Ang Kabuhi kag Ministeryo ni Jesus
Pagkamapainubuson sa Katapusan nga Paskwa
SANDAY Pedro kag Juan, sa sugo ni Jesus, nag-abot na sa Jerusalem agod maghanda para sa Paskwa. Si Jesus, ayhan upod sa napulo pa ka apostoles, nag-abot sang ulihi sang hapon. Ang adlaw nagatunod sang si Jesus kag ang iya kaupdanan nagpanaug sa Bukid sang mga Olibo kag nagtabok sa Nalupyakan sang Kidron. Amo ini ang katapusan nga pagtan-aw ni Jesus sa siudad sa adlaw tubtob sang ginbanhaw sia.
Sang ulihi si Jesus kag ang iya kaupdanan nag-abot sa siudad kag nagkadto sa puluy-an diin saulugon nila ang Paskwa. Nagsaka sila sa hagdanan pakadto sa hulot sa ibabaw, diin nakita nila ang tanan nga paghanda para sa ila pribado nga pagsaulog sang Paskwa. Madugay na nga ginhulat ni Jesus ini nga okasyon, subong sang ginsiling niya: “Ginhandum ko sing hanuot gid ang pagkaon sining paskwa kaupod ninyo sa wala pa ako mag-antos.”
Sing batasan, apat ka tagayan sang alak ang ginainum sang mga nagasaulog sang Paskwa. Sang nabaton ang ayhan ikatlo nga tagayan, si Jesus nagpasalamat kag nagsiling: “Kuhaa ninyo ini kag bahinbahinon sa inyo; kay nagasiling ako sa inyo, Kutob karon indi na ako mag-inum sang bunga sang ubas tubtob nga mag-abot ang ginharian sang Dios.”
Samtang nagakaon, si Jesus nagtindog, ginhal-id ang iya kunup, nagkuha sing inugpamahid, kag ginpuno sing tubig ang batiya. Sing kinaandan, dapat siguruhon sang tagbalay nga ang tiil sang bisita nahinawan. Apang bangod wala sing tagbalay sa sini nga okasyon, si Jesus amo ang naghimo sining personal nga pag-alagad. Mahimo kuntani nga ginhimo ini sang isa sa mga apostoles; apang, bangod kay yara gihapon ang pagpaindisanay sa tunga nila, wala sing naghimo sini. Karon nahuya sila samtang ginahinawan ni Jesus ang ila mga tiil.
Sang nagpalapit sa iya si Jesus, si Pedro nagprotesta: “Dili ka gid maghinaw sang akon mga tiil.”
“Kon indi ako maghinaw sa imo, wala ikaw sing bahin sa akon,” siling ni Jesus.
“Ginuo,” sabat ni Pedro, “indi ang akon mga tiil lamang, kundi ang akon mga kamot kag ulo man.”
“Ang nakapaligos,” sabat ni Jesus, “indi kinahanglan magpanghinaw, kay matinlo sia sing bug-os. Kag kamo matinlo, apang indi tanan kamo.” Nasiling niya ina bangod nahibaluan niya nga si Judas Iscariote nagaplano sa pagluib sa iya.
Sang nahinawan ni Jesus ang tiil sang tanan nga 12, lakip ang tiil sang magaluib sa iya, nga si Judas, ginsuklub niya ang iya mga kunup kag naglingkod liwat sa latok. Nian namangkot sia: “Nakahangop bala kamo sang nahimo ko sa inyo? Kamo nagatawag sa akon, ‘Manunudlo,’ kag ‘Ginuo,’ kag husto ang ginasiling ninyo, kay amo ako. Nian kon ako, ang Ginuo kag Manunudlo ninyo, naghinaw sang inyo mga tiil, kamo man dapat maghinaway sang inyo mga tiil. Kay naghatag ako sa inyo sing sulundan, agod nga kamo man maghimo suno sa nahimo ko sa inyo. Sa pagkamatuod, sa pagkamatuod nagasiling ako sa inyo, Ang ulipon indi daku pa sa iya agalon, ukon ang ginpadala daku pa sa nagpadala sa iya. Kon nakahibalo kamo sining mga butang, malipayon kamo kon ginahimo ninyo sila.”
Daw ano katahom nga leksion sang mapainubuson nga pag-alagad! Ang mga apostoles indi dapat magtinguha sang nahauna nga lugar, nagahunahuna nga importante gid sila katama sa bagay nga ang iban dapat mag-alagad sa ila. Dapat nila sundon ang sulundan nga ginhatag ni Jesus. Indi ini isa ka ritwal nga paghinaw sang tiil. Indi, kundi kinabubut-on ini nga pag-alagad nga wala sing ginadampigan, bisan pa kon daw ano kanubo ukon dimaayo ang hilikuton. Mateo 26:20, 21; Marcos 14:17, 18; Lucas 22:14-18; 7:44; Juan 13:1-17.
◆ Ano ang pinasahi nahanungod sa pagtan-aw ni Jesus sa Jerusalem samtang nagapasulod sia sa pagsaulog sang Paskwa?
◆ Sa tion sang Paskwa, anong tagayan na ang napasa ni Jesus sa 12 ka apostol sa tapos naghatag sing pasalamat?
◆ Anong personal nga pag-alagad ang kinaandan nga ginahimo sa mga bisita sang yari si Jesus sa duta, kag ngaa wala ini ginhimo sang ginsaulog ni Jesus kag sang mga apostoles ang Paskwa?
◆ Ano ang tuyo ni Jesus sang ginhimo niya ang manubo nga pag-alagad tuhoy sa paghinaw sa mga tiil sang mga apostoles?