Ang Langitnon nga Kangga ni Jehova Nagadalagan

“Nahanungod sang mga aliling, gintawag sila sa akon palamatin-an, ‘O nagatiyog nga mga aliling!’”—EZEQUIEL 10:13.

1. May anong sahi sang transportasyon si Jehova?

SA SINING panahon sang madasig nga jet nga mga eroplano, ang mga lider sang kalibutan nagabatyag nga ginaagom nila ang pinakamaayo nga paagi sa paglakbay. Apang, sang nagligad nga 2,600 ka tuig, ginpahayag ni Jehova nga Dios nga may yara sia superlatibo nga paagi sang paglakbay, kag wala pa sing enhinyero ang nakakita sing kaangay sini. Isa ini ka daku kag halangdon nga kangga! Makatilingala bala nga ang Manunuga sang uniberso nagasakay sa kaangay sang kangga nga behikulo? Indi, kay ang langitnon nga behikulo ni Jehova tuhay katama sa bisan anong mahunahuna sang tawo.

2. Paano ginalaragway sang Ezequiel kapitulo 1 ang langitnon nga kangga, kag kay sin-o una gintawag sang manalagna ang aton igtalupangod?

² Sa kapitulo 1 sang tagna ni Ezequiel, ginalaragway si Jehova subong nagasakay sa daku katama nga langitnon nga kangga. Ining makahayanghag nga apat sing aliling nga behikulo nagatiyog sing kinaugalingon kag sarang makahimo sing makatilingala nga mga butang. Nakita ni Ezequiel ining langitnon nga kangga sa palanan-awon sadtong 613 B.⁠C.⁠E., sang didto sia sa isa sang mga suba sang dumaan nga Babilonia. Ginpatalupangod sa aton sing una sang manalagna ang mga nagatatap sa langitnon nga kangga ni Jehova. Samtang nagabasa, tinguhaan naton nga handurawon ang nakita ni Ezequiel.

Apat ka Sapat nga Buhi

3. Ano ang kahulugan sang apat ka mga nawong sang tagsa sa apat ka mga kerubin?

³ Si Ezequiel nagareport: “Sang nagtulok ako, yari karon! ang hangin nga mamadlus nag-abot gikan sa aminhan, ang daku nga gal-um, nga may kalayo nga nagaibwal sing dalayon, kag may kasiga sa palibot sini . . . Kag gikan sa tunga sini nagguwa ang kaangay sang apat ka sapat nga buhi.” (Ezequiel 1:​4, 5) Ang kada isa sining apat ka sapat nga buhi, ukon mga kerubin, may apat ka pakpak kag apat ka nawong. May nawong sila sang leon, nagapakita sang katarungan ni Jehova; nawong sang baka, nagarepresentar sang gahom sang Dios; kag nawong sang agila, nagakahulugan sang Iya kaalam. May nawong man sila sang tawo, nagapakita sang gugma ni Jehova.​—⁠Deuteronomio 32:​4; Job 12:​13; Isaias 40:​26; Ezequiel 1:​10; 1 Juan 4:⁠8.

4. Ngaa ang mga kerubin may apat ka mga nawong, kag kaangay sang ano ang kadasig sang mga kerubin?

⁴ Ang tagsa ka kerubin may nawong nga nagatulok sa isa sang apat ka direksion. Gani, ang mga kerubin gilayon nga makaliso kag makasunod sa nawong nga nagatulok sa luyag nga direksion. Apang kamusta ang kadasig sadtong mga kerubin? Ti, nagadalagan sila sa kadasigon sang kilat! (Ezequiel 1:14) Wala pa sing behikulo nga ginhimo sang tawo ang makadalagan sing subong sina kadasig.

