Mga Pamangkot Gikan sa mga Bumalasa

◼ San-o nagtunog ang pito ka trumpeta sang anghel sang Bugna?

Sa Bugna kapitulo 8, 9, kag 11, mabasa naton ang tuhoy sa pito ka anghel nga naghuyop sa pito ka trumpeta, nga nagapahibalo sang mga kalalat-an nga may daku nga kabaskugon sa mga bahin sang katawhan. Nagrepresentar ini sang pagproklamar sang mga paghukom ni Jehova nga ginbantala sang katawhan ni Jehova sa bug-os nga tion sang katapusan sugod labi na sa kombension sa Cedar Point sang 1922.​—⁠Tan-awa ang Revelation​—⁠Its Grand Climax at Hand!, kapitulo 21 tubtob 23 kag kapitulo 26.

Ang pagtunog sang nahauna nga apat ka trumpeta nagbuyagyag sang patay sa espirituwal nga kahimtangan sang bahin sang Cristiandad sa “duta” kag sa “dagat,” subong man sang napukan nga kahimtangan sang klero kag sang espirituwal nga kadudulman sang Cristiandad.​—⁠Bugna 8:​7-12.

Ginapakita sang maragtas nga ang pagbuyagyag sa publiko sining mga kamatuoran aktuwal nga nagsugod antes sang 1922. Halimbawa, ang lektura nga “Minilyon sang Nagakabuhi Karon ang Mahimo Indi Na Mapatay,” nga una nga ginpamulongpulong sang 1918 kag ginbalhag sa polyeto nga porma sang 1920, nagsugid sang kapaslawan sang Cristiandad kag sang nagahilapit nga katapusan sining kalibutan. Ang The Golden Age sang Septiembre 29, 1920, nagbuyagyag sa Cristiandad subong makihilawason, isa ka butig nga daya, kag manugpatalang sa katawhan.

Ngaa, nian, nagsiling ang libro nga Revelation Climax nga ining apat ka trumpeta ginsugdan lamang nga huypon sa kombension sa Cedar Point sang 1922? Bangod sa amo lamang sadto ginpahibalo ang pangabay nga “ibantala, ibantala, ibantala ang Hari kag ang Ginharian,” nga naghatag sing daku nga kusog sa pagbantala nga hilikuton. Ang Nobiembre 1, 1922, nga guwa sang The Watch Tower, nagasiling: “Ang mga abyan . . . nagtamod sini subong keynote sang kombension nga ang matuod nga pribilehiyo kag katungdanan sang mga balaan karon sa duta amo nga ibantala ang presensia sang Ginuo, ang daku nga Hari sang mga hari, kag nga ang iya ginharian yari na, kag nga amo ini ang labing importante nga butang nga himuon nila.”

Dapat man talupangdon nga samtang ang tanan nga apat sining paghukom nga mensahe ginapahibalo sang mga Saksi ni Jehova sang 1922, ang tagsatagsa sini sa iya turno nakabaton sing mabaskog nga kusog gikan sa pag-adoptar sa apat ka resolusyon sa mga kombension nga ginhiwat sa ulot sang 1922 kag 1925. Minilyonmilyon ka kopya sining mga resolusyon ang ginpanagtag dayon sa naimprinta nga porma, nga epektibo nga nagabuyagyag sang patay sa espirituwal nga kahimtangan sang Cristiandad.​—⁠Tan-awa ang Revelation Climax nga libro, pahina 133, parapo 15.

Ang katapusan nga tatlo ka pagtunog sang trumpeta nagadalahig sing mga “kailo. (Bugna 8:13) Tuhay sila sa pagtunog sang nauna nga apat ka trumpeta kay may kaangtanan sila sa espisipiko nga mga hitabo. Ang pagtunog sang ikalima nga trumpeta may kaangtanan sa pagguwa sang katawhan sang Dios sang 1919 gikan sa “kadadalman.” Ang ikan-om may kaangtanan sa “manugkabayo nga hangaway” kag sa internasyonal nga kampanya sa pagbantala nga nagsugod sang 1922. Ang ikapito may kaangtanan sa pagbun-ag sang Ginharian sang Dios sang 1914.​—⁠Bugna 9:​1-19; 11:​15-19.

Ang tagsa sining mga hitabo nagdala sing kailo kay Satanas kag sa iya kalibutan. Ang pagguwa sang mga hinaplas sang 1919 gikan sa kadadalman sang indi paghikot nagkutot sa klero sang Critiandad kag nagpakita sang bug-os nga pagsikway sa iya ni Jehova. Kutob sang 1922 tubtob karon, ginpatay sang daku nga manugkabayo nga hangaway ang Cristiandad, sa espirituwal nga paghambal, nga ginabuyagyag ang iya patay nga kahimtangan kag nagapaandam sang iya nagapakari nga kalaglagan. Kag sa tapos sang pagkabun-ag sang Ginharian sang 1914, si Satanas gintabog sa langit, nga ginbangdan sang malaglagon nga kagamo sa tunga sang katawhan. Sa dili madugay dulaon sang Ginharian ang daw malig-on nga katilingban sang tawo nga gintukod ni Satanas (sa duta), kag laglagon ang rebelyuso nga katawhan (ang dagat) sa Armagedon.​—⁠Bugna 11:​17⁠–​12:​12; 21:⁠1.

Sa kombension sa Cedar Point sang 1922, ang tanan nga tatlo ka “kailo” nangin dayag sa kalibutan sa kabilugan. Ang kampanya sa pagbantala nga ginsugdan sadto maathag nga nagpakita nga ang “apan” nagguwa na sa “kadadalman” kag ang pagsalakay sang “manugkabayo nga hangaway” nagsugod na. Kag ang makapahulag nga panawag nga ibantala ang Hari kag ang Ginharian nahisanto sing bug-os sa pagtunog sang pito ka trumpeta. Ginpaathag sang Marso 1, 1925, nga guwa sang The Watch Tower nga ina nga mga hitabo sang 1914, 1919, kag 1922 gintagna sa Bugna kapitulo 12. Isa ini ka mas madalom nga paghangop sa pagkabun-ag sang Ginharian, kag matutom nga ginbalhag ini sang mga Saksi ni Jehova. Dugang pa, ang pagpahibalo sa sining kalalat-an nga impormasyon nakabaton sing daku nga kusog gikan sa pag-adoptar kag sa resulta nga pagpanagtag sing mabaskog nga mga resolusyon sa tion sang mga kombension nga ginhiwat kutob sang 1926 tubtob sang 1928.​—⁠Tan-awa ang Revelation​—⁠Its Grand Climax At Hand!, pahina 147, 149, 172.

Busa, ang paghuyop sa pito ka trumpeta nagsugod sang 1922 kag nagpadayon sa tion sang katuigan 1920. Kutob sadto, ang katawhan ni Jehova nagkooperar sing maisugon upod sa mga anghel sa pagsugid sa tanan nga katawhan nga ang Cristiandad patay sa espirituwal, ang iya klero napukan na nga mga lider, kag sa dili madugay sia kag ang nabilin nga bahin sining sataniko nga kalibutan pagalaglagon.