Paano Naton Mabalusan sing Dimakagod ang Gugma sang Dios?

“Kon ginhigugma kita sang Dios sing subong sini, nian obligado man kita nga maghigugmaanay.”​—⁠1 JUAN 4:⁠11.

1, 2. Ano ang ginakinahanglan sa aton agod makabalos kita sing dimakagod sa mga pagpahayag sang gugma sang Dios?

SI Jehova amo ang personipikasyon gid sang gugma. Sa pagkamatuod, sa nagligad nga artikulo, nakita naton kon daw ano gid ka bugana ginpahayag niya ang iya gugma. Nakita man naton kon paano si Moises, si David, kag si Jesucristo dimakagod nga nagbalos sa sadto nga mga pagpasundayag sang gugma. Indi bala dapat nga amo man ang handumon nga himuon sang tagsatagsa ka Saksi ni Jehova? Sa pagkamatuod!

² Ano ang kinahanglanon agod makabalos kita sing dimakagod sa mga pagpahayag sang gugma sang Dios? Una, dapat naton unahon sia sa aton kabuhi, higugmaon sia sa aton bug-os nga tagipusuon, kalag, hunahuna, kag kusog. (Marcos 12:​29, 30) Nagakahulugan ini nga mangin diosnon kita, may mainit nga personal nga kaangtanan kay Jehova. Ginahandum bala naton ang pagpakighambal sa aton langitnon nga Amay sa pangamuyo? Nagapangamuyo bala kita sing walay untat kag padayon? Ukon nagadali bala kita sa aton mga pangamuyo, kon kaisa tuman kasako agod mangamuyo? (Roma 12:​12; 1 Tesalonica 5:17) Ginapatuhoy bala naton ang igtalupangod kay Jehova, ginahatag sa iya kag sa iya organisasyon ang kadungganan sa aton nahimuan? (1 Corinto 3:​7; 4:7) Sa pagkamatuod, ginabatyag bala naton ang subong sang ginbatyag sang salmista? Tuhoy sa Dios, sia nagsiling: “Makapito sa isa ka adlaw ginadayaw ko ikaw.”​—⁠Salmo 119:​164.

3. Kon maghililuong kita, paano naton mapakita nga ginabalusan naton sing dimakagod ang gugma sang Dios?

³ Kon bala ginabalusan naton sing dimakagod ang gugma sang Dios ukon indi, mahimo nga mapadayag kon maghililuong kita. Ang aton bala paghambalanay nasentro lamang sa sekular nga mga butang ukon sa espirituwal nga mga butang? Indi buot silingon nga dapat kita maghiwat sing serioso nga pagtuon sa Biblia sa kada tion nga kaupod kita sang mga masigka-Cristiano. Apang sa pagkamatuod makasapo kita sing pila ka makawiwili nga mga butang nga may espirituwal nga kinaiya nga ilakip sa aton paghambalanay. Ano kon isugid ang mga naeksperiensiahan sa latagon, hambalan ang aton paborito nga teksto sa Biblia, isugid kon paano naton natun-an ang kamatuoran, ukon magsambit sing mga pamatuod sang mahigugmaon nga pag-atipan kag pagpakamaayo sang Dios?

4. Paano naton dapat tamdon ang mga butang kon napaslawan kita tuhoy sa isa ka pribilehiyo sang pag-​alagad?

⁴ Ang isa pa ka kahimtangan nga mahimo magapahayag sang kadakuon sang aton apresasyon sa gugma sang Dios amo kon malaktawan kita may kaangtanan sa pila ka pribilehiyo sang pag-alagad sa organisasyon ni Jehova. Ano ang aton reaksion? Kon nabalaka lamang kita sa pagpadungog kay Jehova, magaugyon kita nga sing pat-od gid ang Dios mapadunggan man bisan kon sin-o man ang may partikular nga pribilehiyo sa pag-alagad. (Ipaanggid ang Lucas 9:⁠48.) Apang kon kita dinagakaigo nga nagakabalaka sa aton kaugalingon nga bentaha ukon ngalan, indi kita mapahamtang nga kita ginlaktawan, sa hunahuna naton. Dapat naton dumdumon nga ginahigugma kita ni Jehova kag mahimo nahibaluan niya nga sa sini nga tion indi naton madala ang kabug-aton sang isa ka teokratikong salabton. Mahimo nga ginapakamaayo niya kita sing bugana sa iban nga mga paagi, kag ina nga mga pagpahayag sang iya gugma dapat magbulig sa aton nga huptan ang aton espirituwal nga pagkabalanse.​—⁠Hulubaton 10:⁠22.