5. Paano ginalaragway ni Ezequiel ang mga aliling kag mga yanta sang kangga?

⁵ Sa hinali, nakita ang mga aliling sang kangga. Dikinaandan gid ini! Ang bersikulo 16 kag 18 nagasiling: “Ang dagway kag ang pagbuhat sa ila daw subong sa aliling sa sulod sang aliling. Ang ila mga yanta mataas kag makahalanguyos; kag sila nga apat ang ila mga yanta hil-ob sang mga mata palibot.” Ang isa ka aliling sa tupad sang kada kerubin nagaresulta sa apat ka mga aliling sa apat ka konektado nga mga lugar. Ang mga aliling nagabaga kaangay sang berilo, isa ka sihagon nga dalag ukon berde nga bato. Nagadugang ini sa kasanag kag katahom sining mahimayaon nga palanan-awon. Sanglit ang mga yanta sang mga aliling “hil-ob sang mga mata palibot,” wala sila nagalakat sing pataka sa bisan diin nga direksion. Kag ang mga aliling mataas katama, sa bagay nga malayo ang lakat sini sa isa lamang ka pagtiyog sa ila mga ehe. Sila, kaangay sang apat ka mga kerubin, nagalakat sing subong kadasig sa kilat.

Mga Aliling sa Sulod sang mga Aliling

6. (a) Paano nga ang kangga may mga aliling sa sulod sang mga aliling? (b) Sa ano ginapahisanto sang mga aliling ang direksion sang lakat nila?

⁶ May isa pa ka butang nga indi kinaandan. Ang tagsa ka aliling may aliling sa sulod​—⁠isa nga palareho sing diametro nga makaigo sing balabag sa sadsaran nga aliling. Sa sini lamang nga paagi nga ang mga aliling masiling nga “nagalakat sila sa ila apat ka kilid.” (Bersikulo 17) Sa hinali, ang mga aliling makaliso bangod may isa ka kilid sang aliling nga nagaatubang sa tagsa ka direksion. Ginahisanto sang mga aliling ang lakat sang ila direksion sa iya sang apat ka mga kerubin. Sa apat ka mga aliling, ang lawas sang kangga sang Dios nagasakay paagi sa dikitaon nga supurta kaanggay sa madasig nga barko nga ginatimbuok sang hangin samtang nagalakat ini sa ibabaw sang tubig.

7. Ano ang ginhalinan sang gahom sang mga aliling?

⁷ Diin ginkuha sang mga aliling ining gahom sa pagpahisanto sa tanan nga mga lakat sang apat ka mga kerubin? Gikan sa balaan nga espiritu sang Dios nga Labing Gamhanan. Ang bersikulo 20 nagasiling: “Sa bisan diin makadto ang espiritu, nagkadto sila . . . Ang espiritu sang mga sapat nga buhi yara sa mga aliling.” Ang dikitaon nga aktibo nga puwersa sang Dios nga yara sa sulod sang mga kerubin yara man sa mga aliling.

8. Anong ngalan ang ginhatag sa mga aliling, kag ngaa?

⁸ Ang mga aliling ginapatuhuyan sa termino nga “nagatiyog nga aliling.” (Ezequiel 10:13) Bangod ini sa kon ano ang ginahimo sang tagsa ka aliling. Ini nagatiyog ukon nagalibot. Ang paglarawan sini nga bahin sang langitnon nga kangga sa sinang paagi nagapatalupangod sa kadasig sang lakat sang langitnon nga kangga. Bisan pa ang mga aliling nagatiyog sing tuman kadasig, pirme nila makita ang ila ginaagihan bangod sang pagkahil-ob sang ila mga mata.

9. Paano ginalaragway ni Ezequiel kon ano ang yara sa ibabaw sang madasig sing dalagan nga apat sing mga aliling nga kangga?

⁹ Apang, tan-awon naton karon kon ano ang yara sa ibabaw sinang mataas kag madasig sing lakat nga apat ka mga aliling. Ang bersikulo 22 sang Ezequiel kapitulo 1 nagasiling: “Sa ibabaw sang mga ulo sang mga sapat nga buhi may kaangay sang kahawaan kaangay sa katya nga makakulugmat tulukon, nga nahumlad sa ibabaw sang ila mga ulo.” Ang kahawaan, bisan pa solido, nagasihag ang kapawa, “kaangay sa katya nga makakulugmat tulukon.” Nagainggat ini kaangay sang linibo ka mga brilyante kon maigo sang adlaw. Makahayanghag gid matuod!

