Pag-alagad kay Jehova nga May Kalipay

“Alagda si Jehova nga may kasadya. Magkara sa iya atubangan nga may malipayon nga pag-amba.”​—⁠SALMO 100:⁠2.

1, 2. (a) Paano ginpadaku ang rasismo sa Berlin, Alemanya, apang ano ang natabo sa krusada para sa “Isa ka Libo ka Tuig nga Paggahom”? (b) Ano nga pagkatuhay sa 1936 ang naobserbahan sa Olym­pia Stadium sang Hulyo 1990, kag sa ano napasad ang kalipay sang internasyonal nga grupo nga nagtipon didto?

ANG danyag amo ang Olympia Stadium, Berlin. Sang nagligad nga kalim-an kag apat ka tuig, ining matahom nga istadyum nangin isa ka sentro sang baisay sang suno sa report wala kuno pagsapaka sang Nazi nga diktador nga si Adolf Hitler ang isa ka itom nga Amerikano nga manugdalagan nga nagdaug sing apat ka bulawan nga medalya. Sa pagkamatuod, isa ini ka huyap sa rasista nga pangangkon ni Hitler tuhoy sa “pagkasuperyor sang mga Aryan”!⁠a Apang sini nga tion, sang Hulyo 26, 1990, ang mga itom, mga puti, mga dalagdalagon​—⁠isa ka nahiusa nga katawhan gikan sa 64 ka pungsod, 44,532 tanan⁠—​nagtipon diri para sa “Putli nga Hambal” nga Distrito nga Kombension sang mga Saksi ni Jehova. Daw ano nga kalipay ang nagluntad sadtong Huebes sang hapon! Pagkatapos sang pamulongpulong tuhoy sa bawtismo, 1,018 ka kandidato ang nagsinggit sing, “Ja!” kag sing, “Ja!” liwat bilang pagpamatuod sang ila dedikasyon kay Jehova nga Dios, sa paghimo sang iya kabubut-on.

² Ining bag-o nga mga Saksi naghinguyang sing 19 ka minuto sa paglinya paguwa sa istadyum padulong sa pool nga balawtismuhan. Kag sa sining bug-os nga mga minuto, naglanog sa daku nga arena ang nagadaguob nga mga pamalakpak. Ang mga dumalaug sa Olym­pic ­Games wala pa gid makaeksperiensia sing subong sini nga palakpak bilang pag-abiabi karon sa sining ginatos, gikan sa madamo nga pungsod, nga nagapasundayag sing pagtuo nga nagadaug sa kalibutan. (1 Juan 5:​3, 4) Ang ila kalipay malig-on nga naangkla sa pagsalig nga sa dili madugay ang paggahom ni Cristo sa Ginharian sang Dios magadala sa pagkamatuod sing isa ka libo ka tuig sang mahimayaon nga mga pagpakamaayo sa katawhan.​—⁠Hebreo 6:​17, 18; Bugna 20:​6; 21:​4, 5.

3. Anong kamatuoran ang ginpadaku sang pagsalig sang mga kombensionista, kag paano?

³ Wala sing pagdumtanay sa rasa ukon pungsod diri, kay ang tanan nagahambal sang putli nga hambal sang Pulong sang Dios, sa amo nagapadaku sang kamatuoran sang mga pulong ni Pedro: “Matuod gid ginahantop ko nga ang Dios wala sing ginapasulabi sa mga tawo, apang sa tagsa ka pungsod ang nagakahadlok sa iya kag nagahimo sang pagkamatarong kalahamut-an sa iya.”​—⁠Binuhatan 10:​34, 35; Sofonias 3:⁠9.

4. Sa idalom sang anong mga kahimtangan nangin tumuluo ang kalabanan sang mga kombensionista, kag paano ginsabat ang ila mga pangamuyo?

⁴ Ang daku nga bahin sining mga kombensionista sa Berlin nangin mga tumuluo sa tion sang malawig nga tinuig sang pagpigos, nga nagakobre sang dag-on sang mga Nazi (1933-45) kag sang dag-on sang mga sosyalistiko nga nagbulos sa Sidlangan nga Alemanya, nga sa diin ang pagdumili sa mga Saksi ni Jehova legal nga bag-o lang gindula sang Marso 14, 1990. Busa, madamo sa ila ang “nagbaton sang pulong sa dakung kapipit-an nga may kalipay sa balaan nga espiritu.” (1 Tesalonica 1:6) May kapin na sila nga kahilwayan karon sa pag-alagad kay Jehova, kag ang ila kalipay wala sing latid.​—⁠Ipaanggid ang Isaias 51:⁠11.

