Report sang mga Manugbantala sang Ginharian
Pagbantala sing Maayong Balita sa “Ukbong sang Duta”
“INING maayong balita sang ginharian ibantala sa bug-os napuy-an nga duta subong panaksi sa tanan nga kapungsuran; kag ugaling magaabot ang katapusan.” Amo ang ginsiling ni Jesus sa iya mga disipulo antes sia mapatay. Pagkabanhaw niya, nagsiling pa sia: “Mangin mga saksi ko kamo sa Jerusalem kag sa bug-os nga Judea kag sa Samaria kag tubtob sa ukbong sang duta.” (Mateo 24:14; Binuhatan 1:8) Karon, ining mga tagna ginatuman sa kapin sa 200 ka kadutaan, lakip ang pungsod sang Peru sa Bagatnan nga Amerika.
Kapin sa 32,000 ka Saksi ang nagabantala sing maayong balita sa sinang matahom nga duta, kag ang ila teritoryo nagalakip sang pila sang mga ukbong sang duta: ang mataas nga Andes, nga may kataason nga tubtob sa ulot sang 4,000 kag 4,500 metros, kag subong man sang mainit nga kagulangan sang Amazon, nga sa diin ang mga tawo didto makadtuan lamang paagi sa mga sakayan. Ang sanga sang Peru nagreport:
◻ “Sa kagulangan, may walo kami ka espesyal payunir nga naasayn sa duha ka diutay nga sakayan nga ginatawag lancha. Ining diutay nga mga sakayan nagalutaw bisan sa kadalumon sang tubig nga 0.3 metro lamang, gani napasangkad ang pagbantala sing maayong balita sa madamo nga bag-ong mga duog paagi sa diutay nga mga suba. Tubtob sa karon, ang mga utod nga nagagamit sini nga mga sakayan nakapahamtang sing ginatos ka libo ka magasin, libro, kag Biblia sa bug-os nga Amazon Valley sang Peru. Subong direkta nga resulta, apat ka bag-ong kongregasyon ang natukod, upod ang lima ka isolated group nga nagareport sang nahimuan kag nagahiwat sing mga miting. Ginalauman nga ining mga grupo mangin mga kongregasyon sa indi madugay.”
◻ May isa ka banwa sa kagulangan nga nagporma sa palibot sang pumping station para sa Trans-Andean nga tubo sang asayte, nga nagadala sing asayte gikan sa kagulangan paagi sa mataas nga Andes tubtob sa nakatundan nga Baybayon. Bangod sang mga trabahador sa tubo sang asayte, ini nga banwa may mga 20 ka bar kag nakilal-an subong duog sa pagpahubog kag paglipaylipay. Apang, sa tapos makahatag ang mga espesyar payunir didto sing maid-id nga panaksi, madamo ang nagbaton sang mensahe sang Ginharian, kag karon apat na lamang ka bar ang nabilin sa banwa! Sa tion sang pagduaw sang manugtatap sang sirkito kasan-o lang, 189 ka tawo ang nagtambong sa pamulongpulong publiko. May yara karon isa ka grupo sang 7 ka manugbantala sa banwa, kag kapin sa 45 ka tawo ang nagatambong sa tanan nga miting. Sa dili madugay, upod ang pagpakamaayo ni Jehova, mangin kongregasyon ini.
◻ Sa isa sang 221 ka kongregasyon sang kapital nga siudad sang Peru, ang Lima, nagapanugiron ang 29-anyos nga lalaki kon paano niya natigayon ang kamatuoran. Bangod nag-untat sia sa pag-eskwela sa edad nga 13 anyos, nagbuylog sia sa isa ka gang sang mga buyong kag nagsugod sang isa ka karera sang pagpakig-away, pag-inom sing droga, kag paghimo sing imoralidad. Pagligad sang duha ka tuig nga pag-alagad sing pilit sa militar, gintublag sia sang iya hunahuna. Nian, sang 1983, nakilala sia sang isa ka mapainubuson nga utod nga babayi sa iya pagpamalaybalay nga pag-alagad. Sa nahauna nga tion, nabatian niya ang nahanungod sa bag-ong kalibutan nga may gugma kag paghidait. Ginsugdan ang pagtuon sa Biblia, kag upod ang mahigugmaon nga bulig gikan sa kongregasyon kag sa kusog ni Jehova, nalandas niya ang iya mga bisyo. Sang 1986 ginbawtismuhan sia kag nagaalagad karon subong isa ka ministeryal nga alagad sa kongregasyon.
Sa pagkamatuod, ang mga pulong ni Jesus nga ang Ginharian ibantala sa “ukbong sang duta” ginatuman sa Peru nga may matahom nga mga resulta, sa kaayuhan sang madamo sa sadto nga duta nga ginagutom kag ginauhaw sa kamatuoran.