Ang Mahimayaon nga Nagasakay sa Kangga

10. (a) Paano ginalaragway ang trono kag ang Isa sa trono? (b) Ano ang kahulugan sang katunayan nga ang Nagasakay sa kangga ginlibutan sang himaya?

¹⁰ Sing maathag, ang kangga nagdulog agod ang Nagasakay sa sini makasugilanon kay Ezequiel. Sa ibabaw sang kahawaan, may kaangay sa isa ka trono, zafiro, ukon madukot nga asul, ang dagway. Sa trono, may Isa nga kaangay sang dagway sang tawo. Ang tawhanon nga dagway makabulig gid sing daku kay Ezequiel nga maapresyar ining balaan nga pagpadayag. Apang inang tawhanon nga dagway napalibutan sang himaya, amo kon ngaa nagabaga ini kaangay sang electrum, ang nagainggat nga tumbaga (ginsamo nga pilak kag bulawan). Makapatay-ug nga katahom! Kutob sa hawak sining kaangay sang tawo nga dagway, ining elegante nga himaya nagalab-ot paibabaw kag paidalom. Busa ang bug-os nga dagway ginalibutan sing himaya. Nagapakita ini nga si Jehova indi mailaragway nga mahimayaon. Dugang pa, ang Nagasakay sa kangga ginaupdan sang matahom nga balangaw. Daw ano nga kalinong kag katinong ang ginapaalinton sang balangaw pagkatapos sang bagyo! Bangod sinang kalma nga panimuot, ginahuptan ni Jehova ang iya mga kinaiya sang kaalam, katarungan, gahom, kag gugma sing timbang katama.

11. Paano naapektuhan si Ezequiel sang palanan-awon nahanungod sa kangga kag trono ni Jehova?

¹¹ Ang kangga kag trono ni Jehova ginalibutan sang kapawa kag matahom nga mga duag. Kabaliskaran gid kay Satanas, ang prinsipe sang kadadalman kag sang okulto! Kag paano si Ezequiel apektado sini tanan? “Sang nakita ko ini,” siling niya, “naghapa ako, kag nabatian ko ang tingog sang isa nga nagpamulong.”​—⁠Ezequiel 1:28.

Kon ano ang Ginalaragway sang Kangga

12. Ano ang ginalaragway sang langitnon nga kangga ni Jehova?

¹² Ano ang ginalaragway sining makahalawhaw nga kangga? Ang langitnon nga organisasyon ni Jehova nga Dios. Ginahuman ini sang iya tanan balaan nga espiritung mga tinuga sa dikitaon nga duog​—⁠mga serafin, mga kerubin, kag mga anghel. Bangod kay si Jehova amo ang Labing Mataas nga Dios, ang tanan nga espiritung mga tinuga niya napaidalom sa iya, kag nagasakay sia sa ila sa kahulugan nga malulo niya nga ginagahuman kag ginagamit sila suno sa iya katuyuan.​—⁠Salmo 103:20.

13. (a) Ngaa masiling nga si Jehova nagasakay sa iya organisasyon? (b) Paano kamo apektado sang palanan-awon nahanungod sa apat-sing-aliling nga kangga ni Jehova?

¹³ Si Jehova nagasakay sa sining organisasyon nga daw sa kangga, nagapalakat sini kon diin ini ginapahulag sang iya espiritu nga maglakat. Wala ini nagalakat bisan diin lang, nga indi kontrolado ukon ginadumalahan sing intelihente. Wala ginatugutan sang Dios ining organisasyon nga maglakat sa bisan diin nga direksion nga mahimo sini luyag kadtuan. Sa baylo, nagasunod ini sang iya mga panuytoy. Sing tingob, ang tanan nahiusa nga nagalakat paabante sa bug-os nga katumanan sang mga katuyuan sang Dios. Daw ano ka makatilingala nga langitnon nga organisasyon ang ginpahayag sining palanan-awon nahanungod sa apat-sing-aliling nga langitnon nga kangga ni Je­hova nga nagadalagan! Nahisanto sa sini, ang organisasyon ni Jehova ginarepresentar su­bong kuwatro-kuwadrado, nga balanse sing himpit.

