Ang Bulawanon nga Talaksan—Ngaa Praktikal Gihapon?

ANG bulawan wala gid nagalubad, gani ang bulawan nga mga alahas ginapabilihan kag ginapakabahandi. Sa baylo nga ihaboy ang daan na nga mga butang nga human sa bulawan, ginakorte liwat sang mga platero ang hamili nga metal sa isa ka bag-o nga buhat sang taliambong bangod ginahuptan sang bulawan ang bili sini.

Sing kaanggid, bisan pa ginpamulong ni Jesus ang Bulawanon nga Talaksan sang nagligad nga mga duha ka libo ka tuig, ang bili sini wala magbuhin. Paagi sa pag-analisar, ukon paghibalo sa pagkapraktikal sini, maapresyar naton sing maayo pa ang kapuslanan sini sa aton karon.

Sang ginhatag sa aton ni Jesus ang Bulawanon nga Talaksan, “ang tanan nga butang, busa, nga luyag mo nga himuon sang mga tawo sa imo, himua man sa ila,” nagdugang sia: “Ini, sa kamatuoran, amo ang kahulugan sang Kasuguan kag sang mga Manalagna.” (Mateo 7:12) Paano ini ginhangop sang mga disipulo ni Jesus kag sang iban pa nga nagapamati sa iya?

“Ang Kahulugan sang Kasuguan kag sang mga Manalagna”

“Ang Kasuguan” nagapatuhoy sa nahauna nga mga sinulatan nga nagahuman sa nahauna nga lima ka tulun-an sang Biblia, ang Genesis tubtob Deuteronomio. Ginapahayag sini ang katuyuan ni Jehova sa pagpatubas sing binhi nga magadula sa kalautan. (Genesis 3:15) Lakip sa sadtong nahauna nga mga tulun-an sang Biblia amo ang Kasuguan, ukon hubon sang mga sugo, nga ginhatag ni Jehova sang 1513 B.⁠C.E, sa pungsod sang Israel paagi kay Moises subong manugpatunga sa Bukid Sinai.

Ang balaan nga kasuguan nagpain sa Israel gikan sa pagano nga mga pungsod sa palibot, kag ang mga Israelinhon indi dapat maghimo sing bisan ano nga magakompromiso sang ila nahamut-an nga tindog sa atubangan ni Jehova. Pinasahi sila nga pagkabutang niya kag dapat sila magpabilin nga subong sina agod mabaton ang iya mga pagpakamaayo. (Exodo 19:​5; Deuteronomio 10:​12, 13) Apang dugang sa ila mga obligasyon sa Dios, ang Mosaikong Kasuguan naghatag sing salabton sa mga Israelinhon nga maghimo sing maayo sa dumuluong nga mga pumuluyo sa Israel. Halimbawa, ini nagsiling: “Ang dumuluong nga nagapanlugayaw upod sa inyo mangin subong sia sang tumandok sa tunga ninyo; kag higugmaon mo sia subong sang imo kaugalingon, kay nangin dumuluong kamo sa duta sang Egipto. Ako si Jehova nga inyo Dios.” (Levitico 19:34) Sang panahon sang mga hari sa Israel, ang dumuluong nga mga pumuluyo may madamo nga pribilehiyo, subong sang pag-ambit sa pagtukod sang templo sang Dios sa Jerusalem.​—⁠1 Cronica 22:⁠2.

Ang Kasuguan nga ginhatag sa Israel nagdumili sang panghilahi, pagpatay, pagpangawat kag pagkamahamkunon. Ining mga sugo, upod sa “iban pa nga sugo,” sarang mabilog sa talaksan, “Dapat mo higugmaon ang imo isigkatawo subong sang imo kaugalingon.” Si apostol Pablo nagdugang: “Ang gugma wala nagabuhat sing malain sa isigkatawo; busa ang gugma amo ang katumanan sang kasuguan.”​—⁠Roma 13:​9, 10.

Kon ang Kasuguan nagbalay sang sadsaran sang Bulawanon nga Talaksan, ano ang sa “mga Manalagna”?

Ang matagnaon nga mga tulun-an sang Hebreong Kasulatan nagapamatuod man sa pagkapraktikal sang Bulawanon nga Talaksan. Ginapakita sini si Jehova subong isa ka Dios nga matutom nga nagatuman sang iya katuyuan. Ginapakamaayo niya ang iya matutom nga mga alagad nga, walay sapayan nga dihimpit, nagatinguha sa paghimo sang iya kabubut-on kag nagapakita sing matuod nga paghinulsol sa ila balingag nga mga buhat. “Panghugas kamo; paninlo kamo; isikway ang malaut nga mga buhat ninyo sa atubangan sang akon mga mata; mag-untat sa paghimo sing maayo. Magtuon sa paghimo sing maayo; magpangita sing katarungan; magluwas sa pinigos; maghukom sa ilo; mag-apin sa balo nga babayi.”​—⁠Isaias 1:​16, 17.

