“Ang Pulong sang Dios Buhi kag Gamhanan”
1, 2. (a) Ano ang ginbangdan sang mga pagbalhin sa kabuhi sang mga nangin Cristiano? (b) Daw ano ka daku ang mangin impluwensia sang Biblia sa isa ka tawo?
SANG tunga-tunga sang nahauna nga siglo C.E., nagsulat si apostol Pablo sa Cristianong kongregasyon sa Roma. Sa sini ginpadaku niya ang kinahanglanon nga ang matuod nga mga Cristiano dapat maghimo sing mga pagbag-o. Sia nagsiling: “Mag-untat sa pagpauyon sa sining sistema sang mga butang, kundi magbalhin kamo paagi sa pagbag-o sang inyo panghunahuna, agod nga mapamatud-an ninyo sa inyo kaugalingon ang maayo kag kalahamut-an kag himpit nga kabubut-on sang Dios.” (Roma 12:2) Ano ina nga nagabalhin sa mga sumulunod ni Jesus, nga nagabag-o sang ila gid panghunahuna? Amo ang gahom sang Pulong sang Dios, ang Biblia.
2 Ginpakita ni Pablo kon daw ano ka daku ang mangin impluwensia sang Biblia sa aton sang magsulat sia: “Ang pulong sang Dios buhi kag gamhanan kag matalom pa sa bisan ano nga espada nga duha sing sulab, nga nagalapos tubtob sa nautlan sang kalag kag espiritu, kag sang mga lutalutahan kag utok, kag nagahantop sang mga hunahuna kag mga tinutuyo sang tagipusuon.” (Hebreo 4:12) Sa pagkamatuod, ang tumalagsahon nga gahom sang Biblia sa paghimo sina nga mga pagbalhin sa mga tawo isa ka makahalaylo nga pamatuod nga ini indi pulong sang tawo lamang.
3, 4. Tubtob sa anong kasangkaron nagbalhin ang mga personalidad sang mga Cristiano?
3 Ang Griego nga tinaga nga ginbadbad “magbalhin” sa Roma 12:2 naghalin sa me·ta·mor·phoʹo. Nagapakita ini sing bug-os nga pagbaylo, kaangay sang pagbaylo sang isa ka ulod padulong sa alibangbang. Bug-os gid ini amo kon ngaa ginalaragway ini sang Biblia subong isa ka pagbag-o sang personalidad. Sa lain pa nga bersikulo sang Biblia, aton mabasa: “Ubaha ang daan nga personalidad upod ang mga buhat sini, kag isul-ob ang bag-o nga personalidad, nga paagi sa sibu nga ihibalo ginabag-o suno sa larawan sang Isa nga nagtuga sini.”—Colosas 3:9, 10.
4 Sang magsulat sa kongregasyon sa Corinto, ginpakita ni Pablo ang kasangkaron sang pagbag-o sang personalidad nga natabo sang nahauna nga siglo. Sia nagsiling: “Bisan ang mga makihilawason, ukon mga diwatahan, ukon mga makihilahion, ukon mga babayinhon, ukon mga sodomanhon, ukon mga makawat, ukon mga mahamkunon, ukon mga palahubog, ukon mga mapasipalahon, ukon mga malugos indi makapanubli sang Ginharian sang Dios. Kag ang iban sa inyo subong anay sina. Apang ginhugasan kamo.” (1 Corinto 6:9-11) Huo, ang imoral kag palaaway nga mga tawo, mga makawat kag mga palahubog, nagbag-o kag nangin huwaran nga mga Cristiano.
Mga Pagbag-o sang Personalidad Karon
5, 6. Paano ang personalidad sang isa ka pamatan-on nga lalaki ginbag-o sing bug-os sang gahom sang Biblia?
5 Kaanggid man nga mga pagbag-o sang personalidad ang makita karon. Halimbawa, ang isa ka bata nga lalaki sa Bagatnan nga Amerika nangin ilo sa edad nga nuebe anyos. Nagdaku sia nga wala sing mga ginikanan nga nagatuytoy sa iya kag gani nangin daku gid ang iya problema sa iya personalidad. Sia nagaasoy: “Sang mangin 18 ako, nagiyan ako sing bug-os sa mga droga kag nakasulod na sa bilangguan bangod sa pagpangawat agod masakdag ang akon bisyo.” Apang, ang iya tiya isa sang mga Saksi ni Jehova, kag sang ulihi nabuligan niya sia.