Gintangdo Subong Manugbantay

14. Sin-o ang ginalaragway ni manalagna Ezequiel?

¹⁴ Apang sin-o ang ginalaragway ni manalagna Ezequiel? Gikan sa katunayan sang maragtas, maathag nga ang hubon sang ginhaplas sang espiritu nga mga Saksi ni Jehova ginbuylog sa langitnon nga kangga. Gani, si Ezequiel nagalaragway sa hinaplas nga nagkalabilin sang mga Saksi ni Jehova kutob sang 1919. Sa espirituwal, ang langitnon nga organisasyon sang Dios nagpakig-angot sa hinaplas nga nagkalabilin sadto nga tuig, agod buhion sila liwat subong mga Saksi ni Jehova sa bug-os nga kalibutan. (Ipaanggid ang Bugna 11:​1-12.) Nian, ang kaangay sang kangga nga organisasyon nagdalagan sadto anay, subong sa karon. Sa katunayan, ang mga aliling nagadalagan sing labi pa kadasig sang sa nagligad. Si Jehova abante nga nagasakay sing madasig!

15. Ano ang ginasiling sang tingog sang Nagasakay sa langitnon nga kangga, kag ano nga sugo ang nabaton ni Ezequiel?

¹⁵ Luyag mahibal-an ni Ezequiel kon ngaa ang langitnon nga kangga nagpalapit sa iya atubangan kag nagdulog. Nahibal-an niya sang ang tingog nag-abot sa iya halin sa Isa nga nagalingkod sa kangga. Nahalipay sa sining makahalawhaw nga talan-awon, si Ezequiel naghapa. Mamati samtang ang tingog sang Nagasakay sa langitnon nga kangga nagasiling: “Anak sang tawo, tindog ka kag magapamulong ako sa imo.” (Ezequiel 2:1) Nian gintangdo ni Jehova si Ezequiel nga mangin manugbantay kag agod paandaman ang rebelyuso nga panimalay ni Israel. Ginsugo sia sa pagpamulong sa ngalan sang Dios. Ang ngalan ni Ezequiel nagakahulugan sing “Ang Dios Nagapabakud.” Gani ginpabakud sang Dios ang Ezequiel nga klase kag ginpadala sila, gintangdo sila subong manugbantay sa Cristiandad.

16, 17. (a) Paano nakabenepisyo si Ezequiel sa palanan-awon tuhoy sa langitnon nga kangga? (b) Sa aton adlaw, paano naapektuhan ang Ezequiel nga klase kag ang dakung kadam-an sang paghangop sa palanan-awon tuhoy sa langitnon nga kangga?

¹⁶ Ang palanan-awon nahanungod sa langitnon nga kangga makahaladlok kay Ezequiel, apang naghanda man ini sa iya para sa pagkatangdo sa iya subong manugbantay sa pagpaandam nahanungod sa nagapakari nga kalaglagan sang Jerusalem. Amo man sa manugbantay nga klase karon. Ang paghangop nila sa palanan-awon nahanungod sa langitnon nga kangga ni Jehova nga nagadalagan may daku nga epekto sa hinaplas nga nagkalabilin. Sang 1931 natun-an nila ang labi pa nahanungod sa palanan-awon ni Ezequiel, subong sang ginapahayag sang Vindication, Book One. Nian napuno sila sang apresasyon sa bagay nga kutob sa guwa sang Oktubre 15, 1931, tubtob sang Agosto 1, 1950, ang desinyo sang panghapin sang Ang Lalantawan, sa natuo nga naibabaw nga bahin sini, naglakip sang ideya sang dibuhista tuhoy sa palanan-awon ni Ezequiel nahanungod sa langitnon nga kangga. Gani, ang Ezequiel nga klase nagpanghikot sa sugo nga ginhatag sa ila, kag nag-alagad sila subong manugbantay, nagapalanog sang balaan nga paandam. Ang tion para sa kalayuhon nga paglaglag ni Jehova nga nagalingkod sa langitnon nga trono sa Cristiandad malapit na katama!