Paghigugma sa Pagkamatarong, Pagdumot sa Kalautan

5. Ano dapat ang mangin epekto sa aton paggawi sang mga pagpahayag sang gugma sang Dios?

⁵ Ang mga pagpahayag sang gugma sang Dios sa aton dapat magpahulag sa aton nga ilugon si Cristo sa paghigugma sa pagkamatarong kag pagdumot sa kalautan. (Hebreo 1:9) Matuod, indi naton mahimo ini sing himpit, subong sang ginhimo ni Jesus. Apang, sarang naton mahimo nga tulumuron nga mangin balaan, bunayag, kag masinulundon sa kasuguan sa masarangan naton sa aton dihimpit nga kahimtangan. Agod mahimo ini, indi lamang dapat kita magpalambo sing gugma sa matarong kag maayong mga butang kundi magpalambo man sing dumot, paglikaw, pagkangil-ad, sa butang nga malaut. Subong ginpabutyag ni apostol Pablo: “Dumti ang malaut, magkapyot sing malig-on sa maayo.” (Roma 12:9) Ang “dumti” isa ka mabaskog nga tinaga, nga nagakahulugan sing “tuman nga pagkangil-ad.”​—⁠Webster’s New Collegiate Dictionary.

6. Ano ang magabulig sa aton sa pagbantay batok sa mga pagsulay nga ginabutang sa aton dalanon sang kalibutan, sang aton makasasala nga unod, kag sang Yawa?

⁶ Ano ang magabulig sa aton sa pagbantay sa aton kaugalingon batok sa mga pagsulay nga ginabutang sa aton dalanon sang kalibutan, sang aton makasasala nga unod, kag sang Yawa? Amo ang katutom kay Jehova nga Dios. Sia nagaapelar sa aton: “Anak ko, magmaalam ka, kag pasadyaha ang akon tagipusuon, agod nga masabat ko sia nga nagapakahuya sa akon.” (Hulubaton 27:11) Huo, ang katutom kay Jehova magapahulag sa aton nga pilion ang maalamon nga dalanon nga dumtan ang iya ginadumtan. Dugang pa, bisan pa daw ano ka makalilipay ukon makakulunyag ang paglapas sang isa sa kasuguan sang Dios, dapat naton padayon nga silingan ang aton kaugalingon nga indi gid ini takus. (Galacia 6:​7, 8) Ang tagipusuon sang tawo malimbungon, madaya, indi bunayag, subong amo ang ginapahanumdom sa aton sa Jeremias 17:⁠9. Ang Cristianong tagipusuon luyag sa maayo, matahom, kag putli nga mga butang. Apang kon kaisa ginapahuyog ini sang makasasala nga mga huyog sa paghandum man sang malain. Kaangay sang tagipusuon sang mga Israelinhon nga nagasimba kay Jehova apang nagapadayon gihapon sang ila idolatroso nga “mataas nga mga duog,” ang aton man tagipusuon mahimo nga makagod kag madaya. (1 Hari 22:​43; Deuteronomio 12:2) Ang aton dihimpit nga tagipusuon mahimo nga mangita sing balibad agod ibutang kita sa dalanon sang pagsulay. Mahimo nga pakadiutayon sini ang pagkaserioso sang isa ka butang nga sayop nga sa amo ginasulay kita. Ukon mahimo nga kombinsihon kita sang aton tagipusuon nga kon may silot man, temporaryo lamang ini.