6 Ang pamatan-on nga lalaki nagapaathag: “Gintudluan ako sang akon tiya sa Biblia, kag pagligad sang pito ka bulan nautod ko ang akon bisyo sa droga.” Nagbulag man sia sa iya mga kaupod anay kag nakasapo sing bag-o nga mga abyan sa tunga sang mga Saksi ni Jehova. Nagpadayon sia: “Ining bag-o nga mga kaupod, upod ang akon regular nga pagtuon sang Biblia, nakabulig sa akon nga mag-uswag kag sang ulihi sa pagdedikar sang akon kabuhi agod mag-alagad sa Dios.” Huo, ining isa ka giyan sa droga kag makawat anay isa na karon ka aktibo, kag matinlo sing pagkabuhi nga Cristiano. Paano nahimo inang hinali nga pagbag-o sang personalidad? Paagi sa gahom sang Biblia.
7, 8. Ilaragway kon paano ang mabudlay nga problema sa personalidad nalubad sa bulig sang Biblia.
7 Ang isa pa ka halimbawa naghalin sa bagatnan nga Europa. Didto, ang isa ka pamatan-on nga lalaki nagdaku nga may mabudlay nga problema sa personalidad: kasingki. Pirme lang sia may kontra. Sang magbaisay sa ila pamilya isa ka bes, ginsakit pa gani niya ang iya tatay, tubtob nga natumba sia! Apang, sang ulihi, nagtuon sia sang Biblia upod sa mga Saksi ni Jehova kag natalupangdan niya ang sugo sang Dios sa tulun-an sang Roma: “Dili magbayad sa bisan kay sin-o sing malaut sang malaut. . . . Kon mahimo, kon masarangan ninyo, magpakighidait sa tanan nga tawo. Dili kamo magtimalos, mga hinigugma, kundi pabayai ang kasingkal.”—Roma 12:17-19.
8 Nabuligan sia sadto nga mga pulong sa pagrealisar kon daw ano kalain ang iya kaluyahon. Ang nagadaku nga ihibalo niya sa Biblia nagtinlo sa iya konsiensia, nga nakabulig sa iya sa pagpugong sang iya pagkamadali maakig. Isa ka bes, sa tapos sia makahimo sing pag-uswag sa iya pagtuon, gin-insultohan sia sang isa ka dumuluong. Nabatyagan sang pamatan-on nga lalaki nga nagabukal sa sulod niya ang kinaandan nga kaakig. Apang may nabatyagan sia nga lain: ang pagbatyag sing kahuya; kag ginpunggan sia sini sa pagpautwas sang iya kaakig. Nakapalambo sia sing pagpugong sa kaugalingon, isa ka importante nga bunga sang espiritu. (Galacia 5:22, 23) Ang iya personalidad tuhay na karon, bangod sa gahom sang Pulong sang Dios.
9. Suno kay Pablo, paagi sa ano nga ahensya ginabalhin ang aton personalidad?
9 Apang, paano ginapatubas sang Biblia inang gamhanan nga epekto? Si Pablo, sa Colosas 3:10, nagsiling nga ang aton personalidad ginabalhin paagi sa sibu nga ihibalo, kag ini nga ihibalo masapwan sa Biblia. Apang paano ginabalhin sang ihibalo ang katawhan?
Ang Papel sang Sibu nga Ihibalo
10, 11. (a) Kon tun-an naton ang Biblia, ano ang matun-an naton nahanungod sa halandumon kag indi halandumon nga mga kinaiya sang personalidad? (b) Ano ang kinahanglanon dugang pa sa ihibalo agod magbag-o ang aton personalidad?
