Pagbantala sing Maayong Balita sa Bug-os nga Globo
ANG Ginharian sang Dios nagagahom! Amo ini ang pinakamatahom sa mga balita. Amo kon ngaa sang 1989 kapin sa 3,700,000 ka Saksi ni Jehova sa bug-os nga kalibutan ang mapagsik nga nagbantala sing “maayong balita” nga gintagna ni Jesus kag sing “makalilipay nga balita” nga ginpahibalo sang anghel sa palanan-awon ni Juan. (Mateo 24:14; Bugna 14:6) Subong ginsiling ni apostol Pablo: “Ang ila tingog naglapnag sa bug-os nga duta, kag ang ila mga pulong tubtob sa mga ukbong sang napuy-an nga duta.” (Roma 10:18) Kag ang mga indibiduwal sang halos tagsa ka pungsod kag tribo kag hambal kag katawhan malipayon nga nagsabat sa ila panawag nga ‘kahadluki ang Dios kag hatagi sia sing himaya.’—Bugna 14:7.
Wala Na sing Pasiguro Para sa Kabuhi
Ang isa sina amo ang isa ka tawo sa Inglaterra nga nagatrabaho sa pagkawala sing kalig-unan sang kabuhi. Si Ken manugpasiguro, kag sang magkadto sia sa panimalay sang mga Saksi ni Jehova, ginpamangkot nila sia: “Luyag mo bala magpuyo sa isa ka kalibutan nga sa diin indi na kinahanglanon ang pasiguro para sa kabuhi?” Ano ang ila buot silingon? Nga suno sa Biblia, sa idalom sang Ginharian sang Dios madamo nga butang nga nagahimo sang kabuhi karon nga wala gid sing kalig-unan, lakip ang balatian kag kamatayon, ang madula na.
Posible bala ina? Huo, ginsaad ina sang Dios mismo. Halimbawa, ang Biblia nagasiling: “Ang Dios magaupod sa ila [katawhan]. Kag pahiran niya ang tagsa ka luha sa mga mata nila, kag wala na sing kamatayon, ukon kalisod ukon paghibi ukon kasakit pa. Ang nahaunang mga butang nagtaliwan.” (Bugna 21:3, 4) Ano ang magapahanabo sina nga pagbalhin? Ang Ginharian sang Dios. Suno sa Pulong sang Dios, sa indi madugay ‘dugmukon sini kag papason ining tanan [modernong-adlaw nga politikal] nga mga ginharian, kag ini magapadayon tubtob sa wala sing katubtuban.’—Daniel 2:44.
Ang mga Kasulatan kaangay sini ginpatalupangod sang mga Saksi ni Jehova sa ginatos ka milyon ka katawhan sa tion sang ila bug-os globo nga pagbantala. Madamo, kaangay ni Ken, ang nakarealisar nga indi ini isa ka handum lamang. Malig-on ang pamatuod. Ining balaan nga mga saad masaligan kag matuman sa dili madugay.
Nagbalhin nga mga Talaksan
Narealisar sang mga nagapamati sa mga Saksi ni Jehova samtang ginapalanog nila ang makalilipay nga ginbalita sang anghel nga kapin pa sa pagpati lamang sa mga saad sang Biblia ang nadalahig sa pagkahadlok sa Dios kag sa paghatag sa iya sing himaya. Ginabalhin sini ang ila bug-os nga pagtamod kag ginapaugdaw ang madamo nga kapaslawan sa kabuhi.
Napamatud-an ini ni Rafael kag sang iya asawa. Nagapuyo sila sa Argentina, kag sang magpakasal sila sang nagligad nga kapin sa 40 ka tuig, nangin una nga tulumuron nila sa kabuhi ang magpangabudlay sing lakas kag magsupot para sa isa ka malig-on nga palaabuton. Apang, pagligad sang 21 ka tuig, ang lamang nga mapakita nila sa ila lakas nga pagpangabudlay amo ang isa ka diutay nga balay nga pirme lang kalay-uhon. Wala na sila nagabatyag sing kalig-unan sang sa tion nga nagpakasal sila.
