‘Wala Ginakahuya ang Maayong Balita’

“Wala ko ginakahuya ang maayong balita; ini, sa kamatuoran, amo ang gahom sang Dios sa pagluwas sang tanan nga nagatuo.”​—⁠ROMA 1:⁠16.

1. Paano ginabaton sa kinaandan ang maayong balita, apang paano tamdon sang dimatinuuhon nga katawhan sang kalibutan ang maayong balita sang Ginharian sang Dios?

ANG maayong balita sa isa ka tawo mahimo nga indi pagtamdon sang iban nga maayong balita. Sa kinaandan, ang tawo nga nagadala sing maayong balita mainit nga ginaabiabi, kag malangkagon nga ginapamatian ang iya balita. Apang, gintagna sang Biblia nga indi pagtamdon sang dimatinuuhon nga katawhan sang kalibutan ang maayong balita sang Ginharian sang Dios kag ang mensahe sini sang kaluwasan subong makalilipay​—⁠Ipaanggid ang 2 Corinto 2:​15, 16.

2. Ano ang ginsiling ni apostol Pablo nahanungod sa maayong balita nga ginbantala niya, kag ngaa ang mensahe nga ginbantala niya maayong balita gihapon karon?

² Si apostol Pablo ginpadala anay agod dalhon ang maayong balita sa publiko. Ano ang ginbatyag niya sa iya komisyon? Sia nagsiling: “Nalangkag ako nga iwali ang maayong balita sa inyo man nga yara sa Roma. Kay wala ko ginakahuya ang maayong balita.” (Roma 1:​15, 16) Agod ang balita mangin maayo gihapon bisan tubtob karon, pagligad sang halos 2,000 ka tuig sa tapos ginsulatan ni apostol Pablo ang mga Cristiano didto anay sa Roma, dapat gid ini isa ka dayon nga maayong balita. Sa kamatuoran, isa ini ka “maayong balita nga wala sing katapusan.”​—⁠Bugna 14:⁠6.

3, 4. Ngaa nagsiling si apostol Pablo nga wala niya ginakahuya ang maayong balita?

³ Ngaa nagsiling si apostol Pablo nga wala niya ginakahuya ang maayong balita? Ngaa mahimo ikahuya niya ini? Bangod isa yadto ka mensahe nga wala maluyagi sang kalabanan, kay may kaangtanan ini sa tawo nga ginlansang sa usok sang pag-antos subong sang isa ka gintamay nga kriminal, nga nagbutang sa iya sa isa ka malain gid nga kahimtangan kon hukman sa naguwa nga panagway. Sa tatlo ka tuig kag tunga, ini nga tawo nagsaka-panaug sa Palestina nga dala ang maayong balita kag ginpamatukan sia sing mabaskog sang mga Judiyo, labi na sang relihioso nga mga lider. Kag karon si Pablo, nga nagadala sang ngalan sinang gintamay nga tawo, ginapamatukan man.​—⁠Mateo 9:​35; Juan 11:​46-48, 53; Binuhatan 9:​15, 20, 23.

⁴ Bangod sina nga pagpamatok, mahimo nga si Pablo kag ang iya mga masigkadisipulo ni Jesucristo gintamod nga nagadala sing butang nga ikahuya. Sa pagkamatuod, ginasunod karon ni Pablo ang butang nga sang una ginatamod niya nga makahuluya. Nakig-ambit sia mismo sa pagpakahuya sa mga sumulunod ni Jesucristo. (Binuhatan 26:​9-11) Apang gin-untatan na niya ina nga buhat. Subong resulta, sia, upod sa iban pa nangin mga Cristiano, nga nagaantos sing masingki nga paghingabot.​—⁠Binuhatan 11:⁠26.