10 Una, ginapakilala sang Biblia ang indi halandumon nga mga kinaiya sang personalidad nga dapat ubahon. Nagalakip ini sa mga butang subong sang “mga mata nga palabilabihon, dila nga butigon, kag mga kamot nga nagapaagay sing dugo nga wala sing sala, tagipusuon nga nagapahito sing mga tinutuyo nga malaut, mga tiil nga madasig magdalagan sa panistis, dimatuod nga saksi nga nagamitlang sing mga butig, kag sia nga nagasab-og sing kasuayon sa tunga sang mga kauturan.” (Hulubaton 6:16-19) Ikaduha, ginalaragway sang Biblia ang mga kinaiya nga dapat naton palambuon, lakip ang “gugma, kalipay, paghidait, pagkamainantuson, pagkalulo, pagkaayo, pagtuo, pagkalum-ok, pagpugong sang kaugalingon.”—Galacia 5:22, 23.
11 Ina nga sibu nga ihibalo nagabulig sa sinsero nga tawo nga usisaon ang iya kaugalingon kag tan-awon kon ano nga mga kinaiya ang dapat niya palambuon kag ano ang dapat niya dulaon. (Santiago 1:25) Apang, pamuno lamang ina. Dugang sa ihibalo, kinahanglan ang motibasyon, butang nga magapahulag sa iya agod handumon niya nga magbalhin. Diri liwat, kinahanglan niya ang sibu nga ihibalo gikan sa Biblia.
Ginapahulag nga Magmaayo
12. Paano ang ihibalo sa personalidad sang Dios nagabulig sa aton sa pagbag-o?
12 Si Pablo nagsiling nga ang halandumon nga bag-o nga personalidad ginadihon “suno sa larawan sang Isa nga nagtuga sini.” (Colosas 3:10) Gani ang Cristianong personalidad dapat mag-anggid sa personalidad sang Dios. (Efeso 5:1) Paagi sa Biblia, ang personalidad sang Dios ginapahayag sa aton. Makita naton ang iya mga pagpakig-angot sa katawhan kag ang iya maayong mga kinaiya, subong sang iya gugma, pagkalulo, pagkaayo, kaluoy, kag pagkamatarong. Ina nga ihibalo nagapahulag sa tawo nga may matarong sing tagipusuon nga higugmaon ang Dios kag handumon nga mangin sahi sang tawo nga nahamut-an sang Dios. (Mateo 22:37) Subong mahigugmaon nga kabataan, luyag naton pahamut-an ang aton langitnon nga Amay, gani ginatinguhaan naton nga ilugon ang iya personalidad sing labi nga masarangan naton sa aton maluya kag dihimpit nga kahimtangan.—Efeso 5:1.
13. Ano nga ihibalo ang nagatudlo sa aton nga ‘higugmaon ang pagkamatarong kag dumtan ang pagkamalinapason’?
13 Ang aton motibasyon ginapabaskog sang ihibalo nga ginahatag sang Biblia sa kon diin nagadul-ong ang maayo kag malain nga mga kinaiya sang personalidad. (Salmo 14:1-5; 15:1-5; 18:20, 24) Natun-an naton nga si David ginpakamaayo bangod sang iya diosnon nga debosyon kag gugma sa pagkamatarong apang nag-antos sia sang madulaan sia sing pagpugong sang kaugalingon. Nakita naton ang makapasubo nga resulta sang maglain ang maayong mga kinaiya ni Solomon sang tigulang na sia. Ang mga pagpakamaayo nga resulta sang pagkatadlong nanday Josias kag Ezequias ginpatuhay sa malaglagon nga mga epekto sang kaluyahon ni Ahab kag sang batinggilan nga pag-apostata ni Manases. (Galacia 6:7) Sa amo natun-an naton nga ‘higugmaon ang pagkamatarong kag dumtan ang pagkamalinapason.’—Hebreo 1:9; Salmo 45:7; 97:10.
14. Ano ang mga katuyuan ni Jehova para sa kalibutan kag sa mga indibiduwal sa sini?
14 Ining motibasyon ginapalig-on pa sang sibu nga ihibalo sa mga katuyuan sang Dios. Ina nga ihibalo nagabulig sa pagbalhin sang ‘puwersa nga nagapahikot sang aton hunahuna,’ ang espiritu nga nagapahulag sa aton panghunahuna kag mga hulag. (Efeso 4:23, 24) Kon tun-an naton ang Biblia, matun-an naton nga indi pagtugutan ni Jehova sing dayon ang kalautan. Sa dili madugay, laglagon niya ining dimatarong nga kalibutan kag paluntaron ang ‘bag-o nga mga langit kag bag-o nga duta nga sa diin magapuyo ang pagkamatarong.’ (2 Pedro 3:8-10, 13) Sin-o ang magapuyo sa sining bag-o nga kalibutan? “Ang matadlong magapuyo sa duta, kag ang himpit magapabilin sa sini. Apang ang malauton utdon gikan sa duta; kag ang maluib gabuton sa sini.”—Hulubaton 2:21, 22.
