ang natabo sing subong sini: “Bangod sa pagtuo si Noe, sang ginpaandaman sang Dios nahanungod sa mga butang nga wala pa makita, nagtuman kag nagtukod sing arka sa pagluwas sang iya panimalay; kag paagi sa pagtuo ginkondenar niya ang kalibutan, kag nangin manunubli sia sang pagkamatarong nga nahisuno sa pagtuo.”​—⁠Genesis 7:​1; Hebreo 11:⁠7.

6. Paano ginkondenar ni Noe ang kalibutan sang iya adlaw paagi sa iya pagtuo?

⁶ Si Noe may talalupangdon nga pagtuo. Nagpati sia sa ginsiling sang Dios nga laglagon yadto nga kaliwatan. Si Noe may mapuslanon nga kahadlok nga indi mapahamut-an si Jehova kag matinumanon nga gintukod niya ang arka suno sa sugo sang Dios. Dugang pa, subong manugbantala sang pagkamatarong, ginpahibalo ni Noe ang iban nahanungod sa nagahilapit nga kalaglagan. Bisan pa wala sila mamati sa iya, nagdumili sia nga tugutan yadtong malaut nga kalibutan nga ‘idasok sia sa dihunan sini.’ (Roma 12:​2, Phillips) Sa baylo, paagi sa iya pagtuo, ginkondenar ni Noe ang kalibutan bangod sang kalautan sini kag ginpakita niya nga takus ini laglagon. Ang iya pagkamatinumanon kag matarong nga mga buhat nagpasundayag nga ang iban luwas sa iya kag sa iya pamilya naluwas kuntani kon handa sila sa pagbag-o sang ila pagkabuhi. Sa pagkamatuod, ginpamatud-an ni Noe nga, walay sapayan sang mga pag-ipit gikan sa iya kaugalingon nga dihimpit nga unod, sang malaut nga kalibutan sa palibot, kag sang Yawa, ang pagkabuhi nga nahamut-an sang Dios posible.

Kon Ngaa Laglagon sang Dios Ining Sistema

7. Paano naton mahibal-an nga nagakabuhi na kita sa katapusan nga mga adlaw?

⁷ Nasaksihan sang tagsa ka dekada sining ika-20 nga siglo ang dugang pa nga pagsalop sang kalibutan sa kalautan. Labi na nga matuod ini kutob sang magsugod ang Inaway Kalibutanon I. Ang katawhan nabuyo gid sa mga butang subong sang seksuwal nga imoralidad, krimen, kasingki, inaway, dumot, kakagod, kag pag-abuso sa dugo amo kon ngaa ang mga nagahigugma sa matarong nagapalibog kon bala may malain pa sa mga kahimtangan karon. Apang, gintagna sang Biblia ang nagakatabo sa aton kaliwatan sang sobra nga kalautan, nagahatag sing dugang pa nga pamatuod nga kita yari na “sa katapusan nga mga adlaw.”​—⁠2 Timoteo 3:​1-5; Mateo 24:⁠34.

8. Ano ang ginsiling sang iban nahanungod sa pagbatyag sing sala?

⁸ Sa karon, ang ideya tuhoy sa sala ginpahaganhagan sa hunahuna sang kalabanan nga tawo. Sang nagligad nga 40 ka tuig, si Papa Pio XII nagsiling: “Ang sala sini nga siglo amo ang pagkadula sang bug-os nga pagbatyag sing sala.” Ang kaliwatan karon nagadumili sa pagkilala sa sala kag pagkamakasasala. Sa iya libro nga Whatever Became of Sin? si Dr. Karl Menninger nagsiling: “Ang tinaga gid nga ‘sala’ . . . halos nadula na​—⁠ang tinaga, upod sa ideya sini. Ngaa? May nagapakasala pa bala?” Madamo ang nadulaan sing ikasarang sa paghantop sang husto gikan sa sayop. Apang indi kita nakibot sa sini, kay gintagna ni Jesus ina nga mga hitabo sang ginpaathag niya ‘ang tanda sang iya presensia’ sa “tion sang katapusan.”​—⁠Mateo 24:​3; Daniel 12:⁠4.