Sang ginhimo sang katawhan sang Dios ang matarong sa iban kag sa Dios, gingarantiya ni Jehova ang iya pagsakdag. “Amo ini ang ginsiling ni Jehova: ‘Bantayi ninyo ang katarungan, kag himua ang pagkamatarong. . . . Malipayon ang mamalatyon nga tawo nga nagahimo sini, kag ang anak sang tawo nga nagahupot sini sing malig-on.”​—⁠Isaias 56:​1, 2.

Ginatuytuyan ni Cristo ang Iya Kongregasyon

Nagkari si Cristo agod tumanon ang Kasuguan kag ang mga Manalagna, kag sugod sang iya tion, ang dayon nga katuyuan ni Jehova nagpadayon sa pagprogreso. (Mateo 5:​17; Efeso 3:​10, 11, 17-19) Ang dumaan nga Kasuguan ni Moises gin-islan sang bag-ong katipan, nga nagalakip sa Judiyo kag Gentil nga hinaplas nga mga Cristiano. (Jeremias 31:​31-34) Apang, ang Cristianong kongregasyon sa aton adlaw karon nagasunod gihapon sa Bulawanon nga Talaksan. Kag yari ang dugang pa nga rason sa pagbaton sa pagkapraktikal sang talaksan: si Cristo amo ang aktibo nga Ulo sang Modernong Cristianong kongregasyon. Wala niya ginbag-o ang iya mga instruksion. Praktikal gihapon ang iya inspirado nga laygay.

Sa wala pa niya ginbayaan ining duta, ginsugo ni Jesus ang iya mga sumulunod nga maghimo sing mga disipulo sa katawhan sang tanan nga pungsod kag tudluan sila sa ‘pagtuman sang tanan nga butang nga ginsugo ko sa inyo.’ Yadto nga instruksion naglakip sa Bulawanon nga Talaksan. Ginpasalig ni Jesus ang iya mga disipulo: “Yari karon! kaupod ninyo ako tubtob sa katapusan sang sistema sang mga butang.”​—⁠Mateo 28:​19, 20.

Subong narekord sa Lucas 6:​31, si Jesus nagsugo: “Ang luyag ninyo nga himuon sa inyo sang mga tawo, himua man ninyo sa ila.” Daw ano ka maayong huwaran ang ginpakita ni Jesus sa paghimo sang una nga tikang sa paghimo sing maayo sa iban!

Sa tion sang iya ministeryo sa duta, ginpanilagan ni Jesus ang ginabatas sang mga tawo, kag nahanuklog sia sa ila. Sa tion sang isa sang iya pagbantala, nakita niya ang kadam-an kag naluoy sia sa ila. Apang kapin pa sa sina, naghimo sia sing mga kahimusan sa pagbulig sa ila. Paano? Paagi sa pag-organisar sing mabaskog nga kampanya sa pagbantala nga nagdala sa iya mga disipulo sa mga puluy-an sang katawhan. Sia nagsugo: “Bisan diin nga siudad ukon minuro ang inyo sudlan, pangitaa kon sin-o didto ang takus, kag pabilin kamo didto tubtob nga maghalin kamo.” Maathag nga ining hilikuton ginsakdag niya kag ginpakamaayo sang iya Amay kay si Jesus nagsiling pa: “Ang nagabaton sa inyo nagabaton sa akon, kag ang nagabaton sa akon nagabaton sadtong nagpadala sa akon. . . . Kag ang bisan sin-o nga magpainom sing isa lamang ka baso nga mabugnaw nga tubig sa isa sining mga magamay bangod nga sia disipulo, sa pagkamatuod nagasiling ako sa inyo, indi niya nga mas-a madula ang iya balos.”​—⁠Mateo 9:​36⁠–​10:⁠42.