Mga Okasyon sa Pagkalipay

5. Paano ginsaulog sang Israel ang pagluwas ni Jehova sa Dagat nga Mapula?

⁵ Ang pagbuhi sa aton kauturan sa Sidlangan nga Europa, kag sining karon lang sa mga bahin sang Aprika kag Asia, nagapahanumdom sa aton sang mga pagluwas ni Jehova sang una. Madumduman naton ang gamhanan nga buhat ni Jehova sa Dagat nga Mapula, kag kon paano ang pag-amba sing pasalamat sang Israel nagbaskog gid sa sini nga mga pulong: “Sin-o bala ang kaangay mo sa tunga sang mga dios, O Jehova? Ang isa nga kahadlukan paagi sa pag-amba sing pagdayaw, ang Isa nga nagahimo sing mga kalatingalahan.” (Exodo 15:11) Sa karon, padayon bala kita nga nagakasadya sa makatilingala nga mga butang nga ginahimo ni Jehova para sa iya katawhan? Sa pagkamatuod nagakasadya kita!

6. Ano ang matun-an naton gikan sa pag-amba sang Israel sang 537 B.⁠C.⁠E. bangod sa kalipay?

⁶ Daku gid ang kalipay sang 537 B.⁠C.⁠E. sang ginpasag-uli ang Israel sa iya duta sa tapos sang pagkaulipon sa Babilonia. Ang pungsod ni Jehova nakasiling karon, subong sang gintagna ni Isaias: “Yari karon! Ang Dios akon kaluwasan. Magasalig ako kag indi magkahadlok; kay si Jah Jehova amo ang akon kusog kag ang akon gahom, kag sia nangin akon kaluwasan.” Daw ano nga paghugyaw! Kag paano ginpabutyag sang pungsod yadto nga kalipay? Si Isaias nagpadayon: “Sa sadto nga adlaw pat-od nga magasiling kamo: ‘Magpasalamat kay Jehova, kamo nga katawhan! Magpanawag sa iya ngalan. Ipahayag ang iya mga binuhatan sa katawhan. Isambit nga ang iya ngalan ginapakataas. Mag-amba kay Jehova, kay naghimo sia sing mahimayaon nga mga butang.’ ” Sila “nakasinggit sa kalipay” sa ‘pagpakilala sa bug-os nga duta’ sang iya gamhanan nga mga buhat, subong sang ginahimo karon sang nahilway nga mga alagad ni Jehova.​—⁠Isaias 12:​1-6.

Kalipay sa Hilikuton ni Jehova

7. Anong mga paghilway ang ginkasadya sang 1919?

⁷ Sa modernong mga tion ang mga alagad ni Jehova nagsugod sa pagsinggit sa kalipay sang ginhatagan niya sila sing makatilingala nga paghilway sang 1919. Sang Marso 26 sadto nga tuig, ang mga katapo sang Nagadumala nga Hubon ginpaguwa sa bilangguan sang Estados Unidos, nga sa diin nabilanggo sila sing siam ka bulan bangod sang dimatuod nga panumbungon nga pagrebelde. Daw ano ka daku nga selebrasyon ang natabo bilang pag-abiabi sa ila liwat sa Brooklyn Bethel! Dugang pa, yadtong tanan nga hinaplas nga nagkalabilin nagkasadya nga sila ginhilway sa espirituwal gikan sa Babilonia nga Daku, ang sistema sang relihion nga sa amo nasiod ni Satanas ang bug-os nga kalibutan.​—⁠Bugna 17:​3-6; 18:​2-5.

8. Anong sorpresa nga publikasyon ang ginpahibalo sa kombension sa Cedar ­Point sang 1919, kag ano nga panawag sa paghikot ang ginhatag?