Ang Bitula sang Paghukom Ginpahamtang sang Adlaw ni Noe

9. Paano ginpaanggid ni Jesus ang adlaw ni Noe sa mahanabo sa tion sang Iya presensia?

⁹ Ginpaanggid ni Jesus ang mga hitabo sang adlaw ni Noe kag ang matabo sa tion sang Iya presensia nga may gahom sa Ginharian, sugod sang 1914. Sia nagsiling: “Subong sang mga adlaw ni Noe, amo man sa presensia sang Anak sang tawo [Jesus]. Kay subong sa sadtong mga adlaw sa wala pa ang anaw sila nagakaon kag nagainom, nagapangasawa kag nagapamana, tubtob sa adlaw nga nagsulod si Noe sa arka; kag wala sila magsapak tubtob nga nag-abot ang anaw kag nagdala sa ila nga tanan, amo man sa presensia sang Anak sang tawo.”​—⁠Mateo 24:​37-39.

10. Paano ang katawhan sa kabilugan wala nagasapak sa mga hitabo nga may kaangtanan sa presensia ni Cristo?

¹⁰ Huo, subong sang sa adlaw ni Noe, ang katawhan karon wala nagasapak. Bangod masako gid sila sa adlaw-adlaw nga pagkabuhi kag makagod nga mga paghimud-os, wala nila ginakilala nga ang mga kahimtangan karon tuhay gid sa mga kahimtangan sang una kag nagasibu gid sa ginsiling ni Jesus nga magatanda sa tion sang katapusan. Sa sulod sang mga tinuig, ginasugiran sang mga Saksi ni Jehova ang modernong kaliwatan nga ang presensia ni Jesus subong Mesianikong Hari sa langit nagsugod sang 1914 kag nagadungan sa “katapusan sang sistema sang mga butang.” (Mateo 24:3) Ginayaguta sang kalabanan nga tawo ang mensahe sang Ginharian, apang bisan ini gintagna sang magsulat si apostol Pedro: “Una sa tanan kinahanglan hangpon ninyo ini, nga sa katapusan nga mga adlaw ang mga mayubiton magaabot nga may pagyubit, nga nagasunod sang ila kaugalingon nga mga kailigbon kag nagasiling: ‘Diin ining saad sang iya pag-abot? Ti, kutob sang adlaw nga nagtulog sa kamatayon ang aton mga katigulangan, ang tanan nga butang nagapadayon subong nga amo sila kutob sa ginsuguran sang pagtuga.’ ”​—⁠2 Pedro 3:​3, 4.

11. Ngaa wala sing mabalibad ang kaliwatan karon kon mag-abot ang dakung kapipit-an?

¹¹ Apang, wala sing balibad ang kaliwatan karon kon mag-abot ang dakung kapipit-an. Ngaa? Bangod may yara rekord sa Biblia tuhoy sa balaan nga mga paghukom sang una nga tion nga nagapahamtang sing bitula sang kon ano ang himuon sang Dios sa aton adlaw. (Judas 5-7) Ang tagna sa Biblia nga nagakatuman sa atubangan gid sang ila mga mata nagapakita sing malig-on kon sa diin na kita sa lakat sang tion. Yara man sa atubangan sining kaliwatan ang pagbantala sang mga Saksi ni Jehova kag ang rekord sang ila paghupot sing integridad kaangay sang kay Noe anay.

12. Sa kahulugan, paano ginapaanggid ni Pedro ang kalaglagan sang kalibutan sang adlaw ni Noe sa magaabot sa “mga langit kag sa duta nga amo karon”?

