“Magtindog nga Malig-on”—Indi Masandad
ANG pinakadaku nga isyu nga ginaatubang sang katawhan karon amo ang nahanungod sa pagkasoberano sa bug-os nga uniberso. Ginaagda kita ni Jehova sa paghimo sing tindog kag maisip sa sini paagi sa pagpasakop sa iya gintangdo nga Hari, nga si Cristo Jesus. May yara madagmit nga kinahanglanon nga batunon ang iya imbitasyon, kag sa sulod lamang sang lima ka tuig, kapin sa isa ka milyon ka indibiduwal ang naghimo sina. Apang natukiban nila nga labi ang nadalahig sa pagkuha sing tindog sang sa isa lamang ka tion nga desisyon nga alagaron si Jehova. Kinahanglan ang bug-os kabuhi nga dedikasyon. Huptan bala naton ang aton tindog kon may kabudlayan? Ukon amat-amat bala kita nga magaluya, sa tapos nga ‘makatindog sing malig-on’ primero?—1 Corinto 16:13; Hebreo 2:1.
Kon natukiban mo nga indi mahapos ang Cristianong dalanon, malipay ka sa paghibalo nga amo man si Jesucristo. Huo, bisan ang bugtong nga Anak sang Dios nangayo sing kusog agod huptan ang iya tindog, labi na sang ang pinakadaku nga pagtilaw nagahilapit. Handurawa sia sa katamnan sang Getsemane, nga nagapangamuyo sing hanuot: “Abba, Amay, ang tanan nga butang mahimo sa imo; ipahilayo sa akon ining tagayan. Apang indi suno sa buot ko, kundi sa buot mo.” (Marcos 14:36) Nahibaluan niya nga ang dalanon sa unahan mabudlay. Nakahibalo gid sia nga maapektuhan ang ngalan sang iya Amay. Gani, ang lamang nga himpit nga tawo sa duta wala mahuya mangayo sing bulig.
Kon mangin mabudlay para sa aton ang tanan, ang aton tuburan sang kusog pareho man sang kay Jesus. Sarang kita makapangayo sing bulig kay Jehova sa pangamuyo agod indi kita masandad ukon mapukan. Apang ano nga sahi sang mga katalagman ang magapasandad sa aton? Ang paghibalo sini kag paghanda sing abanse mahimo nga makabulig sa aton nga malikawan ang pagkasandad.
Ang Paghingabot Magapasandad sa Aton
Ang Biblia nagapaandam: “Ang tanan nga buot magkabuhi nga may diosnon nga debosyon kay Cristo Jesus pagahingabuton man.” (2 Timoteo 3:12) Ang paghingabot mahimo nga magapasandad sa aton, kag nagaabot ini sa madamo nga dagway. (Marcos 4:17) Mahimo nga ini legal nga mga pagdumili—nagadala sang katalagman nga mabilanggo kag mapatay pa—kasingki sang guban, nagapaluya sing pagtuo nga pagpamatok sa adlaw-adlaw sang isa ka determinado, nagasupak nga tiayon, ukon dalayon nga pagyaguta sang mga kabutho.
Ang paghingabot mabudlay batason, apang ginpaandaman kita nga mahanabo ini sa lainlain nga dagway. Gani, sarang naton mapalig-on ang aton pagtuo karon kag maton-an ang pagsalig sa kusog ni Jehova agod nga kon magaabot ang tion, makabatas kita bangod sina nga kusog. (1 Pedro 4:13, 14; 5:6-11) Apang, ang mga kasandaran masami nga mas malimbungon sang sa malaut nga pagsalakay sang paghingabot.
Ang mga Kapaslawan Makapaluya sang Pagtuo
Sin-o ang wala makadumdom sang masubo nga balatyagon nga natabo sang mga bata pa kita kag nagbatyag nga napaslawan? Madumduman mo bala ang tion sang nagsaad si Daddy nga ilagaw ukon pakaunon sa guwa ang pamilya apang sang ulihi bangod sang pila ka rason nagbag-o ang iya pensar? Ukon ang tion nga dalhon ka niya kuntani sa zoo apang sang manuglakat na ginkansela niya ini? Daku gid ang imo kapaslawan!
Ang hamtong nga Cristiano mahimo man mapaslawan, kag ini sa pila ka hitabo nagadul-ong sa espirituwal nga kapahamakan. Ginpahamtang sang iban ang ila paglaum sa isa ka petsa nga sigurado gid sila nga magaabot ang Armagedon. Sang wala sing natabo sa sina nga adlaw, nagbatyag sila sing kapaslawan. Ang iban napaslawan sang ang ginalauman nga pribilehiyo wala matigayon. Dugang pa, ang mga tawo sarang mangin makapalaslaw. Ang isa ka 18-anyos nga dalagita nagsiling sa iya mga ginikanan nga napaslawan gid sia sa pagginawi sang iban nga mga soltero sa kongregasyon—kag sa indi pagdisiplina sa ila sang ila mga ginikanan—amo kon ngaa indi na niya luyag ang kamatuoran.
