Paghidait sa Kalibutan—Ano Gid ang Kahulugan Sini?

ANG paghidait sa kalibutan nga ginahunahuna sang Dios nagadalahig sing labi pa sa tugob-globo nga pag-untat sing tirohay ukon indi na paghimo sing nuklear nga mga hinganiban. Makita ini gikan sa kon paano ginagamit sang Biblia ang tinaga nga “paghidait.”

Halimbawa, sa Hebreo nga Kasulatan (sa “Daan nga Testamento”) ang tinaga para sa paghidait amo ang sha·lohmʹ. Ini nga tinaga gingamit sa Genesis 37:​14, diin ginsugo ni patriarka Jacob ang iya anak nga si Jose: “Tan-awa kon wala sa katalagman ang imo mga utod kag ang panong, kag dalhi ako sing pulong.”⁠a Ang sha·lohmʹ gingamit liwat sa Genesis 41:​16, diin ginbadbad ini nga “maayo.”

Busa, sa Biblikanhon nga kahulugan, ang matuod nga paghidait wala lamang nagalakip sang pag-untat sa kagamo kundi sang kapagros, pagkawalay peligro, kag kaayuhan. Ginpakita sang amon nagligad nga guwa nga ang mga tawo indi makalubad sang problema sa kon paano ipaluntad ang paghidait. Si Jesucristo lamang, ang “Prinsipe sang Paghidait,” ang makalubad kag makapaluntad sang matuod nga paghidait sa duta. (Isaias 9:​6, 7) Binagbinaga, halimbawa, ang ginatagna sang Biblia sa Salmo 72:​7, 8 nahanungod sa paggahom niya: “Sa iya mga adlaw magalambo ang matarong, kag ang bugana nga paghidait tubtob nga wala na ang bulan. Kag sia may kagamhanan kutob sa dagat pa dagat kag kutob sa Suba tubtob sa kaukbungan sang duta.” Hunahunaa lamang​—⁠kapagros, pagkawalay peligro, kag kaayuhan sa bug-os nga kalibutan! Wala sing kasugtanan sa politika ang makahimo sina. Ang Ginharian sang Dios lamang ang makahimo sina, kag labi pa ang mahimo sini. Ang Biblia nagahatag sa aton sing madamong makalilipay nga paglili sing matagnaon sa sining palaabuton nga paghidait sa kalibutan. Binagbinagon naton ang iban sini.

Tugob-globo nga Disarmamento​—⁠Sa Paagi sang Dios!

Ang Salmo 46:​8, 9 nagasiling: “Kari, tan-awa ang mga binuhatan ni Jehova, daw ano nga kahapayan ang nahimo niya sa duta. Sia nagapatunong sang mga inaway tubtob sa ukbong sang duta. Ginabali niya ang pana kag ginautod niya ang bangkaw; ginasunog niya sa kalayo ang mga kangga.” Ang mga tinaga nga “pana,” “bangkaw,” kag ‘kangga,’ mga simbulo sang tanan nga sahi sang hinganiban sa inaway ukon kagamitan sa inaway. Gani labi pa sa paglatid sa armas ukon bug-os nga disarmamento ang himuon ni Jehova. Dulaon niya sing bug-os ang nuklear nga mga hinganiban, mga kanyon, mga tangke, mga manugpalupad sing misil, mga granada, plastik nga mga bomba, mga riple, mga pusil​—⁠tanantanan nga mahimo makabutang sa katalagman sang tugob-globo nga paghidait!

Apang, indi lamang mga hinganiban ang nagatuga sing inaway. Sing masami, ang inaway nagahalin sa madinumtanon, makagod, ukon masingki nga kinaugali sang dihimpit nga mga tawo. (Ipaanggid ang Santiago 4:​1-3.) Busa atakehon sang Ginharian sang Dios ining gamot nga kabangdanan sang inaway paagi sa pagdula sa malain nga batasan sang katawhan. Paano? Paagi sa tugob-globo nga programa sang pagtudlo. “Ang duta matugob sang ihibalo ni Jehova subong nga ang mga tubig nagatabon sang dagat.”​—⁠Isaias 11:⁠9.