¹² Ginapaathag ni Pedro kon ano ang matabo sa mga wala nagahatag sing igtalupangod sa sining mga kamatuoran. Kaangay ni Jesus, ginhimo ini sang apostol paagi sa pagpatuhoy sa natabo sang adlaw ni Noe, nga nagasiling: “Nahisuno sa ila handum, wala nila ginsapak sing hungod ining kamatuoran, nga bangod sa pulong sang Dios may mga langit kutob sa dumaan kag may duta nga ginhuman gikan sa tubig kag bangod sang tubig; kag paagi sa sini ang kalibutan sadto anay ginlapawan sang tubig kag nawala. Apang sa amo man nga pulong ang mga langit kag ang duta nga amo karon gintigana sa kalayo, nga ginatipigan nga sa adlaw sang paghukom kag kalaglagan sang mga tawo nga didiosnon.”​—⁠2 Pedro 3:​5-7.

13. Bangod sang dalagku nga mga hitabo sa palaabuton, anong laygay ni Pedro ang dapat pamatian?

¹³ Bangod ining pat-od nga paghukom sang Dios nagahimutad sa aton sa nawong, indi kita magpalimbong ukon mahadlok sa mga manugyubit. Indi kinahanglan nga sundon naton ang ila madangatan. Si Pedro nagalaygay: “Sanglit ini tanan nga butang tunawon sa amo nga bagay, ano bala nga sari sang mga tawo dapat mangin amo kamo sa balaan nga mga buhat sang paggawi kag mga buhat sang diosnon nga debosyon, nga nagahulat kag nagapadali sang pag-abot sang adlaw ni Jehova, nga bangod sini ang mga langit magahingalayo kag matunaw, kag ang mga kasangkapan matunaw sa kalayo! Apang suno sa iya saad nagahulat kita sing bag-ong mga langit kag bag-ong duta diin magapuyo ang pagkamatarong.”​—⁠2 Pedro 3:​11-13.

Iluga ang Pagtuo ni Noe Agod Maluwas

14. Anong mga pamangkot ang makabulig sa aton sa pag-analisar sang aton kaugalingon?

¹⁴ Sa karon, ginaatubang naton ang pareho nga mga hangkat nga gin-atubang anay ni Noe kag sang iya pamilya nga mangin kag magpabilin nga mga kandidato para sa kaluwasan. Kaangay ni Noe, ginakondenar sang mga Saksi ni Jehova ang kalibutan paagi sa ila pagtuo nga ginasakdag sang maayong mga buhat. Apang mahimo mamangkot ang tagsatagsa sa aton sa iya kaugalingon: ‘Kamusta ang akon kaugalingon? Kon maabot buwas ang dakung kapipit-an, hukman ayhan ako sang Dios nga takus luwason? Kaangay ni Noe, nga “himpit sa iya kadungan,” may kaisog bala ako nga mangin tuhay sa kalibutan? Ukon mabudlay bala kon kaisa masugid ang kinatuhayan sa ulot ko kag sang kalibutanon nga tawo bangod sang akon panghulag, panghambal, ukon pamayo?’ (Genesis 6:9) Si Jesus nagsiling tuhoy sa iya mga disipulo: “Sila indi bahin sang kalibutan, subong nga ako indi bahin sang kalibutan.”​—⁠Juan 17:​16; ipaanggid ang 1 Juan 4:​4-6.

15. (a) Suno sa 1 Pedro 4:​3, 4, paano naton dapat tamdon ang aton anay kalibutanon nga panghunahuna kag paggawi? (b) Ano ang dapat naton himuon kon ginamulay kita sang aton kalibutanon nga mga abyan anay?

¹⁵ Si Pedro nagalaygay: “Ang nagtaliwan nga tion tuman na sa inyo sa paghimo sang luyag himuon sang mga pungsod sang magpatuyang kamo sa mga kaulag, mga kailigbon, pagkapalainom sing alak, mga magansal nga kinalipay, mga paghinubog, kag pagsimba sa makangilil-ad nga mga diosdios. Bangod wala na kamo nagaupod sa ila sa amo nga lakas nga pagpatuyang, nagakatingala sila kag nagapakamalaut sa inyo.” (1 Pedro 4:​3, 4) Mahimo nga mulayon ka sang imo kalibutanon anay nga mga abyan bangod nagalakat ka upod sa Dios kag wala na nagapakig-upod sa ila. Apang, kaangay ni Noe, makondenar mo sila paagi sa imo pagtuo kag maayong mga buhat nga may pagkaugdang.​—⁠Miqueas 6:⁠8.