Bisan pa ang kapaslawan halangpunon sa idalom sining tanan nga sirkunstansia, dapat bala masandad ang mga napaslawan sa ila kaangtanan kay Jehova? Handurawa ang kapaslawan ni Jesus sang ang iya mga apostoles nagpadayon sa pagbaisay kon sin-o ang pinakadaku sa tunga nila, busa nagapakita sing ambisyuso nga panimuot. (Lucas 9:46; 22:24) Handurawa man ang kapaslawan ni Job sang ang tatlo niya ka abyan nga magabulig kuntani sa iya nagbasol sa iya kag nagduhaduha sang iya katutom! (Job 22:5-10) Apang, si Jesus kag si Job wala nasandad.
Ang tanan nga tawo maluya, gani mangin dimakatarunganon ang pahanugutan ang kapaslawan sang iban nga makaapektar sang aton kaangtanan kay Jehova. (Salmo 51:5) Ang pagkadihimpit sang iban indi dapat magbulag sa aton sa makatilingala nga binuhatan nga ginahimo ni Jehova samtang ginatipon niya “ang tanan nga butang liwat kay Cristo.” (Efeso 1:9, 10) Dumduma nga ang ginatipon ni Jehova amo ang dihimpit, makasasala nga mga tawo kaangay naton, mga tawo nga nagakinahanglan sing disiplina kag pagputli agod mangin mabakud. (Salmo 130:3) Indi ang aton dihimpit nga Cristianong utod ang aton kaaway kundi si Satanas, nga luyag maglamon sa aton kon masarangan niya. Indi sia magamadinalag-on kon kita ‘magasumpong sa iya, magapangalig-on sa pagtuo.’ (1 Pedro 5:8, 9) Kon kita may amo sina nga pagtuo, indi gid kita ‘mapaslawan.’—Roma 9:33.
Ang Pagkondenar sa Kaugalingon Makapaluya
Nawasi sang iban ang ila kaangtanan kay Jehova nga Dios bangod sang balatyagon nga ditakus. Nakahibalo sang ila kaugalingon nga mga kaluyahon kag mga kakulangan, naghinakop sila nga indi gid pagbatunon ni Jehova ang ila pag-alagad. Nagabatyag sila nga para sa isa nga kaangay nila ang mag-angkon nga isa ka Saksi ni Jehova salimpapaw lamang. Kaangay bala sina ang pagtamod mo sa imo kaugalingon? Kon amo, dapat mo awayon ina nga balatyagon.
Nagabatyag ka bala nga ditakus sa pag-alagad kay Jehova? Nian pamangkota ang imo kaugalingon, ‘Sin-o ang takus sa sining daku nga pribilehiyo?’ Ang tanan nga mga Cristiano padayon nga nagapakig-away sa ila mga pagkadihimpit. Bisan si apostol Pablo nagyamo: “Kon luyag ko maghimo sing maayo, ang malaut malapit gid.” (Roma 7:21) Salimpapaw bala si Pablo bangod ginahimo niya kon kaisa ang sayop? Indi. Ang salimpapaw amo ang isa nga nagapakunokuno sa kon ano ang indi sia. Kon ginapanikasugan naton nga himuon ang maayo apang nagasala kon kaisa bangod sang aton kaugalingon, pagpakunokuno bala ina? Indi gid.
Ang Biblia nagalaygay sa aton nga “isuklob ang bag-ong personalidad.” (Efeso 4:24) Apang, nagakahulugan bala ina nga nadula naton ang tanan nga batasan sang daan nga personalidad? Indi. Sa iya sulat sa mga taga-Colosas, si Pablo nagsiling nga ang bag-ong personaligad “ginbag-o” suno sa sibu nga ihibalo. (Colosas 3:9, 10) Ang ekspresyon nga “ginbag-o” nagapakita sing padayon nga buhat. Gani ang pagbalhin sang aton personalidad isa ka padayon nga proseso. Indi makakilibot, nian, nga kon kaisa natukiban naton ang mga sayop sa aton kaugalingon.
Sa pagkamatuod, indi ini pagpakadiutay sa pagkaserioso sang sala, ukon nga nagakahulugan ini nga sarang kita magpadala sa pagsulay nga wala nagapakig-away, nagapaabot nga si Jehova awtomatiko nga magapatawad sa aton. Apang nagabulig ini sa aton nga indi mangin dimakatarunganon nga mamulayon sa kaugalingon. Kag nagahimo ini sa aton nga higugmaon si Jehova sing labi pa bangod gin-aman niya ang halad gawad ni Cristo agod maalagad naton Sia walay sapayan sang aton kinaugali nga pagkamakasasala.