Bangod kay ‘gintudluan ni Jehova,’ indi na pagtamdon sang katawhan ang mga kinatuhayan sa rasa subong sadsaran para sa inaway, dumot, ukon pagsimusimu. (Juan 6:45) “Ang Dios walay ginadampigan,” kag ang mga pumuluyo sang duta magapakita sang iya pagkawalay ginadampigan. (Binuhatan 10:34) Dulaon man sang Ginharian ang bisan anong posibilidad para sa pungsodnon nga inaway paagi sa pagdula sa pungsodnon nga mga dulonan. ‘Kutob sa dagat pa dagat kag tubtob sa kaukbungan sang duta,’ ang tanan magapanumpa sang ila kinabubut-on kag mapasalamaton nga katutom sa paggahom ni Cristo.​—⁠Salmo 72:⁠8.

Agod ina nga paghidait magapadayon, dulaon man sang Ginharian ang nagapanguna nga puwersa nga nagabahinbahin sa maragtas sang tawo: ang dimatuod nga relihion. (Sofonias 2:11) Ang katawhan mahiusa sa pagsimba sa lamang matuod nga Dios. (Isaias 2:​2, 3) Magaluntad ang bug-os kalibutan nga paghi­liutod!

Paghidait sa Puluy-an

Apang, ano ang pulos sang paghidait sa kalibutan kon ang pribado nga mga puluy-an isa ka patag-awayan diin ang mga insulto, masakit nga mga hambal, kag pamahog pirme nga mabatian. Amo sina ang nagakatabo sa madamong pamilya karon. Ang iban nga mga pamilya nagatago sang malubha nga dumot sa likod sang lambong sang indi pagtingog.

Busa ang matuod nga paghidait dapat maglakip sang kalinong sa puluy-an. Sa idalom sang edukasyonal nga programa sang Ginharian, ang mga bana kag mga asawa pagatudluan sa pagpakig-angot sa isa kag isa sa gugma kag pagtahod. (Colosas 3:​18, 19) Ang mga kabataan pagatudluan nga ‘mangin matinumanon sa ila ginikanan sa tanan nga butang.’ (Colosas 3:20) Wala na sing rebelyuso nga mga tin-edyer ang magapaslaw kag magapapalibog sa ila mga ginikanan. Ang pagkamatinumanon mangin talaksan, ang kooperasyon pagsulundan. Ang mga kabataan makalilipay tan-awon kag makasaladya nga updon.

Sa karon, ang mga pag-ipit sa ekonomiya nagpagrabe pa gid sang mga tension sa pamilya, kay ang mga ginikanan masunson nga obligado sa pag-abaga sang mabug-at nga lulan sang sekular nga palamugnan. Apang sa idalom sang paggahom ni Cristo, ang mga pamilya mahilway sa makadulugmok nga mga lulan sa pinansial​—⁠mataas nga arkila, dalagku nga balayran sa arendo, mataas nga buhis, pagkawalay palamugnan. Ang makalilipay kag makahalangkat nga trabaho bugana. Kag ang tanan may puluy-an. Talupangda kon paano ginapadaku sang tagna sa Isaias 65:​21-23 ining kamatuoran: “Kag magapatindog sila sing mga balay kag puy-an sila . . . Indi sila magpatindog kag iban ang magapuyo; indi sila magtanum kag iban ang magakaon. . . . Ang akon mga pinili magakalipay sing malawig sa binuhatan sang ila mga kamot. Indi sila magpangabudlay sa walay pulos, ukon magpanganak nga sa kalalat-an; kay sila kaliwat sang pinakamaayo ni Jehova, kag ang ila anak upod sa ila.”

