Makasapo Ka sing Manggad nga Bilidhon Pa sa Bulawan!
ANG mga kamatuoran sa Biblia mahimo mapaanggid sa bulawan, pilak, ukon iban pa nga mga bahandi nga natago. Bisan wala ka pa nakapangita sing literal nga bulawan ukon pilak, ayhan narealisar mo nga ang paghimo sini nagakinahanglan sing lakas nga pagpangabudlay kag pagpersister. Kag masunson nga ang nagapangita nagakapaslawan.
Apang, ina nga kapaslawan indi gid matigayon kon nagapangita ka sing mga bahandi nga natago sa Biblia. Talupangda ining makapalig-on nga garantiya: “Kon padayon mo nga pangitaon sia subong sang pilak, kag padayon nga mag-usisa sa iya subong sang mga bahandi nga natago, nian mahangop mo ang kahadlok ni Jehova, kag makita mo ang ihibalo sang Dios.” (Hulubaton 2:4, 5) Apang dapat ka magpangita.
“Usisaa kag Makita Mo”
“Usisaa kag makita mo nga walay manalagna nga nagalutaw sa Galilea.” Amo sini ang ginlaygay sang iban nga Judiyong mga Fariseo sadtong unang siglo kay Nicodemo, nga isa man ka Fariseo. “Usisaa kag makita mo.” Maayo gid nga laygay. Posible usisaon kag makita ang kamatuoran—butang nga bilidhon pa sa bulawan.
Apang, sa sinang partikular nga hitabo, ang mga naghatag sing laygay nga “usisaa kag makita mo” wala nagpanghikot sing nagakaigo. Paano?
Ang puno nga mga saserdote kag mga Fariseo nagpadala sing mga opisyal sa pagdakop kay Jesucristo. Nahayanghag katama sa iya paagi sa pagpanudlo, ang mga opisyal nagbalik nga indi sia dala. Gani, ginpamangkot sila sang mga Fariseo: “Ginpatalang man bala kamo?” Si Nicodemo nagsaligbat kag nagsiling: “Nagahukom bala sa tawo ang aton kasuguan kon indi sia anay pagpamatian kag mahibaluan ang iya ginahimo?” Ini nga pinamulong nagdul-ong sa laygay nga “usisaa kag makita mo.”—Juan 7:32, 45-52.
Paano napaslawan ang mga saserdote kag mga Fariseo? Wala sila makahibalo ukon nagbaton nga bisan si Jesus nagdaku sa Galilea, natawo sia sa Betlehem. Si manalagna Miqueas nagtagna: “Gikan sa imo [Betlehem] magaguwa sa akon ang isa nga mangin manugdumala sang Israel.” (Miqueas 5:2) Gani yadtong nagapamuno nga mga lalaki wala nag-usisa kag nakakita sang mga kredensiyal ni Jesus subong isa ka manalagna, isa nga mangin manugdumala sang Israel. Nagdul-ong ini sa masubo nga mga resulta, kag nagailustrar ini sa kon daw ano ka importante ang usisaon kag hibaluon ang bug-os nga kamatuoran nahanungod sini. Apang paano masunson nga ginatamod ang kamatuoran?
Ang Kamatuoran Ginsimbugan
“Ang putli nga kamatuoran, kaangay sang puro nga bulawan, natukiban nga indi nagakaigo isirkular, bangod natukiban sang mga tawo nga labi ka kombeniente nga simbugan ang kamatuoran sang sa putlion ang ila kaugalingon,” siling sang isa ka 19-siglo nga manunulat. Matuod gihapon ining mga pulong sa relihion sang kalibutan! Sa likod sining pagsimbog sang kamatuoran amo ang “amay sang kabutigan,” si Satanas nga Yawa. (Juan 8:44; Bugna 12:9) Ginagamit niya ang dimatuod nga relihion sa pagsimbog sa matuod nga mga panudlo nahanungod sa importante nga mga pamangkot subong sini: Sin-o ang Dios? Ano ang kaangtanan ni Jesus sa iya? Ano ang destinasyon sang duta kag katawhan?
Gin-usisa kuntani kag natukiban sang mga saserdote kag mga Fariseo ang kamatuoran. Nakita kuntani nila ang mga manggad nga bilidhon pa sa bulawan. Huo, nahibaluan kuntani nila ang bug-os nga kamatuoran nahanungod kay Jesus paagi sa ‘pagpamati sa iya kag sa paghibalo kon ano ang ginahimo niya,’ subong sang ginpanugda ni Nicodemo. Kon sinsero sila sa paghimo sini, walay duhaduha nga kuntani ginpaathag ini sa ila ni Jesus, subong sang ginhimo niya sa mga disipulo. (Marcos 4:34) Apang diin naton makita ang putli nga kamatuoran karon? Sa pagkamatuod, may garantiya bala nga makita naton sing madinalag-on kag mahangpan ang matuod nga kamatuoran?
[Piktyur sa pahina 4]
Nahibaluan kuntani sang relihioso nga mga lider ang bug-os nga kamatuoran nahanungod kay Jesus paagi sa ‘pagpamati sa iya’