5. Paano ginpaathag ni Pablo ang iya ginsiling nga wala niya ginakahuya ang maayong balita?

⁵ Kon ikahuya sang isa ka tawo nga sia sumulunod ni Jesucristo, ginahuptan niya ang tawhanon nga pagtamod sa mga butang. Indi subong sina si apostol Pablo. Sa baylo, sa pagpaathag nga wala niya ginakahuya ang maayong balita nga iya ginabantala, sia nagsiling: “Ini, sa kamatuoran, amo ang gahom sang Dios sa pagluwas sa tanan nga nagatuo.” (Roma 1:16) Ang gahom sang Dios indi dapat ikahuya kon ini nagapanghikot sa isa ka disipulo ni Jesus sa pagtuman sang dalayawon nga katuyuan sang mahimayaon nga Dios nga ginsimba kag gindayaw mismo ni Jesucristo.​—⁠Ipaanggid ang 1 Corinto 1:​18; 9:​22, 23.

Ang Maayong Balita Ginawali sa Bug-os nga Kalibutan

6, 7. (a) Anong salabton sa maayong balita ang ginatinguhaan sang mga Saksi ni Jehova nga tumanon, kag ano ang resulta? (b) Bisan pa indi gid naton luyag pagtugutan ang kahadlok nga magpugong sa aton sa pagpanaksi, ano ang kinahanglanon kon kaisa? (Tan-awa ang foot­note.)

⁶ Kaangay ni Pablo, ang mga Saksi ni Jehova karon mga disipulo sang Iya ginhimaya nga Anak, si Jesucristo. Sa sining mga Saksi niya, gintugyan ni Jehova ining bahandi sang “mahimayaon nga maayong balita.” (1 Timoteo 1:11) Ang mga Saksi ni Jehova wala mapaslawi sa pagtuman sining mabug-at nga salabton, kag ginalaygayan sila nga indi ini pag-ikahuya. (2 Timoteo 1:8) Importante nga indi gid pagtugutan ang kahadlok ukon pagkamahuluy-on nga magpugong sa aton sa pagpanaksi kag sa pagpakilala sang aton kaugalingon subong mga Saksi ni Jehova.⁠a

⁷ Bangod sang masidla kag wala sing kahadlok nga pagpanaksi, ang ngalan sang Labing Mataas nga Dios ginapakilala sa bug-os nga duta kag ang maayong balita sang iya Ginharian ginabantala sa bug-os nga kalibutan. Ang Anak sang Dios nagsiling: “Iwali ining maayong balita sang ginharian sa bug-os napuy-an nga duta subong panaksi sa tanan nga kapungsuran; kag ugaling magaabot ang katapusan,” kag indi gid mapaslawan ini nga tagna niya. (Mateo 24:14) Ang maayong balita ginabantala karon sa kapin sa 210 ka kadutaan, kag ang katapusan sining pagbantala nga hilikuton wala pa malab-ot. Wala ginakahuya ang maayong balita kag ginaatubang ang palaabuton nga may kaisog, nagapangamuyo kita subong anay sang una nga mga disipulo ni Jesucristo: “Kag karon, Jehova, . . . itugot sa imo mga ulipon ang pagpamulong sang imo pulong sa bug-os nga kasidla.”​—⁠Binuhatan 4:29.

8. Ngaa indi dapat magluya ang mga Saksi ni Jehova bangod sa pagpamatok sang tanan nga pungsod sang duta?

⁸ Bisan pa matuod nga ang mga Saksi ni Jehova ginadumtan kag ginapamatukan sa tanan nga pungsod sang duta, katumanan ini sang gintagna nga mangin nagapakilala nga tanda sang matuod nga mga sumilimba sang isa ka buhi kag matuod nga Dios. (Juan 15:​20, 21; 2 Timoteo 3:12) Gani sa baylo nga magluya kag masubuan sa sini, ang mga manugwali sing maayong balita ginapasalig nga may yara sila balaan nga kahamuot kag bahin sila sang nahamut-an nga organisasyon sang Bug-os Uniberso nga Soberano, si Jehova.

