Mag-andam sa mga Apostata!
Mga Pangunang Punto Gikan sa Sulat ni Judas
ANG mga alagad ni Jehova dapat ‘magkangil-ad sang malaut’ kag ‘magkapyot sing malig-on sa maayo.’ (Roma 12:9) Ginbuligan ni Judas nga manunulat sang Biblia ang iban nga himuon ini sa iya sulat nga ginpadala halin sa Palestina ayhan sang mga 65 C.E.
Gintawag ni Judas ang iya kaugalingon nga “ulipon ni Jesucristo, apang utod ni Santiago.” Si Santiago kilala nga utod sa amay ni Jesucristo. (Marcos 6:3; Binuhatan 15:13-21; Galacia 1:19) Busa si Judas utod ni Jesus sa amay. Apang, ayhan ginhunahuna niya nga indi nagakaigo nga sambiton ining undanon nga labot, kay si Jesus nahimaya na sadto nga espiritu nga persona sa langit. Ang sulat ni Judas tuman ka direkta sa paghatag sing laygay nga makabulig sa aton sa ‘pagkapyot sing malig-on sa maayo’ kag sa pag-andam sa mga apostata.
“Pagpakigsuay Tungod sang Pagtuo”
Bisan pa gintuyo ni Judas ang magsulat nahanungod sa kaluwasan nga ginapatihan sang mga Cristiano, nasapwan niya nga nagakaigo ang paglaygay sa iya mga bumalasa sa “pagpakigsuay tungod sang pagtuo.” (Bersikulo 1-4) Ngaa? Bangod ang didiosnon nga mga tawo nakasulod sa kongregasyon kag “nagabaylo sang dibagay nga kaluoy sang Dios nga balibad sa kaulag.” Naghunahuna sila sing sayop nga malapas nila ang mga kasuguan sang Dios kag makapabilin gihapon sa tunga sang iya katawhan. Kabay nga indi gid kita magpadala sa sinang malaut nga pangatarungan kundi pirme magsunod sang pagkamatarong, nagapasalamat nga paagi sa dugo ni Jesus ang Dios maluluy-on nga naghugas sa aton sang aton mga sala.—1 Corinto 6:9-11; 1 Juan 1:7.
Mga Paandam nga Ginbutang sa Aton Atubangan
Kinahanglan ang magbantay batok sa pila ka panimuot, paggawi, kag katawhan. (Bersikulo 5-16) Bangod kay ang iban nga mga Israelinhon nga ginluwas gikan sa Egipto kulang sing pagtuo, ginlaglag sila. Ang mga anghel nga nagbiya sang ila nagakaigo nga posisyon “gintigana sa mga gapus nga dayon sa mangitongito nga [espirituwal nga] kadudulman tubtob sa paghukom sang daku nga adlaw.” Ang sobra nga imoralidad nagdala sing “silot sang kalayong dayon” sa Sodoma kag Gomora. Busa, pirme naton pahamut-an ang Dios kag indi pagbiyaan ang “banas sang kabuhi.”—Salmo 16:11.
Indi kaangay kay Miguel arkanghel, nga indi gani magpangahas sa paggamit sing mapasipalahon nga paghukom batok sa Yawa, ang didiosnon nga mga tawo nagapasipala sa “mga mahimayaon,” ayhan yadtong ginhatagan sang Dios kag ni Cristo sing himaya subong gintangdo nga mga gulang. Indi gid kita magpakita sing dipagtahod sa hatag-Dios nga awtoridad.
Ang malain nga mga halimbawa nanday Cain, Balaam, kag Core ginsunod sang didiosnon nga mga tawo. Nangin makatalagam sila sa espirituwal kaanggid sa mga bato nga natago sa idalom sang tubig kag kaangay sang mga panganod nga walay tubig kag patay kag gingabot nga mga kahoy nga wala sing ginapatubas nga mapuslanon. Ang mga apostata mga palakumod man, mga palareklamo, kag ‘mga paladayaw sa mga personalidad tungod sa ila kaugalingon nga benepisyo.’
Padayon sa Pagbatu
Si Judas masunod nga naglaygay nahanungod sa pagbatu sa malain nga mga impluensia. (Mga bersikulo 17-25) May mga mayubiton sa “katapusan nga tion,” kag ang matuod nga mga Cristiano dapat magbatas sa ila kag sa ila mayubiton nga mga hambal karon. Agod mabatuan inang malain nga mga impluensia, dapat naton patubuon sa aton kaugalingon ang “labing balaan nga pagtuo,” magpangamuyo sa balaan nga espiritu, kag tipigan ang kaugalingon sa gugma sang Dios, samtang nagahulat sang kaluoy ni Jesus.
Subong dimatuod nga mga manunudlo, ang didiosnon nga mga tawo naghimo sa iban nga magpangduhaduha. (Ipaanggid ang 2 Pedro 2:1-3.) Kag ano ang ginakinahanglan sang mga nagaduhaduha? Ti, ang espirituwal nga bulig agod sagmiton gikan sa “kalayo,” ang walay katapusan nga kalaglagan! (Mateo 18:8, 9) Apang indi dapat ina kahadlukan sang mga diosnon, kay si Jehova magaamlig sa ila gikan sa “pagkapukan” sa sala kag sa kalaglagan nga nagahulat sa mga apostata.
[Kahon sa pahina 31]
Natago nga mga Bato: Si Judas nagpaandam sa mga masigka-Cristiano nahanungod sa ‘mga bato nga natago sa idalom sang tubig sa ila mga sinalusalo sang paghigugma.’ (Judas 12) Bangod sang dimatuod nga gugma para sa mga tumuluo, ang mga apostata kaangay sang matalom nga mga bato sa idalom sang tubig nga sarang makalunod sang mga barko ukon makapilas kag makapatay sa mga nagalangoy. Ang mga sinalusalo sang paghigugma mahimo nga mga bangkete diin ang manggaranon sa materyal nga mga Cristiano nagaagda sa imol nga mga masigkatumuluo. Ang Amay sang Simbahan nga si Chrysostom (347?–407 C.E.) nagsiling: “Nagtipon sila tanan sa sinalusalo: ang manggaranon nagadala sang mga kinahanglanon, kag ang imol kag yadtong wala sing dala nga gin-agda, sila tanan nagsinalusalo sing tingob.” Bisan ano man ang kinaugali sang mga sinalusalo sang paghigugma sadto anay, ang paandam ni Judas nagbulig sa mga matutom nga mag-andam sa apostatang ‘natago nga mga bato’ nga mahimo makadala sing espirituwal nga kamatayon. Bisan ang mga Cristiano wala ginsugo sa paghiwat sing mga sinalusalo sang paghigugma, kag wala ini karon ginahiwat, ang katawhan ni Jehova nagabuligay sa isa kag isa sa materyal sa tion sang pagkinahanglan kag malipayon nga nagaupdanay.