Nian nabatian nila ang maayong balita gikan sa mga Saksi ni Jehova kag natun-an nila ang mas maayo nga sahi sang manggad kag mas maayo nga sahi sang kalig-unan. Ginhambal ini ni Jesus sa iya Sermon sa Bukid, sang magsiling sia: “Dili kamo magtipon sa inyo kaugalingon sing mga bahandi sa duta, diin ang mga sapatsapat kag ang tuktok makaut-ot kag ang mga makawat makasulod sa pagpangawat. Sa baylo, magtipon kamo sing manggad sa langit, sa diin wala sing sapatsapat kag tuktok nga makaut-ot, kag ang mga makawat indi makasulod sa pagpangawat.”—Mateo 6:19, 20.
Samtang ang Biblia wala nagatudlo sa aton nga mangin indi praktikal kon tuhoy sa materyal nga manggad, ginapalig-on kita sini nga indi pag-ipahamtang ang aton paglaum sa sina nga mga butang. (Manugwali 7:12) Sa baylo, dapat kita magpangabudlay agod matigayon ang espirituwal nga kamanggaran paagi sa pagtuon sang Biblia, pagtuon sang kabubut-on sang Dios, kag pag-una sa aton kabuhi sang paghimo sina nga kabubut-on. (Mateo 6:33) Nagsugod si Rafael kag ang iya asawa sa pagtipon sining espirituwal nga manggad, kag karon nagabatyag sila nga manggaranon gid, indi bangod sang ila pinansial nga kahimtangan, kundi bangod sang ila kaangtanan sa Dios. (Bugna 3:17, 18) Ang mensahe sang Ginharian sang Dios isa gid ka maayong balita para sa ila.
Napasag-uli nga Pag-asawahay
Ang maayong balita may gahom gid sa paghimo sing maayo. Halimbawa, si John, nga nagapuyo sa Inglaterra, indi interesado sa Biblia, apang interesado ang iya asawa kag kabataan. Gani nagsugod sila sa pagtambong sa mga miting sang mga Saksi ni Jehova samtang si Juan nagpadayon sa pag-inom upod sa iya mga abyan. Subong resulta, nadalahig sia sa pagpahubog, pagpanigarilyo, kag, sang ulihi, sa imoralidad. Sang ulihi, ginbiyaan niya ang iya asawa kag nag-upod sa isa ka babayi.
Ginsugdan ang mga tikang para sa pagdiborsio. Apang nakibot si Juan nga ang iya asawa—nga nakatuon sang Cristianong paggawi gikan sa iya pagtuon sang maayong balita—mapatugsilingon gihapon sa iya. Indi ini mahangpan ni Juan. Tatlo ka semana antes makompleto ang mga tikang para sa diborsio, ang Cristianong paggawi sang asawa ni John nag-epekto. Ginkaugtan ni John ang iya gingawi, kag wala gindayon ang mga tikang para sa diborsio. Gin-usisa karon ni John ang maayong balita kag nagtuon sang Biblia upod sa mga Saksi ni Jehova. Sia man isa na karon ka Cristiano, kag upod sa iya asawa, ginasugid nila sa iban ang maayong balita sang Ginharian.
Sa karon nga mga adlaw nga ang mga talaksan sang pamilya nagakalusod, kinahanglan sang madamo ang bulig nga ginatanyag sang napasad sa Biblia nga maayong balita. Isa ka koronel sang armada ang nakatupad sang isa sang mga Saksi ni Jehova sa Peru sang magsakay sia sa eroplano. Naghambalanay sila kag gintu-ad sang koronel ang mga problema niya sa iya pamilya, lakip ang kamatuoran nga ang iya asawa nagiyan sa droga kag buot na magbulag sa iya agod mag-upod sa lain nga lalaki nga mas hoben sa iya. Mataktikanhon nga ginpakita sa iya sang Saksi nga ang Biblia nagahatag sing maayo, malig-on nga laygay tuhoy sa pamilya kag nakabulig ini sa iya mismo sa paglubad sang mga problema niya sa iya pamilya.—Efeso 5:21–6:4.
Ginpasalamatan sang koronel ang Saksi sa iya makapalig-on nga mga pulong kag nagsuskriber sia para sa Lalantawan kag Magmata! nga magasin agod nga madugangan ang iya ihibalo tuhoy sa maayong balita. Nian, sang nagapaguwa na ang Saksi sa eroplano, ginlagas sia sang isa ka hoben nga mag-asawa kag nangabay nga makighambal sa iya. “Nagapungko kami sa atubangan mo,” siling nila, “kag nabatian namon ang paghambalanay ninyo sang tawo. Luyag man namon magsuskriber para sa sadto nga mga magasin.” Luyag man nila makatuon sing maayong balita nga makapauswag sang ila kabuhi.