⁸ Ang nangin putukputukan sang maragtason nga mga hitabo sang 1919 amo ang kombension sang katawhan sang Dios nga ginhiwat sa Cedar Point, Ohio, E.⁠U.⁠A., Septiembre 1-8. Sang ikalima nga adlaw sadto nga asambleya, ang “Adlaw sang mga Masigkamanugpangabudlay,” ang presidente sang Watch Tower Society, nga si J. F. Rutherford, naghambal sa 6,000 sing isa ka makapulukaw nga pamulongpulong nga natig-uluhan sing “Ibantala ang Ginharian.” Sa tapos mapaathag ang Bugna 15:2 kag ang Isaias 52:​7, ginsugiran niya ang iya mga manugpalamati nga sa kada ikaduha ka semana, ibalhag ang isa ka bag-ong magasin, ang The Golden Age (karon kilala subong Magmata!), agod ipahamtang labi na sa latagon. Bilang paghingapos sia nagsiling: “Sila nga nahugod sing bug-os sa Ginuo; sila nga wala sing kahadlok, sila nga ang ila tagipusuon putli, nga nagahigugma sa Dios kag kay Ginuong Jesus sa bug-os nila nga hunahuna, kusog, kalag kag kabuhi, magakalipay suno sa ginatugot sang kahigayunan sa pagpakigbahin sa sini nga hilikuton. Pangayua sa Ginuo ang iya pagtuytoy kag pag-ubay agod nga himuon ka niya nga isa ka matuod, matutom, kag mabungahon nga embahador. Nian, upod ang ambahanon sang kalipay sa imo tagipusuon, alagda sia.”

9, 10. Paano ginpauswag ni Jehova ang pagbalhag sa Lalantawan kag Magmata! nga mga magasin?

⁹ Ina nga “ambahanon sang kalipay” nabatian sa bug-os nga duta! Wala sing duhaduha, nga madamo sang aton mga bumalasa ang nakaambit sa pagpauswag sang sirkulasyon sang Magmata! nga magasin tubtob sa 12,980,000 ka kopya sang kada guwa sa 64 ka hambal. Subong isa ka gamhanan nga instrumento sa pagtuytoy sa interesado nga mga tawo padulong sa kamatuoran, ang Magmata! nangin kaupod sang Ang Lalantawan. Sa isa ka pungsod sa Sidlangan, ang isa ka payunir nga utod nga babayi, nga may regular nga ruta sa magasin, nakibot nga sa kada tion nga magdul-ong sia sang pinakabag-o nga mga magasin, ang tagbalay nagadonar sing katumbas sang $7 (U.⁠S.) sa bug-os kalibutan nga hilikuton sang mga Saksi ni Jehova​—⁠nagapakita sa pagkamatuod sing apresasyon sa hilikuton sang Ginharian!

¹⁰ Karon sugod sa ika-112 nga tuig sang pagbalhag, ang Lalantawan nga magasin may sirkulasyon nga 15,290,000 sa 111 ka hambal, ang 59 sining mga edisyon nagaguwa sing dungan sa bug-os nga kalibutan nga may pareho nga kaundan. Subong matutom nga alagad, ang hinaplas nga nagkalabilin padayon nga nagahatag sa mainapresyahon nga mga bumalasa sang “ila [espirituwal] nga pagkaon sa nagakaigo nga tion.” (Lucas 12:42) Sa sulod sang 1990, ang mga Saksi ni Jehova nagreport nga nakapahamtang sila sing 2,968,309 ka bag-o nga suskripsion sa duha ka magasin, 22.7-porsiento nga pag-uswag sang sa 1989.

Nagadugang ang Kalipay

11. (a) Anong panawag ang ginhatag sa katawhan sang Dios sa Cedar ­Point sang 1922? (b) Paano nagsangkad ang pagsinggit sing kalipay?

¹¹ Nagdugang man ang kalipay sang ang katawhan sang Dios, nga may kadamuon nga 10,000, nagtipon sa ikaduha nga kombension sa Cedar ­Point, sang Septiembre 1922, kag 361 ang nabawtismuhan. Sa iya diskurso nga “Malapit Na ang Ginharian sang Langit,” pasad sa Mateo 4:​17, ginhambal ni Utod Rutherford ang makapulukaw nga putukputukan: “Dapat makilala sang kalibutan nga si Jehova Dios kag si Jesucristo Hari sang mga hari kag Ginuo sang mga ginuo. Amo ini ang adlaw sang tanan nga adlaw. Tan-awa, ang Hari nagagahom! Kamo ang iya mga manugbantala. Busa, ibantala, ibantala, ibantala, ang Hari kag ang iya ginharian.” Yadtong mga nag-ambit sa pagsinggit sing kalipay nga naglanog sa sadto nga kombension nagdaku sa kadamuon tubtob nga sang 1989 kapin sa 6,600,000 ang nagtipon sa 1,210 ka kombension sang mga Saksi ni Jehova sa bug-os nga kalibutan, nga sa diin 123,688 ang nabawtismuhan.