¹⁷ Karon, ang “dakung kadam-an” sang katulad-karnero nga mga tawo nagapakig-upod sa hinaplas nga nagkalabilin. (Bugna 7:9) Sing tingob, ginapalanog nila ang paandam nahanungod sa nagapakari nga kalaglagan sang Cristiandad kag sining bug-os yawan-on nga sistema sang mga butang. Inang hilikuton sa pagpaandam ginahimo sing madasig, kag subong sang ginapakita sang Bugna 14:​6, 7, supurtado ini sang mga anghel.

Pagdalagan Upod sa Langitnon nga Kangga

18. Ano ang dapat himuon agod matigayon ang padayon nga supurta sang mga anghel, kag sa ano kita dapat mangin sensitibo?

¹⁸ Ang mapasinakupon nga mga anghel nagadalagan sing dungan subong bahin sang langitnon nga organisasyon sang Dios samtang nagabulig sa dutan-on nga mga alagad ni Jehova sa pagtuman sang ila komisyon nga ibantala ang mga paandam sa paghukom sang Dios. Kon luyag naton ang padayon nga pangamlig kag panuytoy sining gamhanan angheliko nga mga alagad sang Dios, dapat man kita magdalagan sing tingob kag makigdungan sa simbuliko nga pagtiyog sang aliling. Dugang pa, samtang ang bahin sang kitaon nga organisasyon ni Jehova nagadalagan kadungan sang iya langitnon nga kangga, dapat kita mangin sensitibo sa pagpanguna sang espiritu sang Dios. (Ipaanggid ang Filipos 2:⁠13.) Kon kita mga Saksi ni Jehova, dapat kita magdalagan sa direksion man sang langitnon nga kangga. Indi gid naton ini pagbungguan. Kon ginahatag ang panuytoy sa kon diin kita dapat magkadto, dapat naton ini sundon. Gani, ang kongregasyon indi mabahinbahin.​—⁠1 Corinto 1:⁠10.

19. (a) Subong nga ang mga aliling sang langitnon nga kangga may mga mata sa palibot, sa ano dapat mangin alisto ang katawhan ni Jehova? (b) Ano dapat ang mangin paggawi naton sa sining magamo nga mga tion?

¹⁹ Ang mga mata sa palibot sang mga aliling sang kangga sang Dios nagapakita sang pagkaalisto. Subong nga ang langitnon nga organisasyon alisto, dapat man kita mangin alisto sa pagsupurta sa dutan-on nga organisasyon ni Jehova. Sa kongregasyon, mapakita naton ina nga pagsupurta paagi sa pagkooperar sa lokal nga mga gulang. (Hebreo 13:17) Kag sa sining magamo nga mga tion, ang mga Cristiano kinahanglan magpabilin sing suod katama sa organisasyon ni Jehova. Indi naton luyag nga ihatag ang aton kaugalingon nga interpretasyon sa mga hitabo, kay sa sina wala kita nagadalagan upod sa langitnon nga kangga ni Jehova. Pamangkuton naton pirme ang aton kaugalingon, ‘Diin nagapakadto ang langitnon nga organisasyon?’ Kon nagadalagan kita upod sa kitaon nga organisasyon, nagadalagan man kita upod sa dikitaon nga organisasyon.

20. Anong maayong laygay ang ginhatag ni apostol Pablo sa Filipos 3:​13-16?

²⁰ Nahanungod sini, si Pablo nagsulat: “Mga kauturan, wala ako nagaisip nga ini akon na; apang isa ka butang ang akon ginahimo: Sa ginakalimtan ko ang tinalikdan kag nagahimulat ayon sa naunhan, nagapadayon ako padulong sa lalambuton tungod sa padya sang mataas nga pagtawag sang Dios nga yara kay Cristo Jesus. Ang mga hamtong sa aton maghunahuna sing subong; kag kon sa bisan anong butang tuhay kamo sing panghunahuna, ina man ipahayag sang Dios sa inyo. Apang, kon tubtob diin kita nag-uswag, padayon kita nga maglakat sing mahim-ong sa sini man nga rutina.”​—⁠Filipos 3:​13-16.

