Mga Pamangkot Gikan sa mga Bumalasa
◼ Ang Juan 18:15 nagasambit sing isa ka disipulo nga kilala sang mataas nga saserdote. Amo man bala ini ang disipulo nga nagdalagan anay nga “hublas” nga ginsambit sa Marcos 14:51,52?
Indi, daw mahimo nga ang tawo nga kilala sang mataas nga saserdote amo si apostol Juan, samtang si disipulo Marcos ang nagdalagan nga “hublas.”
Sa pagbinagbinag sining mga rekord suno sa paagisod sang tion, masugod kita sa hardin sang Getsemani. Hinadlukan ang mga apostoles sang gindakop si Jesucristo. “Sila tanan nagbiya sa iya kag nagpalagyo.” Ang masunod gid nga bersikulo sa rekord ni Marcos nagasambit sing lain nga punto: “Apang ang isa ka pamatan-on nga lalaki nga nagakunop sing panapton nga lino sa iya hublas nga lawas nagsunod sa iya; kag nagtinguha sila nga dakpon sia, apang nabilin niya ang iya panapton nga lino kag nagpalagyo nga hublas.”—Marcos 14:50-52.
Sa amo, ang una nga reaksion sang 11 ka apostoles ginpatuhay sa reaksion sining wala ginhingadli nga disipulo, gani makatarunganon ihinakop nga indi sia isa sang mga apostoles. Ini nga hitabo ginrekord lamang sa Ebanghelyo nga ginsulat sang nahauna nga disipulo nga si Juan Marcos, ang pakaisa ni Bernabe. Busa, may rason sa pagpati nga si Marcos amo ang “pamatan-on nga lalaki” nga nagsunod kay Jesus nga gindakop apang nalagyo sia nga wala sing tabon ang iya lawas sang magtinguha ang akig nga guban sa pagdakop man sa iya.—Binuhatan 4:36; 12:12, 25; Colosas 4:10.
Sa isa ka tion sadto nga gab-i, ginsundan man ni apostol Pedro si Jesus, sa malayo. Sa sini nga kahulugan may yara pagkaanggid; ang pamatan-on nga disipulo (Marcos) nagsunod kay Jesus apang nagdulog, samtang sang ulihi ang duha sang mga apostoles nga nalagyo nagsunod sa ila gindakop nga Agalon. Sa Ebanghelyo ni apostol Juan, aton mabasa: “Karon si Simon Pedro kag ang isa pa ka disipulo nagsunod kay Jesus. Yadto nga disipulo kilala sang mataas nga saserdote, kag nagsulod sia upod kay Jesus sa luwang sang mataas nga saserdote.”—Juan 18:15.
Ginagamit ni apostol Juan ang ngalan nga “Juan” sa pagpatuhoy kay Juan Bautista apang wala gid niya ginapatuhuyan ang iya kaugalingon sa ngalan. Halimbawa, nagsulat sia tuhoy sa “disipulo nga nakasaksi sining mga butang kag nagsulat sining mga butang.” Sing kaanggid man: “Sia nga nakakita sini nakapanaksi, kag ang iya pagpanaksi matuod, kag ina nga tawo nakahibalo nga nagasugid sia sing matuod nga mga butang.” (Juan 19:35; 21:24) Talupangda man ang Juan 13:23: “May isa sang iya mga disipulo nga nagaidag sa dughan ni Jesus, kag ginhigugma sia ni Jesus.” Natabo ini wala lamang madugay antes gindakop si Jesus. Sang ulihi sadto nga adlaw sang si Jesus nalansang, ginpili niya ang isa ka disipulo, nga ginsambit ni Juan sa kaanggid man nga mga pulong: “Sang nakita niya ang iya iloy kag ang disipulo nga iya ginhigugma nga nagatindog, [si Jesus] nagsiling sa iya iloy: ‘Babayi, yari karon! Ang imo anak!’ ”—Juan 19:26, 27; ipaanggid ang Juan 21:7, 20.
Ining kinaiya nga indi pagsambit sang ngalan makita man sa Juan 18:15. Dugang pa, si Juan kag si Pedro ginsambit man sa isa ka hitabo sa tapos sang pagkabanhaw sa Juan 20:2-8. Ining mga rekord nagapahangop nga si apostol Juan amo “yadtong disipulo nga kilala sang mataas nga saserdote.” Wala nagahatag ang Biblia sing impormasyon sa kon paano nakilala sang Galileanhon nga apostol (Juan) ang mataas nga saserdote kag kon paano man sia nakilala sini. Apang bangod kilala sia sang panimalay sang mataas nga saserdote, nakaagi si Juan sa manugbantay sang ganhaan sa luwang kag napasulod man niya si Pedro.