Padayon sa Paglakat sa Kapawa kag Gugma
Mga Pangunang Punto Gikan sa Nahaunang Juan
SI Jehova amo ang Tuburan sang kapawa kag gugma. Dapat kita magpangayo sa Dios sing espirituwal nga kapawa. (Salmo 43:3) Kag ang gugma amo ang isa sang mga bunga sang iya balaan nga espiritu.—Galacia 5:22, 23.
Ang kapawa, gugma, kag iban pa nga mga butang ginhambalan sa nahaunang ginbugna nga sulat ni apostol Juan, ayhan ginsulat sa ukon malapit sa Efeso sang mga 98 C.E. Ang pangunang rason nga ginsulat ini amo agod amligan ang mga Cristiano gikan sa apostasya kag buligan sila nga magpadayon sa paglakat sa kapawa. Bangod nagaatubang kita sing mga hangkat sa aton gugma, pagtuo, kag integridad sa kamatuoran, ang pagbinagbinag sa sining sulat magabenepisyo gid sa aton.
‘Maglakat sa Kapawa’
Gin-athag ni Juan nga ang matutom nga mga Cristiano dapat maglakat sa espirituwal nga kapawa. (1:1–2:29) Sia nagsiling: “Ang Dios kapawa kag sa iya wala gid sing kadudulman [wala gid sing kalautan, imoral, dimatuod, ukon dibalaan].” Bangod kay ang ginhaplas sang espiritu nga mga Cristiano ‘nagalakat sa kapawa,’ may “paghiambitay” sila sa Dios, kay Cristo, kag sa isa kag isa. Gintinluan man sila sa sala bangod sang dugo ni Jesus.
Hinaplas man kita nga mga Cristiano nga may langitnon nga paglaum ukon nagahulat kita sang kabuhi nga dayon sa duta, padayon kita nga makabenepisyo gikan sa halad ni Jesus lamang kon ginahigugma naton ang aton mga kauturan apang indi ang kalibutan. Dapat man naton likawan ang maimpluensiahan sang mga apostata, subong sang “anticristo,” nga nagapanghiwala sa Amay kag sa Anak. Kag indi gid naton pagkalimtan nga ang kabuhi nga walay katapusan maagom lamang sadtong nagapanguyapot sa kamatuoran kag nagabuhat sang pagkamatarong.
Ang mga Anak sang Dios Nagapasundayag sang Gugma
Masunod nga ginpakilala ni Juan ang mga anak sang Dios. (3:1–4:21) Una, ginahimo nila ang matarong. Ginatuman man nila ang sugo ni Jehova nga Dios nga ‘magtuo sila sa ngalan sang iya Anak, si Jesucristo, kag mahigugmaanay sa isa kag isa.’
Ang isa nga may “ihibalo sang Dios” nakahibalo nahanungod sa mga katuyuan ni Jehova kag kon paano ginapabutyag ang Iya gugma. Magabulig ini sa isa nga ipasundayag ang gugma. Sa pagkamatuod, “ang wala nagahigugma wala nakakilala sa Dios, kay ang Dios gugma.” Ang balaan nga gugma ginpakita sang “ginpadala sang Dios sa kalibutan ang iya bugtong nga Anak subong katumbas nga halad para sa aton mga sala.” Kon si Jehova naghigugma sa aton sing subong sina, obligado kita nga maghigugmaanay sa isa kag isa. Huo, ang bisan sin-o nga nagaangkon nga nagahigugma sa Dios dapat man maghigugma sang iya espirituwal nga utod.
Ang Gugma ‘Nagadaug sang Kalibutan’
Ang gugma nagapahulag sa mga anak sang Dios nga tumanon ang iya mga sugo, apang paagi sa pagtuo nga ‘ginadaug [nila] ang kalibutan.’ (5:1-21) Ang aton pagtuo sa Dios, sa iya Pulong, kag sa iya Anak nagapaposible sa aton nga ‘madaug ang kalibutan’ paagi sa pagsikway sa iya sayop nga panghunahuna kag mga paagi kag paagi sa pagtuman sa mga sugo ni Jehova. Ang Dios naghatag sa ‘mga nagadaug sang kalibutan’ sing paglaum nga kabuhi nga dayon kag nagapamati sang ila mga pangamuyo nga nahisanto sa iya kabubut-on. Bangod kay ang bisan sin-o nga “natawo sa Dios” wala nagabuhat sang sala, si Satanas wala nagapanguyapot sa iya. Apang dapat dumdumon sang mga hinaplas kag sang mga alagad ni Jehova nga may dutan-on nga mga paglaum nga “ang bug-os nga kalibutan yara sa gahom sang malauton.”
[Kahon/Laragway sa pahina 29]
Katumbas nga Halad: Si Jesus amo ang “katumbas nga halad tungod sa aton mga sala [sang iya hinaplas nga mga sumulunod], kag indi lamang tungod sa aton kundi man tungod sa mga sala sang bug-os nga kalibutan,” sa iban nga katawhan. (1 Juan 2:2) Ang iya kamatayon “nagatumbas” (Griego, hi·la·smosʹ, nagakahulugan sang “paagi sa pagpakanay,” “bayad”) apang indi sa kahulugan nga nagapamag-an sang nasaklaw nga balatyagon sang Dios. Sa baylo, ang halad ni Jesus nagapakanay, ukon nagapaayaw, sa mga kinahanglanon sang himpit nga katarungan sang Dios. Paano? Paagi sa pag-aman sang matarong kag makatarunganon nga sadsaran para sa kapatawaran sang sala, agod ang Dios “mangin matarong bisan nga ginapakamatarong ang [duna nga makasasala] nga tawo nga may pagtuo kay Jesus.” (Roma 3:23-26; 5:12) Paagi sa pag-aman sina nga paagi sa paghimo sing bug-os nga pagpaayaw sa mga sala sang tawo, ang halad ni Jesus naghimo nga nagakaigo, ukon nagakabagay, para sa tawo nga tinguhaan kag batunon ang pagpasag-uli padulong sa matarong nga kaangtanan kay Jehova. (Efeso 1:7; Hebreo 2:17) Kita tanan nagapasalamat gid sa sini!