7. Ngaa dapat kita mag-andam batok sa paghandum sang butang nga malaut?

⁷ Bilang pag-apresyar sa gugma sang Dios, dapat kita mag-andam batok sa paghandum sa butang nga malaut, subong sang pagkahuyog sa seksuwal nga imoralidad, minyo man ukon indi. Sa liwat kag liwat, ang sa umpisa daw isa lamang ka indi makahalalit nga paglahugay nagresulta sa paglapitay sa emosyon sang duha ka Cristiano amo kon ngaa sila nakahimo sing sala kag ginsikway. Bisan ang mga gulang, nga dapat mangin indi salawayon nga mga huwaran sa panong, ­wala makalikaw sa sini!​—⁠Ipaanggid ang 1 Hari 15:​4, 5.

8. Anong nagapaandam nga halimbawa ang ginahatag sa aton ni apostol Pablo, kag paano mailustrar ina nga problema?

⁸ Binagbinaga si apostol Pablo, nga ginpakamaayo sing labaw sa kinaugali nga mga palanan-awon kag sing gahom kag sing regalo sang balaan nga inspirasyon. Agod magmadinalag-on sa iya pagpakig-away batok sa makasasala nga mga huyog, ginsakit niya​—⁠huo, ginsumbag niya sing mabaskog⁠—​ang iya lawas. Kontento na bala kita sa paghimo sing kubos sa sini? (Roma 7:​15-25; 1 Corinto 9:27) Daw subong bala nga nagasakay kita sa isa ka diutay nga sakayan sa isa ka masulog nga suba kag ginabutong kita padulong sa busay. Agod malikawan ang kalaglagan, dapat kita magbugsay sing mabaskog batok sa makusog nga sulog. Mahimo nga daw mahinay kita, apang tubtob nagapanikasog kita sing mabaskog, indi kita mahulog sa aton kalaglagan. Sa pagkamatuod, ang mga pagpahayag ni Jehova nga Dios sing gugma dapat magpahulag sa aton sa pagpanikasog sing mabaskog nga mangin matutom sa iya paagi sa pagdumot sa kalautan kag paghigugma sa pagkamatarong.

Magpakita sing Utudnon nga Gugma

9. Anong laygay ang ginahatag ni apostol Juan tuhoy sa paghigugma sa aton kauturan?

⁹ Ang mga pagpahayag sang gugma sang Dios dapat man magpahulag sa aton nga higugmaon ang aton kauturan subong nga ginhigugma ni Jesucristo ang iya mga disipulo. (Juan 13:1) Sing nagakaigo gid, si apostol Juan nagsiling: “Sa sini amo ang gugma, indi nga ginhigugma ta ang Dios, kundi nga ginhigugma niya kita kag ginpadala ang iya Anak nga katumbasan sang aton mga sala. Mga hinigugma, kon ginhigugma kita sang Dios sing subong sini, nian obligado man kita nga maghigugmaanay.” (1 Juan 4:​10, 11) Sa kamatuoran, nagsiling si Jesus nga ang iya matuod nga mga sumulunod makilala paagi sa gugma sa tunga nila.​—⁠Juan 13:​34, 35.

10, 11. Ano ang pila ka mga paagi nga makapakita kita sing utudnon nga gugma?

¹⁰ Nahibaluan naton nga ang mga Cristiano dapat magpakita sing utudnon nga gugma. Apang indi sayop nga pahanumdumon ang aton kaugalingon sang nanuhaytuhay nga mga paagi nga makapakita kita sining tulad-Cristo nga gugma sa isa kag isa. Ina nga gugma magabulig sa aton nga indi pagsapakon ang mga pagkatuhay sa rasa, nasyonalidad, edukasyon, kultura, kag ekonomiko nga kahimtangan. Dugang pa, ang utudnon nga gugma magapahulag sa aton nga magtipon sa mga miting. Kon ginahigugma gid naton ang aton kauturan, indi naton pagtugutan ang malain nga tiempo ukon ang daw indi maayo nga pamatyag nga idingot sa aton ang kalipay sang pagpakig-upod sa ila kag sang pagpakigbahin sa pagpalig-unay. (Roma 1:​11, 12) Kapin pa sa sina, ang utudnon nga gugma magapahulag sa aton nga maghanda sing maayo para sa aton mga miting kag aktibo nga magpakigbahin sa sini agod nga mapukaw naton ang isa kag isa sa gugma kag maayong mga buhat.​—⁠Hebreo 10:​23-25.