9. Ngaa indi kita mahangawa nga ang bug-os nga kalibutan batok sa aton?

⁹ Indi gid pagkalimti: Ginasakdag kita sang Labing Mataas nga Dios sa bug-os nga uniberso. Gani, ano kon ang kalibutan upod ang tanan nga relihioso nga sekta kag mga partido politika sini batok sa aton? Ang bug-os nga kalibutan batok anay sa bugtong nga Anak sang Dios, kag wala kita nahuya nga masapwan sa sini man nga kahimtangan. Subong sang ginsiling niya sa iya mga apostoles: “Kon ang kalibutan nagadumot sa inyo, nahibaluan ninyo nga ini nagdumot sa akon sing una sa inyo. Kon kamo bahin sang kalibutan, ang kalibutan magahigugma sang iya kaugalingon. Apang bangod nga kamo indi bahin sang kalibutan, kundi ginpili ko kamo gikan sa kalibutan, busa ang kalibutan nagadumot sa inyo.”​—⁠Juan 15:​18, 19.

10. Sa diin naghalin ang daku nga paghingabot sa mga Saksi, kag ngaa wala nila ginakahuya ini?

¹⁰ Sa amo ang mga Saksi ni Jehova nagbatas sing paghingabot sa bug-os nga kalibutan apang labi na sa mga pungsod nga nagahuman sa ginatawag nga Cristiandad. Ina nga paghingabot sang Cristiandad wala nagapamatuod sa mga Saksi nga sila indi Cristiano. Sa baylo, nagapamatuod ini sa ila pangangkon nga sila matuod nga mga Cristiano, mga Saksi sang Dios kag Amay ni Jesucristo, nga amo, si Jehova. Bangod mga Saksi sila sang Dios, wala sila nahuya kon mag-antos sila sing paghingabot bangod sa relihioso nga mga kabangdanan. Busa, ang laygay ni apostol Pablo sa mga Cristiano sang nahauna nga siglo nga indi mahuya naaplikar sing nagakaigo sa mga Saksi ni Jehova karon.​—⁠Tan-awa ang Filipos 1:​27-29.

Ang Labing Maayong Balita nga Mawali

11. Sa pagpili sang ngalan nga mga Saksi ni Jehova, ngaa wala ini nagakahulugan nga indi na kita mga sumulunod ni Jesucristo?

¹¹ Maisugon nga ginbaton sang mga Saksi ni Jehova ang ila ngalan bilang katumanan sang saad ni Jehova sa katawhan nga nakigkatipan sa iya sa Isaias 43:⁠10. Apang, wala ini nagakahulugan nga wala na nila ginasunod si Jesucrito. Si Jesus ang ila Lider, ang isa nga ila ginasunod. Sia mismo isa sang mga Saksi ni Jehova. Sa kamatuoran, sia ang nagapanguna nga Saksi ni Jehova.​—⁠1 Timoteo 6:​13; Bugna 1:⁠5.

12. Ano nga sahi sang balita ang ginabantala sang mga Saksi ni Jehova sa bug-os nga kalibutan, kag ngaa?

¹² Ang mensahe nga ginabantala sining mga Saksi ni Jehova sa bug-os nga kalibutan amo ang labing maayong balita nga mawali. Wala sing pangulohan nga mangin maayo pa para sa katawhan sang sa Mesianikong Ginharian nga gintukod ni Jehova sa paggahom sa kalibutan sang katawhan, nga ginpadalhan niya sa iya bugtong nga Anak agod tubuson ini. (Isaias 9:​6, 7) Ang mga pumuluyo sang duta nga ginabantalaan sing maayong balita sang Ginharian ginahatagan sing kahigayunan sa pagbaton sini kag sa pagpamatuod nga takus sa regalo nga kabuhi nga wala sing katapusan sa tawhanon nga pagkahimpit sa isa ka paraiso nga duta.

13. Ngaa mapat-od naton nga ang Mesianikong Ginharian nga pangulohan amo ang mangin labing maayo, kag ano ang wala ginakahuya nga ginarekomendar sang mga Saksi?