Si apostol Juan naghatag sing balanse nga pagtamod sa bagay sang nagsiling sia: “Nagasulat ako sa inyo sini agod nga indi kamo makasala.” Apang nian nagdugang sia sing realistiko: “Apang, kon ang bisan sin-o makasala [bangod sang tawhanon nga pagkadihimpit], may mananabang kita upod sa Amay, si Jesucristo.” (1 Juan 2:1) Sa baylo nga kondehanon sing sobra ang kaugalingon, ini nga paghangop sa aton kahimtangan kag ang bulig nga ginahatag ni Jehova nagatiklod sa aton nga ipalanog ang pinamulong ni Pablo: “Nagapasalamat ako sa Dios paagi kay Jesucristo nga aton Ginuo!”—Roma 7:25.
Indi Magpabilin nga Nasandad
Si Jesus naghatag sing matigdas nga paandam sa isa nga mahimo mangin kabangdanan sang pagkasandad: “Ang bisan sin-o nga nagapasandad sa isa sining mga magamay nga nagatuo sa akon, maayo pa sa iya nga bitayan sa liog sing daku nga bato sang galingan kag itunod sia sa kadadalman sang dagat.” (Mateo 18:6) Apang kamusta ang isa nga nasandad? Kon nasandad kita sang iban ukon sang pila ka kahimtangan, mapasaylo bala naton ang aton kaugalingon kag magsiling, “Ti, indi ini akon sala, gani indi na ako magaalagad kay Jehova”?
Binagbinaga ang isa ka ilustrasyon. Nadalin-as ka na bala sa isa ka diutay nga yelo ukon nadalin-as sa hagdan? Ayhan nakibot ka sa natabo. Halangpunon nga natumba ka sa duta. Apang ano ang ginhimo mo pagkatapos? Nagsiling ka bala: “Indi akon sala nga natumba ako diri. Ang yelo [ukon hagdan] ang balasulon. Gani indi na ako magtindog liwat?” Sing nagakaigo, magatindog ka kag magalakat gilayon palayo sa sina nga lugar.
Indi bala nga amo man sina sa espirituwal nga mga butang? Kon naakig kita sa isa ka sirkunstansia ukon sa isa ka masigka Cristiano, isa ina ka mabug-at nga problema nga dapat lubaron. Apang, kon magpabilin kita nga nasandad, nagapamilit nga basulon ang iban sa problema, indi bala nga labi pa gid nga nangin sala naton ang natabo?
Sing makalilipay, kon kita nasandad, ang mga gulang kag ang iban pa nga mga hamtong sa kongregasyon handa sa pagbulig. (Galacia 6:1) Kag si Jehova mismo nagahatag sing kusog sa mga maluyag mag-alagad sa iya walay sapayan sang mga kabudlayan. (Filipos 4:13) Gani dapat kita pirme mangin handa sa pagpangabay sing bulig kon may butang nga nagasablag sa aton malig-on nga tindog para kay Jehova kag sa iya Ginharian. Nian wala naton ginahatagan si Satanas sing kadalag-an paagi sa pagkasandad kag pagpabilin nga nasandad.
Sa Diin Ka Nagatindog?
Kada adlaw, ang dedikado nga mga alagad sang Dios nagaatubang sing mga isyu nga nagatilaw sang ila debosyon kay Jehova. Bisan ano man ang ila atubangon, dapat sila magtindog kag maisip nga dampig sa Mesianikong Ginharian ni Jehova. Ang gamhanan nga mga gumalahom sining duta nagkuha sang tindog “batok kay Jehova kag batok sa iya hinaplas.” Daw ano nga pribilehiyo nga kinahanglan kita magtindog para sa iya.—Salmo 2:2.
Apang, indi kita makatindog batok sa impluensia sining bug-os nga sistema sang kalibutan sing kinaugalingon lamang, gani nalipay kita sa saad ni Jesus nga mangin kaupod sang iya kongregasyon “tubtob sa konklusion sang sistema sang mga butang.” (Mateo 28:20) Suportahan kita niya. Dugang pa, nagaabot ang daku nga bulig kon magpabilin kita nga suod kay Jehova kag mangabay sing suporta gikan sa iya. Ang pagdangop sa iya Pulong makahatag sa aton sing kusog. Kon nagabatyag kita nga indi makasarang sa pagbatas, ang Salmo 55:22 nagaagda sa aton nga ‘itugyan ang aton lulan kay Jehova mismo, kag sia mismo magaalay-ay sa aton. Indi gid niya pagtugutan ang matarong nga malingkag.’ Huo, ang Biblia nagalaygay sa tanan nga katawhan sang Dios nga “magtindog sing malig-on sa kamatuoran”—kag indi masandad.—1 Corinto 16:13.