12. (a) Sa anong dimatakus nga kalipay nagaambit ang katawhan sang Dios karon? (b) Paano naton ginabalanse ang aton pag-alagad kay Jehova sa pagtuman sa “superyor nga mga awtoridad”?

¹² Ginahigugma sang mga Saksi ni Jehova ang ila kahilwayan. Labaw sa tanan, nagakalipay sila sa modernong-adlaw nga katumanan sang mga pulong ni Jesus: “Kag makilala ninyo ang kamatuoran, kag ang kamatuoran magahilway sa inyo.” Daw ano nga kalipay nga mahilway gikan sa mga misteryo kag mga disparatis sang dimatuod nga relihion! Daw ano ka indi matakus nga kalipay ang makilala si Jehova kag ang iya Anak kag mangin mga masigkamanugpangabudlay nila, nga may paglaum sa kabuhi nga wala sing katapusan! (Juan 8:​32; 17:​3; 1 Corinto 3:​9-11) Ginaapresyar man sang mga alagad sang Dios kon ginatahod sang “superyor nga mga awtoridad” sining kalibutan, nga ila ginapuy-an, ang ila kahilwayan sa pagbantala sang mahimayaon nga paglaum sa Ginharian sang Dios sa idalom ni Cristo. Kinabubut-on nga ‘ginahatag nila kay Cesar ang mga butang nga iya ni Cesar,’ samtang sa amo man nga tion ginahatag sa “Dios ang mga butang nga iya sang Dios.”​—⁠Roma 13:​1-7; Lucas 20:⁠25.

13. Paano ginpabutyag sang mga Saksi ni Jehova ang ila kalipay sang ginhilway sila gikan sa pagpigos?

¹³ Apang, kon limitehan sang tawhanon nga mga awtoridad ining obligasyon sa Dios, ang mga Saksi ni Jehova nagasabat subong sang mga apostoles: “Dapat namon tumanon ang Dios subong manuggahom sa baylo sang mga tawo.” Sadto nga okasyon, sang ginbuhian sang mga manuggahom ang mga apostoles, “naghalin sila . . . nga nagakalipay.” Paano nila ginpabutyag yadto nga kalipay? “Sa adlaw-adlaw sa templo kag sa puluy-an wala sila mag-untat sa pagpanudlo kag pagwali sang maayong balita nahanungod kay Cristo, nga si Jesus.” (Binuhatan 5:​27-32, 41, 42) Subong man, ang modernong-adlaw nga mga Saksi ni Jehova nagakasadya man kon sila makatigayon sing daku pa nga kahilwayan sa pagpadayon sang ila ministeryo. Sa madamo nga pungsod nga sa diin ginbuksan ni Jehova ang dalanon, nagapabutyag sila sing daku nga kalipay paagi sa paghatag sing maid-id nga pagpanaksi sa ngalan ni Jehova kag sa nagapakari nga Ginharian ni Cristo Jesus.​—⁠Ipaanggid ang Binuhatan 20:​20, 21, 24; 23:​11; 28:​16, 23.

Nagapadayon nga May Kalipay

14. Paano ining kalipay nga isa ka bunga sang espiritu nagalabaw sa sinang kinaiya nga ginalaragway sang diksionaryo?

¹⁴ Ano ining daku nga kalipay nga ginaagom sang matuod nga mga Cristiano? Kapin ini ka tudok kag kapin ka permanente sang sa umalagi nga kalipay sang isa nga nagdaug sa Olym­pic ­Games. Isa ini ka bunga sang balaan nga espiritu sang Dios, nga ginahatag sang Dios sa mga “nagatuman sa iya subong manuggahom.” (Binuhatan 5:32) Ginapaathag sang Webster’s nga diksionaryo ang kalipay subong ‘madalom pa sa kahamuot, kapin kaathag ukon dayag sang sa kasadya.’ Para sa isa ka Cristiano, ang kalipay may kapin pa kadalom nga kahulugan. Bangod naangkla ini sa aton pagtuo, isa ini ka gamhanan, makapalig-on nga kinaiya. “Ang kalipay ni Jehova amo ang inyo kuta.” (Nehemias 8:10) Ang kalipay ni Jehova, nga ginapalambo sang katawhan sang Dios, nagalabaw sa hapaw nga kakunyag nga ginaagom sang katawhan gikan sa undanon, kalibutanon nga mga kalalipayan.​—⁠Galacia 5:​19-23.