¹¹ Ano naman kon tuhoy sa pagbulig sa aton kauturan sa pag-alagad sa latagon? Napanilagan nga ang mga gulang kag ang ministeryal nga mga alagad masami nga nagapamalaybalay nga silahanon lamang samtang, paagi sa diutay lamang nga pagplano, sarang nila maagda ang mga manugbantala sang Ginharian nga nagakinahanglan sing bulig sa ministeryo sa pag-upod sa ila. Ang pagpakita sing gugma sa sining paagi magahimo sang pag-alagad sa latagon sang mga gulang kag ministeryal nga mga alagad nga makapaladya sing doble. Kag ano man kon paupdon ang isa ka bag-uhan nga manugbantala sa pagtuon sa Biblia sa puluy-an?​—⁠Roma 15:​1, 2.

12. Paano naton hangpon ang 1 Juan 3:​16-18?

¹² Ang gugma magapahulag man sa aton sa pagbulig sa aton kauturan nga nagakinahanglan gid sing materyal nga bulig. Si apostol Juan nagsulat: “Sa sini nakilala ta ang gugma, kay ginhatag niya ang iya kalag tungod sa aton; kag obligado kita nga ihatag ang aton kabuhi tungod sa mga kauturan. Apang ang bisan sin-o nga may pangabuhian sang kalibutan kag nagatan-aw sa iya utod nga yara sa kakulangan, apang nagapugong sang iya kaluoy sa iya, paano bala ang pagpabilin sang gugma sang Dios sa iya? Mga anak, dili kita maghigugma sa pulong ukon sa hambal kundi sa buhat kag sa kamatuoran.” (1 Juan 3:​16-18) Mahimo nga indi kita karon pagpangabayon nga ihatag ang aton kalag tungod sa iban, apang kon kaisa may mga kahigayunan kita sa pagpabutyag sing gugma para sa ila sa iban nga mga paagi, indi lamang sa pulong ukon sa hambal kundi sa mga buhat man. Wala sing malain sa paghigugma sa aton kauturan sa pulong, apang indi naton luyag limitehan ang aton gugma sa sini lamang kon sila nagakinahanglan sing materyal nga mga butang. Ang ginsiling ni Jesus nga “may kapin nga kalipay sa paghatag sang sa pagbaton” naaplikar man sa paghatag sing materyal nga bulig.​—⁠Binuhatan 20:⁠35.

13. (a) Ano ang pila sang sadsaran nga mga kamatuoran nga natun-an naton sa bulig sang kitaon nga organisasyon ni Jehova? (b) Anong makatarunganon nga punto ang ginsambit ni Charles Taze Russell?

¹³ May kahigayunan kita sa pagpakita sing gugma para sa aton kauturan nga nagapanguna sa kongregasyon ukon may kaangtanan sa kitaon nga organisasyon ni Jehova sa bug-os nga kalibutan. Nagalakip ini sing pagkatutom sa “matutom kag mainandamon nga ulipon.” (Mateo 24:​45-47) Batunon naton ang kamatuoran nga bisan pa daw ano kadamo ang nabasa naton sa Biblia, wala gid naton matun-an ang kamatuoran sa aton kaugalingon lamang. Wala kuntani naton matukiban ang kamatuoran tuhoy kay Jehova, sa iya mga katuyuan kag mga kinaiya, ang kahulugan kag pagkaimportante sang iya ngalan, ang Ginharian, ang gawad ni Jesus, ang kinatuhayan sa ulot sang organisasyon sang Dios kag ni Satanas, ukon kon ngaa gintugutan sang Dios ang kalautan. Subong gid ini sang ginsulat sang nahauna nga presidente sang Watch Tower Society nga si Charles Taze Russell, sang 1914: “Indi bala kita isa ka ginpakamaayo kag malipayon nga katawhan? Indi bala matutom ang aton Dios? Kon may isa nga nakahibalo sing mas maayo pa, pabayai sia. Kon may yara sa inyo nga nakasapo sing butang nga mas maayo pa, ginalauman namon nga sugiran ninyo kami. Wala na kami sing nahibaluan nga maayo pa ukon subong kaayo sang katunga sang nasapwan namon sa Pulong sang Dios. . . . Wala sing dila ukon pluma ang makasugid sang paghidait, kalipay kag pagpakamaayo nga gindala sa aton tagipusuon kag kabuhi sang maathag nga ihibalo tuhoy sa matuod nga Dios. Ang Sugilanon tuhoy sa Kaalam, Hustisya, Gahom kag Gugma sang Dios bug-os nga nagapaayaw sang mga handum sang aton ulo kag sang aton tagipusuon. Wala na kita sing ginatinguhaan nga dugang pa. Wala na sing butang nga handumon pa sing kapin sang sa ipaathag sing matin-aw ining dalayawon nga Sugilanon sa aton hunahuna.” (The Watch Tower, Disiembre 15, 1914, pahina 377-8) Daw ano ka matuod yadtong ginsulat sing maayo nga mga pulong!