16. Paano gintamod sang Dios si Noe, kag anong mga pamangkot ang mahimo makabulig sa aton sa pag-usisa sang aton panghunahuna kag paggawi?

¹⁶ Ginakabig sang Dios si Noe subong isa ka matarong nga tawo. Yadtong matutom nga patriarka “nakapahamuot sa mga mata ni Jehova.” (Genesis 6:8) Kon usisaon mo ang imo mga panghunahuna kag paggawi sa kapawa sang mga talaksan sang Dios, ginabatyag mo bala nga nahamut-an niya ang imo ginahimo, ang tanan nga duog nga ginakadtuan mo? Ikaw bala kon kaisa nagatan-aw sang kalingawan nga tuman ka lapnag karon? Ang Pulong sang Dios nagasiling nga dapat kita maghunahuna nahanungod sa matinlo, mapuslanon, kag makapalig-on nga mga butang. (Filipos 4:8) Ginatun-an mo bala sing maukod ang Pulong sang Dios agod ‘hanason ang imo ikasarang sa paghangop sa pagpatuhay sang husto kag sayop’? (Hebreo 5:14) Ginasikway mo bala ang malain nga mga kaupod kag ginakalangkagan ang pagpakig-upod sa mga masigkasumilimba kay Jehova sa Cristianong mga miting kag sa iban pa nga mga okasyon?​—⁠1 Corinto 15:​33; Hebreo 10:​24, 25; Santiago 4:⁠4.

17. Subong mga Saksi ni Jehova, paano kita mangin kaangay ni Noe?

¹⁷ Sa tapos magreport tuhoy sa pagkahuman sang arka, ang Kasulatan nagasiling: “Ginhimo ini ni Noe suno sa tanan nga ginsugo sang Dios sa iya. Amo gid sini ang ginhimo niya.” (Genesis 6:22) Yadtong diosnon nga tawo maukod man sa pagbantala subong saksi ni Jehova. Kaangay ni Noe, mahimo ka mangin matutom nga sumalakdag sang kon ano ang matarong subong regular nga manugbantala sang pagkamatarong. Magpadayon sa pagpalanog sing paandam tuhoy sa katapusan sining malaut nga kalibutan, bisan pa diutay lamang ang nagapamati. Magpanghikot sing nahiusa upod sa mga masigkatumuluo agod matapos ang hilikuton sa paghimo sing disipulo sa wala pa ang katapusan.​—⁠Mateo 28:​19, 20.

18. Sa anong sadsaran ginapat-od ni Jehova kon sin-o ang dapat maluwas sa dakung kapipit-an?

¹⁸ Nagaaplikar sang pareho nga maayo kag matarong nga mga talaksan subong sang ginhimo niya sang adlaw ni Noe, ginapat-od karon sang Dios kon sin-o ang dapat maluwas kag kon sin-o ang dapat malaglag sa dakung kapipit-an. Ginpaangay ni Jesus ang hilikuton sa pagbahinbahin karon sa pagpain sang manugbantay sa mga karnero gikan sa mga kanding. (Mateo 25:​31-46) Indi luyag sang mga tawo nga nagasentro sang ila kabuhi sa makagod nga mga kailigbon kag mga paghimud-os nga malaglag ang dumaan nga kalibutan kag indi sila maluwas. Apang ang mga nagalikaw sa pagpakigbahin sa kahigkuan sining kalibutan, nga nagahupot sing malig-on nga pagtuo sa Dios, kag nagabantala sang mensahe sang Ginharian, nga nagapalanog sang paandam tuhoy sa nagapakari nga paghukom ni Jehova, makaagom sing balaan nga kahamuot subong mga naluwas. Si Jesus nagsiling: “Nian may duha ka tawo sa latagon: ang isa kuhaon kag ang isa bayaan; duha ka babayi magagaling sa galingan: ang isa kuhaon kag ang isa bayaan.”​—⁠Mateo 24:​40, 41; 2 Tesalonica 1:​6-9; Bugna 22:​12-15.