15. Kon ginapatihan gid naton ang ginasiling sang Biblia nahanungod sa mga katuyuan ni Jehova, paano ini magaapektar sa aton subong mga tawo?
15 Kon ginapatihan gid naton ining saad, ang aton bug-os nga panghunahuna maapektohan. Si apostol Pedro, sa tapos gintagna ang kalaglagan sang kalautan, nagsiling: “Sanglit ini tanan nga butang tunawon sa amo nga bagay, ano bala nga sari sang mga tawo dapat mangin amo kamo sa balaan nga mga buhat sang paggawi kag mga buhat sang diosnon nga debosyon, nga nagahulat kag nagadumdom sang pag-abot sang adlaw ni Jehova.” (2 Pedro 3:11, 12) Ang aton personalidad dapat dihunon sang aton mabaskog nga handum nga malakip sa mga matarong nga mabilin kon malaglag na ang mga malauton.
16. Ano nga sahi sang personalidad ang mangin wala sing duog sa bag-o nga kalibutan, kag paano ini nga ihibalo dapat mag-apektar sa aton?
16 Ang tulun-an sang Bugna nagasaad sa mga matadlong nga, sa tapos malaglag ining kalibutan, “pahiran [sang Dios] ang tagsa ka luha sa mga mata nila, kag wala na sing kamatayon, ukon kalisod ukon paghibi ukon kasakit pa. Ang nahaunang mga butang nagtaliwan.” Apang nagapaandam ini nga “ang mga matalaw kag ang dimatinuohon kag ang nadagtaan kag ang mga manugpatay kag ang mga makihilawason kag ang mga espiritista kag ang nagasimba sa mga idolo kag ang tanan nga butigon” pagasikwayon. (Bugna 21:4, 8) Daw ano ka maalamon nga likawan ang dihalandumon nga mga kinaiya nga indi pagtugutan sang Dios sa bag-o nga kalibutan!
Bulig Gikan sa Guwa
17. Ano nga sahi sang bulig ang ginalaygay sa aton sang Biblia nga pangitaon naton?
17 Apang, ang mga tawo maluya, kag sa masami nagakinahanglan sila sing dugang pa sa impormasyon kag motibasyon agod magbalhin sila. Nagakinahanglan sila sing personal nga bulig, kag ginapakita sang Biblia kon sa diin naton makita ini nga bulig. Halimbawa, ini nagasiling: “Sia nga nagalakat upod sa maalam nga mga tawo magamaalam, apang sia nga nagapakig-angot sa mga buangbuang magalain.” (Hulubaton 13:20) Sing kaanggid, kon nagapakig-upod kita sa mga nagapakita sing mga kinaiya nga luyag naton palambuon, mabuligan kita sing daku nga mangin kaangay nila.—Genesis 6:9; Hulubaton 2:20; 1 Corinto 15:33.
18, 19. Ano ang dapat naton himuon agod ipadayag ang aton hunahuna kag tagipusuon sa espiritu sang Dios?
18 Dugang pa, si Jehova gid nagahatag sing bulig sa porma sang balaan nga espiritu—ang amo gihapon nga espiritu nga gingamit niya sa paghimo sing mga milagro sang una. Sa pagkamatuod, ang halandumon gid nga mga kinaiya sang “gugma, kalipay, paghidait, pagkamainantuson, pagkalulo, pagkaayo, pagtuo, pagkalum-ok, pagpugong sang kaugalingon” ginatawag nga “mga bunga sang espiritu.” (Galacia 5:22, 23) Paano naton matigayon ang bulig sang balaan nga espiritu? Sanglit ang Biblia gin-inspirar sang balaan nga espiritu, kon ginabasa naton ini ukon nagapakighambal sa iban nahanungod sini, ginapadayag naton ang aton hunahuna kag tagipusuon sa mahayluhon nga gahom sina nga espiritu. (2 Timoteo 3:16) Sa pagkamatuod, si Jesus nagsaad nga kon maghambal kita sa iban nahanungod sa aton paglaum, mahimo naton maeksperiensiahan ang direkta nga pagpanghikot sina nga espiritu.—Mateo 10:18-20.