¹³ Sa pagkamatuod, kon si Jesus kinabubut-on nga nag-antos sing mapintas nga kamatayon agod tubuson ang mga tawo nga mangin mga sakop niya, pat-od nga ihatag niya ang labing maayo nga pangulohan. Ginarekomendar naton sa tanan nga tawo sa duta: Mangin matutom kag matinumanon nga sakop sina nga pangulohan. Wala kita mahuya sa pangulohan nga aton sinsero nga ginarekomendar sa tanan nga katawhan. Wala kita nagaisol sa pagbantala sang Ginharian, bisan pa ining dalanon mahimo nga magadala sa aton sing paghingabot. Kaangay ni apostol Pablo, ang tagsatagsa sa aton nagasiling: “Wala ko ginakahuya ang maayong balita.”

14. Suno kay Jesus, daw mangin ano ka lapnag ang pagbantala sa Ginharian sa aton adlaw?

¹⁴ Gintagna ni Jesus nga ang maayong balita sang Ginharian ibantala sa bug-os nga kalibutan, kag ining masangkad nga tagna nagakaigo para sa sina nga mensahe. (Marcos 13:10) Wala sia magpangalag-ag sa pagtagna sang pagbantala sang Ginharian ni Jehova sa pinakamalayo nga kasangkaron​—⁠huo, tubtob sa mga ukbong sang duta. (Binuhatan 1:8) Nahibaluan ni Jesus nga sa bisan diin nga may mga tawo, sinsero nga panikasugan sang iya matutom nga mga sumulunod nga malab-ot sila paagi sa maayong balita sang Ginharian.

15, 16. (a) Sin-o ang takus nga malab-ot sang maayong balita? (b) Ngaa matapos ang pagbantala nga hilikuton walay sapayan sang paghingabot sang organisasyon sang Yawa?

¹⁵ Linibo ka milyon karon ang pumuluyo sang duta kag nagalapta sa tanan nga kontinente kag dalagku nga mga isla sang kadagatan. Apang, wala sing bahin sang napuy-an nga duta ang nangin tuman ka kalayo nga malab-ot sang mga Saksi ni Jehova sing maayong balita nga ginadala nila. Ang bug-os napuy-an nga duta amo ang simbuliko nga palatungan sang tiil ni Jehova nga Dios. (Isaias 66:1) Ang mga tawo nga nagapuyo sa bisan ano nga bahin sang palatungan sang iya tiil takus nga malab-ot sining mensahe sang kaluwasan.

¹⁶ Ang maayong balita karon isa ka makalilipay nga balita nahanungod sa isa ka harianon nga pangulohan nga gintukod na sa mga kamot sang Mesias. Nahibaluan ni Jesus nga walay sapayan sang labing mapintas nga paghingabot sang organisasyon sang Yawa, ang espiritu sang Dios magapahulag sa matuod nga mga sumulunod sang Mesias nga himuon ang tanan nga masarangan nila agod nga “ining maayong balita sang ginharian” subong isa ka malig-on nga kamatuoran ‘mawali sa bug-os napuy-an nga duta.’​—⁠Mateo 24:⁠14.

Wala Ginakahuya si Jesucristo kag si Jehova

17. (a) Ano ang wala ginakahuya sang matuod nga mga sumilimba? (b) Ano nga paggahom ang ginsambit ni Jesus sa Marcos 8:​38, kag ano ang kahulugan sini?

¹⁷ Ang Labing Mataas nga Dios wala magpangalag-ag sa paghatag sing ngalan sa iya kaugalingon, Jehova; gani indi dapat ikahuya sang iya matutom nga mga sumilimba ina nga ngalan. Ang matuod nga mga sumilimba malipayon nga makilala sila kag batunon subong nagahatag sing indi nabahin nga pagsimba kag pagtuman sa iya. Tuhoy sa iya kaugalingon, ginpasad ni Jesus ang talaksan, ukon prinsipio, sa Marcos 8:​38: “Ang bisan sin-o nga magkahuya sa akon kag sang akon mga pulong sa sining kaliwatan nga makilahion kag makasasala, ang Anak sang tawo magakahuya man sa iya kon magkari sia sa himaya sang iya Amay upod sa balaan nga mga anghel.” Sing kaanggid, ang bisan sin-o nga magakahuya sa Dios kag Amay ni Ginuong Jesucristo, ikahuya man sia ni Jehova. Kag ang bisan sin-o nga tinuga nga ikahuya ni Jehova bangod sang iya dimatutom nga dalanon indi takus sa pagluntad sa bisan ano nga bahin sang duog nga sakop sang Dios sa langit ukon sa duta.​—⁠Lucas 9:⁠26.

