Ngaa Dapat Mangin Serioso sa Relihion?

“ANG tawo indi mabuhi sa tinapay lamang.” (Mateo 4:​4, The New English Bible) Ining ginabalikwat pirme nga mga pulong nagapatuhoy sa isa ka tawhanon nga kinahanglanon nga nalipatan sang madamo karon. Ginapakita sini nga may yara kita espirituwal nga bahin sang aton pagkatawo nga dapat busgon. Amo kon ngaa ang naghambal sadtong mga pulong, si Jesucristo, nagsiling man: “Daw ano ka ginpakamaayo ang mga nakahibalo sang ila pagkinahanglan sa Dios.”​—⁠Mateo 5:​3, NEB.

Ang relihion lamang ang makabusog sang aton “pagkinahanglan sa Dios.” Ang relihion lamang ang makasabat sang aton sadsaran nga mga pamangkot tuhoy sa ginhalinan, katuyuan, kag kahulugan sang kabuhi. Kag ang relihion lamang ang makahatag sing matuod nga kahulugan kag importansia sa aton kabuhi. Apang indi ini mahimo tanan sang bisan ano lang nga relihion. Ginsilingan ni Jesus ang isa ka Samariahanon nga babayi: “Ang matuod nga mga sumilimba magasimba sa Amay sa espiritu kag kamatuoran.” (Juan 4:23) Ang pagsimba ‘sa kamatuoran’ nagakahulugan sing kapin pa sa pagsunod sa madugay na ginpadunggan nga mga tradisyon kag mga rito. Masami ini nga nagahatag sa mga sumalakdag sini sing temporaryo lamang nga kalipay, samtang nagabilin sa ila nga gutom sa espirituwal.

Halimbawa, si Edwin O. ­Reischauer, embahador anay sang E.U. sa Hapon, nagsiling: “Para sa kalabanan nga tawo ang Shinto kag Budhismo isa lamang ka kinabatasan kag naandan nga buhat sa baylo sang makahulugan nga mga pagtuluuhan.” Matuod, madamo nga Hapones ang kontento na sa sini nga pagtamod. Apang ang “bag-o nga mga relihion” sa Hapon nagapakita sing nagabaskog nga pagkadikontento sa namat-an nga relihion.

Ang “bag-o nga mga relihion” may huyog sa pagpatuhoy sang igtalupangod sa charis­matic nga mga lider​—⁠indi sa Dios. Madamo sining relihioso nga mga lider ang nagapangangkon nga sila gin-inspirar sang Dios. Apang ang ila mga doktrina sa kabilugan isa lamang ka pagsamo sang Budhismo, Shintoismo, kag sang iban pa nga pagtuluuhan​—⁠upod ang daku nga bahin sang pilosopiya sang tagtukod. Ang ila pangganyat masami nga amo ang panaad nga mas maayo nga kabuhi kag ang ginapangangkon nga mistiko ukon gahom sa pagpaayo. Apang nagahatag bala ina nga mga relihion sing pamatuod nga ginatudluan nila ang ila mga sakop sa pagsimba “sa espiritu kag kamatuoran”? Wala. Sa isa ka butang, daw subong bala nga ang relihioso nga mga kulto yari karon kag buwas wala na. Ang ila daw uso nga kinaugali wala nagahatag sing rason nga tamdon sila sing serioso.

Ang Relihion nga Dapat Tamdon sing Serioso

Apang, may isa ka relihion nga madugaydugay na sang sa bisan ano nga porma sang pagsimba. Amo ini ang relihion nga gintudlo sa Balaan nga Biblia. Ang Biblia ginsugdan nga sulaton sang mga 35 ka siglo nga nagligad, kag ang pila sang ‘mga maragtas’ nga natipigan sa una nga mga kapitulo sini may petsa nga kapin sa isa ka libo ka tuig antes sini.⁠a Ina lamang isa na ka rason nga binagbinagon sing serioso ang relihion sang Biblia.

Ang The Encyclopedia Americana nagasiling tuhoy sa Biblia: “Ang kapawa sini ‘nagsilak sa bug-os nga kalibutan.’ Ginatamod ini karon subong isa ka moral kag relihioso nga bahandi nga sa diin ang wala sing katapusan nga panudlo sini nagapanaad nga kapin ka mapuslanon samtang ang paglaum tuhoy sa isa ka bug-os kalibutan nga sibilisasyon nagauswag.” Apang kon ang isa ka libro matuod gid nga isa ka mapatihan nga tuytoy sa matuod nga relihion, indi mo bala paabuton nga ini may pinakalapnag nga sirkulasyon, agod mabasa sang tanan nga nagapangita sing kamatuoran?