21. Paagi sa pagsunod sa anong rutina posible ang paghimo sing espirituwal nga pag-uswag kaupod sang organisasyon sang Dios?

²¹ Ang tinaga diri nga “rutina” wala nagakahulugan sang malain nga paggawi nga gikan sa sini indi naton mahilway ang aton kaugalingon. Ang mga alagad ni Jehova may maayo nga rutina nga paagi sini makahimo sila sing espirituwal nga pag-uswag. Isa ini ka rutina sang paghimo sing personal nga pagtuon sa Biblia, pagtambong sa mga miting sa kongregasyon, pagbantala sing tayuyon sang maayong balita sang Ginharian, kag pagpabanaag sang mga kinaiya sang langitnon nga organisasyon sang Dios. Ina nga rutina nagapaposible nga masunod nila ang mga pagpanguna sang kaangay sang langitnon nga kangga nga organisasyon ni Jehova. Paagi sa pagpadayon sa sining paagi, matigayon naton ang aton tulumuron, isa man ini ka padya sang dimamalatyon nga kabuhi sa mga langit ukon kabuhi nga walay katapusan sa paraiso nga duta.

22. (a) Agod mangin organisado sing nahiusa ang hinaplas nga nagkalabilin kag ang dakung kadam-an sang iban nga mga karnero, ano ang dapat himuon? (b) Ano ang makita ni Jehova?

²² Subong sang ginapakita sang Juan 10:​16, ang “iban nga mga karnero” kag ang Ezequiel nga klase mahimo mangin organisado sing nahiusa. Gani, kinahanglan nga mahangpan sang tanan sa organisasyon ni Jehova ang bug-os nga kahulugan kag importansia sang palanan-awon nga narekord sa Ezequiel kapitulo 1 agod makadalagan sila sing nahiusa sa langitnon nga organisasyon sang Dios. Ang palanan-awon nahanungod sini nagabulig sa aton nga maapresyar nga dapat kita maghulag nahisuno sa organisasyon sang Dios, kitaon kag dikitaon. Dumduma man nga ang mga mata ni Jehova “nagapanuloktulok sa bug-os nga duta sa pagpakita nga sia mabakud tungod sa ila nga may tagipusuon nga himpit ayon sa iya.” (2 Cronica 16:9) Wala sing isa ka butang nga indi makita ni Jehova, labi na ang may kaangtanan sa iya katuyuan nga ibindikar ang iya kaugalingon subong Soberano sa Bug-os nga Uniberso.

23. Bangod nagadalagan ang langitnon nga kangga ni Jehova, ano ang dapat naton nga himuon?

²³ Sa pagkamatuod, ang langitnon nga kangga ni Jehova nagadalagan sa karon. Sa dili madugay ang tanan nga butang himayaon nahisanto sa Isa nga mahimayaon nga nagasakay sa kangga​—⁠ang tanan sa bindikasyon niya subong Soberanong Ginuo sang uniberso. Ang iya mga serafin, mga kerubin, kag mga anghel nagasakdag sa aton sa aton dakung bug-os kalibutan nga hilikuton sa pagbantala. Nian, magdalagan kita upod sa langitnon nga organisasyon ni Jehova. Apang paano kita makadungan sa nagadalagan sing madasig nga langitnon nga kangga?

Paano Mo Sabton?

◻ Anong mga kinaiya ang ginarepresentar sang apat ka mga sapat nga buhi nga nakita ni Ezequiel?

◻ Ano ang ginalaragway sang langitnon nga kangga ni Jehova?

◻ Sin-o ang ginalaragway ni Ezequiel nga manalagna sang Dios?

◻ Paano naapektuhan ang Ezequiel nga klase kag ang dakung kadam-an sang paghangop sa langitnon nga kangga ni Jehova?