Pagministeryo sa mga Tagaguwa

14. Paano ang mga pagpahayag sang gugma sang Dios dapat magpahulag sa aton sa paghikot sa mga tagaguwa?

¹⁴ Ang mga pagpahayag sang gugma sang Dios nga aton ginaagom dapat magpahulag sa aton sa pagpakita sing gugma sa isigkatawo sa guwa sang kongregasyon. Paano naton mahimo ini? Mahimo ipakita sang mga kahimtangan nga mabuligan ang aton mga isigkatawo sa materyal nga paagi. Apang, kapin ka importante, makapakita kita sing gugma sa isigkatawo paagi sa pagdala sa iban sing maayong balita sang Ginharian sang Dios kag pagbulig sa mga nagahigugma sa pagkamatarong nga mangin mga disipulo ni Jesucristo. Regular bala kita nga nagapakigbahin sa sining publiko nga pagministeryo, ukon ginapatumbayaan bala naton ini? Nangin rutina na lamang bala ini ukon isa ka pakulahaw nga porma sang pag-alagad? Ginapahulag gid bala kita sang gugma sa isigkatawo? Nagapakita bala kita sing kahanuklog? Mapailubon bala kita, ginahulat ang mga tawo sa pagsabat? Ginapalig-on bala naton ang mga tagbalay nga ipabutyag ang ila kaugalingon? Huo, sa baylo nga ikaw lamang ang maghambal, tugutan naton ang gugma sa isigkatawo nga magpahulag sa aton sa pagpamati kag hambalan ang Biblia upod sa mga tawo nga makilala naton sa aton ministeryo.

15. (a) Ngaa ang “dipormal nga pagpanaksi” mas maayo nga termino sang sa “insidental nga pagpanaksi”? (b) Ngaa dapat himuslan ang mga kahigayunan sa pagpanaksi sing dipormal?

¹⁵ Alisto bala kita sa paghimulos sang mga kahigayunan sa pagpanaksi sing dipormal? Dapat tandaan nga indi ini insidental lamang nga pagpanaksi, nga nagapahangop sang hilikuton nga wala maplano ukon may diutay nga importansia. Ang dipormal nga pagpanaksi importante gid, kag ang gugma sa mga isigkatawo magatiklod sa aton sa pagpangita sing mga kahigayunan sa pagpakigbahin sa sini. Daw ano ka mabungahon sa masami ini nga pagpanaksi! Halimbawa, samtang nagatambong sa isa ka kombension sang mga Saksi ni Jehova sa aminhan nga Italya, nagkadto ang isa ka utod nga lalaki sa isa ka garahe agod paislan ang suga sang iya awto. Samtang nagahulat sia, nagpanaksi sia sa mga tawo sa palibot niya kag ginhatagan niya sila sing mga handbill nga nagaagda sa ila sa pamulongpulong publiko tuhoy sa Biblia sadto nga Domingo. Sa isa ka internasyonal nga kombension sa Roma pagligad sang isa ka tuig, mainit nga gintamyaw sia sang isa ka utod nga lalaki nga wala niya makilal-i. Sin-o ining utod? Ti, isa sia sadtong mga lalaki nga nahatagan niya sing handbill sa garahe sang nagligad nga tuig! Namati gali sadto ang tawo sa pamulongpulong publiko kag ginhatag niya ang iya ngalan para sa pagtuon sa Biblia. Karon sia kag ang iya asawa dedikado na nga mga Saksi ni Jehova. Indi maduhaduhaan nga ang dipormal nga pagpanaksi mahimo nga mangin makapaladya!