Amo sina ang natabo sa Biblia. Ginbadbad ini sa 1,928 ka hambal, sa bug-os ukon sa bahin, kag amo ang libro nga may labing lapnag nga sirkulasyon sa maragtas. Dugang pa, napamatud-an ini nga maragtason kag sientipiko nga matuod. Ang arkeolohiya kag ang maragtas nagapamatuod sa sibu nga katumanan sang mga tagna sang Biblia. Hilway ini sa tanan nga porma sang espiritismo kag mistisismo kag okulto. Ini tanan nagahisanto sa pangangkon sang Biblia nga ini ginbugna sang Dios.⁠b​—⁠2 Timoteo 3:⁠16.

Ang “mga Bunga” sang Matuod nga Relihion

Apang indi bala matuod nga madamo nga relihion ang nagapangangkon nga nagasunod sa Biblia? Kag indi bala ang pinuyas, kaawayon, kag pagkasalimpapaw kitaon sa tunga sang madamo nga nagapangangkon nga mga Cristiano? Huo, apang indi ini rason nga sikwayon ang Biblia. Ginpakita mismo ni Jesucristo nga ang kalabanan sang mga nagapangangkon nga Cristiano indi pagkahamut-an sang Dios. (Tan-awa ang Mateo 7:​13, 14, 21-23.) Paano, nian, makilala sang isa ang mga nagabuhat sang matuod nga relihion nga gintudlo sa Biblia? Si Jesus nagsabat: “Sa ila mga bunga makilala ninyo sila. Ginatipon bala ang mga ubas gikan sa mga talungon, ukon ang mga higos sa mga ragiwriw? Subong man, ang tagsa ka kahoy nga maayo nagapamunga sing maayo nga bunga, apang ang malain nga kahoy nagapamunga sing malain nga bunga. Sa pagkamatuod, sa ila mga bunga makilala ninyo sila.”​—⁠Mateo 7:16, 17, 20.

Huo, ang matuod nga relihion dapat mangin isa ka gamhanan nga puwersa para sa kaayuhan, nagapatubas sing mapuslanon nga mga epekto sa tunga sang mga sumilimba. Binagbinaga, halimbawa, si Aki­nori, isa ka Hapones, nga sa iya kaugalingon nga mga pulong, “nangin personipikasyon sang isa ka mapaindis-indison nga espiritu.” Natuman niya sing madinalag-on ang iya mga tulumuron nga makagradwar gikan sa isa ka nagapanguna nga unibersidad kag makatigayon sing obra sa isa ka kilala nga kompanya. Wala sia sing nakita nga rason nga ilakip ang relihion sa iya kabuhi. ‘Ang relihion para sa mga maluya nga nagakinahanglan sing saklay sa kabuhi,’ hunahuna niya.

Ang tanan maayo tubtob, subong resulta sang kahuol kag pagkalapyo, gintapikan sia sing grabe nga balatian. Nagtingig sia, kag ang iya sag-ang naunay sa iya nawala nga abaga. Madamo sang “mga abyan” sa kompanya ni Akinori ang wala makalipay sa iya sa tion sang iya kasisit-an. (Ipaanggid ang Hulubaton 17:⁠17.) Gani nagpahubog sia kag nagplano pa gani sa paghikog.

Apang, sang ulihi, ang asawa ni Akinori nagsugod sa pagtuon sang Biblia upod sa mga Saksi ni Jehova. Isa ka adlaw sa ila paghambalanay, ginsugiran niya si Akinori sing kasulatan sa Galacia 6:​7, nga nagasiling: “Kon ano ang ginasab-ug sang isa ka tawo, ini man ang iya anihon.” Natandog sining mga pulong, nagbuylog si Akinori sa pagtuon upod sa iya, kag ang iya natun-an nagbag-o sang iya pagtamod sa kahulugan sang kabuhi. Samtang nagasanag ang pagtamod ni Akinori, ang iya pag-antos bangod sang kahuol nadula! Subong ginasiling sang isa ka hulubaton sa Biblia: “Ang kalma nga tagipusuon amo ang kabuhi sang unod.” (Hulubaton 14:30) Huo, ang matuod nga relihion nagapatubas sing maayong bunga!

Si Toshiro isa pa ka Hapones nga nakapamatuod kon paano ang matuod nga relihion isa ka puwersa para sa kaayuhan. Bisan pa nagpati sia nga may kaayuhan sa pagkarelihioso, wala sia sing ginhimo nahanungod sini. Ginhugod niya ang iya interes sa pagtigayon sang iya kaugalingon nga balay. Apang, ang paglab-ot sini nga tulumuron wala makahatag sa iya sing kaayawan nga iya ginpaabot. Dugang pa, samtang nagapulupanilag sia sa iya ginaobrahan, naobserbahan niya nga kinaandan ang dibunayag nga mga buhat kag nagresulta ini sa malain nga mga relasyon. Ginlas-ayan si Toshiro sa iya nakita.

