Mga Pamangkot Gikan sa mga Bumalasa

◼ Ang Job 33:24 nagasiling tuhoy sa “gawad” nga nakita para kay Job, nga sa sini wala sia mapatay. Sin-o ina nga gawad para kay Job?

Wala sing ginhalad nga tawhanon nga gawad para kay Job sadto anay, kundi ang Dios nagtabon, ukon nagpatawad, sang sala ni Job.

Daku nga kabudlayan ang ginhimo ni Satanas kay Job, lakip ang “hubag kutob sa dapadapa sang iya tiil tubtob sa iya alimpudwan.” Tuman gid kalain ang hitsura ni Job sa bagay nga ang iya asawa naglaygay sa iya nga ‘sikwayon ang Dios kag mapatay.’ Bisan si Job naghunahuna nga ang kamatayon maayo pa sa pag-antos.​—⁠Job 2:​7-9; 3:⁠11.

Sang daw mapatay na si Job, ginbanta ni Elihu ang wala sing kapat-oran nga kahimtangan ni Job kag nagpasad sing sadsaran para sa paglaum, sa pagsiling: “Ang iya unod nagahagas nga indi makita . . . Kag ang iya kalag nagapalapit sa buho, kag ang iya kabuhi sa mga manuglaglag. Kon may mensahero upod sa iya, isa ka manugpatpat, isa sa isa ka libo, sa pagpakita sa tawo sang matarong sa iya, nian sia maluluy-on sa iya kag nagasiling, ‘Luwasa sia gikan sa buho! Nakakita ako sing gawad! Ang iya unod mangin linghud pa sang sa bata.’ ”​—⁠Job 33:21-25.

Nahibaluan naton nga ginhatag ni Jesucristo ang iya himpit tawhanon nga kabuhi subong katumbas nga gawad para sa mga dihimpit. Ang iya halad nagtimbang sa nawasi ni Adan, nagbayad sa kinahanglanon nga bili agod mahilway sa sala. (Roma 5:​12-19; 1 Timoteo 2:​5, 6) Apang, indi lamang ini ang paggamit sang “gawad” sa Biblia. Ang Hebreo nga tinaga nga makita sa Job 33:​24 nagakahulugan sa “pagtabon.” (Exodo 25:17) Sang ang Dios nagapakig-angot sa dumaan nga Israel, may kahimusan sia sa pagtabon, ukon sa pagtumbas, sa mga sala​—⁠mga halad nga nagtabon sang sala, nagatadlong sang mga bagay sa ulot sang tawo kag sang Dios.​—⁠Exodo 29:​36; Levitico 16:​11, 15, 16; 17:⁠11.

Apang, sang una pa, ang Dios handa sa pagbaton sing mga halad subong ekspresyon sang pasalamat ukon pangabay para sa kapatawaran kag kahamuot. (Genesis 4:​3, 4; 8:​20, 21; 12:​7; 31:54) Nahangpan ni Job ang kabilihanan sang mga halad. Aton mabasa: “Nagbangon sia sing aga pa kag nagdulot sing mga halad-nga-sinunog suno sa kadamuon [sang tanan niya nga mga anak]; kay si Job nagsiling, ‘ayhan nakasala ang akon mga anak kag nagpasipala sang Dios sa ila mga tagipusuon.’ Amo ini ang ginhimo ni Job sing dalayon.” (Job 1:5) Bangod gintinguhaan niya nga pahamut-an ang Dios kag maathag nga may mahinulsulon nga espiritu, ang iya mga dulot may kabilihanan sa itololok sang Dios.​—⁠Salmo 32:​1, 2; 51:⁠17.

Apang nagbalatian sang ulihi si Job nga nagbutang sa katalagman sang iya kabuhi. Indi husto ang pagtamod niya sa iya pagkamatarong, gani ginkinahanglan nga sia tadlungon, paagi kay Elihu. (Job 32:​6; 33:​8-12; 35:​2-4) Si Elihu nagsiling nga si Job indi kinahanglan nga magpadayon sa iya masubo nga kahimtangan tubtob sa kamatayon kag buho (Sheol, ukon kinaandan nga lulubngan). Kon si Job magahinulsol, ang “gawad” mahimo nga makita.​—⁠Job 33:​24-28.

Indi naton kinahanglan hunahunaon nga paagi sa “gawad” ang buot silingon ni Elihu amo nga may isa ka tawo sadto anay ang mapatay tungod kay Job. Bangod sang halad nga batasan nga ginadulot sang matuod nga mga sumilimba, ang gawad nga ginpangabay ni Elihu kay Job mahimo nga isa ka halad nga sapat. Sing makawiwili, ginsilingan sang Dios sang ulihi ang tatlo ka mamulayon nga mga abyan ni Job: “Magdulot nga sa inyo sing halad-nga-sinunog; kag ang akon alagad nga si Job magapangamuyo tungod sa inyo.” (Job 42:8) Bisan ano man nga dagway ang gawad, ang punto ni Elihu amo nga mahimo matabunan ni Job ang iya sala kag makaagom sing resulta nga mga benepis⁠yo.

Amo sina ang natabo. Si Job ‘naghinulsol sa yab-ok kag abo.’ Nian ano? “Ginbaylohan ni Jehova ang kabihagan ni Job . . . Si Jehova naghatag sing pilo sang kadamuon sang iya sang una . . . Kag sa tapos sini nagkabuhi si Job sing isa ka gatos kag kap-atan ka tuig kag nakakita sang iya mga lalaking anak kag sang iya mga lalaking apo​—⁠apat ka kaliwatan.” Isiling naton nga ang gawad wala maghilway kay Job sa sala, gani napatay sia sang ulihi. Apang, ang pagpalawig sang iya kabuhi nagapamatuod nga, sa katunayan, ‘ang iya unod nangin linghud pa sang sa bata, kag nagbalik sia sa mga adlaw sang iya pagkapamatan-on.’​—⁠Job

33:25; 42:​6, 10-17.

Ang mga pagpakamaayo nga natigayon bangod sang pagpadapat sa limitado nga gawad kay Job isa ka pagtan-aw sing una sa bugana nga mga pagpakamayo nga matigayon sang nagatuo nga katawhan sa bag-ong kalibutan. Nian, ang bug-os nga benepisyo sang halad gawad ni Jesus matigayon, nagadula sing dayon sang makahalalit nga epekto sang sala kag pagkadihimpit. Daku gid ang aton rason para sa “makalilipay nga pagsinggit,” subong sang ginsambit ni Elihu.​—⁠Job 33:⁠26.