15. (a) Sa eksperiensia sang matutom nga mga Cristiano, paano ang pagbatas gin-updan sing kalipay? (b) Sambita ang pila ka kasulatan nga nagahatag sing makapalig-on nga pasalig tuhoy sa paghupot sing kalipay.

¹⁵ Binagbinaga ang aton kauturan sa ­Ukraine. Sang gintapok sang ‘superyor nga awtoridad’ ang linibolibo sini sa ila sa Siberia sang maaga nga bahin sang katuigan 1950, nag-antos sila sing daku nga kabudlayan. Sang ulihi, sang ginhatagan sila sang awtoridad sing amnestiya, nagpasalamat sila, apang indi tanan sa ila nagbalik sa ila dutang natawhan. Ngaa? Ang ila pagpangabudlay sa Sidlangan nagpahanumdom sa ila sang Santiago 1:​2-4: “Mga kauturan, kabiga ninyo nga bug-os nga kalipay kon makasugata kamo sing madamo nga pagtilaw, kay nakahibalo kamo nga ang pagtilaw sang inyo pagtuo nagahikot sing pagbatas.” Luyag nila magpadayon sa sinang makalilipay nga pag-ani, kag daw ano ka makalilipay nga abiabihon sa mga kombension sang mga Saksi ni Jehova kasan-o lang sa Po­land ang mga Saksi gikan sa sidlangan sa mga komunidad sang baybayon sang Pasipiko. Nagbuligay ang pagbatas kag kalipay sa pagpatubas sini nga bunga. Sa pagkamatuod, kita tanan nga nagabatas sing malipayon sa pag-alagad kay Jehova makasiling: “Apang ako magakasadya kay Jehova; magakalipay ako sa Dios sang akon kaluwasan. Si Jehova nga Soberanong Ginuo amo ang akon kusog.”​—⁠Habacuc 3:​18, 19; Mateo 5:​11, 12.

16. Paano ang maayong halimbawa ni Jeremias kag ni Job magpalig-on sa aton sa hilikuton naton sa latagon?

¹⁶ Apang, paano naton mahuptan ang aton kalipay kon nagapanaksi kita sa tunga sang matigdas nga mga manugpamatok? Dumduma nga ang mga manalagna sang Dios naghupot sing malipayon nga panimuot sa kaanggid sini nga mga kahimtangan. Si Jeremias, sang gintilawan, nagsiling: “Ang imo mga pulong nakit-an, kag ginkaon ko sila; kag ang imo mga pulong nangin kalipay sa akon kag kasadya sang akon tagipusuon; kay gintawag ako sa imo ngalan, O Jehova nga Dios sang mga kasuldadusan.” (Jeremias 15:16) Daw ano nga pribilehiyo nga tawgon sa ngalan ni Jehova kag magpanaksi sa sina nga ngalan! Ang aton maukod nga personal nga pagtuon kag bug-os nga pagpakigbahin sa Cristianong mga miting magapalig-on sa aton nga magpadayon sa pagkasadya sa kamatuoran. Ang aton kalipay mamutikan sa aton paggawi sa latagon kag sa aton mga yuhom. Bisan sa idalom sang masakit nga pagtilaw, si Job nagsiling tuhoy sa iya mga kaaway: “Nagyuhom ako sa ila​—⁠indi sila magpati sa sini⁠—​kag ang kasilak sang akon nawong wala nila mapasubo.” (Job 29:24) Kaangay sang matutom nga si Job, indi kita dapat magkasubo kon yagutaon kita sang mga manugpamatok. Magyuhom pirme! Ang aton hitsura magapakita sang aton kalipay kag gani pamatian kita.