Isa ka adlaw gin-agda sang iya asawa ang isa ka gulang gikan sa lokal nga kongregasyon sang mga Saksi ni Jehova nga duawon sia. Namutikan sa gilayon ni Toshiro nga ang gulang tuhay sa iya mga kaupod. Ang rason? Sinsero nga ginaaplikar sang gulang ang mga prinsipio sang Biblia sa iya kabuhi. Nahamuot sa sini, ginbaton ni Toshiro ang imbitasyon nga magtuon sa Biblia kag ginsugdan niya nga himuon ang relihion sang Biblia nga iya dalanon sang pagkabuhi.

Ginaagda man namon kamo nga pangilalahon ang mga Saksi ni Jehova. Ang ila “mga bunga” nagahatag sing ebidensya nga nagasimba sila “sa espiritu kag kamatuoran.” Nagapakabudlay gid sila nga iaplikar ang mga panudlo sang Biblia sa ila kabuhi. Kag samtang subong mga indibiduwal indi sila himpit, subong isa ka grupo ginapasundayag nila kon daw ano ka gamhanan nga espirituwal nga puwersa para sa kaayuhan ang matuod nga relihion.

Linibo sa tunga sang mga Saksi ang sang una indi malipayon sa ila kabuhi. Apang paagi sa pag-aplikar sang mga prinsipio sang Biblia, madamo sa ila ang nakahimo sing makapahamuot nga mga pagbag-o. Paagi sa pagpalambo sang ginatawag sang Biblia nga “mga bunga sang espiritu,” nga amo, ang mga kinaiya sang gugma, kalipay, paghidait, pagkamainantuson, pagkalulo, pagkaayo, pagtuo, pagkalum-ok, kag pagpugong sang kaugalingon, nasapwan nila ang sekreto sang personal nga kalipay.​—⁠Galacia 5:​22, 23.

Dayon nga mga Kaayuhan Gikan sa Pag-aplikar sang Matuod nga Relihion

Apang, kapin pa sa pagbag-o sang mga personalidad ukon pagpakanay sang personal nga mga problema ang matuod nga relihion. Ang bug-os globo nga mga problema subong sang polusyon, peligro sang inaway nuklear, kag ang paghingalit sa palibot nagapamahog sa paglaglag sang aton matahom nga planeta. Ginapunggan sang mga problema sa ekonomiya ang kalipay kag ang kaayuhan sang minilyon. Wala sing relihion nga matamod sing serioso luwas kon nagatanyag ini sing paglaum sa paglubad sining bug-os globo nga mga problema.

Ginatanyag sang relihion sang Biblia ina nga paglaum. Nagapanaad ang Dios nga tukuron niya ang isa ka matarong nga bag-ong kalibutan sa idalom sang langitnon nga pangulohan, ukon “ginharian.” (Mateo 6:​9, 10; 2 Pedro 3:​13; Bugna 21:​3, 4) Ining Ginharian amo ang bulong sa tanan nga balatian sang katawhan. Kag tuhoy sa pagkapermanente sinang bug-os duta nga mga kaayuhan, ang Biblia nagapasalig sa aton: “Ang kalibutan nagataliwan kag ang kailigbon sini, apang ang nagahimo sang kabubut-on sang Dios nagapabilin sing dayon.” Huo, ang kabuhi nga wala sing katapusan nga may kalipay amo ang paglaum sang tagsa ka matuod nga Cristiano! (1 Juan 2:​17) Apang ang magabenepisyo gikan sa sining nagapakari nga Ginharian amo lamang sila nga serioso sa pag-aplikar sang matuod nga relihion. Busa ginapalig-on namon kamo nga sugdan ang serioso nga pagtuon sang Biblia.⁠c (Juan 17:3) Samtang ginapasilak ninyo ang Pulong sang Dios sa inyo kabuhi, makaeksperiensia kamo sing daku nga kalipay samtang ang inyo ‘pagkinahanglan sa Dios’ ginabusog sing amat-amat. Sa pagkamatuod, mangin inyo ang dayon nga mga pagpakamaayo bangod serioso kamo sa relihion​—⁠ang matuod nga relihion.

[Mga footnote]

[Laragway sa pahina 5]

Ang pagkamatigayon sang Biblia sa kapin sa 1,900 ka hambal nagahisanto sa pangangkon sini nga ini gin-inspirar sang Dios

[Laragway sa pahina 7]

Ang relihion sang Biblia nagatanyag sing paglaum sa mahidaiton nga mga kahimtangan sa bug-os nga kalibutan sa idalom sang langitnon nga pangulohan