Pat-od ang Paghiusa Paagi kay Cristo

Importante nga mga Punto Gikan sa Mga Taga-Efeso

SANG temprano sang 52 C.E., si apostol Pablo nagwali sa Efeso. Ining manggaranon komersial nga siudad sang Asia Minor sentro man sang dimatuod nga relihion. Apang ang Cristianismo nag-uswag didto sa tapos nagbalik si Pablo sa Efeso, ayhan sang tigtulugnaw sang 52/53 C.E. Naghatag sia sing adlaw-adlaw nga mga pamulongpulong sa awditoryum sang isa ka eskwelahan kag nagpanaksi sa pamalaybalay sa pagtener niya didto sing mga tatlo ka tuig.​—⁠Binuhatan 19:​8-10; 20:​20, 21, 31.

Sang nabilanggo sa Roma sang mga 60-61 C.E., si Pablo nagsulat sa mga Cristiano sa Efeso. Ang tema sang iya sulat amo ang paghiusa upod kag paagi kay Jesucristo. Sa katunayan, nagaunod ini sing 13 ka pagsambit sa ‘paghiusa kay Cristo,’ mas madamo sang sa iban pa nga sulat ni Pablo. Kaangay sang mga taga-Efeso, makabenepisyo kita gikan sa mga pulong ni Pablo nahanungod sa papel ni Cristo, paglikaw sa imoralidad kag pagbatu sa malaut espirituhanon nga mga kusog.

Ang Paghiusa Amo ang Katuyuan sang Dios

Una, ginpaathag ni Pablo kon paano ipaluntad sang Dios ang paghiusa paagi kay Cristo. (1:​1-23) Tuyo ni Jehova nga tipunon liwat sing tingob ang tanan nga butang sa langit kag sa duta paagi sa “isa ka administrasyon” (isa ka paagi sa pagdumala sang mga hilikuton). Paagi kay Cristo, ang Dios magahiusa sang iya kaugalingon sa mga pinili para sa langitnon nga kabuhi kag sa iban nga magapuyo sa duta. Sa karon, ginhiusa sang Dios ang mga hinaplas kag ang “dakung kadam-an,” kag ‘ang pagtipon sa tanan nga butang sa duta’ magapadayon tubtob yadtong sa handumanan nga lulubngan makabati sang tingog ni Jesus kag magaguwa. (Bugna 7:9; Juan 5:​28, 29) Dapat kita magpasalamat tungod sini, subong sang ginpangamuyo ni Pablo nga ang mga taga-Efeso magaapresyar kuntani sang aman sang Dios para sa ila.

Masunod nga ginpatuhoy ang igtalupangod sa Gentil nga mga Cristiano, nga mga patay anay sa sala. (2:1–3:21) Paagi kay Cristo, ang Kasuguan gindula kag ang sadsaran ginpahamtang agod mahiusa ang mga Judiyo kag mga Gentil kag mangin isa ka templo para puy-an sang Dios sa espiritu. Ang pagkamanug-alagad ni Pablo amo ang pagpahibalo sa balaan nga tinago nga ang mga Gentil mahiusa upod kay Cristo, nga paagi sa ila makapalapit sila sa Dios upod ang kahilwayan sa paghambal. Sa liwat nangamuyo si Pablo para sa mga taga-Efeso, sini nga tion nagapangabay nga pabakuron sila sing malig-on ni Jehova sa pagtuo kag ­gugma.

Mga Butang nga Nagapauswag sang Paghiusa

Ginpakita ni Pablo nga ang Dios naghatag sing nagahiusa nga mga butang. (4:​1-16) Ang isa sini amo ang isa ka espirituwal nga hubon nga amo ang kongregasyon. Ini nga hubon nagapanghikot nga nahiusa sa idalom sang pagkaulo ni Cristo. Kag nagaaman sia sing mga hiyas sa mga lalaki agod buligan ang tanan sa pagkaisa sa pagtuo.

Ginpaposible man ni Jehova nga mapakita ang Cristianong mga kinaiya nga nagapauswag sang paghiusa. (4:17–6:⁠9) Kay nasul-ob ang “bag-ong personalidad,” ginalikawan sang mga Cristiano ina nga pagkadidiosnon subong imoral nga hambalanon. Nagalakat sila sing maalamon, nagapakita sing pagtahod kay Cristo, kag nagapadayag sing nagakaigo nga pagpasakop.

Dugang pa, ginapaposible sang Dios nga mabatuan sang mga Cristiano ang malaut espirituhanon nga mga kusog nga nagapanikasog sa pagtublag sang aton paghiusa. (6:​10-24) Ang espirituwal nga hinganib halin sa Dios nagaaman sina nga pangamlig. Gani gamiton naton ini kag mangamuyo sing hanuot, nagalakip sa mga masigkatumuluo sa aton mga pangamuyo.

Daw ano kaayo nga laygay ang ginhatag ni Pablo sa mga taga-Efeso! Kabay nga pamatian naton ini paagi sa paglikaw sa imoralidad kag pagbatu sa malaut espirituhanon nga kusog. Kag apresyahon naton sing tudok ang paghiusa nga ginaagom naton paagi kay Jesucristo.

[Kahon/Piktyur sa pahina 24]

Nagadabadaba nga Baslay: Ang espirituwal nga hinganib nagalakip sang “daku nga taming sang pagtuo” nga paagi sini patyon, ukon palungon, ang “nagadabadaba nga baslay” ni Satanas. (Efeso 6:16) Ang iban nga baslay nga gingamit sang mga Romano amo ang may buho nga tambo nga may salsalon nga suludlan sa ubos sang punta nga puno sang nagadabadaba nga naphtha. Ginatiro ini gikan sa halog nga baslay agod indi mapatay ang kalayo, kag ang pagbubo sing tubig sa sini nagapabaskog lamang sang kadakuon sang kalayo. Apang ang daku nga taming nagaamlig sa mga soldado gikan sa sinang mga baslay, subong nga ang pagtuo kay Jehova nagapaposible sa iya mga alagad nga ‘mapalong ang nagadabadaba nga baslay sang malauton.’ Huo, ang pagtuo nagabulig sa aton sa pagbatu sa mga butang subong sang pagsalakay sang malauton nga mga espiritu kag sang mga pagsulay nga maghimo sing malain, maghingamo sing materyalistiko nga pangabuhi, kag magpadala sa kahadlok kag pangduhaduha.