Paano Mo Ginatamod ang Napulo ka Sugo?
LAINLAIN ang pagtamod sang katawhan sa Napulo ka Sugo sang Biblia. Ang mga Seventh-Day Adventist nagasiling nga ang Napulo ka Sugo nagasakop sa tanan nga tawo. Ang mga Luterano nagakabig sini nga ang “labing maayong hugpong sang kasuguan nga nahatag diin madihon sang indibiduwal ang iya kabuhi.” “Ginahangop sing maayo,” paathag sang isa ka Katoliko nga humalambal, “ang Napulo ka Sugo nagahatag gihapon sing sadsaran para sa Cristianong pagkabuhi.”
Busa, samtang ang relihioso nga mga grupo nagapati nga dapat naton tumanon ang Napulo ka Sugo sing tul-id, ginakabig ini sang iban nga isa lamang ka giya para sa maayong moral nga pagginawi. Sa pagkamatuod, suno sa Encyclopædia of Religion and Ethics, “mahimo nga wala sing dokumento sang tawo ang may labing daku nga impluensia sa relihioso kag moral nga kabuhi sang sa Dekalogo [Napulo ka Sugo].” Ngaa amo sini ang natabo? Binagbinaga anay kon ano ang ginasiling sini. Ini malip-ot, kompleto, kag makusog. Apang paano mo dapat tamdon ang Napulo ka Sugo? Ano ang kahulugan sini sa imo?
[Kahon sa pahina 3]
ANG NAPULO KA SUGO
1. Dili ka maghupot sing iban nga mga dios sa atubangan ko.
2. Dili ka maghimo nga sa imo sing larawan nga tinigban ukon bisan ano nga kaangay sang bisan anong butang nga yara sa langit sa ibabaw ukon yara sa duta sa idalom ukon yara sa tubig sa idalom sang duta. Dili ka magyaub sa ila ukon mag-alagad sa ila . . .
3. Dili ka maggamit sang ngalan ni Jehova nga imo Dios sa wala sing kapuslanan . . .
4. Dumduma ang adlaw nga inugpahuway sa pagpakabalaan sini, sa anum ka adlaw magpangabudlay ka. . . . Dili ka maghimo sing bisan anong buluhaton, ikaw ukon ang imo anak nga lalaki ukon ang imo anak nga babayi, ukon ang imo alagad nga lalaki ukon ang imo alagad nga babayi, ukon ang imo kahayupan ukon ang dumuluong nga yara sa sulod sang imo mga gawang . . .
5. Tahora ang imo amay kag ang imo iloy . . .
6. Dili ka magpatay.
7. Dili ka magpanglahi.
8. Dili ka magpangawat.
9. Dili ka magsaksi sing dimatuod batok sa imo isigkatawo.
10. Dili ka magkaibog sang balay sang imo isigkatawo. Dili ka magkaibog sang asawa sang imo isigkatawo, ukon sang iya alagad nga lalaki ukon sang iya alagad nga babayi ukon sang iya baka ukon sang iya asno ukon ano nga butang nga iya sang imo isigkatawo.—Exodo 20:3-17.