Handurawa ang pagpuyo sa isa ka palibot nga wala sing talan-awon, gahod, kag baho sang kagarukan sang siudad! Handurawa ang pagpuyo sa berde nga duta​—⁠imo duta​—⁠nga ginkultibar sing maayo, ginpatahom, gintupong. Handurawa ang paghaklo sing hangin nga matinlo gid kag putli; nagapamati, indi sang magarot nga gahod sang moderno nga sibilisasyon, kundi sang mabugnaw kag natural nga mga tunog. Matuod, ang iban nga mga indibiduwal nagaagom na sang iban sini. Apang sa idalom sang Ginharian sang Dios, ang tanan magaagom sing mahidaiton nga kahimtangan sang pagkabuhi. Wala na sing imol, wala na sing gutom, wala na sing pigado.​—⁠Salmo 72:​13, 14, 16.

Ang Biblia nagasaad sing dugang nga “tuhoy sa mga malaut, sila pagautdon.” (Hulubaton 2:22) Nagakahulugan ina sang pagdula sa krimen. Kon ang imo kinagot magaguwa sa paghampang, indi ka dapat magkabalaka nahanungod sa mga nagaabuso sang bata ukon sa mga kidnapper nga nagapanago sa dulom, mga salakyan nga ang mga tsuper hubog sa bagay nga nagapadalagan sing madasig katama, ukon nagadayandayan nga mga gang sang nayanggaw sa droga nga mga pamatan-on. Ang inyo mga kabataan magahampang nga wala gid sing peligro kag may kalig-onan.

Paghidait kag ang Imo Personal nga Kaayuhan

Sa ulihi, yara ang aspeto nahanungod sa personal nga kaayuhan. Ang mga kahimtangan sa Paraiso indi makapakanay sa kasakit sang kanser ukon sang arthritis. Busa ang matuod nga paghidait nagalakip sang pagdula sa balatian, sakit, kag kamatayon. Posible bala ina? Sang yari diri sa duta, si Jesucristo sulitsulit nga nagpakita sang iya kagamhanan sa mga balatian sang tawo. (Mateo 8:​14-17) Gikan sa iya mataas nga kahimtangan sa langit, si Cristo makasarang sa paghimo sing mga milagro sa bug-os nga duta! “Nian,” saad sang Biblia, “ang mga mata sang mga bulag pamuklaton, kag ang mga igdulungog sang mga bungol mabuksan. Nian ang piang magalumpat subong sang usa, kag ang dila sang apa magaamba.”​—⁠Isaias 33:​24; 35:​5, 6.

Apang, ang kampanya ni Cristo batok sa kabudlayan sang tawo indi magauntat didto. Si apostol Pablo nagapaathag nahanungod sa paghari ni Cristo: “Kay kinahanglan sia maghari tubtob nga mabutang niya ang iya tanan nga kaaway sa idalom sang iya mga tiil. Ang katapusan nga kaaway nga laglagon amo ang kamatayon.” (1 Corinto 15:​25, 26) Nagakahulugan ini sang pagdula sa tanan nga halit nga ginahatag sang kamatayon sa katawhan kutob gid sa ginsuguran. Subong sang ginpaathag mismo ni Jesucristo: “Ang takna magaabot nga ang tanan nga yara sa handumanan nga mga lulubngan magapamati sang tingog [ni Cristo] kag magaguwa.” (Juan 5:​28, 29) Busa ang dimaisip nga minilyon nga nagkabuhi kag napatay sa kapigaduhon may kahigayunan nga makapakigbahin sa nagapakari nga paghidait sa kalibutan.

Magapakigbahin ka bala? Ang mga Saksi ni Jehova nagapalig-on sa inyo nga hibaluon ang dugang pa nahanungod sa kon ano ang ginatudlo sang Biblia nahanungod sini.⁠b Ang paglaum nga paghidait sa kalibutan makalilipay gid katama, matuod gid, agod pasapayanan. Makasalig kamo nga kon manikasog kamo sa pagtuon kag sa pag-aplikar sa Pulong sang Dios, “ang Dios sang paghidait mangin kaupod ninyo”​—⁠sing dayon!​—⁠Filipos 4:⁠9.

[Mga footnote]

[Piktyur sa pahina 5]

Dulaon ni Jehova ang inaway “tubtob sa kaukbungan sang duta”

[Credit Line]

USAF Official Photo

[Piktyur sa pahina 6]

Ang mga bana kag mga asawa pagatudluan sa pagpakig-angot sing mahidaiton sa isa kag isa