19 Dugang pa, ang Biblia nagasugo: “Magpadayon sa pagpangamuyo.” (Roma 12:12) Sa pagpangamuyo nagapakighambal kita kay Jehova, ginadayaw sia, ginapasalamatan sia, kag nagapangayo sing bulig sa iya. Kon mangayo kita sing bulig sa paglandas sang indi halandumon nga mga kinaiya sang personalidad, subong sang madali maakig, batinggilan, indi mapailubon, ukon bugal, ang espiritu sang Dios magasakdag sa bisan anong panikasog nga ginahimo naton nahisanto sa sina nga pangamuyo.—Juan 14:13, 14; Santiago 1:5; 1 Juan 5:14.
20. Ngaa dapat magpadayon ang mga Cristiano sa pagpangabudlay nga isul-ob ang bag-o nga personalidad?
20 Sang magsulat si Pablo: “Magbalhin kamo paagi sa pagbag-o sang inyo hunahuna,” nagsulat sia sa kongregasyon sang bawtismado kag hinaplas nga mga Cristiano. (Roma 1:7; 12:2) Kag sa orihinal nga Griego, gingamit niya ang porma sang berbo nga nagapahangop sing padayon nga pagpanghikot. Nagapahangop ini nga ang pagbalhin nga ginahimo sa aton sang sibu nga ihibalo gikan sa Biblia progresibo. Kita sa karon—kaangay sang mga Cristiano sang adlaw ni Pablo—ginalibutan sang isa ka kalibutan nga puno sing malain nga mga impluwensia. Kag kita—kaangay nila—dihimpit, may huyog sa paghimo sing malain. (Genesis 8:21) Busa, dapat kita magpadayon sa pagpangabudlay nga landason ang daan kag makagod nga personalidad kag isul-ob ang bag-o, subong sang ginhimo nila. Ang unang mga Cristiano nagmadinalag-on tubtob sa punto nga sila nangin tuhay sing bug-os gikan sa kalibutan sa palibot nila. Amo man sa karon ang ginahimo sang mga Cristiano.
Isa ka Katawhan nga “Gintudluan ni Jehova”
21. Ano ang pila sang mga tagna nga natuman sa katawhan sang Dios sa sining katapusan nga mga adlaw?
21 Sa pagkamatuod, ang espiritu sang Dios karon nagapanghikot indi lamang sa mga indibiduwal kundi sa bug-os nga organisasyon sang mga Cristiano, nga minilyon sa kadamuon. Ang matagnaon nga mga pulong ni Isaias natuman sa sining organisasyon: “Kag madamo nga katawhan ang magalakat kag magasiling: ‘Kari kamo, magataklad kita sa bukid ni Jehova, sa balay sang Dios ni Jacob; kag tudluan niya kita sang iya mga dalanon, kag magalakat kita sa iya mga banas.’ ” (Isaias 2:3) Ang dugang pa nga tagna ni Isaias natuman man sa ila bahin: “Ang tanan mo nga anak tudluan ni Jehova, kag mangin daku ang paghidait sang imo mga anak.” (Isaias 54:13) Sin-o ini sila nga nagaagom sing paghidait bangod gintudluan sila ni Jehova?
22. (a) Sin-o sa karon ang ginatudluan ni Jehova? (b) Maghatag sing mga halimbawa sa pagpakita nga ginakilala sang mga tagaguwa nga tuhay ang mga Saksi ni Jehova.