17. Paano mahimo magbunga ang pagbatas nga may kalipay?

¹⁷ Samtang ginakobrehan naton ang aton teritoryo sa liwat kag liwat, mahimo nga mahamuot sa aton pagbatas kag kalipay ang may huyog sa pagkamatarong nga mga tawo kag mapalig-on sila nga usisaon ang mahimayaon nga paglaum nga ginadala naton. Daw ano ka makalilipay nga magdumala sing pagtuon sa Biblia upod sa ila sing regular! Kag samtang ginapasulod nila sa ila tagipusuon ang hamili nga mga kamatuoran sang Pulong sang Dios, daw ano nga kalipay ang mabatyagan naton kon sila sa katapusan mangin aton mga kaupod sa pag-alagad kay Jehova! Nian makasiling kita, subong sang ginsiling ni apostol Pablo sa bag-ong mga tumuluo sang iya adlaw: “Kay ano bala ang amon paglaum ukon korona sang paghimaya​—⁠ti, indi bala kamo gid?⁠—​sa atubangan sang aton Ginuong Jesus? Kamo gid ang amon himaya kag kalipay.” (1 Tesalonica 2:​19, 20) Sa pagkamatuod, ang makaalayaw nga kalipay masapwan sa pagtuytoy sa mga bag-uhan padulong sa kamatuoran sang Pulong sang Dios kag sa pagbulig sa ila nga mangin dedikado, bawtismado nga mga Saksi.

Ang Kalipay nga Nagapabaskog

18. Ano ang magabulig sa aton sa paglandas sang nanuhaytuhay nga mga pagtilaw karon?

¹⁸ Sa aton adlaw-adlaw nga pagkabuhi, madamo nga kahimtangan ang mahimo magakinahanglan sang aton pagbatas. Ang balatian, kapung-aw, kag kapigaduhon pila lamang. Paano mahuptan sang Cristiano ang iya kalipay agod malandas ini nga mga pagtilaw? Sarang ini mahimo paagi sa pagdangop sa Pulong sang Dios para sa lugpay kag tuytoy. Ang pagbasa ukon pagpamati sa pagbasa sang mga salmo makahatag sing daku nga paumpaw sa tion sang pagtilaw. Kag talupangda ang maalamon nga laygay ni David: “Itungtong kay Jehova ang imo lulan, kag sia magaalay-ay sa imo. Indi sia magtugot nga malingkang ang matarong.” (Salmo 55:22) Si Jehova amo gid sa pagkamatuod ang “Manugpamati sang pangamuyo.”​—⁠Salmo 65:⁠2.

19. Kaangay ni David kag ni Pablo, ano ang pagsalig naton?

¹⁹ Ang organisasyon ni Jehova, paagi sa mga publikasyon sini kag sa mga gulang sang kongregasyon sini, handa pirme sa pagbulig sa aton, bangod maluya kita nga mga tawo, sa paglandas sang aton mga problema. Si David mahinuklugon nga nagalaygay: “Itugyan kay Jehova ang imo dalanon, kag magsalig sa iya, kay himuon niya ini.” Nakasiling man sia: “Nangin pamatan-on ako, kag karon tigulang na, apang wala ako makakita nga ang matarong ginpabayaan, ukon ang iya kaliwat nga nagapakilimos sing kalan-on.” Sa pagpakig-upod sa Cristianong kongregasyon, marealisar naton nga ang “kaluwasan sang matarong nagagikan kay Jehova; sia pamakod nila sa tion sang kalisdanan.” (Salmo 37:​5, 25, 39) Sundon naton pirme ang laygay ni Pablo: “Busa wala kita nagadulog, . . . samtang padayon kita nga nagatulok, indi sa mga butang nga makita, kundi sa mga butang nga dimakita. Kay ang mga butang nga makita umalagi, apang ang mga butang nga dimakita nagapadayon.”​—⁠2 Corinto 4:​16-18.

20. Ano ang makita naton paagi sa aton mata sang pagtuo, kag paano ini nagapahulag sa aton?

²⁰ Paagi sa aton mga mata sang pagtuo, makita naton ang bag-ong sistema ni Jehova sa unhan lamang. Daw ano ka indi mapaanggid nga kalipay kag mga pagpakamaayo ang nagahulat didto! (Salmo 37:​34; 72:​1, 7; 145:16) Bilang paghanda para sa sinang mahimayaon nga tion, pamatian naton ang mga pulong sang Salmo 100:​2: “Alagda si Jehova nga may kasadya. Magkara sa iya atubangan nga may malipayon nga pag-amba.”

[Footnote]

Bilang Repaso:

◻ Anong makalilipay nga paglandas sa rasismo ang makita karon?

◻ Ano ang nagpahulag sa katawhan sang Dios sa pag-amba kag sa pagsinggit sa kalipay?

◻ Paano nagdugang ang matuod nga kalipay karon?

◻ Paano nagabuligay ang pagbatas kag kalipay?

◻ Sa anong paagi mapabaskog naton ang aton kalipay?