Nagbag-o nga Kabuhi
Dugang pa, ang napasad sa Biblia nga maayong balita nagapabag-o sa katawhan. Subong ginsiling ni apostol Pablo: “Ang pulong sang Dios buhi kag gamhanan.” (Hebreo 4:12) Matuod ini sa bahin sang isa ka pamatan-on nga lalaki sa Macedonia, Gresya. Nakibot sia sa paghibalo nga, suno sa Biblia, ang ngalan sang Dios amo si Jehova. Gani ginpangabay niya ang iya abyan nga ipakilala sia sa mga Saksi ni Jehova sa pinakamaaga nga mahimo. Duha ka paghambalanay ang ginhimos upod sa mga Saksi, kag ang tagsa sini nagdugay sing mga apat ka oras. Nian ginsugdan sang pamatan-on nga lalaki ang regular nga pagtuon sing Biblia, kag ang nahauna nga pagtuon nagdugay tubtob sang alas dos sang kaagahon!
Kutob sadtong una nga pagtuon, madasig nga ginpahisanto sang pamatan-on nga lalaki ang iya kabuhi sa mga talaksan sang Biblia. Nagtambong sia sa mga miting para sa pagsimba upod sa mga Saksi ni Jehova kag ginhigugma niya sing labi ang Manunuga. Kag ginpakamaayo man sia ni Jehova. Sa una nga semana sang iya pagtuon sa Biblia, ginpautdan niya ang iya malaba nga buhok. Sa ikaduha nga semana, nag-untat na sia sa pagkadto sa mga bar kag sa mga disco sa pagpangita sing makakulunyag nga mga kaupod. Sa ikatlo nga semana, ginhaboy niya ang iya katapusan nga sigarilyo. Sa tapos magtuon sa duha ka bulan, nagbuylog sia sa mga Saksi sa pagsugid sa iban sang maayong balita sang Ginharian. Huo, nalipay sia nga ang mga Saksi ni Jehova nagdala sing maayong balita sa iya bahin sang duta.
Ang Maayong Balita sa Bilangguan
Bisan ang mga rehas sang bilangguan indi sablag sa maayong balita. Sa Espanya ang isa ka pamatan-on nga nagahingalan kay José may malawig nga sentensya sa bilangguan bangod sang pagpangawat nga may armas kag sang iban pa nga krimen. Apang, nasugiran sia sang mga Saksi ni Jehova sing maayong balita, kag ang mensahe sang Biblia bug-os nga nagpabag-o sang iya pagtamod. ‘Ginhatagan [sia ni Jehova] sing gahom.’—Filipos 4:13.
Nagsiling si José nga nagakaigo nga ihinguyang niya ang iya kabuhi sa sining sistema sang mga butang sa likod sang mga rehas bangod sang iya gingawi anay. Apang nabawtismuhan na sia kag sia karon isa ka Cristiano. Ang iya asawa malig-on nga nagasakdag sa iya, kag ginatinguhaan niya nga padakuon ang ila anak nga lalaki sa Cristianong paagi. Samtang, ginapaambit ni José ang maayong balita sa iya kaupod nga mga bilanggo, mga tawo nga mabudlay malab-ot sang mga nagapuyo sa guwa sang bilangguan. Ang iya karon kaupod sa selda isa na man ka nabawtismuhan nga Cristiano.
Pila lamang ini ka halimbawa sa pagpakita sang mga resulta sang bug-os globo nga pagbantala sang mga Saksi ni Jehova. Sa pagkamatuod, ang maayong balita nga ginpahibalo sang dikitaon nga anghel ginapalanog sang mga Saksi ni Jehova subong “makalilipay nga balita sa mga nagapuyo sa duta, kag sa tagsa ka pungsod kag tribo kag hambal kag katawhan.”
Amo ini ang labing matahom sa mga balita, kag amo lamang ini ang paglaum sang katawhan. Ginapalig-on namon kamo nga pamatian ini. Kaangay ni Ken kag ni John sa Inglaterra, kaangay ni Rafael kag sang iya asawa sa Argentina, kaangay ni José sa Espanya, kag kaangay sang madamo pa, nagabuylog kita sa anghel sa pagpalig-on sa tanan nga ‘mahadlok sa Dios kag hatagan sia sing himaya, kay nag-abot na ang takna sang iya paghukom, kag gani simbaha ang Isa nga naghimo sang langit kag sang duta kag sang dagat kag sang mga tuburan sang tubig.’—Bugna 14:7.