22 Ti, talupangda ining ginkutlo gikan sa sulat nga ginpadala sa New Haven Register, isa ka pamantalaan sa Aminhan nga Amerika: “Kon nag-init man ang imo ulo ukon naakig ka, subong ko, bangod sang ila pagpangombertir, dapat mo dayawon ang ila dedikasyon, ang ila pagkaayo, ang ila talalupangdon nga huwaran sa tawhanon nga paggawi kag matinlo nga pagkabuhi.” Sin-o ang ginapatuhuyan sang nagsulat? Amo gihapon ang grupo nga ginhambalan sang Herald sang Buenos Aires, Argentina, sang ini magsiling: “Napamatud-an sang mga Saksi ni Jehova sa bug-os nga tinuig nga sila mapisan, maligdong, makinuton kag mahinadlukon sa Dios nga mga banwahanon.” Sing kaanggid, ang Italyano nga pamantalaan nga La Stampa nagsiling: “Wala sila nagapangdaya sa buhis ukon nagatinguha sa paglikaw sa indi kombenyente nga kasuguan para sa ila kaugalingon nga kaayuhan. Ang moral nga pagsulundan sang gugma sa isigkatawo, pagpangindi sa gahom, indi masingki kag personal nga pagkabunayag . . . nagasulod sa ila ‘matag-adlaw’ nga pagkabuhi.”
23. Ngaa tuhay gid ang mga Saksi ni Jehova subong isa ka organisasyon?
23 Ngaa ang mga Saksi ni Jehova subong isa ka grupo—kaangay sang nahauna nga mga Cristiano—tuhay gid? Sa madamo nga bahin, pareho lang sila sa tanan. Natawo sila nga may pareho nga pagkadihimpit subong tawo, kag pareho man ang ila mga problema sa pagkabuhi kag sa sadsaran nga mga kinahanglanon. Apang, subong isa ka bug-os kalibutan nga kongregasyon, ginatugutan nila ang Pulong sang Dios nga maggahom sa ila kabuhi. Ang resulta nga internasyonal nga paghiliutod sang matuod gid nga mga Cristiano isa ka gamhanan nga pamatuod nga ang Biblia amo ang inspirado nga Pulong sang Dios.—Salmo 133:1.
Inspirado ang Biblia
24. Ano ang ginapangamuyo naton para sa madamo pa nga mga tawo?
24 Sa sining duha ka artikulo, ginpaathag namon ang duha lamang ka pamatuod sa pagpakita nga ang Biblia Pulong sang Dios, indi sang tawo. Kon ang binagbinagon nila amo ang wala sing tupong nga kaalam sang Biblia ukon ang gahom sini sa pagpabag-o sa mga tawo—ukon ang madamo pa nga butang nga nagatanda sini subong tumalagsahon—indi gid malikawan sang sinsero nga mga tawo ang marealisar nga ini gid gin-inspirar sang Dios. Subong mga Cristiano, ginapangamuyo naton nga madamo pa ang makakilala sining kamatuoran. Nian ila man suliton ang makalilipay nga mga pulong sang salmista: “Talupangda kon daw ano ang paghigugma ko sang imo mga sugo. O Jehova, buhia ako suno sa imo mahigugmaon nga kaluoy. Ang kabug-osan sang imo pulong kamatuoran, kag ang tagsatagsa sang imo matarong nga paghukom imo tubtob sa wala sing katubtuban.”—Salmo 119:159, 160.
Nadumduman Mo Bala?
◻ Ano ang epekto sang Biblia sa matuod nga mga Cristiano?
◻ Paano ang sibu nga ihibalo nagabulig sa pagpabag-o sa aton?
◻ Paano ang Biblia nagapahulag sa aton sa pagpalambo sing maayong mga kinaiya kag landason ang malain nga mga kinaiya?
◻ Ano nga bulig ang matigayon sa pagpalambo sing diosnon nga mga kinaiya?
◻ Ano nga pamatuod nga ang Biblia inspirado ang makita sa tunga sang katawhan ni Jehova?
[Piktyur sa pahina 18]
Ang makapasubo nga resulta sang pagkadimatutom ni Solomon sang tigulang na sia dapat magpahulag sa aton nga higugmaon ang pagkamatarong kag dumtan ang pagkamalinapason
[Piktyur sa pahina 20]
Kon mangayo kita sing bulig kay Jehova, sakdagon sang iya espiritu ang bisan anong panikasog nga ginahimo naton sa paglandas sa malain nga mga kinaiya