Panublia ang mga Pagpakamaayo Upod kay Noe

19. Anong pagtipon ang gintagna nanday Isaias kag Miqueas para sa katapusan nga mga adlaw?

¹⁹ Sa kaanggid nga mga tagna, ginlaragway sang mga manalagna sang Dios nga sanday Isaias kag Miqueas kon ano ang matabo sa tion sang katapusan nga mga adlaw. Ginpanan-aw nila sadto ang makita naton nga nagakatuman karon​—⁠ang panong sang matarong sing tagipusuon nga mga tawo nga nagaguwa gikan sa dumaan nga kalibutan kag nagataklad sa simbuliko nga bukid sang matuod nga pagsimba. Ginaagda nila ang iban: “Kari kamo, kag magtukad kita sa bukid ni Jehova, sa balay sang Dios ni Jacob; kag tudluan kita niya sang iya mga dalanon, kag magalakat kita sa iya mga banas.” (Isaias 2:​2, 3; Miqueas 4:​1, 2) Nagalakat ka bala upod sining malipayon nga panong?

20. Anong mga pagpakamaayo ang agumon sang mga nagatagudili sa kalibutan paagi sa ila pagtuo?

²⁰ Ginsambit man nanday Isaias kag Miqueas ang mga pagpakamaayo nga agumon sang mga nagakondenar sa kalibutan paagi sa ila pagtuo. Ang matuod nga paghidait kag hustisya magaluntad sa tunga nila, kag indi na sila magatuon sing inaway. Malauman nila sing pat-od ang panublion gikan kay Jehova kag “magalingkod sila ang tagsa ka tawo sa idalom sang iya ubas kag sa idalom sang iya higuera.” Apang ang tagsa ka tawo dapat maghimo sing malig-on nga desisyon, kay ginapakita ni Miqueas nga posible ang duha ka dalanon, nga nagasiling: “Ang tanan nga katawhan magalakat ang tagsatagsa sa ngalan sang iya dios; apang kita magalakat sa ngalan ni Jehova nga aton Dios tubtob sa walay katubtuban.”​—⁠Miqueas 4:​3-5; Isaias 2:⁠4.

21. Paano ikaw makaambit sa dakung pagpakamaayo nga kabuhi nga dayon sa duta?

²¹ Maathag nga ginapakita sang Kasulatan kon ano ang kinahanglanon agod maluwas sa dakung kapipit-an: malig-on nga pagtuo. Si Noe may subong sina nga pagtuo, apang amo man bala ikaw? Kon matuod, kaangay niya ikaw mangin “manunubli sang pagkamatarong nga suno sa pagtuo.” (Hebreo 11:7) Naluwas si Noe sang ginlaglag sang Dios ang iya kaliwatan. Indi lamang nga nabuhi sia sing 350 ka tuig sa tapos sang Anaw kundi banhawon sia nga may paglaum nga mabuhi sa duta sing dayon. Daw ano nga pagpakamaayo! (Hebreo 11:​13-16) Ikaw man makaambit sa sina nga pagpakamaayo upod kay Noe, sa iya pamilya, kag sa minilyon nga iban pa nga nagahigugma sang pagkamatarong. Paano? Paagi sa pagbatas tubtob sa katapusan kag pagkondenar sa kalibutan paagi sa pagtuo.

Nadumduman Mo Bala?

◻ Ngaa importante para sa mga Cristiano nga tun-an ang kabuhi ni Noe?

◻ Ano ang wala ginasapak sang katawhan sining kaliwatan, nga magadul-ong sa ila kalaglagan?

◻ Kaangay ni Noe, paano naton makondenar ining kalibutan?

◻ Paano kita mangin kaangay ni Noe subong manugbantala sang pagkamatarong?