Ang Kabuhi kag Ministeryo ni Jesus

Ang Maalam kag Buangbuang nga mga Ulay

GINSABAT ni Jesus ang pangabay sang iya mga apostoles para sa tanda sang iya presensia nga nagagahom sa Ginharian. Karon nagahatag sia sing dugang nga bahin sang tanda sa tatlo ka parabola, ukon mga ilustrasyon.

Ang katumanan sang kada ilustrasyon makita sadtong nagakabuhi sa tion sang iya presensia. Ginsugdan niya ang una paagi sa mga pulong: “Nian ang ginharian sang langit mapaangay sa napulo ka dalaga nga nagdala sang ila mga suga kag nagkadto sa pagsugat sa nobyo. Lima sa ila mga buangbuang, kag lima mga mainandamon.”

Paagi sa ekspresyon nga “ang ginharian sang langit mapaangay sa napulo ka dalaga,” indi buot silingon ni Jesus nga katunga sadtong magapanubli sang langitnon nga Ginharian mga buangbuang kag katunga mga mainandamon! Indi, kundi buot niya silingon nga may kahilabtanan sa Ginharian sang langit, may bahin nga kaangay sini ukon sina, ukon ang butang may kahilabtanan sa Ginharian mangin kaangay sina.

Ang napulo ka dalaga nagalaragway sa tanan nga mga Cristiano nga yara sa linya para sa ukon nga nagaangkon nga yara sa linya para sa langitnon nga Ginharian. Sadto anay sang Pentecostes 33 C.⁠E. nga ang Cristianong kongregasyon ginsaad nga magpakasal sa ginbanhaw kag ginhimaya nga Nobyo, si Jesucristo. Apang ina nga kasal mahanabo sa langit sa wala ginhatag nga ispisipiko nga tion sa palaabuton.

Sa ilustrasyon, ang napulo ka dalaga nagguwa sa pagsugat sa nobyo kag sa pagbuylog sa prosesyon sa kasal. Kon mag-abot sia, sugaan nila ang pagaagihan sang prosesyon paagi sa ila mga suga, busa nagapadungog sa iya samtang ginadala niya ang iya nobya pasulod sa balay nga ginhanda para sa iya. Apang, si Jesus nagapaathag: “Sang nagdala ang mga buangbuang sang ila mga suga, wala sila magdala sing lana, apang ang mga mainandamon nagdala sing lana sa ila mga tibudtibud pati sang ila mga suga. Karon sang naglantang ang nobyo, tanan sila gintuyo kag nagtulog.”

Ang madugay nga pagpalantang sang nobyo nagapakita nga ang presensia ni Cristo subong nagagahom nga Hari yara pa sa malayo nga palaabuton. Sang ulihi naglingkod sia sa iya trono sang tuig 1914. Sa sulod sang malawig nga kagab-ihon antes sina, ang tanan nga dalaga natulogan. Apang wala sila pagkondenaha bangod sini. Ginkondenar ang buangbuang nga mga dalaga bangod wala sila magdala sing lana sa ila mga tibudtibud. Si Jesus nagapaathag kon paano nagbangon ang mga dalaga sa wala pa mag-abot ang nobyo:

“Sa tunga sang kagab-ihon may isa ka sininggit, ‘Yari karon ang nobyo! Guwa kamo sa pagsugat sa iya.’ Nian tanan yadtong dalaga nagbangon kag nag-aman sang ila mga suga. Kag ang mga buangbuang nagsiling sa mga mainandamon, ‘Hatagi kami sang inyo lana, kay nagakapalong ang amon mga suga.’ Apang ang mga mainandamon nagsabat, ‘Basi indi ini mag-igo sa amon kag sa inyo. Maayo pa magkadto kamo sa mga nagabaligya kag magbakal nga sa inyo kaugalingon.’ ”

Ang lana nagasimbulo sa butang nga nagahupot sa matuod nga mga Cristiano nga nagasiga subong mga sulu, nga amo, ang inspirado nga Pulong sang Dios, diin nagapanguyat sila sing hugot, upod ang balaan nga espiritu, nga nagabulig sa paghangop sa sina nga Pulong. Ang espirituwal nga lana nagapaposible sa mainandamon nga mga ulay nga makaiwag sing kapawa sa pagsugat sa nobya sa tion sang prosesyon pakadto sa sinalusalo sa kasal. Apang ang buangbuang nga ulay nga klase wala sing espirituwal nga lana sa ila kaugalingon, sa ila mga tibudtibud. Gani ginasaysay ni Jesus ang natabo:

“Kag sang nagkadto [ang buangbuang nga mga dalaga] sa pagbakal [sing lana], nag-abot ang nobyo, kag ang mga handa nga dalaga nagsulod upod sa iya sa sinalusalo sang kasal; kag gintakup ang ganhaan. Ugaling nag-abot man ang iban nga mga dalaga, nga nagasiling, ‘Ginuo, Ginuo, buksi kami!’ Apang nagsabat sia, ‘Sa pagkamatuod nagasiling ako sa inyo, wala ako makakilala sa inyo.’ ”

Sang nag-abot si Cristo sa iya langitnon nga Ginharian, ang mainandamon nga ulay nga klase sang matuod nga hinaplas nga mga Cristiano nagbugtaw sa ila pribilehiyo nga mag-iwag sing suga sa sining nadulman nga kalibutan bilang pagdayaw sa nagbalik nga Nobyo. Apang ang nagalaragway sa buangbuang nga mga ulay wala makahanda sa paghatag sining nagaabiabi nga pagdayaw. Gani sang nag-abot ang tion, wala ginbuksan ni Cristo sa ila ang ganhaan sa sinalusalo sang kasal sa langit. Ginbilin niya sila sa guwa sang kadudulman sang kagab-ihon sang kalibutan, agod mapatay kaupod sang tanan iban pa nga nagahimo sing malain. “Busa bantay kamo,” hinakop ni Jesus, “kay wala kamo makahibalo sang adlaw ukon sang takna.” Mateo 25:​1-13.

◆ Sin-o ang ginasimbulo sang napulo ka dalaga?

◆ San-o ginhimo ang saad sa pagpakasal sa nobyo, apang san-o sia nag-abot agod dalhon ang iya nobya sa sinalusalo sa kasal?

◆ Ano ang ginarepresentar sang lana, kag ano ang posible nga nahimo sang mainandamon nga mga ulay bangod sang pagpanag-iya sini?

◆ Diin natabo ang sinalusalo sa kasal?

◆ Anong makalilipay nga padya ang nawasi sang buangbuang nga mga dalaga, kag ano ang nadangtan nila?