Ang Kabuhi kag Ministeryo ni Jesus
Isa ka Binais ang Nag-utwas
SANG kasisidmon, si Jesus nagtudlo sing matahom nga leksion sang mapainubuson nga pag-alagad paagi sa paghinaw sang mga tiil sang iya mga apostoles. Pagkatapos, ginsugdan niya ang Memoryal sang iya nagahilapit nga kamatayon. Karon, labi na bangod sang bag-o lang natabo, isa ka makakilibot nga insidente ang natabo. Ang iya mga apostoles mainit nga nagbaisay sa kon sin-o sa ila ang labing daku! Ayhan, bahin ini sang nagaluntad na nga baisay.
Dumduma nga sa tapos si Jesus nagbaylo-dagway sa bukid, ang mga apostoles nagbaisay sa kon sin-o sa ila ang labing daku. Dugang pa, si Santiago kag si Juan nangabay sing prominente nga posisyon sa Ginharian, nga nagdul-ong sa dugang nga pagbaisay sa tunga sang mga apostoles. Karon, sa iya katapusan nga gab-i kaupod nila, daku gid nga kasubo kay Jesus ang makita sila nga nagakamog liwat! Ano ang ginhimo niya?
Sa baylo nga akigan ang mga apostoles bangod sang ila gingawi, sa liwat si Jesus mapailubon nga nangatarungan upod sa ila: “Ang mga hari sang mga pungsod nagapakaginuo sa ila, kag ang mga may pagbulut-an sa ila ginatawag nga mga Manughimo sang Maayo. Apang, indi kamo subong sina. . . . Kay sin-o bala ang daku pa, ang nagalingkod sa pagkaon ukon ang nagaalagad? Indi bala ang nagalingkod sa pagkaon?” Nian, nagapahanumdom sa ila sang iya halimbawa, sia nagsiling: “Apang ako yari sa tunga ninyo subong sang nagaalagad.”
Walay sapayan sang ila pagkadihimpit, ang mga apostoles nagpabilin nga kaupod ni Jesus sa tion sang iya mga pagtilaw. Gani sia nagsiling: “Nakigkatipan ako sa inyo, subong nga ang akon Amay nakigkatipan sa akon, sing ginharian.” Ining personal nga katipan sa ulot ni Jesus kag sang iya matutom nga mga sumulunod nagbuylog sa ila sa iya agod makigbahin sa iya harianon nga paggahom. Limitado lamang nga kadamuon nga 144,000 ang gindala sang ulihi sa sini nga katipan para sa isa ka Ginharian.
Bisan pa ang mga apostoles gintanyagan sining matahom nga palaabuton sang pagpakig-upod kay Cristo sa paggahom sa Ginharian, sa karon sila maluya sa espirituwal. “Tanan kamo masandad sa akon karon nga gab-i,” siling ni Jesus. Nagasiling kay Pedro nga nangamuyo Sia tungod sa iya, si Jesus naglaygay: “Kon ikaw magliso liwat, palig-ona ang imo mga kauturan.”
“Mga anak,” paathag ni Jesus, “sa diutay pa nga tion kaupod ako ninyo. Kamo magapangita sa akon; kag suno sa ginsiling ko sa mga Judiyo gani karon ginasiling ko sa inyo, ‘Kon diin ako makadto indi kamo makakadto.’ Ako nagahatag sa inyo sing bag-ong sugo, nga maghigugmaanay kamo; subong nga ako naghigugma sa inyo, nga kamo man maghigugmaanay. Sa sini ang tanan nga tawo makahibalo nga kamo mga gintoton-an ko, kon maghigugmaanay kamo.”
“Ginuo, diin bala ikaw makadto?” pamangkot ni Pedro.
“Kon diin ako makadto indi ka makasunod sa akon karon,” sabat ni Jesus, “apang magasunod ka ugaling.”
“Ginuo, ngaa bala indi ako makasunod sa imo karon gid?” luyag mahibaluan ni Pedro. “Ihatag ko ang akon kabuhi tungod sa imo.”
“Ihatag mo bala ang imo kabuhi tungod sa akon?” pamangkot ni Jesus. “Sa pagkamatuod nagasiling ako sa imo, sa Imo karon nga adlaw, huo, karon nga gab-i, sa wala pa makapamalo ang manok sing makaduha, ipanghiwala mo ako sing makatlo.”
“Bisan kinahanglan ako mapatay upod sa imo,” protesta ni Pedro, “indi ko ikaw pag-ipanghiwala.” Kag samtang ang iban nga mga apostoles nagbuylog sa pagsiling sing amo man, si Pedro nagtikal: “Kon ang tanan masandad sa imo, ako indi gid masandad!”
Nagapatuhoy sa tion nga ginpadala niya ang mga apostoles sa pagbantala nga paglakbay sa Galilea nga walay puyopuyo kag balalonan sang pagkaon, si Jesus namangkot: “Nakulangan bala kamo sing bisan anong butang?”
“Wala!” sabat nila.
“Apang karon ang may puyopuyo dalhon niya ini, kag subong man ang balalonan,” siling niya, “kag ang wala sing espada ibaligya niya ang iya kunup kag ibakal sini. Kay nagasiling ako sa inyo nga ining nasulat dapat matuman sa akon, ‘Kag naisipan sia upod sa mga malinapason.’ Kay ang nasulat nahanungod sa akon may katumanan.”
Ginatudlo ni Jesus ang tion nga ilansang sia kaupod sa mga malauton, ukon sa mga malinapason. Ginapakita man niya nga pagkatapos sina ang iya mga sumulunod magaatubang sing makusog nga paghingabot. “Ginuo, tan-awa! yaring duha ka espada,” siling nila.
“Tuman na,” sabat niya. Subong sang makita naton, paagi sa pagdala sing mga espada magapahanugot ini kay Jesus sa indi madugay sa pagtudlo sang isa pa ka importante nga leksion. Mateo 26:31-35; Marcos 14:27-31; Lucas 22:24-38; Juan 13:31-38; Bugna 14:1-3.
◆ Ngaa makakilibot gid ang binais sang mga apostoles?
◆ Paano ginlubad ni Jesus ang binais?
◆ Ano ang nahimo sang katipan nga ginhimo ni Jesus sa iya mga gintoton-an?
◆ Anong bag-o nga sugo ang ginhatag ni Jesus, kag daw ano ini ka importante?
◆ Anong sobra nga pagsalig ang ginpakita ni Pedro, kag ano ang ginsiling ni Jesus?
◆ Ngaa ang mga instruksion ni Jesus nahanungod sa pagdala sing puyopuyo kag balalonan tuhay sa ginhatag niya primero?