Nga ang Bulawanon nga Talaksan nagapahangop sing positibo nga buhat para sa iban makita sa pagpangatarungan ni Jesus sa isa pa ka okasyon: “Kon ang ginahigugma ninyo amo man lang ang nagahigugma sa inyo, ano bala nga kaayuhan ang inyo nahimo? Kay bisan gani ang mga makasasala nagahigugma sa mga nagahigugma sa ila. Kag kon ang ginahimuan ninyo sing maayo amo man lang ang nagahimo sing maayo sa inyo, ano bala nga kaayuhan ang inyo nahimo? Bisan pa gani ang mga makasasala nagahimo man sina. Sa kabaliskaran, higugmaa ang inyo mga kaaway kag himua ang maayo sa ila . . . kag mangin daku ang inyo balos.” (Lucas 6:​32, 33, 35) Busa, ang pagsunod sa praktikal gihapon nga Bulawanon nga Kasuguan magatiklod sa aton sa pag-una sa paghimo sing maayo bisan sa mga tawo nga indi naton kilala sing personal.

Praktikal Gihapon, Epektibo Gihapon

Ayhan ang labing malig-on nga pamatuod nga ang Bulawanon nga Talaksan praktikal gihapon nagagikan sa aktuwal nga mga eksperiensia sang mga nagsunod sa sini. Ang mga Cristiano nga nagagawi sa adlaw-adlaw nahisuno sa kasuguan sang Dios nakasapo sing daku nga kalipay kag, sa masami sing wala ginapaabot nga mga pagpakamaayo. Paagi sa pagkamatinahuron kag pagkabuot sa mga katapo sang medikal nga klinika nga ginagamit niya, nasapwan sang isa ka Cristianong babayi nga nakabenepisyo sia bangod sang pagtinguha gid sang mga nars kag mga doktor nga atipanon sia.

Ang mga Saksi ni Jehova nga nakapakigbahin sa mga proyekto nga madasig nga pagtukod sing mga Kingdom Hall makapamatuod sa pagkapraktikal sang Bulawanon nga Talaksan. Ang mainabyanon nga pagduaw sa mga tawo nga nagapuyo malapit sa duog sang konstruksion agod pahibaluon sila sang ginaplano masami nga may positibo nga reaksion. Sa amo ang mga tawo nga sang una nagapamatok sa mga Saksi nakapanilag nga sila nagahimo sing maayo sa ila mga kaingod, kag nasaksihan nila ang pagbuligay sang katawhan sang Dios. Subong resulta, ang iban nagtanyag sa pagbulig sa konstruksion, sing direkta ukon paagi sa pagtanyag sing mga suplay.​—⁠Ipaanggid ang Zacarias 8:⁠23.

Sang ang isa ka Iranian nga Saksi nga nagapuyo sa London, Inglaterra, nagbakal sing pagkaon gikan sa isa ka balaligyaan, gin-insulto sia sang tag-iya bangod isa sia ka dumuluong. Wala nahadlok, mainayuhon kag mataktikanhon nga ginpaathag sang Saksi nga sia, subong isa sang mga Saksi ni Jehova, wala sing paghinakit sa mga tawo sang iban nga nasyonalidad. Sa baylo, ginduaw niya ang tanan sa kaingod nga dala ang mensahe sang Biblia. Ang resulta? Ginpaamanan sang tag-iya ang pagkaon nga gin-order sang Saksi.

Sa pagkamatuod, ang Bulawanon nga Talaksan indi lamang para sa sinang diutay nga mga buhat sang pagkamainayuhon. Tubtob sa karon, ang labing daku nga pagpakita sini amo ang kaayuhan nga ginahimo sang mga Saksi ni Jehova sa bug-os nga kalibutan paagi sa regular nga pagduaw sa mga puluy-an sang ila mga isigkatawo nga dala ang mensahe sang maayong balita sang Ginharian sang Dios.

Pagkabuhi Nahisuno sa Bulawanon nga Talaksan

Ang pag-aplikar sa Bulawanon nga Talaksan nagakahulugan sing pagliso sang imo igtalupangod sa iban. Isa ini ka positibo nga panuytoy. Dapat ka mangita sing mga okasyon nga ikaw makahimo sing maayo sa mga tawo sa palibot mo. Mangin mainabyanon kag mabinalak-on sa iban, nga nagapakita sing personal nga interes sa ila! (Filipos 2:4) Sa paghimo sini, magaani ka sing bugana nga mga pagpakamaayo. Ginasunod mo ang laygay ni Jesus: “Pasigahon ninyo ang inyo kapawa sa mga tawo, agod makita nila ang inyo maayo nga mga binuhatan kag magahimaya sila sa inyo Amay nga yara sa langit.” (Mateo 5:16) Nian, si Jehova mangin inyo Manugpadya samtang malangkagon nga ginapangita ninyo sia kag nagakabuhi sa adlaw-adlaw suno sa Bulawanon nga Talaksan.​—⁠Hebreo 11:⁠6.