Padayon nga Balusi ang Gugma sang Dios

16. Anong mga pamangkot ang nagakaigo nga ipamangkot naton sa aton kaugalingon?

¹⁶ Bugana gid si Jehova sa pagpakita sing gugma para sa iya mga tinuga. Subong nabinagbinag na naton, ang Kasulatan nagahatag sa aton sing maayong mga huwaran sang mga tawo nga nagbalos sing dimakagod sa mga pagpahayag sang gugma sang Dios. Labing nagakaigo, ang inspirado nga salmista nagtuaw: “Kabay kuntani nga pasalamatan sang mga tawo si Jehova tungod sang iya mahigugmaon nga kaluoy kag sang iya makatilingala nga mga binuhatan sa mga anak sang mga tawo.” (Salmo 107:​8, 15, 21, 31) Ginabaton bala naton ang dibagay nga kaluoy sang Dios kag ginawasi ang katuyuan sini? Kabay nga indi gid ina matabo! (2 Corinto 6:1) Gani pamangkuton naton ang aton kaugalingon sing indibiduwal: ‘Ginaapresyar ko gid bala ang mga pagpahayag sang gugma sang Dios nga ginaagom ko na kag masaligon nga nagalaum nga maagom ini sing dugang pa sa palaabuton? Ginapahulag bala ako sini nga higugmaon si Jehova sa akon bug-os nga tagipusuon, kalag, hunahuna, kag kusog? Diosnon gid bala ako? Ginahigugma ko bala ang pagkamatarong kag ginadumtan ang kalautan? Nagapakita bala ako sing utudnon nga gugma? Kag daw ano ka suod nga ginatinguhaan ko nga sundon ang mga tikang ni Jesus may kaangtanan sa akon ministeryo?’

17. Ano ang mangin resulta kon balusan naton sing dimakagod ang mga pagpahayag sang gugma ni Jehova nga Dios?

¹⁷ Sa pagkamatuod, madamo gid ang mga paagi agod mapakita naton ang aton sinsero nga pasalamat sa tanan nga mga pagpahayag sang gugma sang Dios nga naeksperiensiahan naton. Paagi sa paghimulos sing bug-os sang mga kahigayunan sa pagpakita sina nga apresasyon, pahalipayon naton ang tagipusuon sang aton langitnon nga Amay, mangin pagpakamaayo sa iban, kag makabaton kita sing kalipay, paghidait, kag pagkakontento. Kabay busa nga magpadayon kita sa pagbalos sing dimakagod sa mga pagpahayag sang gugma sang Dios.

Paano Mo Sabton?

◻ Ano ang kinahanglanon agod makabalos sing dimakagod sa gugma sang Dios?

◻ Paano kita makaandam batok sa mga pagsulay?

◻ Ano ang pila ka mga paagi sa pagpakita sing utudnon nga gugma?

◻ Paano ang mga pagpahayag sang gugma ni Jehova dapat magpahulag sa aton sa paghikot ayon sa aton mga isigkatawo?

[Piktyur sa pahina 17]

Dapat kita magpanikasog batok sa makasasala nga huyog agod malikawan ang kalaglagan

[Piktyur sa pahina 18]

Ang mga gulang nagapakita sing utudnon nga gugma paagi sa pag-upod sa iban sa pag-alagad sa Ginharian

[Piktyur sa pahina 19]

Ginpatalupangod ni Charles Taze Russell, ang nahauna nga presidente sang Watch Tower Society, ang paghidait, kalipay, kag pagpakamaayo nga Dios lamang ang makahatag