18. (a) Ngaa dapat naton ipasalop sa aton tagipusuon kag hunahuna ang ginhambal ni Jesus sa Mateo 10:​32, 33? (b) Ano ang matabo sa mga nagapanghiwala kay Jesus kag kay Jehova bangod sang kahadlok sa mga tawo? (Maghatag sing mga halimbawa pasad sa foot­note.)

¹⁸ Tuguti ang masunod nga mga pulong ni Jesucristo nga magsalop sa aton tagipusuon kag hunahuna: “Busa ang tagsatagsa nga magatu-ad sa akon sa atubangan sang mga tawo, ituad ko man sia sa atubangan sang akon Amay nga yara sa langit; apang ang bisan sin-o nga magpanghiwala sa akon sa atubangan sang mga tawo, ipanghiwala ko man sia sa atubangan sang akon Amay nga yara sa langit.” (Mateo 10:​32, 33; Lucas 12:​8, 9) Sa amo man nga sadsaran, ang bisan sin-o nga magapanghiwala sa Dios kag Amay ni Ginuong Jesucristo ipanghiwala man Niya. Indi sia pag-isipon nga takus mangin katapo sang panimalay nga ang pangulo nga Anak sini amo si Jesucristo. Busa laglagon sia sa gintangdo nga tion sang Dios.⁠b

19, 20. (a) Ngaa wala sing ikahuya ang mga nagapangamuyo sa pagpakabalaan sang ngalan ni Jehova? (b) Ano ang nahimo sang wala sing kahadlok nga mga manugwali sang Ginharian, kag sin-o ang nagasakdag sa ila?

¹⁹ Ang modelo nga pangamuyo nga gintudlo ni Jesus sa iya mga disipulo pagasabton: “Amay namon nga yara sa langit, pakabalaanon ang imo ngalan. Magkari ang imo ginharian. Paghimuon ang imo kabubut-on, subong sang sa langit, amo man sa duta.” (Mateo 6:​9, 10) Kon matabo ina, ang mahigugmaon nga mga disipulo ni Jesus wala sing ikahuya. Ang ngalan ni Jehova pagasimbahon kag pakabalaanon indi lamang sang minilyon nga nagakabuhi karon nga indi na mapatay kundi sang ginatos ka milyon man sang katawhan nga tawgon niya gikan sa ila lulubngan sa tion sang iya isa ka libo ka tuig nga paggahom sa Ginharian. May kahigayunan sila nga mabuhi sa paraiso nga duta sing dayon.

²⁰ Wala sing pagkahuya, ining wala sing kahadlok nga mga manugwali sing maayong balita sang Ginharian nakapanaksi sa bug-os nga globo walay sapayan sang bug-os kalibutan nga pagpamatok bangod may nagasakdag sa ila nga labaw sa tawo​—⁠ang pagsakdag sang langitnon nga mga anghel. Busa, ang mga Saksi ni Jehova ‘nagakahadlok sa Dios kag nagahatag sa iya sing himaya.’​—⁠Bugna 14:​6, 7.

Wala Nahuya sa Pagkahadlok sa Dios kag sa Paghatag sa Iya sing Himaya

21. Ano ang wala ginakahuya nga ginahimo sang mga Saksi ni Jehova, kag ano ang resulta?

²¹ Ginpamatud-an sang mga Saksi ni Jehova nga wala sila nahuya sa pagkahadlok sa Dios kag sa paghatag sa iya sing himaya, nga ginagamit pa gani ang iya personal nga ngalan nga Jehova. Nagresulta ini sa indi mapabutyag nga mga pagpakamaayo para sa ila. Ining mga pagpakamaayo nag-abot subong matutom nga katumanan sang mga saad sang Labing Mataas nga Dios. Daw ano nga pagbindikar ini sa iya subong isa ka nagakabuhi kag matuod nga Dios, ang Soberano sang uniberso!

22. Ngaa magaatubang ang mga Saksi ni Jehova sing mapintas nga paghingabot, apang ano nga kalipay ang matigayon nila?

²² Sa nagapakari nga palaabuton, ang sekular nga mga pangulohan magaliso batok sa relihioso nga mga paggahom kag laglagon sila tanan​—⁠lakip ang Cristiandad. (Bugna 17:​16, 17) Busa, ang mga Saksi ni Jehova magaatubang sing isa ka panahon sang mapintas nga paghingabot sang kalibutanon nga mga elemento. Indi sila makabatas kag maluwas kon ang wala sing katapusan nga Dios indi upod sa ila. Apang upod sia sa ila, kag gani malipay sila sa pagtan-aw nga ina tanan nga batok sa mga Cristiano kag batok kay Jehova nga mga kaaway laglagon sang Dios nga ginasimba sang mga Saksi sing maisugon. Indi sila mahuy-an nga ginbuyagyag kag ginlaglag subong mga kaaway sang matuod nga teokrasya kundi magaeksperiensia sila sing indi mapabutyag nga kalipay sa pag-amba kay Jehova: “Kutob sa tion nga wala sing katubtuban tubtob sa tion nga wala sing katubtuban ikaw Dios.”​—⁠Salmo 90:⁠2.

23. Ngaa wala sing ikahuya ang mga Saksi ni Jehova, kag ano ang mangin resulta?

²³ Magahatag sila sing himaya sa Dios, ang Amay ni Jesucristo, nga paagi sa iya ang tawhanon nga pamilya ginatubos agod mag-agom sing kabuhi nga wala sing katapusan nga may kahimpitan kag kalipay sa paraiso nga duta. Daw ano ka gamhanan nga Dios ginpamatud-an ni Jehova ang iya kaugalingon paagi kay Cristo Jesus! Daw ano katahom ginpasundayag ni Jehova ang iya kaugalingon subong isa ka maalam kag mahigugmaon nga manuggamit, indi manug-abuso, sang iya labing gamhanan nga gahom! Sing nagakahisuno, wala kita sing dapat ikahuya may kaangtanan sa iya ukon sa iya bugtong nga Anak, si Jesucristo. Wala kita nahuya nga mangin mga manugwali sang mahimayaon nga maayong balita, nga nagawali sang nagalandas nga gahom ni Jehova nga Dios paagi kay Cristo Jesus, nga nagsiling sa nagahingapos nga inoras sang iya kabuhi sa duta: “Magpakaisog kamo! Nadaug ko ang kalibutan.” (Juan 16:33) Sa pagpili sining dalanon, sundon naton pirme ang huwaran ni apostol Pablo, nga wala gid magkahuya sang maayong balita. Kon himuon naton ina, indi kita pag-ikahuya sang Labing Gamhanan nga Dios.

[Mga footnote]

Repaso nga mga Pamangkot

◻ Kaangay ni apostol Pablo, ano dapat ang mangin panimuot naton sa pagbantala sing maayong balita, kag ngaa?

◻ Ngaa ang mensahe nga ginawali sang mga Saksi ni Jehova amo ang labing maayong balita?

◻ Ano nga paandam ang ginhatag ni Jesus tuhoy kay bisan sin-o nga magakahuya sa iya kon mag-abot sia nga may himaya sa Ginharian?

◻ Ano ang matabo sa mga nagapanghiwala kay Jesus kag kay Jehova?

◻ Ano ang nahimo sang mga manugwali sing maayong balita nga wala sing pagkahuya, kag ngaa?